God I Stap Wetem Yufala Kasem Taem Yumi Mit Bakegen

I Kam long Presiden Tomas S. Monson


Tomas S. Monson
Taem yumi tekem ol mesej blong ol las tu dei insaed long hat mo laef blong yumi, bae yumi gat blesing.

Ol dia brata mo sista blong mi. Yumi kam long en blong wan narafala jeneral konfrens wetem insperesen. Miwan, mi kasem kakae long saed blong spirit mo kam antap, mo mi save se yufala i filim spesel spirit blong konfrens ia.

Mifala i talem bigfala tangkyu long olgeta evriwan we oli bin tekpat long sam wei. Ol trutok blong gospel, oli tijim gud olgeta mo poenemaot gud olgeta. Taem yumi tekem ol mesej blong ol las tu dei insaed long hat mo laef blong yumi, bae yumi gat blesing.

Olsem oltaem, wanem i bin kamaot long konfrens ia bae i kamaot long ol namba blong Ensign mo Liahona magasin. Mi leftemap tingting blong yufala blong ridim ol toktok ia bakegen mo blong tingting hevi long ol mesej we oli stap insaed. Long laef blong mi, mi faenem se mi kasem moa samting long ol toktok ia taem mi stadi dip moa long olgeta.

Konfrens ia i bin go olbaot long wol, i go krosem ol kantri mo ol solwota long ol pipol long evri ples. Nomata mifala i stap longwe long plante long yufala, mifala i filim spirit blong yufala mo sendem lav mo tangkyu blong mifala i go long yufala.

Long Ol Brata blong yumi we oli bin rilis long konfrens ia, mi wantem talem bigfala tangkyu blong hat blong mi long yumi evriwan from ol plante yia blong seves. Plante tumas oli bin kasem blesing tru long ol kontribusen blong yufala long wok blong Lod.

Ol brata mo sista. Mi jes selebretem namba 85 betdei blong mi, mo mi glad tumas long wanwan yia we Lod i givim long mi. Taem mi tingbak long eksperiens blong laef blong mi, mi talem tangkyu long Hem from evri blesing blong Hem we oli kam long mi. Olsem we mi talem long mesej blong mi long moning ia, mi bin filim han blong Hem i lidim ol hadwok blong mi taem mi bin traehad blong wok blong Hem mo givim seves long yufala evriwan.

Ofis blong Presiden blong Jos i wan we i gat fulap wok long hem. Mi talem tangkyu tumas from tufala fetful kaonsela blong mi, we oli wok long saed blong mi mo oli oltaem glad mo save help gud long wok ia we i kam long Fas Presidensi. Mi talemaot tangkyu blong mi tu long ol gudfala man we oli stap long Kworom blong Olgeta Twelef Aposol. Oli neva taed blong wok long gudfala wok blong Masta, wetem ol memba blong Ol Kworom blong Olgeta Seventi we oli givim tabu help long olgeta.

Mi wantem presem yufala, ol brata mo sista blong mi, weaples yufala i stap long hem raon long wol, from evri samting we yufala i stap mekem long ol wod mo ol branj, ol stek mo ol distrik blong yufala. Taem yufala i glad blong mekem koling blong yufala, yufala i stap help blong bildimap kingdom blong God long wol ia.

Bae yumi lukaot long wanwan long yumi, givim help long taem blong nid. Bae yumi no tokbaot nogud mo jajem man, be bae yumi putum tingting i stap daon, mo mekem semmak long eksampol blong Sevya blong gat lav mo kaen fasin. Wetem tingting ia, bae yumi glad blong wok blong wanwan long yumi. Bae yumi prea blong kasem insperesen blong save ol nid blong olgeta raon long yumi, mo bae yumi go fored mo givhan.

Bae yumi stap glad mo gohed long laef. Nomata yumi stap long ol taem blong denja, Lod i lavem yumi mo i gat tingting long yumi. Hem i stap oltaem long saed blong yumi mo mekem wanem i stret. Bae Hem i helpem yumi long taem blong nid. Ol hadtaem oli kam long laef, ol problem we yumi no tingting long olgeta mo yumi no jusum. I no gat wan long yumi i save ronwe. Stamba tingting blong laef ia i blong lanem samting mo gro blong kam moa olsem Papa blong yumi, mo plante taem, hem i long ol hadtaem we yumi lanem plante samting, nomata ol lesen oli had tumas. Laef blong yumi i save fulap long glad taem yumi stap folem ol tijing blong gospel blong Jisas Kraes.

Lod i askem: “Stap glad. Mi mi winim wol ia.”1 Save ia i mas karem bigfala glad i kam long yumi. Hem i bin laef from yumi, mo Hem i bin ded from yumi. Hem i bin pem praes from sin blong yumi. Bae yumi mekem folem eksampol blong Hem. Bae yumi soem bigfala glad blong yumi long Hem taem yumi akseptem sakrifaes blong Hem mo laef long wei we bae yumi kwalifae blong gobak mo laef wan dei wetem Hem.

Olsem we mi bin talem long ol konfrens bifo, mi talem tangkyu from ol prea long bihaf blong mi. Mi nidim olgeta; mi filim olgeta. Mifala, olsem ol Jeneral Atoriti, mifala i tingbaot yufala evriwan mo prea se bae ol gudfala blesing blong Papa long Heven i stap long yufala.

Nao, ol brata mo sista we mi lavem tumas. Yumi stop mo kambak long sikis manis. Bae God i stap wetem yufala kasem taem yumi mit long taem ia. Long nem blong Sevya mo Ridima, we i Lod Jisas Kraes, amen.