Luksave Ol Blesing

I Kam long Presiden Tomas S. Monson


Tomas S. Monson
Papa blong yumi long Heven i save gud long ol nid blong yumi mo bae i helpem yumi taem yumi stap askem help blong Hem.

Ol brata mo sista we mi lavem tumas. Konfrens ia i makem 49 yia long taem we oli sastenem mi, long 4  Oktoba 1963, olsem wan memba blong Kworom blong Olgeta Twelef Aposol. Foti naen yia i wan longfala taem. Be long plante wei, taem i sot stat long taem we mi bin stanap long pulpit long Tabenakol mo givim fas toktok blong mi long jeneral konfrens.

Plante samting i jenis stat long 4  Oktoba 1963. Yumi stap long wan spesel taem blong histri blong wol. Yumi gat blesing blong fulap samting. Mo yet, hem i had samtaem blong luk ol problem mo fasin blong stap slak raon long yumi, mo no givap. Mi faenem se, i no gud blong stap tingting long nogud saed, mo sapos yumi tekem wan step biaen, mo tingting long ol blesing blong laef blong yumi, wetem olgeta we oli smol, samtaem ol blesing we yumi no luksave, bae yumi faenem moa hapines.

Taem mi stap lukbak long ol las 49 yia, mi faenem sam samting. Wan i we, ol eksperiens we mi no save kaontem we mi bin gat, oli no ol eksperiens we wan bae i talem se bigfala samting i hapen long olgeta. Be, long taem we oli hapen, plante taem, mi no luksave olgeta mo oli nomol. Be yet, taem mi tingtingbak, oli mekem ol laef oli rij mo gat blesing—wetem laef blong mi tu. Mi wantem askem yufala blong mekem semmak—bae yufala i mekem wan lis blong samting blong laef blong yufala, mo lukaotem ol blesing, bigwan mo smolwan, we yufala i bin kasem.

Wanem i bin kam strong long taem we mi lukbak long ol yia, hem i save blong mi se prea blong yumi, oli harem mo ansarem. Yumi save gud trutok ia we i stap long 2 Nifae long Buk blong Momon: “Ol man i stap, blong oli save gat glad.” 1 Mi testifae se plante glad i kam taem yumi luksave se yumi save toktok wetem Papa blong yumi long Heven tru long prea, mo ol prea ia, bae Hem i harem mo ansarem—ating i no long wei mo taem we yu wantem, be bae i gat ansa, we i kam long wan Papa long Heven we i save mo lavem yu evriwan, mo i wantem yu stap hapi. I no tru se Hem i bin promesem se: “Putum tingting blong yu i stap daon; mo Lod, God blong yu, bae i tekem han blong yu mo lidim yu, mo givim ansa long ol prea blong yu.”?2

Long ol nekis minit we oli givim long mi, bae mi wantem serem wetem yufala wan smol eksperiens we mi bin gat, we ol prea blong mi, Hem i bin harem mo ansarem, mo taem mi tingtingbak, i givim blesing long laef blong mi, mo tu, long laef blong ol narawan. Jenol blong mi, we mi raet long hem evri dei long ol pas yia, i helpem mi blong tingbaot sam speselwan, we bae mi no save talem bakegen sapos mi no bin raetemdaon.

Eli long yia 1965, mi gat wok blong go long ol stek konfrens mo blong gat ol narafala miting raon long Saot Pasifik eria. Hem i fas visit blong mi long pat blong wol ia, mo i wan taem we mi neva fogetem. Plante samting long saed blong spirit, i hapen long taem we mi bin mitim ol lida, ol memba mo ol misinari.

Long wiken blong Satedei mo Sandei, 20 mo 21 Febwari, mifala i bin stap long Brisban, Ostrelia, blong gat ol konfrens sesen blong Brisban Stek. Long taem blong ol miting long Satedei, mi mitim distrik presiden blong wan eria kolosap. Taem mi sekhan long hem, mi gat strong filing se mi nidim blong toktok long hem mo givim kaonsel long hem, mo mekem se mi askem hem sapos hem i save kam wetem mi long Sandei moning sesen long nekis dei blong mi toktok long hem.

