Ibilangyo dagiti Bendision

Ni Presidente Thomas S. Monson


Thomas S. Monson
Ammo ti Nailangitan nga Amatayo dagiti kasapulantayo ket tulongannatayo no kiddawentayo Kenkuana ti tulongna.

Ay-ayatek a kakabsatko, daytoy a komperensia ti mangitanda iti 49 a tawenko manipud pay idi nakanunonganak, idi Oktubre 4, 1963, kas miembro ti Korum dagiti Sangapulo-ket-dua nga Apostol. Napaut a panawen ti uppat-a-pulo-ket-siam a tawen. Nupay kasta, iti adu a wagas, kasla ababa unay ti panawen manipud idi nagtakderak iti pulpito iti Tabernacle a nangtedak iti umuna unay a bitlak iti sapasap a komperensia.

Adun ti nagbalbaliwan manipud pay idi Oktubre 4, 1963. Agbibiagtayo iti naidumduma a panawen iti pakasaritaan ti lubong. Nakaad-adu dagiti paraburtayo. Ngem no dadduma narigat a kitaen dagiti problema ken panagliway iti aglawlawtayo ken saankay a maupay. Natakuatak nga imbes a panunotentayo dagiti negatibo, no kitaentayo a naimbag ken ibilangtayo dagiti parabur iti biagtayo, agraman dagiti kasla babassit, no dadduma saan a makita a bendision, agbalintayo a naragragsak pay.

Iti pannakaamirisko iti napalabas a 49 a tawen, adda sumagmamamo a natakuatak. Maysa ditoy ti saan a mabilang a padasko a saan a nasken a dagitay maibilbilang a naidaddaduma. Kinapudnona, iti panawen a napasamakda, kasla nakabasbassit ken gagangayda laeng. Ngem, no kitaenyo a nasayaat, pinabaknang ken pinaraburanda dagiti biag---nangnangruna ti bukodko a biag. Isingasingko nga aramidenyo met ti kastoy---nga amirisenyo ti biagyo ket kitaenyo nangnangruna kadagiti parabur, dadakkel ken babassit, a naawatyon.

Iti panangtaliawko iti napalabas a biagko kanayon a mapatpatibker ti pannakaammok a mangmangngegan ken masungsungbatan dagiti kararagtayo. Pamiliartayo iti kinapudno a masarakan iti 2 Nephi iti Libro ni Mormon: “Panggep dagiti tao ket tapno maaddaanda iti ragsak.”1 Paneknekak a kaaduanna dayta a ragsak ti umay no bigbigentayo a makasaritatayo ti Nailangitan nga Amatayo babaen ti kararag ken dagita a kararag ket mangngegan ken masungbatanto---nalabit a saan a no kasano ken kaano a masungbatanda, ngem dagitoy ket masungbatandanto ti Nailangitan nga Ama a makaammo ken mangipatpateg kadatayo nga awan pagkuranganna ken agtarigagay iti pagragsakantayo. Saan kadi nga inkarinan kadatayo, “Agpakumbabaka; ket kibinennakanto nge iturong ti Apo a Diosmo, ket itdennanto kenka ti sungbat dagiti kararagmo”?2

Iti sumaruno a sumagmamano pay a minuto a naited kaniak, kayatko nga iburay ti bassit a padasko a nakangngegan ken nakasungbatan dagiti kararagko, no pampanunotek, nangisangbay kadagiti parabur iti biagko kasta met iti biag dagiti dadduma pay a tao. Ti inaldaw a diurnalko, nga indulinko iti unos dagitoy a tawen, ket nakatulong a nangipaay iti sumagmamano a banag a diakon malagip pay.

Iti nasapa a panawen ti 1965, natudingannak a dumar-ay kadagiti komperensia ti stake ken mangangay iti dadduma pay a miting iti intero a lugar ti South Pacific. Daytoy ti umuna nga isasarungkarko iti dayta a paset ti lubong, ken daytoy ti panawen a diak kaano man malipatan. Adu ti naespirituan a padas a napasamak iti daytoy nakatudingak nga aramid bayat ti pannakipagkitak kadagiti lider, miembro, ken misionario.

