Vukei Ira me ra Dau Ta iCake

Mai Vei Peresitedi Henry B. Eyring

iMatai ni Daunivakasala ena Mataveiliutaki Taumada


Henry B. Eyring
Ena nomu veituberi, ena rawa kina vei ira o liutaka me ra raica, vinakata, ka vakabauta ni rawa ni ra yacova na ivakatagedegede cecere duadua ni nodra veiqaravi ena matanitu ni Kalou.

Au vakavinavinakataka vakalevu na madigi meu mai tiko ena soqoni cecere ni matabete oqo, ka mai rogoca na veivakavuvuli kei na ivakadinadina vakasakiti. E vakavuna meu nanuma lesu na veika au sa sotava oti. E voleka ni veika kece au sa qarava rawa ena noqu itutu vakamatabete e baleta ni o ira na tamata era kilai au, era raica na veika e tu vei au kau a sega ni raica vakaiau.

Niu a se tama gone, au a masuta meu kila na veika era rawa ni cau kina na luvequ ena matanitu ni Turaga. Me baleti iratou na gonetagane, au kila ni rawa ni donumaki iratou na veimadigi eso ni matabete. O iratou na yalewa, au kila ni ratou na veiqaravi ena nodratou matataka na Turaga. Era na cakava kece tiko na Nona cakacaka. Au kila ni ratou tamata yadua, ka na solia vakakina na Turaga vei iratou yadua e dua na isolisoli me ra vakayagataka ena nodra veiqaravi ena vukuna.

Au na sega ni rawa ni tukuna vei kemuni yadua na tama kei na iliuliu yadua ni itabagone na matailalai ni veika vinaka duadua mo cakava. Ia e rawa niu yalataka vei iko ni ko na vakalougatataki ira me vukei ira me ra kila na isolisoli vakayalo era a sucu vata mai. Era duidui na tamata kece ka duidui na cau e rawa ni ra cakava. E sega ni dua e sagai me druka. Ni o vakasaqara na ivakatakila mo raica kina na isolisoli ka raica na Kalou vei ira o liutaka tiko ena matabete—vakauasivi vei ira na gone—o na vakalougatataki mo laveta cake na ivakarau ni nodra rai ki na veiqaravi e rawa ni ra cakava. Ena nomu veituberi, ena rawa kina vei ira o liutaka me ra raica, vinakata, ka vakabauta ni rawa ni ra yacova na ivakatagedegede cecere duadua ni nodra veiqaravi ena matanitu ni Kalou.

Ena vukudratou na luvequ, au a masuta na ivakatakila meu kila kina na sala e rawa niu vukei iratou yadua kina me ratou vakarautaki iratou ena veimadigi duidui me ratou qarava kina na Kalou. Oti au qai tovolea meu vukei iratou me ratou raica, nuitaka, ka cakacakataka na vunilagi oqo. Au a ceuta e dua na papa me baleti iratou yadua na luvequ tagane ka dua na kena malanivosa mai na ivolanikalou me vakamacalataka na nona isolisoli talei kei na dua na iyaloyalo me matataka na isolisoli oqo. Ena ruku ni iyaloyalo kei na italanoa, au ceuta kina na nona siga ni papitaiso kei na siga e tabaki kina ki na veitutu ni matabete, ka makataki na kena balavu ena tikinisiga ni veigauna yadua oqori.

Au na vakamacalataka na papa au a ceuta me baleti iratou yadua na luvequ tagane me vukei koya me raica na nona isolisoli vakayalo kei na veika e rawa ni cau kina ena cakacaka ni Turaga. E rawa ni o vakauqeti mo raica ka kila, me vakataki au, na veisolisoli yadua kei na veimadigi duidui me baleti ira yadua na itabagone o dau lomana ka liutaka.

