Luk Ol Narawan Olsem we Oli Save Kam

I Kam long Presiden Tomas S. Monson


Tomas S. Monson
Yumi save helpem olgeta blong winim ol smol rong blong olgeta. Yumi mas developem paoa ia blong luk ol man ia, i no olsem we oli stap naoia, be olsem we oli save kam taem oli kasem ol testemoni blong gospel blong Kraes.

Ol dia brata blong mi. Tu taem long wan yia, bigfala Konfrens Senta ia i fulap gud wetem prishud blong God taem yumi kam tugeta blong harem ol mesej we i kam long God. I gat wan naesfala spirit we i kavremap jeneral prishud miting ia blong Jos. Spirit ia, i aot long Konfrens Senta mo i go long evri bilding we ol boe blong God oli kam tugeta long hem. I tru, yumi bin filim spirit ia tedei long naet.

Sam yia i pas, bifo oli bildim naes Konfrens Senta ia, wan visita blong Tempol Skwea long Sol Lek Siti i bin go long wan sesen blong jeneral konfrens long Tabenakol. Hem i lisin long ol mesej blong Ol Brata. Hem i lisingud long ol prea. Hem i harem naes miusik blong Tabenakol Kwaea. Hem i sapraes se piano i bigbigwan mo i naes tumas long Tabenakol. Taem miting i finis, hem i talem: “bae mi givim evri ting we mi gat sapos mi bin save se wanem ol spika oli talem tedei, i tru.” Wanem we hem i stap talem, hem i: “Sapos nomo mi gat wan testemoni blong gospel.”

Bae i no gat wan samting nating long wol ia we bae i givim moa kamfot mo glad bitim wan testemoni blong trutok. Nomata, yumi stap long defren level, mi biliv se evri man o yang man long ples ia i gat wan testemoni. Sapos yu filim se yu no gat yet strong testemoni ia we yu wantem gat, mi askem strong long yu blong wok blong kasem wan testemoni olsem. Sapos testemoni blong yu i strong mo i dip, wok blong kipim i stap olsem. Yumi gat blesing blong gat save abaot trutok.

Mesej blong mi tedei long naet, ol brata, i we i gat plante man tumas we oli gat smol o nogat testemoni naoia; olgeta we oli save mo wantem kasem wan testemoni olsem, bae oli glad sapos yumi glad blong wokhad blong serem testemoni blong yumi mo helpem olgeta blong jenis. Samtaem, yumi nao i save givim janis blong oli jenis. Mi tokbaot faswan olgeta we oli memba, be naoia, oli no komitim olgeta fulwan long gospel.

Plante yia i pas, long wan eria konfrens we oli holem long Helsinki, Finlan, mi bin harem wan strong mesej, we mi tingbaot oltaem mo i pusum man, we oli givim long wan sesen blong ol mama mo ol gel blong olgeta. Mi no fogetem mesej ia, nomata we kolosap 40 yia i pas, we mi harem mesej ia. Long plante trutok we spika ia i toktok raon long hem, woman ia i talem se wan woman i nid blong oli talem long hem se hem i naes. I nid blong oli talem long hem se hem i impoten. Hem i nid blong oli talem long hem se hem i gat praes.

Ol brata. Mi save se ol man oli semmak nomo long ol woman long saed ia. Yumi nid blong oli talem long yumi se yumi minim wan samting, se yumi save mekem samting mo yumi gat praes. Yumi nid blong kasem wan janis blong givim seves. From ol memba ia, we oli nomo kam long Jos, o oli stap holemtaet olgeta mo oli nomo stap komitim olgeta, yumi save prea blong faenem rod blong go toktok long olgeta. Blong askem olgeta blong mekem wok long Jos, ating i stret fas step we oli nidim blong oli kambak fulwan. Be olgeta lida ia we oli save help long saed ia, plante taem, oli stap holemtaet olgeta blong mekem olsem. Yumi nidim blong gat long maen se man i save jenis. Oli save putum biaen ol nogud fasin. Oli save sakem sin from ol rong blong olgeta. Oli save kam klin inaf blong kasem prishud. Oli save wok blong Lod wetem ful tingting. Bae mi givim sam eksampol.