Afta long Sandei sesen, mitufala i gat taem blong storian tugeta. Mitufala i tokbaot ol plante wok blong hem olsem distrik presiden. Taem mifala i toktok, mi filim strong blong givim hem sam spesel tingting long saed blong misinari wok mo olsem wanem, hem mo ol memba blong hem, oli save helpem ol fultaem misinari long wok blong olgeta long eria blong hem. Afta, mi bin lanem se man ia i bin stap prea blong kasem daereksen long saed ia. Long hem, storian blong mitufala i wan spesel witnes we God i bin harem mo ansarem prea blong hem. Hem i bin wan gudfala miting be mi save strong long tingting blong mi se Spirit i bin lidim mo i mekem samting i defren long laef mo wok blong distrik presiden ia, long laef blong ol memba blong hem, mo long sakses blong ol misinari long eria ia.

Ol brata mo sista blong mi. Ol stamba tingting blong Lod, plante taem oli hapen taem yumi mekem folem toktok blong Spirit. Mi biliv se moa yumi mekem samting folem insperesen mo strong filing we i kam long yumi, moa Lod bae i trastem yumi long ol wok blong Hem.

Mi bin lanem, olsem we mi bin talem long sam mesej bifo, blong neva pusumbak wan toktok blong Spirit. Long wan taem, plante yia i pas, mi bin stap swim long pul blong olfala Deseret Spot Ples long Sol Lek Siti, taem mi filim insperesen blong go long Yunivesiti Hospital blong visitim wan gudfala fren blong mi we i bin lusum wan leg blong hem from kansa mo operesen we i bin hapen afta. Wantaem nomo, mi aot long pul, mi dresap, mo mi go luk gudfala man ia.

Taem mi kasem rum blong hem, mi faenem se i no gat man. Taem mi askem, mi lanem se bae mi save faenem hem long pul blong hospital, wan ples we oli yusum blong tritim bodi. I bin hapen olsem. Hem i stap long narasaed blong pul, kolosap long ples we i dip. Mi singaotem hem mo hem i tanem wiljea blong hem blong kam talem halo long mi. Mitufala i gat wan gudfala storian, mo mi tekem hem i gobak long rum blong hem, mo givim wan blesing long hem.

Samtaem afta, fren blong mi i talem se tingting blong hem i slak evriwan long dei ia, mo hem i stap tingting blong tekemaot laef blong hem. Hem i bin prea blong kasem help, be hem i stat blong filim se i no gat ansa long ol prea blong hem. Hem i go long pul wetem tingting ia se hemia i wan wei blong endem harem nogud blong hem—blong lidim wiljea blong hem i go long dip ples blong pul. Mi bin kam long stret taem, wan ansa long wanem we mi save se i wan insperesen we i kam long God.

Fren blong mi i bin laef plante moa yia—ol yia we oli fulap long hapines mo tangkyu. Mi glad tumas se mi bin wan tul long han blong Lod long trabol dei ia long pul.

Long wan nara taem, taem Sista Monson mo mi i stap draev i go hom afta we mitufala i visitim sam fren, mi filim strong se mitufala i mas go long taon—mo draev longwe—blong go visitim wan olfala wido we i bin stap long wod blong mifala bifo. Nem blong hem i Sila Tomas. Long taem ia, hem i stap long wan kea senta. Eli long aftenun, mifala i faenem hem we i slak, be i stap silip gud long bed blong hem.

Sila i bin blaen longtaem finis, be hem i haremsave voes blong mitufala kwiktaem. Hem i askem sapos mi save givim wan blesing, mo talem se hem i rere blong ded sapos Lod i wantem hem blong gobak hom. I bin gat wan swit spirit blong pis long rum, mo evriwan long mifala i save se haf laef blong hem long wol ia bae i sot. Sila i holem han blong mi, mo talem se hem i bin prea strong se bae mi kam luk hem mo givim wan blesing long hem. Mi talem long hem se mitufala i kam from wan insperesen we i kam stret long Papa long Heven. Mi kisim fored blong hed blong hem, mo mi save se bae mi nomo luk hem bakegen long wol ia. I bin hapen olsem, mo hem i bin ded long nekis dei. Blong mi save givim sam kamfot mo pis long swit Sila blong mifala, i bin wan blesing long hem mo long mi.

