Helpem Olgeta Blong Tingting Longwe

I Kam long Presiden Henri B. Aering

Fas Kaonsela long Fas Presidensi


Henri B. Aering
Wetem help blong yu, olgeta we yu lidim bae oli save luk, wantem mo bilivim se oli save kasem fulwan paoa blong wok long kingdom blong God..

Mi glad tumas long janis ia blong stap long impoten prishud miting ia, blong harem gud tijing mo testemoni. I mekem mi tingbaot taem mi wan boe. Kolosap evri samting we mi ting mi save mekem olsem wan we i gat prishud hem i from wanwan man i save mi, i luk ol samting long mi, we mi no save luk olgeta.

Taem mi wan yang papa, mi bin prea blong save wanem wok nao bae ol pikinini blong mi bae oli mekem long kingdom blong Lod. Long saed blong ol boe, mi bin save se oli gat ol janis long saed blong prishud. Long saed blong ol gel, mi bin save se bae oli givim seves taem oli ripresentem Lod. Evriwan bae i mekem wok blong Hem. Mi bin save se wanwan i defren, mo from hemia, Lod bae i givim olgeta ol defren presen blong wanwan i yusum long seves we bae oli givim long Hem.

Nao. Mi no save talem evri papa mo evri lida blong ol yut, wanem ol samting nao i gud moa blong yufala i mekem. Be mi save promesem yufala se bae yufala i blesem olgeta taem yufala i helpem olgeta blong luksave ol presen long saed blong spirit we oli bon wetem. Evri man mo woman i defren, mo i gat wan defren wok blong mekem. I no gat wan i kam long wol blong stap nating. Taem yu askem revelesen blong luk ol presen we God i luk insaed long olgeta we yu lidim insaed long prishud—speseli ol yangfala—bae yu gat blesing blong mekem oli luksave seves ia we oli save mekem. Wetem help blong yu, olgeta we yu lidim bae oli save luk, wantem mo bilivim se oli save kasem fulwan paoa blong wok long kingdom blong God.

Wetem ol pikinini blong mi, mi bin prea blong kasem revelesen long hao nao bae mi helpem olgeta wanwan blong oli rere long ol stret janis blong wok blong God. Mo afta, mi bin traem blong helpem olgeta blong gat pikja, blong hop mo blong wok from impoten fiuja ia. Mi bin kavem wan wud blong wanwan boe blong mi wetem wan toktok blong skripja we i tokbaot wanem mi bin luk we bae i olsem spesel presen blong wanwan mo wan pikja we i ripresentem presen ia. Andanit long pikja mo toktok, mi kavem deit blong baptaes mo deit blong prishud odinesen blong olgeta, wetem longfala blong hem we hem i gat long deit blong wanwan taem ia.

Bae mi tokbaot wud we mi bin kavem blong wanwan boe blong mi blong helpem hem blong luk ol presen blong hem long saed blong spirit, mo wanem hem i save mekem long wok blong Lod. Bae yu save kasem insperesen, semmak olsem mi, blong luksave ol spesel presen ia, mo ol spesel janis, we wanwan yut we yu lavem mo lidim, i gat.

Taem bigfala boe blong mi i kam dikon mo wan Igel Skaot, pikja blong igel i kam long maen blong mi, mo mi tingbaot hem mo fiuja blong hem. Mifala i bin stap long Aedaho kolosap long Saot Teton hil, mo mifala i bin wokbaot tugeta mo lukluk ol igel oli stap flae. Pikja ia long maen blong mi i givim filing blong ol toktok blong Aesea we yumi bin harem oli kwotem finis long konfrens ia.

“Olgeta we oli taed, hem i stap givim paoa long olgeta, mo olgeta we oli no strong, hem i stap mekem olgeta oli strong bakegen.

“Ol yangfala oli save kam slak we oli taed olgeta, mo ol yang man oli save foldaon we oli taed nogud.

