Jipan̄ Jodikdik ro Kōm̧m̧an Kōttōpar ko Reļļap

Jen Būreejtōn Henry  B. Eyring

Rikakpilōklōk eo Kein Kajuon ilo Būreejtōnji eo Kein Kajuon


Henry B. Eyring
Kōn jipan̄ eo am, jabdewōt eo kwōj tōl e naaj maron̄ loe, kōņaan, im tōmak bwe er remaron̄ bōk likio in jibadbad eo aer n̄an jerbal ilo aelōn̄ in kiin̄ eo an Anij.

Eļap aō kam̧oolol kōn iien in em̧m̧an bwe imaron̄ in pād ilo kweilo̧k in eļap an priesthood, n̄an maron̄ ron̄ jet katak ko rem̧m̧an im naan in kam̧ool ko. Ekōm̧m̧an aō ļōmņak kōn en̄jake eo aō make. Enan̄in aolep men iaar maron̄ kōttōpraki āinwōt juon rikabwijer priesthood eo ej kōnke kajjojo ro rejeļā kajjieō raar lo men ko ijjab maron̄ loi.

Āinwōt juon jemān eo edik iaar jar n̄an jeļā ta menin leļo̧k ko ajri ro nejū remaron̄ in kōm̧m̧ane ilo aelōn̄ in kiin̄ in an Irooj. N̄an ļaddik ro, ijeļā bwe emaron̄ wōr aer iien ko rem̧m̧an an priesthood. N̄an leddik ro, ijeļā remaron̄ leļo̧k jerbal in jipan̄ bōk jikin Irooj. Aolep renaaj maron̄ kōm̧m̧ane jerbal eo an Irooj. Ijeļā bwe kajjojo, im kōn menin Irooj enaaj leļo̧k n̄an er menin leļo̧k ko rejenolo̧k n̄an kajjojo n̄an kōjerbali ilo jerbal in jipan̄ eo An.

Kiiō, ijjab maron̄ ba n̄an aolep jemān im aolep ritōl an jodikdik ro tipdikin meļeļe ko kōn ta eo em̧m̧antata n̄an kom̧ n̄an kōm̧m̧ani. Ak imaron̄ kalim̧m̧uri kom̧ bwe kom̧ naaj jeram̧m̧an n̄an jipan̄ er kile menin leļo̧k ko raar ļotaktok kaki. Aolep armej rej oktak im ewōr juon aer jipan̄ eoktak n̄an kōm̧m̧ane. Ejjeļo̧k juon ej tōl n̄an likjab. Ilo ami pukōt m̧adenļo̧k n̄an loe menin leļo̧k ko an Anij n̄an lo ro kwoj tōl er ilo priesthood―elaptata jodikdik ro―kom̧ naaj jeram̧m̧an n̄an kaloļo̧kjeņ er kōn jerbal in jipan̄ eo remaron̄ kōm̧m̧ane. Jen ami tōl, jabdewōt ro kom̧ij tōl er naaj maron̄ loe, kōņaan, im tōmak bwe remaron̄ bōk jibadbad eo aer elikio n̄an jipan̄ ilo aelōn̄ in kiin̄ in an Anij.

Ippān ajri ro nejū make, iaar jar kōn m̧adenļo̧k eo n̄an jeļā ewi wāween imaron̄ jipan̄ kajjojo iaer m̧aanjebpopo n̄an kajjojo iien ko aer rem̧m̧an n̄an jerbal n̄an Anij. Im ij kajjieon̄ jipan̄ er pijaik, kōjatdikdik, im jerbal n̄an ilju im jekļaj in. Iaar ļōme juon būlaiwūt n̄an kajjojo ļaddik ro nejū ippān juon kout jān jeje ko rekwojarjar eo eaar kōmeļeļeiki menin leļo̧k ko raorōk im juon pija eaar kōmeļeļeiki menin leļo̧k in. Ilaļ in pija eo im eaar maalkan juon jeje, iaar ļōme raan in peptaij ko kajjojo an ļaddik im kain̄i ko n̄an opiij ko an priesthood, ilo utiejān eaar kōkkaļeik ilo raan eo an kajjojo m̧akūtkūt.