Idi dumteng ti aldaw ti Sabado ken Domingo, Pebrero 20 ken 21, addakami iti Brisbane, Australia, tapno mangangay kadagiti sesion ti regular a komperensia ti Brisbane Stake. Kabayatan dagiti miting iti Sabado, nayam-ammoak iti district president manipud iti kabangibang a lugar. Nakilamanoak kenkuana, nariknak unay a masapul a makasaritak isuna tapno balakadak, ken tapno idawatko kenkuana no makuyognak iti kabigatanna iti sesion iti agsapa ti Domingo tapno maipatungpalko daytoy.

Kalpasan ti sesion iti Domingo, naaddaankami iti gundaway a makapagsarita. Napagsaritaanmi maipapan ti adu a pagrebbenganna kas district president. Bayat ti panagsarsaritami, nariknak a kasapulan a balakadak isuna maipanggep iti aramid a misionario ken no kasano a makatulong isuna ken dagiti miembrona kadagiti full-time a misionario iti panagtrabahoda iti lugarna a masakupan. Idi agangay naammuak nga agkarkararag daytoy a tao tapno matarabay iti daytoy a banag. Para kenkuana ti isasarungkarmi ket naisangsangayan a pammaneknek gapu ta dagiti kararagna ket dinengngeg ken nasungbatan. Kasla gagangay daytoy a panagkitami ngem ti maysa a patiek ket tinarabaynak ti Espiritu ken nakaaramid daytoy iti naidumduma a panagbalbaliw iti biag dayta a district president ken iti panangidaulona, iti biag dagiti miembrona, ken iti balligi dagiti misionario idiay.

Kakabsatko, masansan a maipatungpal dagiti panggep ti Apo no ikasotayo ti pannarabay ti Espiritu. Mamatiak a no ad-adda nga agtignaytayo iti inspirasion ken dagiti parikna nga umay kadatayo, ad-adda a pagtalkannatayo ti Apo kadagiti aramidna.

Nasursurok, kas nadakamatko kadagiti mensahek idi, a di kaano man itantan ti maysa a parikna. Iti maysa a gundaway adun a tawen ti naglabas, bayat ti panaglanglangoyko iti daan a Deseret Gym iti Salt Lake City nakariknaak iti inspirasion a mapan iti University Hospital tapno sarungkarak ti naimbag a gayyemko a dina maigaraw dagiti luppona gapu iti tumor, ken ti operasion a naaramid kenkuana. Dagus a pinanawak ti pool, nagpellesak, ket saan a nabayag napanakon tapno sarungkarak daytoy naimbag a lalaki.

Idi makadanonak iti siledna, natakuatak nga awanen ti tao idiay. Nagsaludsodak ket naammuak a nalabit a masarakak isuna iti lugar ti swimming pool ti ospital, iti lugar a nakausaran ti physical therapy. Kasta ngarud ti napasamak. Napan idiay a nakalugan iti wheelchairna ken is-isuna laeng ti adda idiay. Adda isuna iti adayo a bangir ti pool, asideg ti adalem a pasetna. Inawagak isuna, ket pinagandarna ti wheelchairna tapno umasideg a kumablaaw kaniak. Naragsak ti panagsaritami, ket kinuyogko isuna a nagsubli iti siledna iti ospital, a nangtedak kenkuana iti pammendision.

Idi agangay naammuak manipud iti gayyemko a madagdagsenan unayen isuna iti dayta nga aldaw ket pinampanunotna nga agpakamatay laengen. Nagkararag tapno magin-awaan ngem nariknana a saan a nasungbatan dagiti kararagna. Napan iti pool a pampanunotenna a daytoy ti wagas a mamaggibus iti rigatna---babaen ti panangiturongna iti wheelchairna iti adalem a paset ti pool. Simmangpetak iti dayta a napeggad a kanito, kas sungbat iti ammok a maysa nga inspirasion manipud iti ngato.

Nagbiag pay ti gayyemko iti ad-adu pay a tawen---tawtawen a napnuan iti ragsak ken panagyaman. Naragsakanak gapu ta nagbalinak a maysa a ramit kadagiti ima ti Apo iti dayta napeggad nga aldaw iti swimming pool.

