Veivakalougatataki ni Sakaramede

Mai vei Elder Don R. Clarke

Ena Vitusagavulu


Don R. Clarke
Eda na vakalougatataki ni sa yaloda meda vakavinavinaka ena vuku ni nona Veisorovaki o Jisu Karisito, vakavouya na noda veiyalayalati ni papitaiso, vakila na veivosoti, ka ciqoma na veivakauqeti mai na Yalo Tabu.

Au a tubu cake mai Rexburg e Idaho, kau a vakauqeti ka vakavulici kina mai na dua na matavuvale, ira na itokani, qasenivuli, kei ira na iliuliu vakasakiti. E tu ena noda dui bula kece na veika talei eso dau tara na yaloda ka yaco kina na veisau tawamudu. E dua na ka vaqori a yaco ena noqu gauna ni itabagone. Na ka oqori a veisautaka na noqu bula.

Au dau bulabula tu ga ena Lotu ka curuma mai na Matabete i Eroni. Niu yabaki tinivakacaca, a kerea o Baraca Jacob, na noqu qasenivuli, meu vola ena dua na kadi na veika au a vakasamataka tiko ena gauna ni sakaramede. Au taura na noqu kadi ka tekivu volavola. Matai ni ka ena ituvatuva e dua na qito basketbol ena bogi oti keitou a qaqa kina. Ka qai tarava mai e dua na veigadivi ni oti na qito, qai toso yani na ituvatuva. Guilecavi sara ga se sega ni volai ena matanivola lelevu na yaca Jisu Karisito.

Dau vakaleweni na kadi ena vei-Sigatabu yadua. Sa yaco me vakaibalebale vakalevu cake vakayalo vua e dua na Matabete i Eroni gone na sakaramede kei na soqoni ni sakaramede. Au sa dau nanamaki ki na vei-Sigatabu ka vakakina ena madigi meu vakaivotavota ena sakaramede, ni sa veisautaki au tiko na noqu kila na nona Veisorovaki na iVakabula. Ena vei-Sigatabu kece sara me yacova mai nikua, niu vakayagataka na sakaramede, au sa dau raica na noqu kadi ka railesuva na ka au sa vola kina. Sega ni dau yali mai na noqu lisi ena gauna oqo, taumada, na iVakabula ni kawatamata.

Eda wilika ena Veiyalayalati Vou na nodratou a sota ena dua na rumu e cake na iVakabula kei ira na Nona iApositolo ena Kanavata ni Lakosivia.

“A sa taura na madrai ka vakavinavinaka, ka dovia, ka solia vei ira, ka kaya, oqo na yagoqu sa soli ena vukumudou: dou cakava oqo mo dou vakananumi au kina.

“Sa vakatalega kina na bilo, ni sa oti na ivakayakavi, ka vaka, A bilo oqo na veiyalayalati vou ena noqu dra, sa liviraki ena vukumudou.1

A tekivutaka talega ko Jisu na cakacaka vakalotu ni sakaramede ena Nona sikovi ira na Nifai.2 Sa yaco meu kila na bibi ni rua na ka a yaco oqo.

E kaya o Peresitedi David O. McKay, “Au vakauqeti meu vakabibitaka na ka sa lesia na Turaga me soqoni bibi duadua ena Lotu, sai koya oqori na soqoni ni sakaramede.”3 Kevaka eda vakavakarau vakavinaka ki na sakaramede, e rawa ni da veisautaka na noda bula. Au vinakata meu vakatura e lima na ivakavuvuli ka rawa ni vakalougatataka na noda bula ni vakayagataki ena bula kilikili na sakaramede.

I. Me Tiko na Yalo ni Vakavinavinaka ena Vuku ni Nona Veisorovaki o Jisu Karisito

Na imatai ni ivakavuvuli sai koya me tiko na yalo ni vakavinavinaka vei Tamada Vakalomalagi ena gauna ni sakaramede ena vuku ni Nona Veisorovaki na Luvena. A talanoataki na italanoa oqo me baleta na kena veisoliyaki na sakaramede:

“E sega soti ni dau vakaibalebale vei au na sakaramede me yacova na Sigatabu au tabaki kina meu dikoni. Ena yakavi oqori au a veisoliyaka kina ena imatai ni gauna na sakaramede. Ni se bera na soqoni, a vakasalataki au e dua na dikoni, ‘Qarauni Baraca Schmidt. O na rairai vakayadrati koya!’ Sa qai yaco mai na gauna meu vakaitavi ena kena soli yani na sakaramede. E lako vinaka ena imatai ni ikaono ni iyatu. Era vakaivotavota na gone kei na qase ka sega ni dua na vakasama se na leqa. Au qai yacova yani na ikavitu ni iyatu, na iyatu e dau dabe voli kina o Baraca Schmidt. Au kurabui sara. E sega ni moce ni yadra vinaka tu. E duatani o koya mai vei ira na kena vo au sa votai ira yani, e taura na madrai ena vakasama titobu kei na vakarokoroko.

