Kin Kehlail ni Soupeikasal, Kehl, oh Doadoahk

Sang Bishop Gary E. Stevenson

Kaunen Pisop


Gary E. Stevenson
Nantihong warohng duwehte sounpei pwulopwul 2,000 me kehlail nan arail soupeikasal ni arail wia priesthood warohng.

Ahi koasoai en pwohng wet pahn doke mehlel mwahnakapw akan, de Aaronic Priesthood kan, me pokonpenehier nan sampah pwehn iang towehda mihting lap wet en priesthood kan. I pahn ehukihong kumwail soai pwoat sang nan Pwuken Mormon me kosoia duwen Helaman oh nah sounpei pwulopwul 2,000. Iren pwuhk sarawi wet pahn kasalehda wiewiahn mwahnakapw en mahs ko—oh kamarainiada kumwail, mwahnakapw en imwi-rahn akan. I kihda ehu iren pwuhk sarawi me I keieu pereniki: “Oh irail koaros wia mwahnakapw kei, oh irail inenen kehlail nan arail soupeikasal, oh arail kehl oh doadoahk; ahpw kilang, kaidehn ihte met—irail wia ohl ekei me mehlel ahnsou koaros.”1 Soupeikasal, kehlail, doadoahk, oh mehlel—mwohmw kei me warohng kaping!

I pahn koasoaia mahs duwen keieun mwohmw me kawehwe duwen irail: “kehlail ni soupeikasal.” Ong ie, met kasalehda duwen mwahnakapw pwukat arail kamehlele wia me pwung ni soupeikasal, de me Alma koasoaia, “en wia … soun kadehde kan en Koht ni ahnsou koaros, oh ni wasa koaros.”2 Sounpei pwulopwul 2,000 tungoaleniki ahnsou tohto pwe ren kasalehda arail soupeikasal. Emenemen kumwail pil pahn lelohng ahnsou kan nan amwail mour me kumwail pahn anahne soupeikasal. Emen kompoakapahi, John, ahpw soaiahiong ie duwen eh lelohngng ehu soangen ahnsou pwuko nan ah mour.

Sounpar kei samwalahro John keradahng nan ehu sukuhl ndand nan wehin Japan. E iang towehda ehu pwurokirahm en tohn sukuhl loalokong me kohsang wasahkei nan sampah. Ekei iangala pwurokirahmo pwe ren kadaiala arail wehwehki tiahk oh lokaiahn Japan, ekei kilang me met arail ahnsou mwahu en kak kahkada oh alehdi doadoahk nan Japan, ahpw irail koaros mweseldahsang imwarail pwe ren iang sukuhl nan ehu wehi tohrohr.

Mwurinte en John ah peidi, pakair wiawihong irail tohn sukuhl kan sang wehin liki kan me mie kamadipw ehu pahn wiawi pohn oas en ihmw. Ni soutiko, John oh kompoakepah kan ahpw mwesellahng wasa me kamadipwo pahn wiawih ie.

Mwurin arail iangadahla eleveider nan ihmw posoke oh lel nan posoke keieu powe, John oh kompoakapah ko ahpw dou pohn kehndake tehtikitik ieu lao re lel pohn oas en ihmwo oh tepida koasoakoasoaiong iengarail ko. Mwurin ahnsou kis, wasao ehusoahngala. Mwoaroang, ngilen keseng oh wedei en sakau laudla, ehu en John eh salohda. Sohte pwand, emen aramas ko tepida kihpene tohn sukuhl kan ren wiahda ehu pwonopwon pwe re pahn simwok maru. John konsopdi oh mwadangete ndahiong iengehkan ren mwesel. Emen iengehkan mwomwen kanameneke oh nda, “John, met mengei—kitail pahn kesihnente nan pwonopwon wet, oh ahnsou me maruo lel rehtail, kitail pahn alehte oh kihla ahpw kitail sohte pahn simwoke. Pwe kitail pahn namenekila mwohn koaros ma kitail pahn mwesel. Met ngilen mengei ong John, ahpw e sohte ngilen pwung. E ese me e konehng pakairki nsene oh mwekidki. Mwurin ahnsou kis e kamwakidada ah soupeikasal oh ndahiong iengehkan me ren doula wia dahme re men wia, ahpw e pahn samwalahr. Emen kompoakapao pilada en mihmi oh pidelongalahng nan pwonopwono; mehteio idawehnla John ni peikasal oh ira doudihla nan eleveidero. Ahnsou me wenihmw en eleveidero ritida, ira pwuriamweiki pwolihs en Japan kei pidohido, daulih ira oh seimek doudahla ni kehndake me kohdahla pohn oasen ihmwo. John oh kompoakapao eri douda nan eleveidero oh kohkohla.