Iti sabali pay a gundaway, bayat ti panagawidmi ken ni Sister Monson kalpasan ti isasarungkarmi kadagiti gagayyem, nariknak a nasken a mapankami iti ili---adu a milia pay ti kaadayona---tapno sumarungkar iti maysa a baket a balo a nagnaed iti wardmi iti naminsan. Zella Thomas ti naganna. Iti dayta a panawen, naggigian iti maysa a balay a pagaywanan. Iti dayta nasapa a malem nakitami isuna a nakakapkapsuten ngem sitatalna a nakaidda iti katrena.

Nabayagen a bulsek ni Zella, ngem nailasinna a dagus dagiti timekmi. Sinaludsodna no mabalin nga itdek kenkuana ti pammendision, a kinunana pay a nakasaganan a matay no kayat ti Apo a pagsublien iti pagtaenganna. Adda maysa a nasam-it, natalna nga espiritu iti siled, ken ammomi amin nga ababa laengen ti nabati pay nga orasna iti daytoy a biag. Inigganan ni Zella ti imak ket kinunana a nagkararag a sipapasnek tapno umayak a mangsarungkar kenkuana ken ipaayan iti pammendision. Imbagak kenkuana nga immaykami gapu iti direkta nga inspirasion manipud iti Nailangitan nga Amatayo. Inagkak ti mugingna, nga ammok a nalabit a diakton makita pay isuna iti daytoy a biag. Kasta ngarud ti napasamak, gapu ta pimmusay isuna iti kabigatanna. Ti pannakaitedko iti sumagmamano a liwliwa ken talna iti nasingpet a Zellami ket maysa a bendision kenkuana ken bendision kaniak.

Ti gundaway nga agbalin a bendision iti biag ti sabali a tao ket masansan a sumangbay a saan a ninamnama. Iti maysa a nakalamlamiis a rabii ti Sabado kabayatan ti panawen ti lam-ek ti 1983–84, nagbiahekami ken ni Sister Monson iti sumagmamano a milia a mapan iti bantay tanap ti Midway, Utah, a yan ti maysa a pagtaenganmi. Ti temperatura iti dayta a rabii ket minus 24 degrees Fahrenheit (–31°C), ken kayatmi a penken no nasayaat met laeng ti pagtaenganmi idiay. Kinitami ket naammuanmi a nasayaat met laeng, isu a pimmanawkamin nga agsubli iti Salt Lake City. Dikami pay nakaadayo iti sumagmamano a milia iti highway idi nagsardeng nga agandar ti luganmi. Naan-anay a naisadsadkamin idiay. Manmano a lamminenak, no kasta man, kas iti pannakalamminko iti dayta a rabii.

Sikekedked nga inrugimi ti nagna a napan iti kaasitgan nga ili, humagibis dagiti lugan a lumabas kadakami. Iti kamaudiananna nagsardeng ti maysa a lugan, ket indiaya ti maysa a barito a tulongannakami. Natakuatanmi idi agangay a limmaput ti diesel fuel iti tanke ti gas ti kotsemi gapu iti lamiis, a nangpabalin nga imposible a mapaandarmi pay ti kotsemi. Intulodnakami daytoy nasingpet a barito nga agawid iti pagtaenganmi iti Midway. Pinanggepko a bayadan isuna iti impaayna a serbisio ngem siaaayat a pinagkedkedanna. Imbagana nga isu ket maysa a Boy Scout ket kayatna ti agaramid iti naimbag. Inyam-ammok ti bagik kenkuana, ket impeksana ti panagyamanna iti gundawayna a makatulong. Iti panangipapanko nga agarup agtawen isuna iti edad ti misionario, sinaludsodko kenkuana no adda dagiti planona nga agserbi iti mision. Imbagana a saanna pay a masigurado no ania ti kayatna nga aramiden.

Iti kabigatan ti Lunes, sinuratak daytoy a barito ket nagyamanak kenkuana iti kinasayaatna. Iti suratko inallukoyko isuna nga agserbi iti full-time a mision. Inragpinko ti maysa a kopia dagiti librok ket inugedak dagiti kapitulo maipapan iti serbisio a misionario.