Janis blong stap olsem wan blesing long laef blong wan narawan, plante taem i kam taem yumi no ting long hem. Long wan kolkol Satedei naet, long winta blong 1983–84, Sista Monson mo mi i draev sam kilometa i go long Hil vale blong Midwei, Yuta, long wan hom blong mitufala. Tempereja long naet ia i maenes 31 digri, mo mitufala i wantem mekemsua se evri samting i oraet long hom blong mitufala. Mitufala i jekem mo faenem se i oraet, mekem se mitufala i aot blong gobak long Sol Lek Siti. Mifala i draev sam kilometa nomo long bigfala rod, nao trak blong mitufala i stop, i nomo wok. Mitufala i fas i stap. Mi mi neva bin kolkol olsem we mitufala i bin kolkol long naet ia.

Mitufala i no glad, mo stat wokbaot i go long taon we i stap kolosap, ol trak oli flae pasem mitufala. Nao wan trak i stop, wan yang man i wantem givhan. Mifala i faenem se masut long tank blong trak i kam tik from ples i kolkol, mekem se i no posibol blong draevem trak. Gudfala yang man ia i draevem mitufala i gobak long Midwei hom blong mitufala. Mi traem blong givim mane long hem from help blong hem, be hem i no wantem. Hem i talem se hem i wan Skaot Boe mo i wantem mekem wan gud samting. Mi luk se hem i olsem mi, mo hem i talem tangkyu from janis ia blong save help. Mi ting se hem i gat yia blong wan misinari, mi askem hem sapos hem i gat plan blong go long misin. Hem i talem se hem i no save stret wanem hem i wantem mekem.

Long Mandei blong hem, mi raetem wan leta i go long yang man ia mo talem tangkyu long hem from kaen fasin blong hem. Long leta ia, mi leftemap tingting blong hem blong go long wan fultaem misin. Mi putum wan kopi blong wan long ol buk blong mi, mo haelaetem ol japta long saed blong misinari seves.

Wan wik afta, mama blong yang man ia i ringim mi mo talem se boe blong hem i wan gudfala man be from sam samting we i stiarem laef blong hem, longfala tingting blong hem blong go long misin i go daon. Hem i talem se hem mo papa blong boe ia i bin livim kakae mo prea se bae hat blong hem i jenis. Oli bin putum nem blong hem long prea long Provo Tempol. Oli bin hop se, long sam wei, bae samting i tajem hat blong hem blong gud, mo bae hem i gobak long tingting blong hem blong go long wan misin mo stap fetful blong wok blong God. Mama i bin wantem mi blong save se hem i bin luk long ol samting we i bin hapen long kolkol naet ia olsem wan ansa long prea blong tufala long bihaf blong boe ia. “Mi bin agri wetem hem.”

Afta sam manis mo moa komunikesen wetem yang man ia, Sista Monson mo mi i bin glad tumas blong go long misinari kakae blong hem bifo hem i go long Britis Kolombia Vankuva Misin.

I wan janis we mi krosem rod blong hem long kolkol naet long Disemba ia? Mi no ting nating mo mi no biliv. Be mi biliv se miting blong mifala i ansa blong prea blong hat blong wan mama mo papa long bihaf blong boe blong tufala we tufala i laekem.

Bakegen, ol brata mo sista, Papa blong yumi long Heven i save gud long ol nid blong yumi mo bae i helpem yumi taem yumi stap askem help blong Hem. Mi biliv se i no gat wan wari blong yumi, we i smol tumas o i no impoten. Lod i save ol smol samting blong laef blong yumi.

Mi wantem endem toktok blong mi wetem wan eksperiens i no longtaem, we i tajem plante handred pipol. Hem i hapen long wan kalja selebresen blong Kansas Siti Tempol, faef manis nomo i pas. Semmak wetem fulap samting we i hapen long laef blong yumi, i luk se i jes wan narafala eksperiens we i wokaot gud. Be, taem mi lanem situesen we i go wetem kalja selebresen ia long naef bifo oli dediketem tempol, mi luksave se so long naet ia, i no bin wan nomolwan. Be i gud tumas.

Semmak wetem evri kalja taem we i go wetem ol dedikesen blong tempol, ol yut long Kansas Siti Misuri Tempol Distrik oli bin praktis long so long ol seperet grup long eria blong olgetawan. Plan i blong evriwan i mit tugeta long bigfala munisipol senta we oli rentem long Satedei moning blong so ia, blong oli save lanem wetaem mo weples blong kam insaed, weaples bae oli stanap, mo hamas spes bae i stap bitwin wanwan long olgeta, olsem wanem blong aot mo ol nara samting—plante ditel we oli sapos blong kasem long dei taem olgeta we oli gat wok ia, oli putum ol danis mo singsing ia oli go tugeta blong mekem se las so bae i smut mo i olsem ol profesenol.

