Tehk Mahs, Ahpw Papah

Sang Linda K. Burton

President Lap en Pwihn en Sawas en Lih


Linda K. Burton
Sang ni kaiahn, emenemen kitail kak duwehla Sounkomouro ni atail kin papah sapwellimen Koht serihkan.

Ehu kadehde laud me kitail ahniki me atail soukohp, President S. Monson, me Sapwellimen Kauno soun papah pilipil men, iei me e esehla idawehn karasaras en Sounkomouro—papah emenemen. Kitail akan me pidelongehr nan pihl en pepdais inoukidahr en wia soahngohte. Kitail inoukidahr en “tamataman ih ahnsou koaros [Sounkomouro] oh kapwaiada sapwellime kosonned akan,”1 oh E ketin mahsanih, “Ih ei kosonned, Kumwail en poakpene, nin duwen ei poakohng kumwail.”2

Karonge mahsen en President Monson eh kapatahiong luhkohte: “Aramas tohto limwahtail me kin anahne kitail en tehk oh kakehlail oh sawas, koalolomwahu, oh atail kadek… .Kitail me wia limen Kauno pohn sampah, oh ahniki kosonned en papah oh sewesehda oh pwokada Sapwellimehkan. E ketin koapwoaroapwoarki emenemen kitail en wia.”3

Kumwail rong—luhk en poakpene nanpwungemwail? Ong ekei aramas, papah de kalohk wad emen, idawehn sapwellimen Sounkomouro karasaras, sohte kin mengei ong irail. Pwehn sewesei kitail en mwahula nan poakohng mehteikan, I men kihda lepin lokaia pahiou mehn tamataman: iei” Tehk mahs, ahpw papah.

Kereniong sounpar paisek samwalahro, ngehi oh ei pwoud kohla nan tehnpas sarawi ong aht pwohng en nialem en mwomweitpene. Se pwopwoud kapw oh I saloh pwe keriau en ei pwurala ni ei pwopwoud kapwte. Emen lih, me mwohd limwahi mwein kasawiada. E pengdo oh mwenginingin nda, “Dehr saloh. I pahn seweseiuk.” Ei saloh meleileidi, oh I kak mwohd mwahu nan tiepenehu pwon. Lih menet tehkada mahs apw papah.

Kitail koaros luhkodohngehr en idawehn padahk kan en Sises oh en kin papahpene. Luhk wet sohte kin uhdi ong lih soulengkan. I pahn ehukiong kumwail karasaras kei duwen irail ako me eselahr duwen tehk oh ahpw papah sang karonge padahngkan en Sises me re kasaledahr.

Kisin seri en Primary sounpar weneu nda: “Ahnsou me re piliehda pwe ien sawas, I kak pilada kempoakepahi men en iang ie. I pilada pwutak emen nan ai klahso me kin mwahuki liderawas pwehki sohte pak ehu emen pilada ih. I men en nsenemwahu.”4

Dahme seri menet tehkada? E tehkada me seri me kin liderawas sohte kin pilipilda. Dahme e wia pwehn papah? E uhdahte pilada ih en kempoakapahki ara pahn soun sawas nan klahso. Sises padahngki, “Poakohng amwail imwintihti kan, kapakapki oh wia mwahu ong me kin kalokei kumwail.”5

Nan ehu ward, mie Priesthood en Aaron kei, re kin tehk oh met kin papah sang ni arail kadek lamalam. Nan wihk koaros pwutak pwulopwul pwukat pahn pwarada mwadang oh kin wie kesikesihker likin ihmw sarawio pahn kotou, snow de karakar awiawih aramas mahko ar pahn pwaredo. Re kin pwekadasang arail wheelchair ko sang nan sidohsa, kin sawas kol pehn me moangepwetdih ko oh kahreirailohng nan ihmwo. Re udahn wia pwukoah ong Koht. Ni arail tehk oh ahpw papah, re momourki karasaras en padahk en Sounkomouro. “Kumwail en ese pwe soahng koaros me kumwail wiahiong emen riei me tikitik pwukat, ngehi me kumwail wiahiong.”6 Ni ahnsou me re doadoahngki pwuhk en me pwulopwul kan, mwahnakapwpwukat udahn pahn kin doudoulahte wiewiahte doadoahk en Krais.