Inaaj kōmeļeļeik būļaiwūt ko iaar ļōmi n̄an kajjojo ļaddik ro n̄an jipan̄ e loe menin leļo̧k ko aer jen jetōb im ta eo emaron̄ kar jipan̄ ilo jerbal in an Irooj. Kom̧ maron̄ im̧we n̄an kile, āinwōt kar n̄a, menin leļo̧k ko raorōk im iien ko rem̧m̧an rejenolo̧k n̄an kajjojo jodikdik ro kom̧ij iakwe im tōl.

Ke ļaddik eo nejū erūttotata eaar erom juon tikōn im juon Eagle Scout, juon pija in juon ikōļ eaar itok n̄an kōļmenļo̧kjeņ eo aō ke iaar ļōmņak kōn e im ilju im jekļaj eo an. Kōm̧ ar jokwe ilo Idaho epaake tulaļ in South Teton mountain, ijo kōm̧ ar tallōn̄ ippān doon ie im alooje an ikōļ ko ebbōkak lōn̄ļo̧k. Pija in ilo kōļmenļo̧kjeņ in aō eaar letok n̄an eō en̄jake kōn naan ko an Aiseia:

“Ej leļo̧k kajoor n̄an eo ej parok; im n̄an eo ejjeļo̧k an maron̄, Ej korļo̧k kajoor.

“Ro rem̧m̧an dettaer renaaj parok im m̧ōk, im likao ro renaaj kijeļo̧k im bun̄:

“A ro rej kattare Jeova renaaj kōkāāl aer kajoor; renaaj jepeļālon̄ļo̧k kōn peir āinwōt igōl ko; renaaj ettōr im jab m̧ō; renaaj etetal im jab parok.” 1

Ilo m̧ool, ippān ļaddik eo nejū erūtto tata, kōm̧ ar bōjrak am tallōn̄ ilaļ in dam̧ eo eutiej ilo South Teton kōnke ļaddik eo nejū eaar lukkuun m̧ōk. Eaar kōņaan bōjrak. Eaar ba, “Enaaj ke aolep iien būrom̧ōj bwe kōm̧ ar jab tōparļo̧k lōn̄tata? Kwon etal wōt—ijjab kōņaan jook.”

Iaar uwaak, “Ij jamin naaj jook, im kwoj jamin naaj būrom̧ōj. Jenaaj aolep iien kememej bwe jaar tallōn̄ ijin ippān doon.” Ilo ijo eutiej ilo būļaiwūt eo an, iaar ļōme juon ikōļ im juon m̧aalkan jeje “Ioon Pā ko’ pein Ikōļ ko.”

Ium̧win iiō ko, ļaddik eo nejū eaar tōprakļo̧k lōn̄ļo̧k āinwōt juon mijenede jān aō maron̄ kōļmenļo̧kjeņ kake ilo korak in aō kōjatdikdik. Ilo apan̄ ko an jikin mijen, jet iaan ta ko eaar jelm̧ai raar ļapļo̧k jen an maron̄. N̄an ļaddik eo kwoj kotake, emaron̄ in, āinwōt kar ļaddik eo nejū, bwe Irooj eaar kotak e lōn̄ļo̧k ilo kwaļo̧k gospel eo ilo juon kajin epen jān aō kar ļōmņak epidodo. Eļan̄n̄e kom̧ naaj kajjieon̄ ippān jabdewōt likao n̄an en̄jake maron̄ ko an ilo priesthood eo, ij kalim̧m̧uri kom̧ bwe Irooj enaaj jiron̄ kom̧ jon̄an eo āinwōt ami aikuj. Ļaddik eo emaron̄ wōr ippān maron̄ eo aaet ilōn̄ in ta eo Irooj enaaj kwaļo̧k n̄an kom̧. Jipan̄ e kōm̧m̧ani kōttōpar ko reļļap.

