Yufala I Save Filim Samting Ia Nao?

I kam long Elda Kwentin L. Kuk

Blong Kworom Blong Olgeta Twelef Aposol


Kwentin L. Kuk
Sam insaed long Jos, oli bilif se oli no save ansarem kwestin blong Alma wetem wan stret yes. Oli no save “filim samting ia nao.”

Presiden Monson, mifala i lavem, givim ona, mo sastenem yu! Impoten anaonsmen ia we i makem wan histri, wetem respek, long misinari wok i wan inspiresen. Mi save tingbaot glad ia long 1960 taem we yia blong wan yang man blong go long misin i bin 20 yia mo i go daon long 19 yia. Mi bin kasem Britis Misin olsem wan niu misinari we i gat 20 yia. Fas misinari we i bin kam long misin long 19 yia hem i Elda Jefri R. Holan, mo hem i bin wan moa gudfala misinari. Hem i bin sem blong sam manis bifo hem i kasem 20 yia. Afta long wan yia, plante moa we oli bin gat 19 yia oli kam. Oli bin stap obei mo oli bin stap ol fetful misinari mo wok i kam antap. Mi trastem se bae i gat wan bigfala haves naoia olsem ol stret mo gud misinari wetem komitmen blong fulfilim komanmen blong Sevya blong prijim gospel blong Hem.

Long lukluk blong mi, yufala we i stap long jeneresen we i stap kam antap, i rere gud bitim moa bitim eni nara jeneresen blong bifo. Save blong yufala long saed blong ol skripja i moa bigwan. Be, ol jalenj we jeneresen blong yufala i stap fesem taem yufala i stap rere blong go long misin, i semmak long hemia we evri memba blong Jos oli stap fesem. Yumi evriwan i save se kastom long plante ples long wol i no lidim man long stret mo gud fasin o long komitmen long saed blong spirit. Truaot long histri, ol lida blong Jos oli wonem ol pipol mo tijim long olgeta fasin blong sakem sin. Long Buk blong Momon, yangfala Alma i wari tumas abaot rabis fasin mo fasin blong nogat komitmen we i mekem se hem i risaen olsem jif jaj, lida blong ol man blong Nifae, mo putum evri work blong hem long koling blong hem olsem wan profet.1

Long wan long ol strong ves long skripja, Alma i talem: “Sapos yufala i bin gat wan jenis we i hapen long hat, mo sapos yufala i bin wantem blong singim singsing blong lav blong pemaot man, bae mi askem, yufala i save filim samting ia naoia?”2

Ol lokol lida raon long wol, oli ripotem se taem oli lukluk long jeneral, ol memba bong Jos, speseli ol yut, oli strong moa bitim bifo. Be oltaem, bae oli resemap tu wari: faswan, jalenj blong rabis fasin we i stap kam antap long wol mo, seken, fasin blong no gat intres mo no gat komitmen we sam memba i gat. Oli stap askem kaonsel long olsem wanem blong helpem ol memba blong folem Sevya mo kasem wan ful mo dip fasin blong jenisim laef we i stap blong oltaem.

Kwestin ia, “yufala i save filim samting ia naoia?” i ring krosem plante handred yia. Wetem evri samting we yumi bin kasem long dispensesen ia—olsem restoresen blong ful gospel blong Jisas Kraes, plante presen long saed blong Spirit mo ol plante blesing blong heven—jalenj blong Alma i stap kam moa impoten.

Stret afta Esra Taf Benson i bin kam olsem wan Aposol long 1943, Presiden Joj Albet Smit3 i bin givim kaonsel ia: “Misin blong yu i blong wonem ol pipol wetem wan kaen toktok, se fasin blong sakem sin i wan meresin ia nomo blong hilim wol ia.”4 Taem hem i talem toktok ia, yumi bin stap long medel blong Wol Wo 2.