Ni yaco me dikoni na luvequ tagane qase duadua ka dua na Eagle Scout, a votu mai noqu vakasama e dua na iyaloyalo ni ikeli niu vakasamataki koya kei na nona veisiga ni mataka. Keitou a vakaitikotiko kina mai Idaho volekata na boto ni ulunivanua na South Teton, na vanua keirau dau taubaletaka vata ka sarava kina na nodra vakatubutubu cake na ikeli. Na iyaloyalo oqori ena noqu vakasama e kauta mai na vakanananu ni vosa nei Aisea:

“Sa dau solia na kaukauwa vei ira era sa malumalumu; ia ena vakalevutaka na kaukauwa vei ira era sa sega ni gumatua rawa.

“Io era na malumalumu ka oca ga na cauravou, a ra na bale sara na tamata bula:

“Ia ko ira era sa waraki Jiova era na vakaukauwataki tale; era na cabe cake me vaka era vakatabana vakaikeli; era na cici ka sega ni oca; era na lako tu ka sega ni malumalumu mai.”1

Ia na ka dina, keirau sa tarova na neirau dau kabata na ruku ni ulunivanua na South Teton kei na luvequ tagane qase duadua baleta ni sa oca o na luvequ. E vinakata me sa rauta. E kaya o koya, “Au na dau lomabibi tu beka ena veigauna baleta ni daru a sega ni yaco rawa ki cake? Ta, lako ga o iko—au sega ni vinakata mo yalorarawa.”

Au qai sauma, “Au na sega vakadua ni yalorarawa, ka o na sega vakadua ni lomabibi. Daru na dau nanuma tu ni daru a kaba vata mai ki ke.” Ena dela ni nona papa ni kena balavu, au a ceuta kina e dua na ikeli kei na vosaceuti “Ena Taba ni Ikeli.”

Ena veiyabaki e muri, a vakatubutubu vakalevu cake sara na luvequ vakadaukaulotu mai na kena au nanuma e rawa ni rawata ena yalonuinui. Ena veibolebole ena buturara ni kaulotu, eso na ka a sotava e vaka me sivia sara na veika e rawa ni yacova. Ena vukuna na gonetagane o laveta, ena vaka beka, na veika a sotava na luvequ, a laveti koya cake sara na Turaga ena vunautaki ni kosipeli ena dua na vosa dredre kau a sega ni vakabauta ni na rawata. Kevaka mo na tovolea vua e dua ga na cauravou e rawa me vakila na nona itavi ni matabete, au yalataka vei iko ni na tukuna vei iko na Turaga na levu ni ka o gadreva. Ena tu beka vua na gonetagane oqori na veika e sivia sara na veika ena vakatakila vei iko na Turaga. Vukei koya me dau ta icake.

E dau mamadua beka na gonetagane o via vakayaloqaqataka tiko ka na sega kina ni rawa me dua na italai qaqa vakamatabete. E dua tale na luvequ tagane e dau mamadua vakalevu ni se gonetagane lailai ka sega mada ga ni rawa ni curuma e dua na sitoa ka vosa vua na vunivola. Sa rui dau rere vakalevu. Kau lomaleqataka ena noqu masulaka na nona veisiga ni mataka ena matabete. Au vakasamataki koya ni sa na tu ena buturara ni kaulotu—oya e sega ni rogorogo vinaka. Au a dusimaki ki na dua na ivolanikalou e Na Vosa Vakaibalebale: “Era dro ko ira na tamata ca ni sa sega e dua sa vakasava: ia ko ira na yalododonu era sa yaloqaqa me vaka na laioni.”2

Au ceuta na “Yaloqaqa me vaka na Laioni” ena nona papa, ena ruku ni droini ni dua na ulu ni laione e kaila tu. Ena nona kaulotu kei na veiyabaki tarava, a rawata vinaka na vakanuinui ena noqu ceuceu. Na luvequ tagane ka dau mamadua ena dua na gauna sa vunautaka na kosipeli ena yalodina ka sotava na veika rerevaki ena yaloqaqa. A vakalevulevui ena nona itavi me matataka na Turaga.

E rawa ni yaco oqori ena vukuna na cauravou o tubera tiko. O na gadreva mo tara cake na nona vakabauta me rawa ni veisautaki koya na Turaga me dua na italai yaloqaqa cake mai na gonetagane mamadua o raica tiko ena gauna oqo.