Kalpasan ti makalawas tinawagannak iti telepono ti ina ti barito ket imbagana a ti anakna ket maysa a kalaingan nga agtutubo a lalaki ngem gapu kadagiti nadumaduma nga impluensia iti biagna, napukaw ti nabayagen a tarigagayna nga agserbi iti mision. Imbagana a nagayuno ken nagkararagda iti amana tapno agbalbaliw ti pusona. Inkabilda ti naganna iti listaan dagiti ikararagan ti Provo Utah Temple. Ninamnamada a no kaskasano, iti maysa a wagas, masagid koma ti pusona para iti pagsayaatan ket agsubli iti tarigagayna nga agmision ket agserbi iti Apo a sipupudno. Kayat ti ina a maammuak a para kenkuana dagiti pasamak iti dayta a nalamiis a rabii kas maysa a sungbat dagiti kararagda para iti anakna a lalaki. Kinunak, “umanamongak kenka.”

Kalpasan ti sumagmamano a bulan ken ad-adu pay a pannakisarita iti daytoy a barito, naragsakankami unay ken ni Sister Monson a dumar-ay iti missionary farewellna sakbay ti ipapanawna a mapan iti Canada Vancouver Mission.

Naigundaway kadi laeng a nagsarak dagiti dalanmi iti dayta nalamiis a rabii ti Disiembre? Diak mamati a naigundaway laeng. Ketdi, mamatiak a ti panagkitami ket maysa a sungbat kadagiti naimpusuan a kararag da nanang ken tatangna para iti anakda a lalaki nga ipatpategda.

Manen, kakabsatko, ammo ti Nailangitan nga Amatayo dagiti kasapulantayo ket tulongannatayo no kiddawentayo Kenkuana ti tulongna. Mamatiak nga awan ti pakaseknantayo a nakabasbassit wenno awan pategna. Adda ti Apo kadagiti detalye ti biagtayo.

Kayatko nga igibus babaen iti panangisaritak ti maysa a kallabes a padas a naadddan iti epekto kadagiti ginasut a tattao. Napasamak daytoy iti parambak iti kultura para iti Kansas City Temple, lima pay laeng a bulan ti napalabas. Maitulad kadagiti adu a mapaspasamak iti biagtayo, iti dayta a panawen daytoy ket kasla maysa pay a padas a nakaurnosan ti amin a banag. Nupay kasta, idi maammuak dagiti kasasaad nga adda pakainaiganna iti parambak iti kultura iti rabii sakbay ti pannakaidaton ti templo, naamirisko a saan a gagangay ti pabuya iti dayta a rabii. Ketdi, naidaddaduma daytoy.

Kas kadagiti amin nga okasion iti kultura a naangay a mainaig kadagiti pannakaidaton ti templo, nagensayo dagiti agtutubo ti Kansas City Missouri Temple District iti pabuyada iti nagsisina a grupo kadagiti bukodda a lugar. Ti plano ket agkikitada amin iti dakkel a maupaan a municipal center iti bigat ti Sabado ti panagpabuya tapno maammuanda no kaano ken sadino ti serkanda, sadino ti pagtakderanda, no kasano ti kadakkel ti giwang iti nagbabaetanda ken ti tao a sumaruno kadakuada, kasano ti rummuar iti umuna a kadsaaran, ken dadduma pay---adu a detalye a nasken a maalada a dagus kabayatan ti agmalem a buklen ti nadumaduma a buya tapno mapapintas ken mapasayaat ti maudi a pabuya.

Adda maysa laeng a dakkel a problema iti dayta nga aldaw. Ti sibubukel a produksion ket agpannuray kadagiti nakarekord a paset a maipakitanto iti dakkel a screen a maawagan iti Jumbotron. Dagitoy nairekord a paset ket napateg unay iti sibubukel a produksion. Saanda laeng a pinagsisilpo amin dagitoy, ngem ti tunggal naka-televised a paset ti isu ti pangirugi iti sumaruno a pabuya. Dagiti video a paset ket napateg unay tapno maipatungpal ti sibubukel a produksion. Ket saan a gumana ti Jumbotron.

Sidadanag a nagtitinnulong dagiti technician a nangrisut iti problema idinto nga agur-uray dagiti agtutubo, ginasgasut kadakuada, a naibusen ti napateg nga oras ti panagensayo. Kasla imposible a marisut ti kasasaad.