Tedei, fasin blong spolem klin tingting i go antap. Wan popula man blong raet i talem: “Evriwan i save kalja i posen, mo i no gat man i tingting se hemia bae i jenis.”5 Fasin blong soemaot oltaem vaelens mo rabis fasin long saed blong seks insaed long miusik, konset, peinting, mo eni nara media long evri dei kalja blong yumi i bitim taem bifo. Hemia, wan man blong Baebol blong Baptis jos i tokbaot long wan fani wei mo talem: “Sistem blong proteksen long saed blong spirit blong ful laefstael blong wan pipol, i kasem kil.”6

I no wan sapraes se sam, insaed long Jos, oli bilif se oli no save ansarem kwestin blong Alma wetem wan stret yes. Oli no “filim samting ia naoia.” Oli filim se oli stap long wan taem we oli sot long Spirit. Ol narawan oli kros, kasem kil, o harem nogud. Sapos yu yu filim olsem, 7 hem impoten blong lukluk gud from wanem yu no save “filim samting ia naoia”.

Fulap long olgeta we oli sot long Spirit mo no gat komitmen, ating oli no bin mekem ol bigfala sin o rabis fasin, be oli bin mekem ol joes we i no waes. Samfala, oli tingting nating long fasin blong kipim ol tabu kavenan blong olgeta. Ol narawan oli spendem plante taem blong olgeta long ol samting we oli no impoten. Samfala, oli letem ol bigfala paoa blong kalja mo politik i daonem fasin blong stap tru long gospel blong Jisas Kraes. Samfala, oli go insaed fulap long ol tul blong Intanet we i mekem samting i kam bigwan, o tokbaot samting ova mak, mo long sam kes, oli mekemap sam nogud storian abaot ol fas lida blong Jos. Afta, oli mekem sam giaman toktok we i spolem testemoni blong man. Eniwan we i bin mekem ol joes ia, i save sakem sin mo kam niu bakegen tru long spirit.

Blong draon insaed long ol skripja, hem i impoten blong kasem kaekae long saed blong spirit.8 Toktok blong God i givim komitmen mo i meresin blong hilim ol brok filing, kros, o giaman tingting.9 Taem komitmen blong yumi i kam daon from eni risen, pat blong ansa long problem ia, i blong sakem sin.10 Komitmen mo fasin blong sakem sin, tufala i joen gud.

K. S. Lewis, man blong hadwok, Kristin man blong raet, i raet gud abaot topik ia. Hem i talem se bilif blong ol Kristin man i talem long ol pipol blong sakem sin mo promesem olgeta fasin blong kasem fogivnes; be kasem taem nomo we ol pipol oli save mo filim se oli nidim fogivnes, bilif blong ol Kristin man i nomo gat mining long olgeta. Hem i talem: “Taem yu save se yu sik, bae yu lisin long dokta.”11

Profet Josef Smit i poenemaot se bifo baptaes blong yu, yu save stap long medel graon bitwin gud mo nogud. Be “taem yu joenem Jos ia, yu saen blong wok blong God. Taem yu mekem olsem, yu lego medel graon, mo yu neva save [gobak].” Kaonsel blong hem i we yumi neva mas lego Masta.12

Alma i talemaot klia se tru long Atonmen blong Jisas Kraes “[Hem i stretem] ol han blong sore” long olgeta we oli sakem sin.13 Afta Alma i askem ol kwestin we oli dip mo impoten olsem. Yumi rere blong mitim God? Yumi kipim yumiwan i klin? Evriwan i mas tingting hevi long ol kwestin ia. Eksperiens blong Alma blong no folem fetful papa blong hem, mo afta, kam long wan save long hamas hem i nidim fogivnes mo wanem i minim blong singim singsing blong lav blong pemaot man, i gat paoa mo i winim tingting.

Olsem eni samting we i daonem komitmen blong man i gat risal blong hem, i gat tu ril jalenj we tufala i stap rul oltaem mo tufala i bigwan. Faswan, i fasin blong no stap kaen, fasin blong faet mo fasin blong givim nogud tritmen insaed long haos. Seken, i ol rabis fasin long saed blong seks mo ol tingting we oli no klin. Tufala ia, plante taem oli kam fastaem, mo tufala i stamba blong joes blong no gat komitmen.