“Be olgeta we oli stap luk long Hae God blong hem i givhan long olgeta, bambae hem i stap givim paoa long olgeta, bambae oli girap olsem we oli gat wing, olsem igel, bambae oli save resis gogo, be [oli] no save taed, mo oli save wokbaot i go longwe be oli no save kam slak.” 1

Wanem i tru se, wetem bigfala boe ia, mifala i bin stop wokbaot andanit long top blong Saot Titon from se boe blong mi i taed. Hem i bin wantem blong stop. Hem i talem, “Bae mi filim sore ia sapos yumitu no go kasem top? Papa, yu gohed—mi no wantem yu harem nogud.”

Mi ansa: “Bae mi no save harem nogud, mo bae yu neva harem sore. Oltaem bae yumitu tingbaot se yumitu klaem tugeta.” Long top blong wud blong hem we i makem tolfala blong hem, mi kavem wan igel, wetem toktok ia “Antap long ol wing blong igel.”

Afta sam yia, boe blong mi i go hae moa olsem wan misinari bitim we mi bin tingting long hem long ol hop blong mi. Long ol jalenj blong misin blong hem, sam long yufala, i luk se i hae tumas long hem. From boe ia we bae yu leftemap, ating, mo hemia i bin olsem long boe blong mi, ating Lod i bin leftemap hem hae moa taem hem i prijim gospel long wan had lanwis. Sapos yu traem, wetem eni yang man, blong mekem hem i luksave prishud responsabiliti blong hem, mi promesem yu se Lod bae i talemaot hamas we yu nidim. Boe ia, ating i gat samting we i save mekem moa, ating moa bitim wanem Lod bae i talemaot long yu. Helpem hem blong tingting longwe.

Boe ia we yu stap leftemap tingting blong hem, ating i no toktok tumas, i no naf blong i wan strong prishud wokman. Wan nara boe blong mi i no stap toktok tumas taem hem i smol; bae hem i no save wokbaot i go long wan stoa mo toktok long stoakipa. Hem i fraet tumas. Mi stap wari taem mi bin stap prea from prishud fiuja blong hem. Mi bin stap tingting long hem we i stap long misin fil—mo i no givim wan gud pikja nating. Mi kam blong luk wan skripja long Ol Proveb: “Man nogud i save fraet isi nomo. Nating we i no gat man i ronem hem, be hem i save ronwe kwiktaem nomo, be man we i stret, hem i no save fraet, tingting blong hem i strong we i strong, olsem laeon nomo.”2

Mekem se mi kavem “Strong olsem Laeon” long wud blong hem, andanit long pikja blong bigfala hed blong laeon we i stap singaot. Long misin blong hem mo ol yia afta, hem i mekem hop long kaving blong mi i kamtru. Boe blong mi we i no save toktok i prijim gospel wetem strong tingting mo i fesem ol denja wetem strong paoa. Hem i kam antap long ol responsabiliti blong hem blong ripresentem Lod.

Hemia i save hapen long yangfala man ia we yu stap lidim. Yu nidim blong bildimap fet blong hem se Lod i save jenisim hem i kam wokman we i strong moa bitim slakslak boe we yu stap luk naoia.

Yumi save se Lod i mekem ol wokman blong Hem i kam strong. Yang boe Josef we i bin luk God Papa mo Pikinini blong Hem, Jisas Kraes, long wan bus blong ol tri, i bin jenis i kam wan strong man long saed blong spirit. Parli P. Prat i bin luk hemia taem Profet Josef Smit i bin sakemaot ol toktok blong ol nogud gad we oli holemtaet hem prisena. Elda Prat i raetem:

“Wantaem hem i stanap long leg blong hem, mo toktok wetem wan voes blong tanda, o olsem singaot blong laeon, i talem, olsem we mi save tingbaot, i talem ol toktok ia:

“‘YUFALA I STOP! , Yufala ol devel blong hel. Long nem blong Jisas Kraes mi sakemaot yufala, mo givim oda long yufala blong stap kwaet; bae mi no stap wan moa minit mo harem kaen lanwis ia. Stopem kaen toktok ia, o yu o mi i ded NAOIA!’”

Long saed blong eksperiens ia, Elda Prat i raetem, “Man blong heven mo tabu man, mi bin luk wan taem ia nomo, taem hem i stanap wetem ol jen long medelnaet, long wan hol blong kalabus long wan vilej long Misuri.”3

Lod bae i givim ol stret mo gud wokman blong Hem, ol janis blong stap strong olsem ol laeon, taem oli toktok long nem blong Hem mo olsem ol witnes blong prishud blong Hem.