“Ena vica na miniti ka tarava au sa baci gole tale yani ki na ikavitu ni iyatu vata o ya kei na wai. Ena gauna oqo e dina na noqu itokani. A cuva tu na ului Baraca Schmidt ka bobo tu na matana lelevu vaka-Jamani. E laurai vinaka ni sa lutu tu na nona moce. Na cava beka e rawa niu cakava se tukuna? Au vakaraica tu mada vakalailai na vacu ni matana, e sanuki ka makawa ena veiyabaki ni cakacaka vakaukauwa kei na bula dredre. A curu ki na Lotu ni se qai yabaki tinivakacaca ka donumaka e vuqa na veivakacacani ena nona tauni lailai mai Jamani. Au dau rogoca vakalevu na kena italanoa ena soqoni ni soli ivakadinadina. Au qai nanuma meu tara na tabana ena vakanuinui me yadra kina. Niu kala yani, qai mata mai vakamalua na uluna. E drodrova sobu tu na baluna na wainimatana, niu raica yani na yaloka ni matana au raica kina na loloma kei na reki. A dolele yani vakamalua ka taura na wai. E dina niu se qai yabaki tinikarua ena gauna ko ya, au se nanuma vinaka toka ga na veika au a vakila ena noqu sarava na kena turaga bulitaki wakakau oqo. Au kila deivaki ni vakila e dua na ka me baleta na sakaramede au se bera ni vakila. Au vakadeitaka kina ena gauna oya niu via vakila na veika vata oya.”4

E veitaratara ki lomalagi o Baraca Schmidt, ka veitaratara vata kei koya ko lomalagi.

II. Nanuma ni da Vakavouya tiko na Veiyalayalati ni Papitaiso

Na ikarua ni ivakavuvuli me da nanuma ni da sa vakavouya tiko na noda veiyalayalati ni papitaiso ni da vakaivotavota ena sakaramede. Eso na yalayala eda dau vakayacora me vaka e volai tu ena ivolanikalou, e oka kina na:

“Dou curu ki na lomanibai ni Kalou, ka vakatokai me nona tamata, … mo dou veivuketaka na nomudou icolacola, … mo dou tagi vata kei ira sa tagi … , ka vakadinadinataka na Kalou.”5

“Ka lako mai ena yalo e raramusumusu kei na yalo e bibivoro, … ka sa lomadra me ra taura na yaca i Jisu Karisito, ka qaravi Koya me yacova na ivakataotioti,”6 ka dau nanumi Koya ka muria na vunau sa solia vei ira.7

Na masu ni sakaramede era ivakananumi vei keda ni veiyalayalati oqo. Ni da vakaivotavota ena sakaramede, eda sa vakavouya na noda yalayala me da dina tiko ki na noda veiyalayalati oqo. Au vakabauta ni kilikili me da rawa ni cavuqaqataka na masu ni sakaramede ena noda vakasama kei na yaloda. Oqori ena vukei keda me da vakanamata ena kena vakavoui na noda veiyalayalati ni papitaiso. Se da a yabaki 8 se 80 ena gauna eda papitaiso kina, au nuitaka ni da na sega ni guilecava na siga oya kei na veiyalayalati eda a vakayacora.

III. Ena Gauna ni Sakaramede e Rawa ni da Vakila ni da sa Vosoti mai na Noda iValavala Ca

Na ikatolu, ena gauna ni sakaramede eda rawa ni vakila ni da sa vosoti mai na noda ivalavala ca. Kevaka eda a taura na gauna ni bera na sakaramede me da veivutunitaka na noda ivalavala ca, ena rawa vei keda me da gole yani mai na sakaramede ka vakila ni da sa savasava ka savasava vuka. E kaya o Peresitedi Boyd K. Packer: “Na sakaramede e vakavouya na ivalavala ni veivosoti. Ena vei-Sigatabu kece ni votai mai na sakaramede, oqori na soqo me marautaki kina na ivalavala ni veivosoti. … Ena vei-Sigatabu yadua mo vakasavasavataki iko me rawa kina, ni yaco mai na kena gauna, ni o mate me na savasava tu na yalomu.”8 Ni da vakaivotavota ena bula kilikili ena sakaramede ena vukei keda me da vakataki ira na tamata ni Tui o Penijamini, ka ra, “sa vakasinaiti ena marau, ni sa bokoci na nodra ivalavala ca, ka vakacegu na yalodra.9

IV. Eda Rawa ni Vakauqeti ena iWali ni Noda Leqa

Na ikava ni ivakavuvuli sai koya ni da rawa ni vakauqeti ena iwali ni noda leqa ena soqoni ni sakaramede. Niu peresitedi voli ni kaulotu mai Bolivia, keirau a vakalougatataki vata kei Mary Anne na watiqu, me keirau tiko ena dua na semina ni peresitedi ni kaulotu vata kei Peresitedi Henry B. Eyring. Ena soqoni oqori a vakavuvulitaka kina o koya ni tolu na sala bibi e rawa ni da vakarautaki keda kina me yaga vei keda e dua na soqoni. Me da lako mai kei na noda leqa, yalomalumalumu me vakataki ira na gone ka vakarau tu me vuli, kei na gagadre me da vukei ira na luve ni Kalou.