Hamas yumi tekem mo holemtaet tufala fasin ia, i impoten tumas. Fasin blong faet, fasin blong givim nogud tritmen, nogud fasin mo fasin blong nogat respek long hom, oli no samting we God i akseptem—i no samting we God i akseptem se ol adalt oli stap mekem, i no samting we God i akseptem se jeneresen we i stap kam antap i stap mekem. Papa blong mi, i no aktiv long Jos, be hem i wan gud eksampol, speseli long wei we hem i tritim mama blong mi. Oltaem bae hem i talem: “God bae i mekem ol hasban oli responsibol long evri taem we oli mekem wota blong ae blong waef blong olgeta i ron.” Sem tingting ia, oli tokbaot bigwan insaed long “Famle: Wan Ofisol Toktok I Go long Wol.” I rid olsem: “Olgeta we oli stap mekem nogud long ol man, woman o pikinini blong olgeta, … bambae olgeta ia oli mas lukaot from God bambae i jajem olgeta from ol samting ia.”14 Nomata se wanem kalja nao yumi groap long hem, o se papa mo mama blong yumi i bin tritim gud, o, i no bin tritim gud yumi, yumi no mas tritim nogud wan long saed blong bodi, filing o wetem toktok.15

Nid blong gat gudfala fasin long sosaeti i moa impoten. Fandesen blong fasin blong stap kaen mo gudfala fasin i stat insaed long ol hom blong yumi. Hem i no wan sapraes se pablik fasin blong man i go daon long semtaem we famle i stap foldaon. Famle i fandesen blong lav mo fasin blong holemtaet spirit. Famle, i wan ples we fasin blong folem bilif blong relijin i save gro i kam antap. I tru, “wol i fulap lav sapos yu gat lav long hom.”16

Nogud fasin long saed blong seks mo ol tingting we oli no klin i brekem standet we Sevya i putum i stap.17 Oli bin wonem yumi long stat blong dispensesen ia se nogud fasin long saed blong seks bae i stap olsem bigfala jalenj.18 Ol kaen fasin ia, spos yumi no sakem sin, bae i mekem yumi lusum spirit mo lusum komitmen. Ol muvi, TV, mo Intanet, oltaem oli sendem ol rabis mesej mo pikja. Presiden Dita F. Ukdof mo mi, i bin stap long wan vilej long bus blong Amason i no longtaem i pas, mo hem i luk ol satelaet plet we oli bin putum antap long ol simpol taj haos. Mitufala i glad tumas long infomesen we i stap long eria ia. Mitufala i luk save tu se i no gat ples long wol we i no save kasem ol nogud samting mo ol pikja we i pulum tingting blong seks. Hemia i wan risen from wanem ponografi i kam wan series problem long dei blong yumi.

I longtaem i pas, mi bin gat gud storian wetem wan boe we i gat 15 yia, mo i kasem Aronik prishud. Hem i helpem mi blong andastanem olsem wanem i isi, long Intanet dei blong yumi, blong ol yangfala oli foldaon long tingting we oli no klin mo ol ponografi pikja. Hem i poenemaot se long plante prinsipol we Jos i tijim, i gat sam we oli luksave long sosaeti, se fasin blong no folem ol prinsipol ia, i save spolem helt mo gud laef. Hem i tokbaot sigaret, fasin blong smok, yusum drag, dring alkol we ol yangfala i stap mekem. Be hem i talem se i no gat wan komplen o wan impoten woning we i kam long sosaeti abaot ponografi o rabis fasin long saed blong seks.