Fastaem we mi kam wan memba blong Kworom blong Olgeta Twelef Aposol, mi gat janis blong go wetem Presiden N. Eldon Tena, wan kaonsela long Presiden Deved O. MaKei, long wan stek konfrens long Albeta, Kanada. Long taem blong miting, stek presiden i ridim ol nem blong fo brata we oli bin kwalifae blong oli odenem olgeta i kam elda. Ol man ia, Presiden Tena i bin save olgeta, from we hem i bin stap smol taem long eria ia. Be Presiden Tena i bin save mo tingbaot olgeta olsem we oli bin stap, mo hem i no save se oli jenisim laef blong olgeta mo oli kwalifae fulwan blong kam elda.

Stek presiden i ridim nem blong fas man mo askem hem blong stanap. Presiden Tena i toktok slo long mi, “Traem luk. Mi neva ting se bae hem i save mekem.” Stek presiden i ridim nem blong seken man, mo hem i stanap. Presiden Tena i tajem mi mo talem sapraes blong hem. Mo i semmak olsem wetem ol fo brata ia.

Afta long miting, Presiden Tena mo mi, i gat janis blong kongratuletem ol fo brata ia.

Long ol yia 1940 mo 1950, wan man we i lukaotem kalabus long Amerika, Klinton Dafi, oli save gud hem from hadwok blong hem blong tijim gud ol man long kalabus blong hem. Wan i tokbaot nogud hem mo talem: “Yu mas save se ol bigfala taega oli no save jenisim kala blong skin blong olgeta?”

Klinton Dafi i ansa: “Yu mas save se mi no stap wok wetem ol bigfala taega. Mi wok wetem ol man, mo ol man oli stap jenis evri dei.”1

Plante yia i pas, mi gat janis blong stap olsem presiden blong Kanada Misin. I bin gat wan branj wetem smol namba blong prishud. Oltaem, i gat wan misinari i prisaed long branj. Mi kasem strong filing se i gat nid blong gat wan memba blong branj i prisaed long ples ia.

I gat wan adalt memba long branj we i wan dikon long Aronik Prishud be i no kam tumas, o tekpat tumas blong kam antap long prishud. Mi filim insperesen blong singaotem hem olsem branj presiden. Oltaem, bae mi tingbaot dei we mi bin mekem intaviu wetem hem. Mi talem hem se Lod i givim insperesen long mi blong singaotem hem blong kam presiden blong branj. Afta we hem i toktok fulap from i no wantem, mo toktok blong waef blong hem we i glad, hem i talem se bae hem i mekem wok. Mi odenem hem i kam pris.

I bin stat blong wan niu dei blong man ia. Laef blong hem i kam stret kwiktaem, mo hem i promesem mi se bae hem i laef folem ol komanmen olsem we hem i sapos blong mekem. Long sam manis afta, oli odenem hem olsem wan elda. Hem, mo waef blong hem mo famle, i bin go long tempol, mo oli bin sil. Ol pikinini blong tufala i go long misin mo oli mared long haos blong Lod.

Samtaem, blong talem long ol brata blong yumi se yumi nidim olgeta mo oli impoten, i save helpem olgeta blong tekem step ia blong komitim olgeta mo kam aktiv fulwan. Hemia i tru long saed blong olgeta we oli kasem prishud nomata yia blong hem. Hem i wok blong yumi blong givim janis long olgeta blong laef olsem we oli sapos blong mekem. Yumi save helpem olgeta blong winim ol smol rong blong olgeta. Yumi mas developem paoa ia blong luk ol man ia, i no olsem we oli stap naoia, be olsem we oli save kam taem oli kasem ol testemoni blong gospel blong Kraes.

