Au Kila. Au Bulataka. Au Taleitaka.

Mai vei Ann M. Dibb

Karua ni Daunivakasala ena Mataveiliutaki Raraba ni Goneyalewa


Ann M. Dibb
Eda sa daumuria na noda iVakabula, o Jisu Karisito. Na saumaki mai kei na nuidei vakaoqo sa isau tiko ni sasaga vagumatua ka vakainaki. E ka ni tamata yadua. E cakacaka ni bula taucoko.

Au vakauqeti ena nodra ivakaraitaki na lewe ni Lotu valavala dodonu, oka kina o ira na itabagone dokai. Ko ni sa rai vakayaloqaqa tiko vua na iVakabula. Ko ni sa yalodina tiko, talairawarawa, ka savasava. Na veivakalougatataki ko ni sa ciqoma ena vuku ni nomuni caka vinaka e sega walega ni yaco ki na nomuni bula ia ena noqu bula talega kei na nodra bula e vuqa na tamata ena sala sa kilai tu, ia dau vakawasoma ga ena kena e tawakilai.

Ena vica na yabaki sa oti, au a laini tu meu volivoli ena neimami sitoa e kea. A tucake tu e liu vei au e dua na goneyalewa, ka via yabaki 15. E laurai vua ni yalonuidei ka mamarau. Au raica sara na nona siqeleti kau sega ni tarova rawa meu vosa vua. Au a kaya, “O iko o gole mai taudaku ni vanua, se vavei?”

A kurabuitaka o koya na noqu taro ka sauma mai, “Io, e dina. Au gole mai Colorado. O kila vakacava?”

Au a vakamacalataka, “Baleta na nomu siqeleti.” A donu sara na noqu vakanananu niu wilika na vosa a volai toka ena nona siqeleti, “Au Momani. Vakacava o iko?”

Au a tomana, “Au via tukuna ga niu doka vakalevu na nomu yalonuidei mo duatani ka daramaka e dua na ivakaraitaki doudou vakaoqo. Au raica e dua na duidui vei iko, kau diva mera a vakataka na nomu dina ka yalonuidei na goneyalewa kei na lewe ni Lotu yadua.” Sa oti na neirau volivoli, keirau veivakamocetaki ka dui gole.

Ia ena veisiga kei na veimacawa ni oti na gauna tawanamaki ni veisiga vakaoqo, au raica niu sa mai vakasamataka sara tiko vakabibi na veisotari oya. Au vakasamataka voli na nona nuidei tu vaka oya na goneyalewa mai Colorado me vakatakila ni sa lewe ni Lotu i Jisu Karisito ni Yalododonu Edaidai. Au sa mani veinanuyaka se iyatuvosa cava meu digitaka me tabaki ena noqu siqeleti me vakaraitaka na noqu vakabauta kei na ivakadinadina. Au a mani vakasamataka e vuqa na malanivosa e rawa. Kena itinitini, au mai vakacegu toka ena dua na qaqa ni vosa veiganiti au na rawa ni daramaka vakadoudou: “Au Momani. Au kila. Au bulataka. Au taleitaka.”

Au gadreva meu vakatabakiduataka na noqu vosa ena itukutuku qaqa, ka nuitaki oqo.

Na imatai ni tiki ni itukutuku sa ivakaro raraba, veivakadeitaki, ka qaqa: “Au Momani.” Me vaka ga na goneyalewa au a sotava ena sitoa ka sega ni rerevaka me kila ko vuravura ni lewe ni Lotu i Jisu Karisito ni Yalododonu Edaidai. Au sa nuitaka ni da na sega ni rere se yalolailai meda vakatakila yani, “Au Momani.” E dodonu meda yalonuidei, me vakataka na iApositolo o Paula ni a kaya, “Niu sa sega ni maduataka na itukutuku vinaka kei Karisito: ni sai koya oqo na kaukauwa ni Kalou me vakabulai kina ko ira yadua era sa vakabauta.”1 Oi keda na lewenilotu, eda sa dau muria na noda iVakabula, o Jisu Karisito. Na saumaki mai kei na nuidei vakaoqo sa isau tiko ni sasaga vagumatua ka vakainaki. E ka ni tamata yadua. E cakacaka ni bula taucoko.