Ahnsou me pwolihs kan leldahla powe, tohn sukuhl kan mwadangete kesehla wini suwed kan sang pohn ihmwo pwe ren dehr kolkoldi. Ahpw mwurin arail silehdi wasao, pwolihs kan uhd kihirailpene nan lain ehu pohn ihmwo oh ndahiong tohn sukuhl kan en kapahla pehrail kan. Pwolihs ko eri aluhdihla ni laino oh ned mwahu pehn tohn sukuhl kan iangahki sendi lap akan. Koaros me kol maruo, mehnda ma re simwoke de soh, mihla pahn pakaraun en dihp, oh kalokpehkan me laud. Kereniong irail koaros, tohn sukuhl me mihmi pohn oas en ihmwo kapidohi sang nan arail sukuhl kan, oh irail me dipikihda dihp kin pekeussang Sapahn. Ouraman en sukuhl, sounpar en onohnop, oh ahnsou mwahu en alehdi doadoahk nan Japan koaros sohrala nan ahnsou tehkis.

Met I pahn koasoaiahiong kumwail dahme wiawihiong irail meh silimeno. Kompoakapah me mihmi pohn oas en ihmwo lekideksang sukuhlo nan Japan me e doadoahklaudiki keradahng loalle oh anahne kopwurupwurlahng imweo. Kompoakapah me iang John mweselsang kamidipwo nihpwongo, kanekehla ah sukuhl nan Japan, oh doula oh koledi dikri sang sukuhl laud oh ndand riau nan United States. Pwehki ah pwukoa doadoahk e pwurala Asia, wasa me ah doadoahk inenen pweida. E wie kalahnganiki lel rahn wet ahn John karasaras soupeikasal. Ah John, uwen pweidahn eh mour eh sohte kak sosohng. Sounparo me e mih Japan elehieng eh pwopwoudda oh elehieng eh nainikihda pwutak riemen. E wia soun netinet pweida men oh me keren e wiahla emen sounpadahk en ehu sukuhl laud nan Japan. Medewe ia pahn mwomwen ah mour ma e sohte soupeikasal oh mweseldahsang kamadipwo ni soutik kesempwalo nan Japan.3

Mwahnakapw akan, e pahn mie ahnsou me kumwail pahn, duwehte John, anahne kasalehda amwail soupeikasal ni sansal mwohn mesen peliamwail kan, me pahn kak kahrehiong amwail alehdi kapit oh namenekla. Oh nan mwehi wet, mie kasongosong kei me kitail pahn anahne pelian nan wasahn mahwin me sohte ngile mwohn kompiuhder oh dipwisou teikan. Dipwisou en doadoahk kapw akan kin wahdo katep laud ahpw re pil kin wahdo soangen kasongosong kei me dih en mahs kan sohte kin lelohng. Ehu ropirop me keren kadierekda me seri pwulopwul en rahn wet kin lelohng kasongsong laud rahn koaros kaidehnte nan wasahn sukuhl kan ahpw ni ahnsou me re kin doadoahngki internet. E kadierekda me seri pwulopwul me kilang kilel en kang sakau oh doadoahngki wini suwed nan internet tohto irail kin ahpwete mengei en doadoahngki sakau en wai de wini suwed pahn pak siluh de pahieu tohtohsang mehteikan. Emen me kaun ohpis lap mahs koasoaia: “Ropirop en pahr wet kadierekda ehu kahpwal kapw en idihd sang peliarail–idihd en iang doadoahngki dipwisou en mwehiet. Idihd en iang doadoahngki dipwisou en mwehiet sipelehlahr idihd sang kompoakapah oh iengerail. Idihd wet pidelongohng nan wasahn kousoan akan oh nan en seri ahr perehn meir sang ni Internet.”4Kasaladahn soupeikasal en mour pwung pahn kalapw tikitik te duwe padik de sohte padik nan kompiuhder. Misineri kan kin ale kaweid sangPreach My Gospel,“Dahme ke pilada ken medewe oh wia ahnsou me ke kelehpw oh kamehlele me sohte me kilikilanguhk iei sosohng kehlail en ahmw mour mwahu.”5Kin soupeikasal! Kin kehlail! Uh nan wasa sarawi kan, oh dehr mwekidsang.6

Mwahnakapw akan, I inouki me Kauno pahn kakehlailih kumwail. Pwe Koht “sohte kin kahrehiong kitail masak; aphw manaman.”7E pahn katingihki amwail mwekid soupeikasal oh mour pwung—peren oh popohl. Soangen soupeikasal wet pahn kohsang amwail pwoson Sises Krais oh Sapwellime Tomwo, amwail kapakap kan, oh amwail peikiong kosonned akan.