Wantaem mi go long wan miting long Lidvil, Kolorado. Lidvil i stap long wan ples we i stap 3 taosen mita antap. Mi tingbaot spesel miting ia from ples blong hem i antap we antap, be tu, mi tingbaot from samting we i bin hapen long naet ia. I gat wan smol namba blong man blong prishud i stap. Olsem wetem branj long Kanada Misin, branj ia, wan misinari i prisaed long hem mo i bin olsem longtaem i kam.

Long naet ia, mifala i gat wan naes miting, be taem mifala i stap singsing long las hym, insperesen i kam long mi se i mas gat wan lokol branj presiden i prisaed. Mi tanem mi long misin presiden mo askem: “I no gat wan man long ples ia we i save prisaed? Wan lokol man?”

Hem i ansa: “Mi no save wan man.”

Long taem blong singsing ia, mi luklukgud long ol man we oli sidaon long ol fas tri ro. Tingting blong mi i lukluk wan long ol brata ia. Mi talem long misin presiden, “Man ia i save stap olsem branj presiden?”

Hem i ansa: “Mi no save. Ating hem i save.”

Mi talem: “Presiden, bae mi tekem hem i go long narafala rum mo intaviu long hem. Yu toktok afta long las hym kasem taem we mi kambak.”

Taem mitufala i wokbaot kambak long rum, misin presiden i endem testemoni blong hem. Mi presentem nem blong brata ia blong stap olsem niu branj presiden. Stat long dei ia i go, Lidvil, Kolorado i gat wan lokol memba i lidim yunit long ples ia.

Ol brata. Semfala prinsipol ia i go long olgeta we oli no memba yet. Yumi mas developem skil o paoa ia blong luk man, i no olsem we oli stap, be olsem we oli save kam taem oli ol memba blong Jos, taem oli gat wan testemoni blong gospel, mo taem laef blong olgeta i go stret wetem ol tijing blong hem.

Yumi gobak long yia 1961, oli bin holem wan wol konfrens blong ol misin presiden, mo evri misin presiden long Jos, oli kam long Sol Lek Siti from ol miting ia. Mi kam long Sol Lek Siti aot long misin blong mi long Toronto, Kanada.

Long wan long ol miting ia, N. Eldon Tena, we tetaem ia i Asisten blong Kworom blong Olgeta Twelef, i jes kambak long fas eksperiens blong hem blong prisaed ova long ol misin long Inglan mo Wes Yurop. Hem i tokbaot wan misinari we i wan long misinari we i gat moa sakses, we hem i mitim long evri intaviu we hem i bin gat. Hem i talem se taem hem i intaviu long misinari ia, hem i talem long hem: “I stret sapos mi talem se evri pipol we yu baptaesem olgeta i kam long Jos, oli givim nem blong olgeta long yu.”

Yang man i ansa: “No. Mifala i faenem olgeta tru long wokbaot blong mifala.”

Brata Tena i bin askem hem wanem i defren long wei we hem i stap toktok long man—from wanem hem i gat bigfala sakses we ol narawan oli no gat. Yang man i talem se hem i traem blong baptaesem evri man mo woman we hem i mitim. Hem i talem se sapos hem i noknok long doa mo luk wan man we i smok siga (bigfala sigaret) mo i dresap long olfala klos mo i no gat intres long samting—speseli relijin—bae misinari ia i putum pikja long maen blong hem, se bae man ia i luk olsem wanem sapos hem i stap long defren situesen. Long maen blong hem, hem i save luk man ia i sevem mustas i klin, i werem wan waet sot mo waet traoses. Mo misinari i save luk hem i lidim man ia i go long ol wota blong baptaes. Hem i talem: “Taem mi luk wan man long wei ia, mi gat paoa blong talem testemoni blong mi long hem long wan wei we mi save tajem hat blong hem.”