Ļaddik eo kom̧ij rōjan̄e emaron̄ āinwōt eparok n̄an erom juon rikarejar an priesthood eo ekajoor. Juon iaan ļaddik ro nejū eaar ej jokook ke eaar juon ļaddik jidikdik bwe eban kōnnaan n̄an juon clerk ilo juon m̧ōn wia. Iaar inepata ke iaar jar kōn tokālik eo an priesthood eo an. Iaar tōl ļo̧k n̄an juon eoon ilo Jabōn Kōnnaan: “Ri jab wānōk rej ko n̄e ejjeļo̧k ri lukwarkware; a rū wānōk rej peran āinwōt juon ļaion.”2

Iaar ļōme “Kajoor āinwōt juon Ļaion” ioon būļaiwūt eo an, ium̧win juon pija in juon bōran ļaion ekilep. Ilo mijen eo an im ilo iiō ko raar itok tokālik, eaar kakūrm̧ool kōjatdikdik eo ilo jerbal in ļōme eo aō. Juon ļaddik nejū ejjokook eaar kwaļo̧k gospel eo kōn peran eļap im kar jelm̧ae kauwōtata ko kōn peran. Eaar kōļapļo̧k ilo eddo ko an n̄an bōk jikin Irooj.

Menin emaron̄ waļo̧k n̄an likao eo kom̧ij tōl e. Kom̧ij aikuj kalōk tōmak eo an bwe Irooj en ukōte n̄an juon rikarejar eperan jen ļaddik eo eparok kom̧ij loe kiiō.

Jejeļā bwe Irooj ej kōm̧m̧an bwe ro rikarejaren ren kajoor. Ļaddik eo edik eo eaar lo Anij Jemān im Nejin, Jisōs Kraist, ilo juon bukwin wōjke eaar oktak n̄an juon jetōb enneia. Parley  P. Pratt eaar lo bwe ke Rikanaan Joseph Smith eaar kakkōļ rikōjparok eo enana eo eaar jipan̄ er kalbuuj. Elder Pratt eaar rekoote:

“Ilo juon iien ejidimikij eaar jerkak n̄an ioon neen, im kar kōnono ilo juon ainikien jourur, ak āinwōt n̄e ļaion ej lamōj, ba, āinwōt jon̄an imaron̄ bōke, naan ko rej ellaajrak:

“‘IKŌN̄, kom̧ ro m̧ōttan ron̄ in kijeek. Ilo etan Jisōs Kraist ij kakkōļ kom̧, im kean̄ kom̧ n̄an pād wōt; iban mour bar juon minit im ron̄jake kajin in. Bōjrak kōnono eo, ak kom̧ ak N̄a rej mej IIEN IN EKADU!’”

Jen en̄jake in, Elder Pratt eaar je, “Kautiej im utiej iaar loe ak juon wōt alen, āinwōt eaar jutak ilo tomede ko ilo bon̄, ilo juon armej emeļeļe ilo juon bukwōn ebun̄bun̄ ilo Missouri.”3

Irooj enaaj leļo̧k n̄an rikarejaren ro An rewāppen iien ko rem̧m̧an n̄an kajoor āinwōt ļaion ko n̄e rej kōnono ilo Etan im āinwōt rikam̧ool ro ilo priesthood eo An.

Bar juon nejū, aaet āinwōt juon ļaddik, ewōr an kumi in ļaddik ro m̧ōttan eo emakijkij an kappok an ribwebwenato. Epidodo jem̧jerāik ilubwilijin armej. Ke ij kajjieon̄ anto̧o̧ne jipan̄ eo an ilo aelōn̄ in kiin̄ in an Anij, iaar en̄jake bwe enaaj wōr an kajoor n̄an kepaaktok armej ippān doon ilo iakwe im ippān doon.