President N. Eldon Tanner koasoaia: “Emen pwutak pwulopwul nan ah wasahn sukuhl kak wia mehn kahlemeng en kehlail oh mwahu. Emen mwahnakapw nan wasahn mwadong en mpwei, de nan wasahn sukuhl, de rehn ienge tohn doadoahngkan kak, ni eh pahn momourki rongamwahuo, wauneki ah priesthood, oh uhki me pwung, wia laud me mwahu. Pak tohto kumwail pahn lelohng me kin kawe oh kapitihkumwail lella irail akan me kamehlele duweikumwail, mendahte arail mwein waunikinkumwail pwehki amwail wiewia pwung. Ahpw tamataman me pein Sounkomouro kalokolok, wiekaula, aramas kendipih, oh ni imwilao kalohpwuala pwehki eh sohte ketin pweieksang sapwellime koasoandi. Mie pak kumwail kin uhdi oh medewe dahme pahn wiawi ma e ketin pwungitikla oh mahsanih, ‘Oh, mie katepen met? oh pwilikihdi sapwellime pwukoahu? Dah, kitail men wia aramas sohte pweida kei, de kitail men wia sounpapah kehlail me mendahkilahr kahpwal oh wiewia suwed en sampah wet? Kitail anahne soupeikasal en mwekidki oh iang wia sounpapah mehlel, loaloapwoat en Krais.”8

I lukeikumwail en nantihong warohng duwehte sounpei pwulopwul 2,000 me kehlail nan arail soupeikasal ni arail wia priesthood warohng.. Tamataman, dahme kumwail wia, wasa kumwail kohla ie, oh dahme kumwail kilang pahn mie lipwe ong ihs me kumwail pahn wiahla. Ihs me kumwail men wiahla? Wiahla dihken men me warohng, sounpadahk men me warohng, de priest men me warohng. Koasoanehdi mwahu pwe kumwail en kak warohng en pidolong nan tehnpas sarawi met oh en warohng en alehdi tiahk sarawi kan ni sounpar me konehng oh en kedekedeo kesepwildahng nan pwukoa lap en Priesthood en Melkisedek. Met iei ahl en mour pwung me kin lukehdo sawas en nanleng. Kauno mahsanih me manaman en duwe Koht kin sansalda nan tiahk sarawi kan en Priesthood en Melkisedek.9

Pahpa nohno kan, kaun kan en priesthood, oh soahng kan me soukohp kan kesempwaliki dierek nan noumwail pwuken Pwukoa ong KohtohOng Kakehlepen Me Pwulopwul pahn kaweid kumwail kohwei.

President Thomas S. Monson kaweidki me keren:

“En wiahda [koasoandi] ni eripit, soupeikasal kin anahn—soupeikasal en nda soh, oh soupeikasal en nda ehng.

“I peki ni karakarahk kumwail en koasoanehdi … met te, en dehr wetlahsang pohn ahl me pahn kahluwaikitaillahng wasa me kitail nannantihong lella: mour soutuk rehn Samatail Nanleng.”10

Duwehtehte sounpei 2,000 arail sapeng ruwes en mahwin sang arail kaun, Helaman, oh kamwakidada arail soupeikasal kehlail, kumwail pil kak wia soahngohte oh idawehn amwail kaun-soukohp, President Thomas S. Monson.

Kumwail, nei mwahnakapw kan me kolokol Priesthood en Aaron, pwehn kaimwsekala I kihda ahi kadehde en Koht Sahm oh Sises Krais oh mahsen en Joseph Smith. Ni ansou me e kaweidkinkitail en doula nan doadoahk lap wet, Wonowei oh dehr pweiek ahniki soupeikasal, oh kohwei pweida.11 Ni mwaren Sises Krais, ahmen.

Show References

  1.  

    1. TehkAlma 53:20.

  2.  

    2.  Mosiah 18:9.

  3.  

    3. Ahn aramas emen soai me e koasoaiahieng aramas me wiahda padahk wet.

  4.  

    4. Joseph A. Califano Jr., me tapiada oh kakaun ni duwen chairman emeritus en National Center on Addiction and Substance Abuse me mih Columbia University, nan kasalada sang CASA me pid ropirop, casacolumbia.org.

  5.  

    5.  Preach My Gospel : A Guide to Missionary Service (2004), 118.

  6.  

    6. TehkDoctrine and Covenants 87:8.

  7.  

    7.  2  Timoty 1:7.

  8.  

    8. N. Eldon Tanner, “For They Loved the Praise of Men More Than the Praise of God,” Ensign, Nopempe 1975, 74–75.

  9.  

    9. TehkDoctrine and Covenants 84:20.

  10.  

    10. Thomas S. Monson, “The Three Rs of Choice,” Liahona oh Ensign, Nopempe 2010, 68.

  11.  

    11. TehkDoctrine and Covenants 128:22.