Ol dia brata mo sista. Tingting blong yangfala man ia i stret. Wanem nao i ansa? Blong plante yia, ol profet mo aposol oli bin tijim se fasin blong folem bilif blong relijin insaed long hom i impoten.19

Papa mo mama. Taem i pas finis we gud patisipesen blong yufala long ol miting mo program blong Jos, nomata we oli impoten, i save tekem ples blong yufala blong mekem tabu responsabiliti blong yufala blong tijim ol pikinini blong yufala blong laef klin, laef stret mo gud mo wokbaot stret long fes blong Lod. Wetem anaonsmen blong Presiden Monson long moning ia, hem i impoten se wok ia, yufala i mas fetful blong mekem hemia insaed long hom, we i wan ples blong haed, wan ples we fasin blong stap kaen, fogivnes, trutok mo stret mo gud fasin oli rul. Papa mo mama i mas gat strong paoa long tingting blong jekem o kontrolem raet blong pikinini blong go long Intanet, blong jekem mo kontrolem wanem oli luk mo lisin long hem long televisen, muvi, mo miusik. Papa mo mama i mas gat strong paoa long tingting blong talem, no, blong difendem trutok, mo serem ol strong testemoni. Ol pikinini blong yufala oli nidim blong save se yufala i gat fet long Sevya, yufala i lavem Papa blong yufala long Heven, mo sapotem ol lida blong Jos. Fasin blong kam raep long saed blong spirit, i mas gro insaed long hom. Mi hop se bae i no gat wan i aot long konfrens ia mo bae i no andastanem se ol problem blong fasin blong man blong tedei, yumi mas tokbaot mo stretem insaed long famle. Ol bisop, prishud mo okseleri lida oli nidim blong sapotem ol famle mo mekemsua se oli tijim ol prinsipol long saed blong spirit. Ol hom mo visiting tija oli save help, speseli wetem ol pikinini we oli gat papa o mama nomo.

Yangfala man ia we mi bin tokbaot, i bin wantem tumas blong save sapos ol Aposol oli save se, stat long wanem yia nao oli mas stat blong tijim mo protektem pikinini long ponografi mo ol tingting we oli no klin. Hem i talemaot gud se long sam eria, i gud blong tij bifo yut i graduet long Praemeri, mo hemia i no eli tumas.

Ol yut we oli bin luk ol rabis pikja long eli yia blong olgeta oli fraet se olgetawan, oli mekem se oli nomo kwalifae blong go long misin mo ol tabu kavenan. From hemia, fet blong olgeta i save go daon bigwan. Mi wantem promesem yufala ol yangfala, olsem oli bin tijim, se tru long fasin blong sakem sin, yufala i save kwalifae from evri blesing blong heven.20 Hemia nao stamba blong Atonmen blong Sevya. Plis toktok wetem papa o mama blong yu o wan advaesa we yu trastem, mo toktok wetem bisop blong yu.

Taem we i kam long gud fasin long saed blong seks, sam adalt oli bilif se blong tekpat long wan bigfala yumaniterian projek o prinsipol i karemaot nid ia blong folem ol tijing blong Sevya. Oli talem long olgetawan se ol rabis aksen long saed blong seks i “wan smol samting…[sapos mi] wan gud man mo mi gat bigfala lav.”21 Ol kaen tingting ia, i wan giaman tingting long yuwan. Sam yangfala i talem long mi se long kalja blong yumi tedei, i no “fit” blong traehad tumas long plante eria, mo hemia i tekem tu fasin blong laef stret folem ol stret mo gud prinsipol.22 Plis no foldaon long trik ia.

Long taem blong baptaes, yumi promes blong tekem long yumi “nem blong [Jisas] Kraes, yumi gat komitmen blong wok blong Hem kasem en.”23 Kaen kavenan ia i askem yumi blong wokhad wetem strong paoa long tingting, komitment, mo tru fasin, sapos yumi wantem blong gohed blong singim singsing blong lav we i pemaot man, mo stap olsem wan we i bin jenisim laef fulwan.