Wan nara boe blong mi, taem i yangfala, i gat wan bigfala grup blong fren we oli wantem stap wetem hem. Hem i save go wetem eni man. Taem mi stap prea mo stap traem blong luksave fiuja kontribusen blong hem long kingdom blong God, mi filim se bae hem i gat paoa blong pulum ol pipol oli kam tugeta long lav mo yuniti.

Hemia i lidim mi long stori, long Doktrin mo Ol Kavenan, we i tokbaot ol wok blong ol elda blong prishud blong bildimap Saeon long Misuri long ae blong ol enjel we oli bin luk traehad mo wok blong olgeta. Hemia i nidim bigfala sakrifaes. Revelesen long Doktrin mo Ol Kavenan i talem: “Be, mi blesem yufala, from testemoni we yufala i talem, oli rekodem long heven blong ol enjel oli lukluk long hem; mo oli glad long yufala, mo mi fogivim ol sin blong yufala.”4

Long wud blong boe blong mi, mi kavem “Ol Enjel Oli Glad long Yu.”

Paoa blong boe ia blong pulum tugeta mo lidim ol pipol i bin gohed i bitim taem we hem i stap skul. Wetem ol narafala man we oli kasem prishud, hem i bin oganaesem ol stek aktiviti we i givim ol yut long eria blong hem, fet blong stap strong mo win long ol had situesen. Taem hem i stap bildim fet long ol yang man mo woman ia, hem i bin help blong bildimap ol smol grup blong Saeon long ol taon blong Amerika. Long kaving blong hem, mi kavem ol enjel we oli blo long pupu; ating i no olsem we oli mekem, be i moa isi blong kavem wan pupu bitim blong kavem wan singaot.

Ol enjel oli stap glad taem ol prishud lida raon long wol oli stap bildimap Saeon long ol wod, stek, mo misin blong olgeta. Mo oli stap glad long ol yang man mo woman we yu stap helpem olgeta blong bildim Saeon long weaples oli stap long hem mo long wanem situesen oli stap long hem. Saeon, i risal blong ol pipol we oli joen long kavenan mo long lav. Mi invaetem yufala blong helpem ol yut blong yumi blong joen.

Long wan boe blong mi, mi filim blong kavem wan san—hemia san long skae—mo ol toktok we oli kam long Prea blong Sevya long Bihaf blong Ol Man: “Hemia nao Laef we I No Save Finis.” Kolosap long en blong seves blong Hem long wol ia, Sevya i bin prea long Papa blong Hem:

“Mo laef ya, i min se man i save yu, we yu nomo yu tru God, mo i save mi, se mi Jisas Kraes, we yu sanem mi mi kam.

“Mi mi leftemap nem blong yu long wol ia mo mi finisim ol wok yu givim long mi blong mi mekem.”5

Boe blong mi i givim prishud seves raon long tri bigfala ples, be moa impoten, insaed long hom mo insaed famle blong hem. Hem i bildim laef blong hem raon long olgeta. Hem i wok kolosap long hom, mo plante taem, hem i gobak hom blong joenem waef mo ol pikinini long taem blong lanj. Famle blong hem i stap kolosap long Sista Aering mo mi. Oli stap lukaot long yad blong mifala olsem se i blong olgeta. Boe ia i stap laef, i no blong kwalifae blong laef we i no save finis nomo, be tu, blong laef wetem ol memba blong famle raon long hem blong taem we i no save finis, we hem i stap pulum olgeta oli kam tugeta raon long hem.

Laef we i no save finis, i yuniti, insaed long ol famle, wetem Papa, Pikinini, mo Tabu Spirit. Laef we i no save finis, i posibol tru long ol ki blong prishud blong God we oli bin kambak tru long Profet Josef Smit. Blong mekem hemia i wan gol we i no save finis long fored blong ol yut we yu stap lidim, i wan bigfala presen we yu save givim olgeta. Bae yu mekem faswan tru long eksampol blong yu insaed long famle blong yuwan. Olgeta we yu stap lidim, ating oli no gat wan famle insaed long Jos, be mi givim jalenj long yu blong helpem olgeta blong filim mo wantem lav blong wan famle, long tugeta saed blong vel.