Na tiki ni vosa e tarava e vakadeitaka, “Au kila.” Ena vuravura nikua, era sa tu na veimataqali itaviqaravi, ulutaga, kei na gagadre, ka saga tiko meda malele kina. Ni sa vuqa tu na veivakataotaki, sa tu beka vei keda na kaukauwa, bula vakaivakarau, kei na yalodina meda rai vakatabakidua tikoga ki na veika e bibi cake? Eda sa kila vakavinaka tiko beka na dina ni kosipeli me vakataka na noda vuli, cakacaka, qito, se noda tex kei na veivolavolai? Eda sa vaqara vakaidina tiko beka na isau ni noda vakatataro ena noda kana mai na ivolanikalou kei na nodra vosa na parofita? Eda sa vasaqara tiko beka na veivakadeitaki ni Yalo Tabu?

Na bibi ni noda rawata na kila-ka sa ivakavuvuli tawamudu. Na Parofita o Josefa Simici e “dau taleitaka na kila-ka ena kena kaukauwa dodonu.”2 E kaya: “E yaga ki na bula kei na bula vakalou na kila-ka. … Dou rogoca, koi kemudou kece na veitacini, na tikina bibi oqo: na kila-ka sa kaukauwa ni Kalou ki na veivakabulai.”3

Sa ka bibi na dina kei na kila-ka taucoko, ia ena maliwa ni veivagolei tani ki na noda bula ena veisiga, e dodonu meda raica tiko vakatabakidua na noda tara cake na kilai ni kosipeli me rawa ni da kila vakavinaka na sala meda bulataka kina na ivakavuvuli ni kosipeli ki na noda bula.4 Ni sa tubu cake tiko na noda kila na kosipeli, eda na tekivu yalonuidei ena noda ivakadinadina ka rawa meda kaya, “Au kila.”

Tarava na tikina, “Au bulataka.” Na ivolanikalou e vakavulica ni dodonu meda “muria na vosa ka kakua ni rogoca walega.”5 Eda bulataka na kosipeli ka yaco meda “muria na vosa” ena noda cakacakataka na vakabauta, talairawarawa, taleitaka na qaravi ira na tamata, ka vakamuria na ivakaraitaki ni noda iVakabula. Eda cakacaka ena yalodina ka cakava na ka eda kila ni sa dodonu “ena veigauna kecega, ena veika kecega, kei na veivanua kecega,”6 veitalia ga ke dua e rai tiko mai se sega.

Ena keda ituvaki ni bula oqo, e sega ni dua e vinaka sara. Se mani vakacava na sasaga vagumatua ni noda bulataka na kosipeli, eda na caka cala taucoko, ka da na valavala ca taucoko. Ia sa na veivakacegui tudei dina meda kila ni mai na veisorovaki vuetaki ni noda iVakabula, eda na rawa ni vosoti ka vakasavasavataki tale. Na cakacaka oqo ni veivutuni dina kei na veivosoti e vaqaqacotaka na noda ivakadinadina kei na noda sasaga meda talairawarawa ki na ivakaro ni Turaga ka taracake na noda bula ena ivakatagedegede ni kosipeli.

Niu vakasamataka na malanivosa, “Au bulataka,” au nanuma sara na noqu a sotava e dua na goneyalewa o Karigan. A vola vakaoqo: “Se qai oti toka ga vakalailai oqo e dua na yabaki na noqu lewena na Lotu. … Vei au, niu a se dauvakatataro tiko, e dua ga na ivakaraitaki, ni dina na Lotu oqo oya niu vakila niu sa mai kunea e dua na lotu e vakavulica na ivakarau savasava kei na ivakatagedegede e gadrevi. Au sa raica e mataqu dina na veika e yaco vei ira na tamata ena gauna era vakawalena kina na ivakaro ka digitaka na sala cala. Au sa vakadeitaka makawa sara e lomaqu, meu bulataka na ivakatagedegede ni ivakarau savasava cecere. … Au kalougata vakalevu niu sa mai kunea na dina kau sa papitaiso rawa. Au sa marau sara ga.”7

Na iotioti ni malanivosa ni noqu itukutuku raraba na “Au taleitaka.” Na noda rawata meda kila na kosipeli i Jisu Karisito kei na noda bulataka vagumatua na ivakavuvuli ni kosipeli ena noda bula ena veisiga ena muataka e vuqa na lewe ni Lotu mera tukuna ena mamarau, “Au taleitaka na kosipeli!”

E dau yaco mai na yalo vakaoqo ni da vakila ni sa vakadinadinataka vei keda na Yalo Tabu ni da sa luvena na Tamada Vakalomalagi, ka sa dau nanumi keda, ka da sa tiko ena salatu dodonu. Ena tubu cake na noda taleitaka na kosipeli ni da sotava na loloma nei Tamada mai Lomalagi vata kei na vakacegu sa yalataka tu na iVakabula ni da vakaraitaka tiko Vua ni sa lomada meda talairawarawa ka muri Koya.