Wan eksampol long histri, long saed blong komitmen blong stap strong mo no muvmuv, we i gud long yumi nomata wanem yia yumi gat, i eksampol we wan Britis man long Olimpik i bin soem taem hem i bin kompit long1924 Olimpik Gem long Paris, Franis.

Erik Lidel i bin boe blong wan Skotis misinari long Jaena mo wan strong man blong relijin. Hem i mekem ol Britis lida blong Olimpik oli kros taem hem i no wantem, nomata oli traem blong fosem hem, blong ron long wan opening resis blong 100 mita, we bae i hapen long wan Sandei. Long en, hem i bin win long 400 mita resis. Eksampol blong Lindel blong no wantem blong ron long Sandei i gud tumas.

Long ol taem we oli tokbaot laef blong hem mo long ol seremoni blong givim ona long hem, oli bin yusum ol toktok blong insperesen blong Aesea: “Be olgeta we oli stap luk long Hae God blong i givhan long olgeta bae oli luk we oltaem hem i givim paoa long olgeta. Bae oli girap olsem we oli gat wing [blong] igel; bae oli save resis gogo be leg i no save taed mo oli save wokbaot gogo be oli no save kam slak.”24

Gudfala fasin blong Lidel i gat bigfala paoa long yangfala pikinini boe blong mitufala long joes blong hem blong no tekem pat long ol spot blong Sandei, mo moa impoten long hemia, blong hem i seperetem hem long fasin we i no stret mo i no gud, mo i folem fasin blong wol . Hem i yusum kwot blong Aesea blong go long yiabuk. Erik Lidel i livim wan eksampol we i gat paoa long saed blong fasin blong stap traehad mo gat komitmen blong folem wan prinsipol.

Taem ol yut blong yumi oli folem kaonsel blong Presiden Monson blong stap rere blong go long misin, mo taem yumi evriwan i stap laef folem ol prinsipol we Sevya i tijim, mo yumi stap rere blong mitim God,25 yumi winim wan resis we i moa impoten.26 Bae yumi gat Tabu Spirit olsem man blong gaedem yumi long saed blong spirit. Long eniwan we laef blong hem i no stap long oda, tingbaot, i no let yet blong mekem Atonmen blong Sevya i kam fandesen blong fet mo laef blong yumi.27

Long ol toktok blong Aesea, “Nating we ol sin blong yufala i mekem yufala i doti gud, be bae mi mekem we yufala i klin we i klin; Naoia yufala i doti we i doti, be bambae yufala i kam klin olgeta.”28

Hem i prea blong mi se wanwan long yumi bae i tekem eni aksen we i nid blong filim Spirit naoia blong mekem se yumi save singim singsing blong lav we i pemaot man wetem evri hat blong yumi. Mi testifae long paoa blong Atonmen blong Sevya, long nem blong Jisas Kraes, amen.

Show References

  1.  

    1. Luk long Alma 4:15–19.

  2.  

    2.  Alma 5:26.

  3.  

    3. Joj Albet Smith, long taem ia i bin Presiden blong Kworom blong Olgeta Twelef Aposol. Bae hem i kam Presiden blong Jos long 21 Mei, 1945. (Luk long Deseret News 2012 Church Almanac [2012], 98.)

  4.  

    4. George Albert Smith, insaed long Sheri L. Dew, Ezra Taft Benson: A Biography (1987), 184.

  5.  

    5. Peggy Noonan, “The Dark Night Rises,” Wall Street Journal, 28–29 Julae 2012, A17.

  6.  

    6. Dr. R. Albert Mohler Jr., presiden, The Southern Baptist Theological Seminary, presentesen i go long ol lida blong ol relijin, Niu Yok Siti, 5 Sept. 2012.

  7.  

    7. Luk long 2 Nifae 2:27.

  8.  

    8. Luk long Jon 5:39; Amos 8:11; luk tu long James E. Faust, “A Personal Relationship with the Savior,” Ensign, Nov. 1976, 58–59.

  9.  

    9. Luk long Alma 31:5.

  10.  