Ni da lako mai ena yalomalumalumu ki na soqoni ni sakaramede, e rawa ni da vakalougatataki me da vakila na veivakauqeti me baleta na iwali ni noda leqa e veisiga. Me da vakavakarau mai, tu vakarau me da vakarorogo, ka sega ni rawa ni vagolei tani. Eda wilika ena ivolanikalou, “Ia, au sa kaya vakaidina vei iko, a dodonu sara mo vakasamataka vakavinaka taumada; kevaka sa dodonu vei iko mo qai kerea, ia kevaka au kila ni ganita, au na uqeta na yalomu ka na katakata mai na lomamu; raica ko na qai kila sara ni sa dodonu.”10 E rawa ni da kila na veika e dodonu me da cakava me wali kina na noda leqa.

V. Ni da Vakaivotavota ena Bula Kilikili ena Sakaramede ena Vukei Keda me da Vakasinaiti ena Yalo Tabu

Na ikalima ni ivakavuvuli, vakaivotavota ena bula kilikili ena sakaramede, ena vukei keda me da vakasinaiti ena Yalo Tabu. Ena nona tekivutaka na sakaramede ena Nona veisiko vei ira na Nifai, e kaya kina o Jisu, “Ko koya yadua sa kania na madrai oqo, sa kania na lewequ; kei koya sa gunuva na waini oqo, sa gunuva na noqu dra; ia ena sega ni viakana ka sega talega ni viagunu, ia ena vakamamautaki.”11 Sa yalataki veikeda kevaka era sa via kania ka via gunuva na ivalavala dodonu, era na vakamamautaki ena Yalo Tabu. E yalataki talega ena masu ni sakaramede kevaka eda na bulataka na noda veiyalayalati, ena tikoga vata kei keda na Nona Yalo Tabu.12

E kaya o Elder Melvin J. Ballard: “O au e dua na ivakadinadina bula ni tiko e dua na yalo ka sala vata na kena qaravi na sakaramede ka vakatakata na yalo mai ulu ki yava; o na vakila ni vakamamacataki na mavoa ni yalo, ka laveti na icolacola. Ena yaco mai ki na yalo kilikili ka gadreva dina tu me vakaivotavota ena kakana vakayalo oqo na vakacegu kei na marau.”13

Eda na vakalougatataki ni sa yaloda meda vakavinavinaka ena vuku ni nona Veisorovaki o Jisu Karisito, vakavouya na noda veiyalayalati ni papitaiso, vakila na veivosoti, ka ciqoma na veivakauqeti mai na Yalo Tabu ni da vakaivotavota ena sakaramede e veimacawa. Ena dau yaco me dua na soqoni ni sakaramede cecere kevaka e itakele ni noda sokalou na sakaramede. Au vakaraitaka na noqu vakavinavinaka ena vuku ni nona Veisorovaki o Jisu Karisito. Au kila ni bula tiko o Koya. Ena yaca i Jisu Karisito, emeni.

Show References

  1.  

    1.  Luke 22:19–20; vakaikuritaki.

  2.  

    2. Raica na 3 Nifai 18.

  3.  

    3. David O. McKay, ena Conference Report, Okot. 1929, 11.

  4.  

    4.  Book of Mormon Student Manual (ivolavakarau ni iVakarau ni Vuli ena Lotu, 1979), 417.

  5.  

    5.  Mosaia 18:8–9.

  6.  

    6.  Vunau kei na Veiyalayalati 20:37.

  7.  

    7. Raica na Vunau kei na Veiyalayalati 20:77.

  8.  

    8. Boyd K. Packer, Mine Errand from the Lord (2008), 196.

  9.  

    9.  Mosaia 4:3; vakaikuritaki.

  10.  

    10.  Vunau kei na Veiyalayalati 9:8; vakaikuritaki.

  11.  

    11.  3 Nifai 20:8.

  12.  

    12 Raica na Vunau kei na Veiyalayalati 20:77.

  13.  

    13. Melvin J. Ballard, ena Bryant S. Hinckley, Sermons and Missionary Services of Melvin Joseph Ballard (1949), 149.