Ol pis wud we mi tokbaot oli wan wei blong helpem ol yang pipol blong kasem hae pikja we God i stap luk long olgeta, mo long fiuja mo spesel seves we Hem i stap mekem olgeta oli rere blong givim. Bae Hem i helpem yu blong luk olsem wanem blong mekem hemia long pikinini blong yu, o ol nara yut yu stap lidim. Be taem yu stap prea blong luk smol long fiuja ia yuwan mo talemaot long yangwan ia, wanwan, bae yu kam blong save se God i lavem wanwan long ol pikinini blong Hem, wanwan long olgeta, mo i luk ol bigfala mo spesel presen long wanwan long olgeta.

Olsem wan papa, mi gat blesing blong luk ol bigfala fiuja long kingdom blong God, blong ol gel blong mi tu, semmak wetem ol boe blong mi. Taem mi prea blong lukaotem help, mi bin luk wan rod blong helpem ol gel blong mi blong luksave tras we God i putum long olgeta olsem ol wokwoman we oli save bildim kingdom blong hem.

Taem ol gel blong mi oli bin yangfala, mi bin luk se mifala i save helpem wanwan long mifala blong filim lav blong olgeta long narasaed blong vel, tru long olgeta jeneresen. Mi bin save se lav i kam long seves mo i givim hop blong kasem laef we i no save finis.

Mekem se mifala i stap kavem ol wud blong katem bred, mo putum wan bred we mifala i bekem, mo go tugeta blong givim long ol wido, ol man wido, mo ol famle. Toktok we mi kavem long wanwan wud ia blong katem bred i ridim, “J’aime et J’espere” long Franis we i minim “Mi lavem mo Mi hop.” Pruf blong wanwan spesel presen blong olgeta i no kamaot nomo long bod we mi stap kavem, be i kamaot klia moa taem mifala i stap serem long olgeta we oli gat nid, oli stap harem nogud o lusum wan, we oli luk se lav blong Sevya mo Atonmen blong Hem i save givim wan stret laet blong hop. Hemia laef we i no save finis long ol gel blong mi, mo long wanwan long yumi.

Nao, ating yu tingting’ “Brata Aering, yu stap talem se mi nid blong lanem olsem wanem blong kavem wud?” Ansa i no. Mi bin lan blong mekem kaving wetem help blong wan gudfala tija we i gat presen ia, we i Elda Boed K. Peka bifo. Wanem smol skil mi kasem, i from bigfala presen blong hem olsem wan man blong mekem kaving, mo fasin blong hem blong wet longtaem olsem wan tija. Heven nomo i save givim wan tija olsem Presiden Peka. Be i gat plante wei we yumi save sepem hat blong ol pikinini, mo i no nidim wan pis wud o wud blong makem man blong kavem.

Eksampol, ol niu teknoloji blong komunikesen i givim janis blong serem mesej blong fet mo hop i gotru ol ples we i seperetem yumi, kwiktaem mo i no sas. Waef blong mi i stap helpem mi blong mekem hemia. Mifala i stat toktok long telefon wetem ol apu pikinini, mo ol pikinini we mifala i save kasem olgeta. Mifala i askem olgeta blong serem ol stori blong sakses blong olgetawan mo ol seves we oli givim. Mifala i stap invaetem olgeta blong sendem ol foto blong ol aktiviti ia. Mifala i yusum ol foto ia blong soem sam toktok long skripja. Mifala i putum wan o tu ves moa blong Buk blong Momon. Ating Nifae mo Momon bae i no sapraes long kwaliti blong spirit we i stap long wanem mifala i krietem mo singaotem “Famle Jenol: Ol Smol Plet.” Mifala i kolem smol plet from ol smol plet i gat ol samting long saed blong spirit nomo mo karemaot ol nara samting. Mifala i tingting se no yumi no rekodem futbol tumas mo ol nara samting. Be Sista Aering mo mi i kasem blesing long wok ia. Mifala i filim insperesen blong jusum wan toktok long skripja mo sam mesej blong sam testemoni we mifala i raetem. Mo mifala i luk pruf long laef blong olgeta se hat blong olgeta i tanem i go long mifala mo long Sevya mo i go antap.