Menin eaar tōlļo̧k n̄a n̄an bwebwenato eo ilo Doctrine and Covenants me ej kōmeļeļeik kijejeto ko an elder ro ilo priesthood n̄an kalōk Zaion ilo Missouri n̄an nōbar enjeļ ro, ro kar loe jipan̄ ko aer. Menin eaar bōk eļap kaarmejet ko. M̧adenļok in ilo Doctrine and Covenants ej kwaļo̧k, bwe jej jeram̧m̧an kōnke naan in kam̧ool eo jej kwaļo̧k im naan in kam̧ool eo ej jeje ilan̄ n̄an an enjeļ ro lukkuun riiti; im enjeļ ro rej lan̄lōn̄ kōn eok, im jerawiwi ko am rej jeorļo̧ki.4

Ioon ijo eutiej ioon būļaiwūt eo an ļaddik eo nejū, iaar ļōme “Enjeļ ro rej Lan̄lōn̄ Kōn Eok.”

Maron̄ in eļap an ļaddik in n̄an kakuktok im kareel armej kar eļļāļo̧k ilōn̄ in iiō in jikuuļ ko an. Ippān rikabwijer priesthood ro, eaar ejaake m̧akūtkūt ko an stake ko raar leļo̧k n̄an jodikdik ro retōmak ilo eria eo n̄an niknik im em̧ool anjo̧ ilo jekjek ko reppen. Ke eaar kalōk tōmak ilo likao rein im jiron̄ rein, eaar jipan̄ kalōk kumi ko reddik an Zaion ilo bukwōn ko ilo Amedka. Ilo ļōmļōm eo, iaar likūt enjeļ ko rej uk jilel ko, ko remaron̄ jab lukkuun jejjet ilo wāween kar kōm̧m̧ane, ak eaar pidodo n̄an ļōme jān juon lamōj.

Enjeļ ro rej lan̄lōn̄ āinwōt ritōl ro an priesthood aolepān laļ in rej kalōk Zaion ilo ward ko aer, stake ko, im mijen ko. Im renaaj lan̄lōn̄ ioon likao ro im jiron̄ ro kom̧ij jipan̄ er n̄an kalōk Zaion jabdewōt jikin rej pād ie im ilo jabdewōt jekjek remaron̄ pād ie. Zaion ej tōprak in an armej likwōj jen bujen im iakwe. Ij karuwaineneiktok kom̧ n̄an jipan̄ jodikdik ro am n̄an kobaik.

N̄an juon iaan ļaddik ro nejū, iaar im̧we n̄an ļōme juon aļ im naan ko jān jar in jojomar an Rilo̧mo̧o̧r eo: “Men in Mour Indeeo.” Turinļo̧k jem̧ļo̧kin jerbal eo An ilo mour in, Rilo̧mo̧or eo eaar jar n̄an Jemān:

“Im men in mour indeeo, bwe ren jeļā Kwe juon wōt anij e m̧ool, im Jisōs Kraist, eo Kwaar jilkintok.

“Iar kaiboojoj Eok ioon laļ; Iar kamōjļo̧k jerbal eo Kwaar letok n̄an Eō bwe In kōm̧m̧ane.”5

Ļaddik ro nejū kar bōk jerbal an priesthood kijoone jilu laļ ko ak eo eļaptata ilo m̧weo im̧ōn im ilowaan baam̧le eo an. Eaar kalōk mour eo an ipeļaakier. Ej jerbal epaake ļo̧k m̧weo, im emakijkij an jepļaak n̄an kobaļo̧k ippān kōrā eo ippān im ajri ro nejiero n̄an m̧ōn̄ā in rālep. Baam̧le eo an rej jokwe lukkuun epaake Sister Eyring im n̄a. Rej kōjparok iaat eo am̧ eļan̄n̄e ekar lukkuun aer. Ļaddik eo nejū ej mour jab wōt n̄an kōkkare n̄an mour indeeo ak n̄an mour ipeļaakin jen membōr in baam̧le ro reakwe.