Ena gauna duidui eso ni noda bula, se da saumaki vou mai ki na Lotu se lewenilotu dede, eda na raica ni sa seyavu yani na marau taleitaki oqo. Eso na gauna e yaco oqo ena gauna ni ibolebole eso ka dodonu meda bulataka na vosota. Eso na gauna e dau yaco ena gauna ni noda bula sautu kei na tiko vinaka. Ni yaco mai vei au na yalo vakaoqo, au kila ni sa dodonu meu raicalesu na noqu sasaga ni vakatorocaketaka na noqu kila na kosipeli ka bulataka na ivakavuvuli ni kosipeli ena noqu bula.

E dua vei ira na ivakavuvuli ni kosipeli kaukauwa duadua ia e dau dredre toka ena so na gauna me bulataki oya na yalomalumalumu kei na solibula ki na lewa ni Kalou. Na nona masu na Karisito ena Were o Kecisemani, a kaya vua na Tamana, “Ia me kakua ni yaco na noqu lewa, me yaco ga na nomuni lewa.”8 Oqo me sa noda masu talega. Vuqa na gauna, ena masu vakanomodi vakaoqo, eda vakila ni da solegi ena loloma nei Tamada Vakalomalagi, ka ra vakalesuimai na yalo reki lomani oya.

Ena dua na soqoni ni veiliutaki ni Goneyalewa mai Eugene, e Oregon, a noqu madigi meu sota ka veivosaki kei Sister Cammy Wilberger. Na italanoa a wasea vei au o Sister Wilberger sa ivakadinadina ni kaukauwa kei na veivakalougatataki ni dua na goneyalewa me kila, bulataka, ka taleitaka tiko na kosipeli.

Ena vica na yabaki sa oti a mate ena vakacala-ka o Brooke na luvei Sister Wilberger yalewa yabaki 19 ni sereki na vuli ena imatai ni nona yabaki ena univesiti. E nanuma lesu o Sister Wilberger, “Oya e dua na gauna dredre sara ka butobuto ki na neitou matavuvale. Ia, sa mai solia vei keitou o Brooke e dua na isolisoli cecere. Keitou a sega ni raica oqo ena gauna a tubu cake tiko kina, ia ena veiyabaki kei na veigauna ni nona bula lekaleka, a solia vei keirau o Brooke e dua na isolisoli cecere duadua e rawa ni solia e dua na goneyalewa vei rau na nona itubutubu. O Brooke e a dua na yalewa luve ni Kalou bula dodonu. … Ena vuku ni isolisoli oqo ka vakabibi na kaukauwa gumatua ni Veisorovaki, sa yaco vei au na veivaqaqacotaki, loma vinaka, kei na veivakacegui yalataki ni iVakabula. Au sega ni taroga na vanua sa tiko kina oqo o Brooke kau sa kakavaki ga ki na neitou vakaduavatataki lomani.”9

Au sa vakadinadinataka na ituvatuva cecere ni bula marau tawamudu ni Tamada Vakalomalagi. Au kila ni sa kilai keda ka lomani keda o Koya. Au kila ni sa tala mai e dua na parofita, o Peresitedi Thomas S. Monson, me vakayaloqaqataki keda ka vukea meda dusimaki lesu Vua. Sa noqu masu ni da na sasaga yadudua yani meda rawa ni vakaraitaka ena yalonuidei, “Au Momani. Au kila. Au bulataka. Au taleitaka.” Au cavuta na veika oqo ena yalomalumalumu ena yaca i Jisu Karisito, emeni.

Me kilai: Me ikuri ni vuli, au vakatura me wiliki na Alama 32 kei na vosa nei Elder Dallin H. Oaks “The Challenge to Become” (Liahona, Jan. 2001, 40–43).

Show References

  1.  

    1.  Roma 1:16.

  2.  

    2. George Q. Cannon, ena Nodra iVakavuvuli na Peresitedi ni Lotu: Josefa Simici (2007), 299.

  3.  

    3.  iVakavuvuli: Josefa Simici, 304; raica talega na Martha Jane Knowlton Coray, ivola lailai, Church History Library, Salt Lake City.

  4.  

    4. Raica na veika sotavi ni yavunibula ena kila-ka naba 1, Torocake Yadudua ni Goneyalewa (ivola lailai, 2009), 38.

  5.  

    5.  Jemesa 1:22.

  6.  

    6.  Mosaia 18:9.

  7.  

    7. iVola vakaitaukei.

  8.  

    8.  Luke 22:42.

  9.  

    9. iVola vakaitaukei.