Eda kila ni dau vakayaloqaqataki ira na Nona italai na Turaga. Na gonetagane o Josefa ka a raica na Kalou na Tamada kei na Luvena, o Jisu Karisito, ena dua na veikau, a veisautaki me dua na tuwawa vakayalo. A raica oqori o Parley P. Pratt ena gauna e vosataki ira kina na yadra dauveivakasewasewani era a vesuki koya tu na Parofita o Josefa Simici. E vola kina o Elder Pratt:

“Vakasauri na nona tu e yavana, ka vosa ena domo ni kurukuruku, se vaka na kaila ni laione, ka kaya, ena kena vinaka duadua au rawa ni nanuma, na veivosa oqo:

“‘DOU TIKO LO, na tevoro mai eli. Ena yaca i Jisu Karisito au sa vunauci kemudou, ka vakaroti kemudou mo dou galu; au na sega ni bulataka e dua tale na miniti ka rogoca na mataqali vosa vaqori. Dou muduka sara na veivosaki vaqori, de na dua vei kemudou se o au ena mate SARA GA QO!’”

Na mataqali gauna vaqori, a vola kina o Elder Pratt, “Au se qai bau raica vakadua, na bula dokai ka vakaturaga ni tucake tu ena ivesu sinucodo ena bogilevututu, ena dua na valeniveivesu ena dua na koro tawakilai mai Missouri.”3

Ena solia na Turaga vei ira na Nona italai buladodonu na madigi me ra yaloqaqa kina me vaka na laione, ni ra vosa ena Yacana ka ra ivakadinadina bula ena Nona matabete.

E dua tale na luvequ tagane, ni se gonetagane mada ga, era dau lewe levu na nona itokani era dau vinakata me ra tiko vata kei koya. E dau rawarawa na nona semati vei ira na tamata. Niu masu ka tovolea meu raica na nona cau ena matanitu ni Kalou, au vakila ni na tu vua na kaukauwa me dreti ira vata na tamata ena loloma kei na yalovata.

Oqori e kauti au ki na itukutuku ena Vunau kei na Veiyalayalati ka vakamacalataka na nodra sasaga na italatala qase ni matabete mera tarai Saioni cake mai Missouri ki na nodra vakacaucau na agilosi ka raica na nodra sasaga kei na cau. A gadrevi kina na solibula e cecere. E kaya na ivakatakila ena Vunau kei na Veiyalayalati, “Ia dou sa kalougata koi kemudou, ni sa volai mai lomalagi na nomudou itukutuku me ra dikeva na agilosi; io era sa rekitaki kemudou ka sa bokoci na nomudou ivalavala ca.”4

Ena nona papa ni balavu na luvequ tagane, au ceuta kina “Era sa Rekitaki Kemudou na Agilosi.”

Na nona qaqa cecere na luvequ tagane oqo me dau sokomuni ira ka vakauqeti ira na tamata a curu sivita yani na gauna ni nona biuvuli. E a tuvalaka na veitaviqaravi ni iteki ena nona cakacaka vata kei ira na nona itokani matabete, ka vakavuna vei ira na itabagone ena vanua e tiko kina mera dau vakabauta, dau vosota ka yaloqaqa ena veika dredre era donumaka. Ena nona tāra na vakabauta vei ira na cauravou kei na goneyalewa, a vukea na kena tarai na veiwasewase lalai kei Saioni ena loma ni veikoro lelevu e Amerika. Ena ceuceu, au biuta kina na agilosi era uvu biukila, e sega beka ni vaka na kena icakacaka dina sara, ia e a rawarawa cake beka me ceuti e dua na biukila mai na kaila.

Era reki na agilosi ni ra tarai Saioni cake na iliuliu ni matabete e vuravura taucoko ena nodra veitabanalevu, iteki, kei na tabana ni kaulotu. Ka ra na reki ena vukudra na cauravou kei na goneyalewa o ni vukea me ra tarai Saioni ena vanua cava ga era tu kina kei na ituvaki ni bula cava ga era donumaka. Na Saioni sai koya na vuadra na tamata era vauci ena veiyalayalati kei na loloma. Au sureti kemuni mo ni vukei ira na nomuni itabagone me ra curu kina.