Mour indeeo ej n̄an mour ippād doon, ilo baam̧le ko, ippān Jemān, Nejin, im Jetōb Kwojarjar. Mour indeeo ej kōmaron̄ wōt jen kii ko an priesthood eo an Anij, eo eaar kōjepļaaktok jen Rikanaan Joseph Smith. Kabwijer kōttōpar in m̧okta jen jodikdik, ami tōl ej āinwōt eļap, juon menin leļo̧k ilo ami kar maron̄ leļo̧k n̄an er. Kom̧ naaj kōm̧m̧ane ijjino jen waanjon̄ak ilo baam̧le eo ami make. Ro kom̧ij tōl maron̄ ejjeļo̧k aer baam̧le ilo Kabun̄ in, ak ij kajjitōk ippāmi n̄an jipan̄ er en̄jake im kōņaan iakwe an baam̧le ilo jim̧or turājet in lōn̄ōr eo.

Utiej in būļaiwūt ko iaar kōmeļeļeik rej wōt juon wāween n̄an jipan̄ jodikdik bōk juon ļōmņak eļap Anij ej loe ilo er im jipan̄ eo ejenolo̧k. Ej kōpooj er n̄an leļo̧k. Enaaj jipan̄ kom̧ loe wāween eo n̄an kōm̧m̧ane n̄an ajri ro nejūm̧ ak n̄an jodikdik ro jet. Ak ilo ami lukkuun jar pukōt meļeļe in ilju im jekļaj eo ami im n̄an kōnono kake n̄an armej ro reddik, kom̧ naaj jeļā bwe Anij ej iakwe kajjojo ajri ro Nejin āinwōt kajjojo im ej loe menin leļo̧k ko reļļap im jenolo̧k ilo kajjojo iaer.

Āinwōt juon jemān iaar jeram̧m̧an n̄an loe ilju im jekļaj ko reļļap ilo aelōn̄ in kiin̄ an Anij n̄an leddik ro nejū barāinwōt ļaddik ro nejū. Ke iaar lukkuun in pukōt tōl, iaar loe juon iaļ n̄an jipan̄ leddik ro nejū kile lōke eo an Anij eo eaar pād ippāer āinwōt rikarejar ro remaron̄ kalōk aelōn̄ in kiin̄ in An.

Ke leddik ro nejū raar iddik, iaar loe bwe kōm̧ maron̄ jipan̄ ro jet en̄jake iakwe an jabdewōt raar eļļā jen lōn̄ōr eo, jen epepen n̄an epepen. Iaar jeļā bwe iakwe ej itok jān jipan̄ im im̧we kōjatdikdik eo an mour indeeo.

Kōn menin kōm̧ ar ļōme būļaiwūt ko ioer kōm̧ ar likūt juon loub in pilawā kar kōm̧m̧ane im̧weo im kar etal ippān doon n̄an bōkļo̧k menin leļo̧k eo am n̄an kōrā ro emej pāleer, im baam̧le ko. Maalkan jeje ko iaar ļōme ioon būļāiwūt eo ej riit, “J’aime et J’espere,” kajin Frence n̄an “Ij iakwe im ij kōjatdikdik.” M̧ool eo an menin leļo̧k ko an jetōb rejenolo̧k ippāer raar waļo̧k jab wōt ioon būļaiwūt ko iaar ļōmi ak eļapļo̧k im alikkar ke kōm̧ij ajiji n̄an jabdewōt ro raikuj, ilo ilubwilijin metak im jako, bar kam̧ool bwe iakwe an Rilo̧mo̧o̧r eo im Pinmuur eo An emaron̄ katōk juon meram ewāppen an kōjatdikdik. Men in ej mour indeeo n̄an leddik ro nejū im n̄an kōj kajjojo.