Kin wie tetehk oh papah, ekei pak kin wia lapalahn doadoahk. Mie peinakapw emen ede Alexandria me pil alehdi pepehm oh tehkada me emen rie serepein Madison, sohte kak kanekehla pein ah Personal Progress pwehki eh soumwahu en kahpwal en madamadau. Alexandria eri kihpene ienge peinakapw koaros nan eh wardo, tuhkiong eh kaunko, oh ngidingidkiong irail en wia mehkot ong Maddy pwe e sohte kak pein wia kelehpw. Emen emen serepeinko ahpw kanekehla ekis ekis en kamwekid ko oh dahme mih nan pwuhk en Personal Progresso pwehn sewese Maddy alehdi nah medallion.7

Peinakapw pwukat pahn doula mwahu nan pwukoah en nohno oh nan Pwihn en Sawas en Lih pwehki re kaiahndahr en keieu tehk ahpw papah nan soangen wiewia sapan tohto.

Presiden Monson katamanohng kitailehr me kadek sapan, “limpoak unsek en Krais”8—de , kin wie tetehk oh papah— “lipwen ahnsou me kitail kin taman lihohdi men oh kin sowese wahla nan kemwekid kan” oh ahnsou me emen rietail lih kin mwomwohd kelekelepw nan Pwihn en Sawas en Lih alehdi luhk, “Kohdo, mwohd limwaht. ”9 Kossoned kohlo kak doadoahk ni soangen ansou wet: “Kumwail wiahiong meteikan me kumwail kin anahne aramas akan en kin wiahiong kumwail.”10

Pil ehu karasaras en ohl insenohmen papahier nan soang kesemwpwal riau. Dene:

“I sewese ei pwoud ehu rahnsarawio rehn nah seri en Primary-ko, seri sounpar isuh me kin limwekidikid. Ahnsou me Primary tep, I tehkada me emen irail kin mwohd kospene pohn ah sehro oh mesen soumwahu. Ngehn sarawi mwengininginiongie me e anahne koaloloamwahu, eri ngehi mwohndi limah oh mwenginingin idek dah rohng. E sohte sapeng… , ngehi eri tepda koulieng.

“Primary-o wie onohnopki koul pwoat, oh ni aht wie kokoulki, ‘Ma I rongki ahi mohngiong, I kin rong kapitien Sounkomouro,’ ngehi eri tepda kehn kamarain laud oh pepehm mwahu audehla palingenie, I alehdi pein ai kadehde duwen sapwellimen Sounkomouro limpoak ong serio…ongie…kitail me kin weliandi limen kauno en papah emen emen.”11

Kaidehnte me ohl menet wia pwukoahn idawehn Krais ni eh tehkada me e anahne sewese eh pwoud rehn seri sounpar isuh limwekidikid; ahpw e pil papah serihmen me anahne sawas. E idawehn Sounkomouro, me padahngki, “Mehkan me kumwail kilang ie wia, ih me kumwail pahn pil wia.”12

Ansou kerendo, mie lapake ieu me wiawi me elehieng ansou mwahu tohtome tohnpadahk kan en Sises Krais en tehkada mahs oh papah. Ohl oh lih, me pwulopwul oh seri kan, ar kilangada me pisinis ko oh ihmw kan ahr ohla, re pwilikihdi dahme irail wiewia oh tepda sawas kamwakel oh kamwkamwahwiala. Ekei tehkada me me sawas re kak kihda ni lopworada kopwe. Ekei kin dahlimwih kilel ko oh soangsoangen doaropwe kesemwpwal kei oh kin kanaiohng tenekihseli wen me re kak pahn ketipin pwehn madala. Tetehk oh ahpw papah sohte kin kalapw mengei oh sohte kin itar pein atail ahnsou.

Ia wasa me mwahu sang nan ihmw en tehk mahs oh ahpw papah. Karasaras ehu sang mour en Elder Richard G. Scott. E kasalehda:

“Ehu pwohngo nait kisin pwutak Richard, me kin kohwahki soumwahu en mohngiong, pirida wie sengseng….ai pwoud me kin pwourda oh apwalih seri sengseng, apw met I nda, ‘I nek apwalih.’