Ena vukuna e dua na luvequ, au a vakauqeti meu ceuta e dua na matanisiga—oqori, na matanisiga mai lomalagi—kei na malanivosa mai na Nona Masu ni Vakatakekere na iVakabula: “Sai Koya Oqo na Bula Tawamudu.” Ni sa voleka ni mai cava na nona veiqaravi vakalotu ena vuravura oqo, a masuta na Tamana na iVakabula:

“Sai koya oqo na bula tawamudu, me ra kilai kemuni na Kalou dina duadua ga, kei Jisu Karisito, ko koya ko ni a tala mai.

“Au sa vakarokorokotaki kemuni e vuravura: niu sa vakaotia na cakacaka ko ni a solia mai vei au meu kitaka.”5

Sa vakayacora na luvequ tagane na veiqaravi vakamatabete ena loma ni tolu na vanua lelevu ia e bibi duadua ena loma ni nona vale vei ira na nona matavuvale. E tāra cake na nona bula wavoliti iratou. E cakacaka voleka toka ga ki vale, ka vakavuqa na nona dau laki vakasigalevu vata kei na watina kei ira na luvena gone sobu. Eratou vakaitikotiko voleka sara na nona matavuvale vei keirau kei Sisita Eyring. Eratou dau qarauna na neirau lomanibai me vaka ga e nodratou. Na luvequ tagane oqo e sega walega ni bula tiko me rawata na bula tawamudu ia e bula me ra wavoliti koya talega me tawamudu na nona matavuvale ka sa vakasoqoni ira wavokiti koya tiko.

Na bula tawamudu sai koya na bulataki ni duavata, ena matavuvale, vata kei na Tamana, na Luvena, kei na Yalo Tabu. Ena rawa duadua ga na bula tawamudu mai na idola ni matabete ni Kalou, ka ra a vakalesui mai vua na Parofita o Josefa Simici. Nomu taura toka na takete tawamudu oqori e matadra na itabagone o liutaka sa tautauvata ga na kena cecere kei na isolisoli e rawa ni ko solia vei ira. Mo na cakava taumada ena nomu ivakaraitaki ena nomu matavuvale. Ena sega beka ni vakamatavuvale tiko ena Lotu o ira o liutaka tiko, ia au bolei kemuni mo ni vukei ira me ra vakila ka gadreva na loloma ena yasa ruarua ni ilati.

Na papa ni balavu au vakamacalataka tiko e dua ga na sala me ra vukei kina na itabagone me ra raica na veika vakasakiti e raica vei ira na Kalou kei na nodra veisiga ni mataka kei na veiqaravi duatani sa vakarautaki me ra solia. Ena vukei iko o Koya mo raica na ivakarau e rawa ni o cakava kina vei ira na luvemu kei ira tale eso na itabagone o liutaka. Ia ni o vakasaqara ena yalomasumasu mo raica na veisiga sa bera mai oqo ena vukumu, ka qai tukuna vei ira na itabagone vakayadua, ena yaco mo kila ni Kalou e lomani ira yadua na Luvena me vaka ni ra tamata ka raica vei ira yadua na veisolisoli cecere ka duidui.

Me vaka e dua na tama au a vakalougatataki meu raica na veisiga ni mataka cecere ena matanitu ni Kalou ena vukudra na luvequ yalewa ka vakakina o ira na luvequ tagane. Niu vakasaqara na veituberi ena yalomasumasu, a vakaraitaki vei au e dua na sala meu vukei ira kina na luvequ yalewa mera raica ka kila na veivakabauti ni Kalou ena vukudra ni ra italai ka rawa ni ra tara na Nona matanitu.

Ni ra se gone na luvequ yalewa, au raica ni rawa ni keimami vukei ira eso me ra vakila na nodra loloma ko ira era sa tu ena daku ni ilati, ena veitabatamata kece sara. Au kila ni loloma oqori e yaco mai ena veiqaravi ka vakauqeta na inuinui ni bula tawamudu.