Kiiō, kom̧ maron̄ kōļmenļo̧kjeņ, “Brother Eyring, kwoj ke ba bwe ij aikuj in ekkatak ļōme?” Uwaak eo ej jaab. Iaar ekkatak n̄an ļōme ippān jipan̄ an juon rikatakin ejouj im kapeel, eaar Elder Boyd  K. Packer. Jidik kapeel eo iaar maron̄ etale n̄an menin leļo̧k in an eļap āinwōt juon riļōme im an kijenmej āinwōt juon rūkaki. Lan̄ wōt emaron̄ letok juon rūkaki rōt in. Ak ewōr wāween ko kom̧ maron̄ ļōmi būruwōn ajri ro ijjelo̧kin ļōmi būļaiwūt ko n̄an er.

N̄an waanjon̄ak, wāween kōnono ko rekāāl jen kein jerbal ko raan kein rej kōtlo̧k ad kwaļo̧k ennaan ko an tōmak im kōjatdikdik peļaakin kōtaan ko reļļap, reium̧ im jidik wōt ak ejjeļo̧k wōņaer. Kōrā eo pāleeō ej jipan̄ n̄a kōm̧m̧ane menin kajjojo jota. Kōm̧ij jino jen kōnono ilo talboon ippān jibūm̧. Kōm̧ij kajjitōk ippāer n̄an kwaļo̧k ippam̧ bwebwenato ko aer make retōprak im jipan̄ eo rekar kōm̧m̧ane. Kōm̧ij barāinwōt kajjitōk ippāer n̄an jilkintok pija ko an raan in m̧akūtkūt ko. Kōm̧ij kōjerbal pija ko n̄an kōmeļeļeik jejjo perokūrāāp ko kōn jeje. Kōm̧ij kobaik juon ak ruo eoon jān Bok in Mormon. Bōlen Nipai im Mormon renaaj kar bwilōn̄ jen jetōb in em̧m̧an an waļo̧k in am ak kijejeto eo ebwe jon̄an n̄an kōm̧m̧ane ta eo kōm̧ij kōnono kake āinwōt “Jōnōl eo an Baam̧le: Pileej ko Reddik.” Ak Sister Eyring im n̄a rej jeram̧m̧an jen kijejeto in. Kōm̧ij en̄jake im̧we ilo kālet eoon ko jen jeje ko rekwojarjar im ennaan eo ekadu an naan in kam̧ool eo kōm̧ij je. Im kōm̧ij loe kam̧ool ilo mour ko an ajri ro jibūm̧ ilo būruwer aer oktak tok n̄an kōm̧ im n̄an Rilo̧mo̧o̧r eo.

Ewōr bar wāween ko jet n̄an kajjieon̄ kareel ro jet; em̧ōj ami kadede pād ie ilo elōn̄ iaer. Imminene ko an jar an baam̧le eo ami im riiti jeje ko rekwojarjar renaaj kōm̧m̧an eļapļo̧k ememļo̧kjeņ ko ejjeļo̧k jem̧ļo̧kier im oktak ko reļļap an bōro jen ami maron̄ kili kiiō. Mekarta m̧akūtkūt ilo ānbwin, āinwōt pād ilo juon m̧akūkūt in ikkure ak alooje juon pija, remaron̄ kareel juon būruwōn ajri. Jekdoon ta ejjab m̧akūtkūt ak en̄jake ko me rej itok ilo ami kōm̧m̧ane. Iaar loe juon idajon̄jon̄ em̧m̧an n̄an kaklen m̧akūtkūt ko kōn tōprak eo n̄an kōm̧m̧ane juon oktak eļap ilo mour an juon armej edik. Ej bwe rej kwaļo̧k m̧akūtkūt eo ewōr juon itoklimo ie me rej en̄jake aer itok n̄an er āinwōt juon menin leļo̧k jān Anij. Ijeļa bwe epidodo jān en̄jake eo ad make.