Yumi gat wok blong lukluk long ol fren blong yumi, olgeta we yumi joen wetem, ol neiba blong yumi long wei ia. Bakegen, yumi gat wok ia blong luk wanwan man o woman, i no olsem we oli stap, be olsem we oli save kam. Mi plis long yufala blong tingting long olgeta long wei ia.

Ol brata. Lod i talem long yumi wan samting abaot olsem wanem nao prishud we yumi gat i impoten. Hem i talem long yumi se yumi kasem prishud ia wetem wan promes mo wan kavenan. Hem i givim long yumi instraksen ia we yumi mas fetful mo tru long evri samting we yumi kasem, mo yumi gat wok ia blong kipim kavenan ia i go kasem en. Mo afta, evri samting we Papa i gat, bae Hem givim long yumi.2

Strong paoa long tingting, i toktok ia we yumi nid blong harem mo holem kolosap long hat blong yumi—strong paoa long tingting blong tanem baksaed blong yumi long temtesen, strong paoa long tingting blong leftemap voes blong yumi wetem testemoni long evriwan we yumi mitim, mo stap tingbaot se evriwan i mas gat wan janis blong harem mesej ia. Hem i no isi samting blong yumi mekem. Be yumi save kam blong bilivim ol toktok blong Pol i go long Timoti:

“Spirit ya we God i givim long yumi, hem i no blong mekem yumi fraet, nogat. Spirit ya i blong mekem yumi gat paoa, i blong mekem yumi lavem ol man, mo i blong mekem yumi naf blong blokem ol samting we yumi nomo i wantem.

“Nao from samting ya, bambae yu no sem blong tokbaot Masta blong yumi.”3

Long Mei 1974, mi bin stap wetem Brata Jon H. Grobeg long ol aelan blong Tonga. Mifala i gat wan apoenmen blong visitim King blong Tonga, mo mifala i mitim hem long wan ofisol miting. Mifala i tokbaot ol samting. Be, bifo mifala i aot, Jon Grobeg i talem wan samting we i no hapen oltaem. Hem i talem: “Hae King, yu rili mas kam wan Momon, mo olgeta wokman blong yu tu, from se afta, fulap long ol problem blong yu mo ol problem blong olgeta, bae oli kam stret.”

King i smael bigwan mo ansa: “Jon Grobeg, ating yu tru ia.”

Mi tingbaot Aposol Pol long fored blong Agripa. Mi tingbaot ansa blong Agripa long testemoni blong Pol: “Yu yu ting se smol taem ya nomo bambae yu pulum mi mi kam Kristin man.”4 Brata Grobeg i gat strong paoa long tingting blong talem testemoni blong hem long wan king.

Tunaet, i gat plante taosen long yumi we oli stap wok blong Lod fultaem olsem ol misinari blong Hem. Blong ansa long singaot ia, oli livim biaen long olgeta, hom, famle, fren, mo skul mo oli go fored blong mekem wok. Olgeta we oli no andastanem oli askem kwestin ia: “Olsem wanem nao oli rere blong akseptem nomo mo givim plante taem olsem?”

Ol misinari blong yumi oli save ansa wetem ol toktok blong Pol, bigfala misinari ia blong bifo: “Mi mi stap talemaot gud nius blong Kraes, be mi no gat raet blong tok flas from samting ya. Hemia i wok blong mi we mi mas mekem. Sipos mi no moa talemaot gud nius ya, hemia bigfala trabol blong mi ya, bambae mi harem nogud tumas from.”5

Long tabu skripja, i no gat wan toktok moa we i moa stret, we i givim moa wok, i givim moa stret instraksen, we i tok stret bitim tok blong Lod we i laef bakegen long ded i talem taem Hem i bin kamaot long Galili long ol leven disaepol blong Hem. Hem i talem:

“God i givim olgeta paoa long mi, long olgeta samting long heven mo long wol.

“Nao from samting ya, yufala i mas go long ol man long olgeta ples long wol, blong pulum olgetaoli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit.