Keitou mani ceuta eso na papa ni madrai ka keitou biuta kina e dua na ibuli madrai vavi e vale ka keitou lako vata ka veisoliyaka na neitou isolisoli vei ira na yada, dawai, kei na veimatavuvale. Na itukutuku au ceuta ena papa ni madrai yadua oqori e vaqo, “J’aime et J’espere,” Vakavaranise ni “Au loloma ka nuitaka.” Na ivakadinadina ni nodra iloloma vakayalo e kune sega walega ena papa au ceuta ia e qai matata cake ni keitou sa veisoliyaka yani vei ira era gadreva, ka ra sotava tu na mosi se na lolosi, na veivakadeitaki ni nona iloloma na iVakabula kei na Nona Veisorovaki e rawa ni vakavurea na ramase uasivi sara ni inuinui. Oqo na bula tawamudu vei ira na luvequ yalewa kei keitou yadua.

Eso beka era na vakasamataka, “Baraca Eyring, o kaya tiko beka ni dodonu meu vulica meu dau ceuceu?” Na kena isau e sega. Au a vulica ga na ceuceu ena nona veivuke e dua na qasenivuli ka kenadau, o Elder Boyd K. Packer ena gauna oya. Na maqosa lailai au bau rawata e vu mai na nona isolisoli cecere vakadauceuceu kei na nona dauvosota vaqasenivuli. Na mataqali dauveituberi vakataki Peresitedi Packer e rawa ga ni soli mai lomalagi. Ia e levu tu na sala e rawa ni o bulia kina na yalona e dua na gone ka sega kina na ceu papa kau se ivakarau ni balavu me baleti ira.

Me vakaoqo, na tekenoloji vovou ni veitaratara sa rawa kina ni wasei na itukutuku eso ni vakabauta kei na inuinui me kosova na veimaile e tawasei keda, walega oqo ka na lailai se sega ni saumi. Dau vukei au na watiqu ena ka oqo. Keirau tekivu ena neirau veitalanoa ena talevoni kei ira na makubui keirau kei na luvei keirau e rawa ni keirau veitaratara kaya. Keirau dau kerei ira me ra wasea mai na italanoa eso ni nodra rawa-ka yadua kei na veiqaravi era vakayacora. Keirau dau sureti ira talega me ra vakau itaba mai ni veicakacaka oqori. Keirau dau vakayagataka na itaba eso oqori me ivakaraitaki ni vica na parakaravu itukutuku. Keirau dau soqona e dua se rua na tikina mai na iVola i Momani. Erau na sega beka ni taleitaka sara o Nifai kei Momani na ivakatagedegede vakayalo ni neirau itukutuku se na lailai ni cakacaka e caka me rawa kina na ka keirau vakatoka me “iVolaniveisiga ni Matavuvale: Na Peleti Lalai.” Ia keirau sa vakalougatataki kei Sisita Eyring ena sasaga oya. Keirau vakila na veivakauqeti ena neirau digitaka na malanivosa ni ivolanikalou kei na itukutuku leleka ni ivakadinadina keirau vola. Ka keirau raica na kena ivakadinadina ena nodra bula ena kena vagolei na yalodra vei keirau ka vakakina vua na iVakabula kei lomalagi.

Era tu tale eso na sala me da dolele yani kina, o ni sa cakava tiko e vuqa. Na nomuni itovo ni masu vakamatavuvale kei na wili ivolanikalou ena vakavuna e vuqa na balolo ni vakanananu kei na veisau lelevu ni yalo mai na kena o ni vakila tiko ena gauna oqo. Na itaviqaravi vakayago sara mada ga, me vaka na lako ki na dua na qito se sara iyaloyalo, e rawa ni bulia na yalona e dua na gone. E sega ni ka bibi na itaviqaravi, ia na veika eda vakila ena gauna e caka tiko kina. Au sa raica rawa e dua na vakatovotovo vinaka me kilai kina na itaviqaravi ka rawa ni vakavuna na veisau ena nona bula e dua na itabagone. Oya me ra vakatura e dua na itaviqaravi era dau taleitaka ka ra vakila ni yaco mai me vaka ni isolisoli va-Kalou. Au kila mai na veika au sa sotava ni rawa oqori.