Ti nagsurat ken ti direktor ti parambak, ni Susan Cooper, ket inlawlawagna idi agangay: “Bayat ti panangpadasmi iti sabasabali a plano, ammomi a saan nga omobra daytoy. …Bayat ti panangkitami iti iskediul, ammomi a saanmin a kabaelan pay daytoy, ngem ammomi nga adda kadakami ti maysa kadagiti kaindaklan a pigsa iti kadsaaran iti baba---dagiti 3,000 nga agtutubo. Kasapulanmi ti bumaba ket ibaga [kadakuada] no ania ti mapaspasamak ken makaalakami iti pigsa iti pammatida.”3

Maysa nga oras laengen sakbay a mangrugi a sumrek iti center dagiti agbuya, nagparintumeng dagiti 3,000 nga agtutubo iti suelo ket naggigiddan a nagkararagda. Inkararaganda a maparegta koma dagiti tao a mangtartarimaan iti Jumbotron tapno maammuanda no ania ti nasken a tarimaanenda iti daytoy; indawatda iti Nailangitan nga Amada a tulonganna ida a makaaramid iti saanda a kabaelan nga aramiden gapu ta awanen ti oras.

Kuna ti maysa a nagsurat maipapan iti daytoy kalpasanna, “Maysa a kararag a dinto kaano man malipatan dagiti agtutubo, saan a gapu ta natangken ti suelo, ngem gapu ta tinunaw ti Espiritu dagiti tulangda.”4

Saan a nabayag immasideg ti maysa kadagiti technician a nangibaga kadakuada a natakuatanen ken naaturen ti problema. Kinunana a suerte ti pannakasolbarna, ngem nasaysayaat nga ammo dagita amin nga agtutubo ti pudno a gapuna.

Idi sumrekkami iti municipal center iti dayta a rabii, awan ti ammomi maipapan kadagiti napasamak a parikut iti dayta nga aldaw. Idi agangay laeng a naammuanmi ti maipapan dagitoy. Nupay kasta, nasaksianmi ti nakapimpintas ken napasayaat a pabuya---maysa kadagiti kapintasan a nabuyakon. Nagraniag kadagiti agtutubo ti nagloriaan, nabileg nga espiritu a narikna ti amin a dimmar-ay. Kasla ammoda no sadino ti serkanda, sadino ti pagtakderanda, ken no kasano ti pannakidanggayda iti dadduma pay nga agpabuya nga adda iti lawlawda. Idi naammuan a nagkurang ti oras tapno agensayo ken adu kadagiti pabuyada ti saan pay a naensayo ti sibubukel a grupo, napasiddaawak. Awan ti nakaammo. Pudno a ti Apo ti nangpunno iti pagkurangan.

Agingga ita diak pulos agsardeng a masdaaw iti wagas ti Apo iti panangparegtana ken panangiturongna iti amin a banag maipanggep iti pagarianna ken addaan iti panawen a mangted iti inspirasion maipanggep iti maysa a tao---wenno maysa a parambak ti kultura wenno maysa a Jumbotron. Ti kinapudno a kabaelanna, nga aramidenna, ket maysa a pammaneknek kaniak.

Kakabsatko, adda ti Apo iti unos ti panagbiagtayo. Ay-ayatennatayo. Kayatna a bendisionannatayo. Kayatna a kiddawentayo ti tulongna. Bayat ti panangtarabayna ken panangiturongna kadatayo ken bayat ti idedengngegna ken isusungbatna kadagiti kararagtayo, makasaraktayto itn ragsak ditoy ken ita a tartarigagayanna para kadatayo. Ammotayo koma dagiti bendisionna iti biagtayo, ikararagko iti nagan ni Jesucristo, ti Mangisalakantayo, amen.

Show References

  1.  

    1.  2 Nephi 2:25.

  2.  

    2.  Doktrina ken Katulagan 112:10.

  3.  

    3. Susan Cooper, iti Maurine Proctor, “Nothing’s Too Hard for the Lord: The Kansas City Cultural Celebration,” Meridian Magazine, Mayo 9, 2012, ldsmag.com.

  4.  

    4. Proctor, Meridian Magazine, Mayo 9, 2012.