“Mo yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save se mi bambae mi stap wetem yufala oltaem, gogo wol ya i finis.”6

Tabu komanmen ia, wetem ol bigfala promes blong hem, i moto blong yumi tedei, olsem i bin stap long medel blong taem. Misinari wok i wan stret aedentiti saen blong Jos blong Jisas Kraes blong Ol Lata-dei Sent. I bin olsem oltaem. Bae i olsem oltaem. Olsem Profet Josef Smit i bin talem: “Afta we yumi talem evri samting, wok we i bigwan moa, mo i moa impoten, hem i blong prijim Gospel.”7

Long 2 sotfala yia, evriwan long ol fultaem misinari we oli stap wok long hae ami blong God bae oli finisim ol fultaem wok blong olgeta mo bae oli mas gobak hom mo gobak long ol famle blong olgeta we oli lavem. Olgeta we bae oli tekem ples blong olgeta, yumi faenem olgeta tunaet we oli stap long ol grup we oli kasem Aronik Prishud blong Jos. Ol yang man. Yufala i rere blong ansa yes? Yufala i glad blong mekem wok? Yufala i rere blong givim seves?

Presiden Jon Teila i eksplenem wanem yufala i mas mekem: “Kaen man we mifala i wantem olsem man blong tekem mesej blong gospel, oli ol man we oli gat fet long God; ol man we oli gat bilif long relijin blong olgeta, ol man we oli ona long prishud blong olgeta, ol man we oli fulap long Tabu Spirit mo paoa blong God, ol man blong ona, tru fasin, klin fasin, mo, oli klin evriwan.”8

Ol brata. Komanmen ia blong serem gospel blong Kraes i kam long yumi wanwan. Taem laef blong yumi i stret wetem ol standet blong God, olgeta we oli stap raonabaot long yumi bae oli no talem komplen ia: “Taem blong tekemaot kakae long garen i pas, mo draetaem i finis, be Hae God i no sevem yumi yet.”9

Stret Man blong Lukaot long sol blong yumi, misinari we i pemaot man, i givim yumi stet promes blong Hem.

Sevya i talem se sapos yumi stap wok evri dei blong laef blong yumi blong taltalemaot long ol pipol ia blong oli sakem sin, mo tekem wan sol nomo i kam long Hem, bambae glad blong yumi i bigwan wetem Hem insaed long kingdom blong Papa blong Hem!

Mo sapos glad blong yufala bae i bigwan wetem wan sol we yufala i bin tekem i kam long Hem insaed long kingdom blong Papa blong Hem, bambae glad blong yufala i bigbigwan moa sapos yufala i tekem plante sol i kam long Hem.10

Abaot Hem we i talem ol toktok ia, mi talem witnes blong miwan. Hem i Pikinini blong God, Ridima blong yumi, mo Sevya blong yumi.

Mi prea se bae yumi gat strong paoa long tingting blong stretem han blong felosip, strong tingting blong traem mo traem bakegen, mo tingting we i stap daon we yumi nidim blong lukaotem help blong Papa blong yumi taem yumi stap mekem folem komanmen blong serem gospel . Responsabiliti i stap long yumi, ol brata. Long nem blong Jisas Kraes, amen.

Show References

  1.  

    1. Insaed long Bill Sands, The Seventh Step (1967), 9.

  2.  

    2. Luk long Doctrine and Covenants 84:33–39.

  3.  

    3.  Seken Timoti 1:7–8.

  4.  

    4.  Ol Wok 26:28.

  5.  

    5.  Fas Korin 9:16.

  6.  

    6.  Matiu 28:18–20.

  7.  

    7.  Teachings of Presidents of the Church: Joseph Smith (2007), 330.

  8.  

    8.  Teachings of Presidents of the Church: John Taylor (2001), 73.

  9.  

    9.  Jeremaea 8:20.

  10.  

    10. Luk longDoctrine and Covenants 18:15–16.