I bin gat wan bigfala problem long dei ia. Ful so i dipen long ol miusik mo pikja we oli rekodem finis, we bae oli soem long wan bigfala skrin we oli singaotem Jambotron. Ol pat we oli rekodem ia oli impoten long so. Oli no mekem nomo se evri samting i joen tugeta, be wanwan vidio pat bae i anaonsem nekis so. Vidio pat ia i impoten blong mekem ful so ia i gat mining olsem wan so nomo. Mo Jumbotron ia i no wok.

Ol teknisen oli wokhad blong stretem problem ia, mo ol yut oli bin stap wet, plante handred long olgeta we oli lusum taem blong praktis. Situesen i go nogud evriwan.

Woman we i raetem mo daerektem selebresen ia, Susan Kupa, i eksplenem afta: “Taem mifala i stap muv long plan A i go long plan B kasem Y, mifala i save se bae i no wokaot. … Taem mifala i stap lukluk long taemtebol, mifala i save se bae mifala i no save mekem, be mifala i save se mifala i gat wan paoa we i moa bigwan we i stap daon long fil—3,000 yut. Mifala i nidim blong go daon mo talem long [olgeta] wanem i stap hapen mo dipen long fet blong olgeta.”3

Wan aoa bifo ol man oli kam insaed long senta, 3,000 yut i nildaon long floa mo prea tugeta. Oli bin prea se olgeta we oli stap wok long Jambotron bae oli kasem insperesen blong save wanem blong fiksim; oli bin askem Papa blong olgeta long Heven blong helpem olgeta long wanem we olgetawan, oli no save mekem from se taem i sot.

Wan i raetem hemia afta, “Hem i wan prea we ol yut bae oli neva fogetem, i no from se floa long fil ia i strong, be from se Spirit i meltem bun blong olgeta.”4

I no longtaem afta, wan long ol teknisen i kam blong talem long olgeta se oli faenem problem mo oli fiksim. Hem i talem se oli bin laki, be evri yut ia oli bin save gud moa.

Taem mifala i bin go insaed long munisipol senta long naet ia, mifala i no save long ol hadtaem blong dei ia. Afta nomo, mifala i bin save. Wanem we mifala i bin witnesem, i bin naes tumas, i smut mo i olsem ol profesenol—wan long ol bes wan we mi bin luk. Ol yut oli saenaot wetem wan spirit we i gat paoa we evriwan we oli bin stap oli bin filim. Oli bin save stret weples blong go insaed, mo weples blong stanap, mo olsem wanem blong joen wetem evriwan we i mekem so wetem olgeta. Taem mi bin lanem se taem blong praktis i katsot mo plante long ol olgeta oli bin praktis, mi bin sapraes. Bae i no gat wan i save. Lod i bin givhan long wanem oli no save mekem.

Mi neva stop blong sapraes long hao Lod i save pusum mo daerektem longfala mo tolfala blong kingdom blong Hem, be yet, i gat taem blong givim insperesen long saed blong wanwan man—o wan kalja selebresen, o wan Jambotron. Be i tru se Hem i save mekem, mo Hem i mekem, hemia i wan testemoni long mi.

Ol brata mo sista blong mi. Lod i stap long evri laef blong yumi. Hem i lavem yumi. Hem i wantem blesem yumi. Hem i wantem yumi lukaotem help blong Hem. Taem Hem i stap lidim mo daerektem yumi, mo taem Hem i stap harem mo ansarem ol prea blong yumi, bae yumi faenem hapines wanwan taem we hem i wantem blong yumi. Bae yumi mas luksave ol blesing blong Hem long laef blong yumi, mi prea olsem long nem blong Jisas Kraes, Sevya blong yumi, amen.

Show References

  1.  

    1.  2 Nifae 2:25.

  2.  

    2. Luk long Doctrine and Covenants 112:10.

  3.  

    3. Susan Cooper, insaed long Maurine Proctor, “Nothing’s Too Hard for the Lord: The Kansas City Cultural Celebration,” Meridian Magazine, 9 Mei 2012, ldsmag.com.

  4.  

    4. Proctor, Meridian Magazine, 9 Mei  2012.