I gat ol wei blong go aot; yufala i stap mekem plante finis. Fasin blong stap mekem famle prea, mo skripja riding bae i mekem ol memori oli stap mo i gat moa jenis long hat bitim we yu luksave naoia. Iven sam aktiviti, olsem blong go long wan spot, luk wan muvi, i save sepem hat blong wan pikinini. Wanem i moa impoten i no aktiviti be filing we i kam taem yufala i mekem. Mi bin faenem wan gud tes blong faenem ol aktiviti we i gat paoa blong mekem samting i defren long laef blong wan yangfala. Hem i taem olgeta oli talem wan aktiviti taem oli filim se oli gat intres long hem from i olsem wan presen we i kam long God. Mi save se i posibol, tru long eksperiens blong mi.

Taem mi kam wan dikon taem mi gat 12 yia, mi bin stap long Niu Jesi, 80 kilometa long Niu Yok Siti. Mi bin drim se mi wan bigfala besbol plea. Papa blong mi i bin agri blong tekem mi go luk wan gem we oli plei long olfala Yanki Stedium long Bronks. Mi save luk swing blong Joe DiMagio we i mekem wan homran long medelfil, wetem papa blong mi i stap long saed blong mi; wan taem ia nomo we mitufala i go long wan bigfala besbol gem tugeta.

Be wan nara dei wetem papa blong mi i sepem laef blong mi blong oltaem. Hem i tekem mi long Niu Jesi i go long hom blong wan petriak long Sol Lek Siti. Mi neva luk man ia bifo. Papa blong mi i livim mi long doa. Petriak i tekem mi go long wan jea, i putum han blong hem antap long hed blong mi, i givim wan blesing, olsem wan presen we i kam long God, we i talemaot ol bigfala tingting blong hat blong mi.

Hem i talem se mi mi wan long olgeta we oli talem: “Blesing i stap long ol man blong mekem pis.”6 Mi bin sapraes tumas se wan strenja bae i save hat blong mi, mekem se mi openem ae blong mi blong luk rum ia we merikel ia i stap hapen long hem. Blesing ia we i talem wanem mi save mekem i sepem laef blong mi, mared blong mi, mo prishud seves blong mi.

Aot long eksperiens ia mo wanem i kam afta, mi save testifae, “From i no evriwan we mi givim evri presen long olgeta; from we i gat plante presen, mo long evri man, mi givim wan presen tru long Spirit blong God.”7

From we Lod i talemaot wan presen blong mi, mi bin save luksave mo rere from ol janis blong yusum presen ia blong blesem olgeta we mi lavem mo givim seves long olgeta.

God i save ol presen blong yumi. Jalenj blong mi long yufala mo long mi, i blong prea blong save ol presen we yumi bin kasem, blong save olsem wanem blong developem olgeta, mo blong luksave ol janis we God i givim long yumi blong givhan long ol narawan. Be antap long evri samting, mi prea se bae yufala i kasem insperesen blong helpem ol narawan blong faenemaot ol spesel presen blong olgeta we i kam long God blong givim seves.

Mi promesem yu se sapos yu askem, bae yu kasem blesing blong helpem mo leftemap ol narawan i go kasem ful paoa blong olgeta long seves blong olgeta we yu lidim mo lavem. Mi testifae long yu se God i laef, Jisas i Kraes; hemia i prishud blong God we yumi holem mo God i mekem yumi rere wetem ol spesel presen ia blong givim seves long Hem bitim evri hop we yumi gat. Long nem blong Jisas Kraes, amen.

Show References

  1.  

    1.  Aesea 40:29–31.

  2.  

    2.  Ol Proveb 28:1.

  3.  

    3.  Autobiography of Parley P. Pratt, ed. Parley P. Pratt Jr. (1938), 211.

  4.  

    4. Luk long Doctrine and Covenants 62:3.

  5.  

    5.  Jon 17:3–4.

  6.  

    6.  Matiu 5:9.

  7.  

    7. Luk long Doctrine and Covenants 46:11.