Ke iaar erom juon tikōn ilo iiō eo 12, iaar jokwe ilo New Jersey, 50 maiļ ko (80 km) jān New York City. Iaar ettōņak aō erom juon riakiu emōkade. Jema eaar errā ippa n̄an bōkļo̧k eō n̄an alooje juon ikkure ilo etto im bwebwenato Yankee Stadium ilo Bronx. Imaron̄ in loe den̄den̄ eo an bōtta eo āinwōt Joe DiMaggio eaar kōm̧m̧ane juon home run n̄an oror ko ilo center field ippān jema ej jijet iturō, iien eo wōt kōm̧ kar etal n̄an juon ikkure in iakiu ippān doon.

Ak bar juon raan ippān jema eaar jekņaļōmen mour eo aō indeeo. Eaar bōk eō jān New Jersey n̄an m̧weo im̧ōn juon petriak em̧ōj an ekkapit ilo Salt Lake City. Ij jan̄in kar loe em̧m̧aan eo m̧okta. Jema eaar joļo̧k eō ilo jikinwe in kōjem̧ eo. Petriak eo eaar tōl ļo̧k eō n̄an juon jea, likūt pein ibōra, im kwaļo̧k juon kōjeram̧m̧an eo ekitbuuj juon kōm̧let in ikdelel eo eļap an būruwō.

Eaar ba bwe iaar juon iaan ro kar ba, “Em̧ōņōņō ro ri kōllaajrak.”6 Iaar ilbōk bwe juon rum̧ajet emaron̄ jeļā būruwō bwe iaar kōpeļļo̧k meja n̄an lo ruum̧ eo ijo juon kabwilōn̄lōn̄ eaar waļo̧k ie. Kōjeram̧m̧an in kōn maron̄ ko aer eaar jekņalōmen mour eo aō, m̧are eo aō, jerbal in priesthood eo aō.

Jān en̄jake in im ta eo eaar itok ālkin, imaron̄ kam̧ool bwe aolep ejjeļo̧k aer aolep menin leļo̧k n̄an er. Ewōr menin leļo̧k ko, im aolep armej ej leļo̧k n̄ane jen Jetōb an Anij.7

Jen an Irooj kwaļo̧k n̄an eō juon menin leļo̧k, iaar maron̄ loe n̄an kile im m̧aanjebpopo n̄an iien ko rem̧m̧an n̄an kōjerbali n̄an kōjeram̧m̧an ro jet ij iakwe im jerbal n̄ani.

Anij ejeļā menin leļo̧k ko ad. Aō kajjitōk n̄an kom̧ im n̄an n̄a ej n̄an jar n̄an jeļā bwe menin leļo̧k ko jaar būki, n̄an jeļā kilen ejaaki, im n̄an kile iien ko rem̧m̧an n̄an jerbal n̄an ro jet ro Anij ej letok n̄an kōj. Eļaptata iaer, ij jar bwe kom̧ naaj im̧we n̄an jipan̄ ro jet loe menin leļo̧k ko aer jān Anij n̄an jerbal.

Ij kalim̧m̧uri kom̧ bwe eļan̄n̄e kom̧ naaj kajjitōk, kom̧ naaj jeram̧m̧an n̄an jipan̄ im kotak ro jet n̄an likio in kōttōpar eo aer ilo jerbal n̄an jabdewōt ro rej tōl im iakwe. Ilo etan Jisōs Kraist, amen.

Show References

  1.  

    1.  Aiseia 40:29–31.

  2.  

    2.  Jabōn Kōnnaan ko 28:1.

  3.  

    3.  Autobiography of Parley P. Pratt, ed. Parley P. Pratt Jr. (1938), 211.

  4.  

    4.  Doctrine and Covenants 62:3.

  5.  

    5.  Jon 17:3–4.

  6.  

    6.  Matu 5:9.

  7.  

    7.  Doctrine and Covenants 46:11.