Ena gauna au dikoni kina niu yabaki 12, au a vakaitikotiko mai New Jersey, 50 na maile (80 km) mai na siti o New York. Au tadra niu a dua na dau qito veitavi kilai levu. A vakadonuya o tamaqu me kauti au ki na dua na qito ka vakayacori ena rara makawa dau talanoataki na Yankee Stadium ena Bronx. Au se rawa ni raica toka ga na cawi ni itavi ena nona tavia o Joe DiMaggio e dua na wavoki vakadua ka tau mai ki na loma ni valenisarasara keirau dabe veitikivi toka kina kei tamaqu, na gauna duadua ga keirau bau lako vata kina ki na dua na qito levu ni veitavi.

Ia e dua tale na siga vata kei tamaqu a veisautaka vakadua na noqu bula. A kauti au mai New Jersey ki na nona vale e dua na peteriaki tabaki e Salt Lake City. Au se bera vakadua ni raica na tamata oya. A biuti au ga e matanikatuba o tamaqu. A kauti au na peteriaki ki na dua na idabedabe, biuta na ligana e uluqu, ka cavuta e dua na veivakalougatataki me vaka na isolisoli mai vua na Kalou ka okati kina na kena tukuni na gagadre cecere ni yaloqu.

E kaya ni o au e dua vei ira ka a tukuni kina, “Sa kalougata ko ira sa dautataro.”6 Sa dua na ka na noqu kurabui ni rawa ni kila e dua na vulagi uasivi sara na yaloqu kau mani dolava na mataqu meu raica na rumu e yaco tiko kina na cakamana oqo. Na veivakalougatataki oqori ni veika au rawa ni cakava sa bulia na noqu bula, na noqu vakawati, kei na noqu veiqaravi vakamatabete.

Mai na veika oqori kei na veika e tarava mai, au rawa ni vakadinadinataka, “Raica sa sega ni rawata na isolisoli kecega na tamata yadua, ia sa vuqa na isolisoli, ka sa soli vei ira na tamata yadua me vaka sa lewa na Yalo ni Kalou.”7

Ena nona vakatakila vei au na Turaga e dua na isolisoli, sa rawa kina vei au meu kila ka vakavakarau ki na madigi eso meu vakayagataka ena nodra vakalougatataki o ira au dau lomana ka qarava.

E kila na Turaga na noda isolisoli. Na noqu bolebole vei iko kei au sai koya me da masuta me da kila na isolisoli e soli vei keda, me da kila na ivakarau me da vakatorocaketaka kina, ka kila na madigi sa vakarautaka vei keda na Kalou me da qaravi ira kina na tani. Ia me kena ilutua, au masuta mo ni na vakauqeti mo ni vukei ira tale eso me ra kila na nodra isolisoli digitaki ni veiqaravi mai vua na Kalou.

Au yalataka vei kemuni ni kevaka o ni kerea, o ni na vakalougatataki mo ni vukea ka laveti ira tale eso ki na ivakatagedegede cecere ni nodra veiqaravi vei ira era liutaka ka lomana. Au vakadinadinataka vei kemuni ni bula tiko na Kalou, ni Karisito o Jisu, oqo na matabete ni Kalou, eda taura tu, ka sa vakarautaki keda na Kalou ena veisolisoli digitaki me da qaravi Koya me sivia na noda inuinui talei duadua. Ena yaca i Jisu Karisito, emeni.

Show References

  1.  

    1.  Aisea 40:29–31.

  2.  

    2.  Na Vosa Vakaibalebale 28:1.

  3.  

    3.  Autobiography of Parley P. Pratt, ed. Parley P. Pratt Jr. (1938), 211.

  4.  

    4.  Vunau kei na Veiyalayalati 62:3.

  5.  

    5.  Joni 17:3–4.

  6.  

    6.  Maciu 5:9.

  7.  

    7.  Vunau kei na Veiyalayalati 46:11.