“Pwehki eh kahpwalo, ni eh kin tepda sengseng, ah kisin mohngiongo kin kumwukumw pitipitla. E tepda mwus oh mwusdiong pohn ah pehto. Pwohngo, I koledi ih pahnedi en koaloalomwahuwihdi eh mohngiong en wawaila oh kawuhdi eh sengseng ni ei welianda ah likouko oh kidipen ah pehto. I kol ih lao ih meirla. I sohte ese ahnsouo me mwurin sounpwungkei serio pahn ahpw mehla. I pahn taman erein duwen ai kol ih nan pehikat nin lukopen pwohngo.”13

Sises masahnih, “Mehmen me men lapalap rehmwail, e pahn papah meteikan.”14

Ekei pak kitail kin men papahte ni mwohmw me nsenetail nin duwen me kitail men ahpw kaidehn udahn ni wiepe me anahnpe nan ahnsouo. Ni en Elder Robert D. Hales padahngki padahk en duwen mourki kasohtik, e ehuki karasaras en pwainda kisakis ong eh tungoal wereko. Eh werek idek, “Ke pahn pwainda dipwisouen ohngie de ong kowe?”15 Ma kitail doadoahngki iren peidek wet ong pein kitail ni atail kin papah oh idek, “I wiewia met ong Sounkomouro de I wiewia met ong pein ngehi?” atail papah en sawas pahn kin udahn en duwehte en Sounkomouro. Sounkomouro keinemwehier rehtail, oh eri kitail pil, “Dahme komwi ketin kupwurki ien wia?”16

Wihk kei samwalahro, I karuwaru oh pwunodadahki eh tohto dahme I pahn wia. I kin koapwoaroapwoarki ien kohla ni tehnpas sarawio rahno apw I nohn kediropw. Ni ahnsou me madamadawo kohdo nan moangei me I nohn kediropw en kohla nan tehnpas sarawio, e panginiehda dahme keiou anahne wia mahs. Eri ngehi mweselsang ahi ohpiso alu kohla ni tehnpas sarawi en Salt Lake, medemedewe iahd me I pahn kapwungala kuloako. Ahpw I kalahnganki, Kauno eh kanemengah, kupwurkadek, oh padahkiongie padahk ieu rahno.

Ni ei mwohndi nan perehn tiepenehu, lih pwulopwul men pengdo oh mwenginingindo nda, “Udahn I saloh. Met iei keriau en ahi kohdo nan tehnpas sarawi. Komw kak menlau sewesei ie?” Ia mwomwen eh kakete ese me ih mahsen me I udahn anahne rong? E sohte ese, ahpw Sahm Nanleng me mwahngih. E ketin tehk ei anahn laud. I udahn anahne papah. E kamwekiddada lih karakahk menet en papah ie ni lukei ie ien papah ih. I pahn ndahwei, ni mehlelo me ngehi me uhd alehda kamarain laud.

I kin inenen kapingki mehlel uwen tohtohn aramas me kin idawehn Krais me papahier aht peneinei erein pahr tohto, sang nan ahi mohngiong I kasalehda ai kaping kalahngan ohng ai ei werek oh peneinei, me kin pahpa ni soh lehk oh ni limpoak mehlel.

Kitail koaros en rapahki mahs en tehk, mwuri papah. I kadehde me ma kitail pahn wia, atail papah, duwehte President Monson, pahn wia kasalepen atail miniminpenehn tohnpadahk. I ese me Sounkomouro ieias oh President Monson me atail soukohp en rahnwet. Ni mwaren Sises Krais, ahmen.

Show References

  1.  

    1. TehkDoctrine and Covenants 20:77.

  2.  

    2.  Sohn 15:12.

  3.  

    3. Thomas S. Monson, “What Have I Done for Someone Today?” Liahona oh Ensign, Nopempe 2009, 86.

  4.  

    4. Canyon H., “A Good Choice,” Friend, Senweri 2012, 31.

  5.  

    5.  Madiu 5:44.

  6.  

    6.  Madiu 25:40.

  7.  

    7. Tehk “For Madison,” lds.org/youth/video/for-madison.

  8.  

    8.  Moroni 7:47.

  9.  

    9. Thomas S. Monson, “Charity Never Faileth,” Liahona ohEnsign, Nopempe 2010, 125; pil tehk Daughters in My Kingdom: The History and Work of Relief Society (2011), 101.

  10.  

    10.  3 Nephi 14:12.

  11.  

    11. Al VanLeeuwen, “Serving the One,” Liahona, Oakos 2012, 19; Ensign, Oakos 2012, 15; pil tehk Sally DeFord, “If I Listen with My Heart,” 2011 Outline for Sharing Time, 28.

  12.  

    12.  3 Nephi 27:21.

  13.  

    13. Richard G. Scott, “The Eternal Blessings of Marriage,” Liahona oh Ensign, Mei 2011, 96.

  14.  

    14.  Madiu 20:26.

  15.  

    15. Robert D. Hales, “Becoming Provident Providers Temporally and Spiritually,” Liahona oh Ensign, Mei 2009, 9.

  16.  

    16.  Madiu 20:32.