    10. Luk long Alma 36:23–26.

  11.  

    11. C. S. Lewis, Mere Christianity (1952), 31–32. Lewis i bin wokman long wok blong fasin blong raet long Inglan, long Oksfod Yunivesiti, mo afta i bin jeaman blong Medieval and Renaissance English long Kambrij Yunivesiti.

  12.  

    12. Luk long Teachings of Presidents of the Church: Joseph Smith (2007), 324; luk tu longRevelesen 3:15–16.

  13.  

    13.  Alma 5:33.

  14.  

    14. “Famle: Wan Ofisol Toktok I Go long Wol,” 35538 852mo Ensign, Nov. 2010, 129.

  15.  

    15. Luk long Richard G. Scott, “Removing Barriers to Happiness,” Ensign, May 1998, 85–87. Sam strong fasin blong kastom oli agensem ol tijing blong Sevya, mo oli save lidim yumi long rong rod. Taem mi bin stap long Saot Pasifik, mi bin mitim wan man we i bin stap stadi long Jos blong plante yia. Hem i bin talem se tijing blong wan lida blong Jos i bin tajem hem long wan prishud konfrens, we i talem se “Ol han ia we yufala i bin yusum fastaem blong kilim ol pikinini blong yufala, naoia, bae yufala i yusum blong blesem ol pikinini blong yufala.” Hem i bin agri blong kasem ol lesen long ol misinari, i kasem baptaes, mo i bin kam wan gudfala lida.

  16.  

    16. “Lav long Hom,” STMSBP, pej 44.

  17.  

    17. Luk long Alma 39.

  18.  

    18. Luk long Ezra Taft Benson, “Cleansing the Inner Vessel,” Ensign, Mei 1986, 4.

  19.  

    19. Presiden Gordon B. Hinkli i bin givim “Famle: Wan Ofisol Toktok I Go long Wol” long taem blong jeneral Rilif Sosaeti miting long Septemba 1995. Presiden Tomas S. Monson i bin prisaed blong jenisim fas japta blong Handbook 2: Administering the Church (2010), “Families and the Church in God’s Plan.”

  20.  

    20. Luk long Alma 13:27–30; 41:11–15.

  21.  

    21. Ross Douthat, Bad Religion: How We Became a Nation of Heretics (2012), 238; luk tu long Alma 39:5.

  22.  

    22. Yu no letem wan kalja we i fulap long fasin blong faet mo nogud fasin long saed blong seks, mo i spolem ol man we oli laef folem ol prinsipol we Sevya i tijim, i spolem bilif blong yu. Olsem poet Wordsworth i raetem gud, “Fidim [tingting blong yu] wetem ol gudfala tingting, blong mekem se i no gat rabis maot, had jajmen, o jik blong ol selfis man oli winim yu, o oli spolem gudfala bilif blong yu” (“Lines Composed a Few Miles above Tintern Abbey,” insaed long The Oxford Book of English Verse, ed. Christopher Ricks [1999], 346).

  23.  

    23.  Moronae 6:3; oli ademap italik; luk tu long Mosaea 18:13.

  24.  

    24.  Aesea 40:31; luk tu long Robert L. Backman, “Day of Delight,” New Era, Jun 1993, 48–49.

  25.  

    25. Luk long Alma 34:32.

  26.  

    26. Luk long Fas Korin 9:24–27.

  27.  

    27. Luk long Hileman 5:12. Oliva Wendel Holms Senia i bin talem: “Mi faenemaot se bigfala samting long wol ia, i no ples we yumi stanap long hem, be i wantem rod nao yumi stap tekem: Blong kasem wof blong heven, samtaem yumi mas sel wetem win, mo samtaem agensem win—be yumi mas sel i go, i no blong letem taed blong wota i pulum yumi, i no blong silip long ples we yumi angka long hem.” (The Autocrat of the Breakfast-Table [1858], 105).

  28.  

    28.  Aesea 1:18.