Scott D. Whiting
A ngarbab el teletelel a okedecherul a templo loruul tial Ikelesia a olchotel e olangch er a teletael er a klengar kid.

Ng diak el meketeket ra bo kuldingel ra meral klebokel el Brigham City Utah Templo, eak mlo melebedebk er sel taem, ra kdirk kungedereder ra teletelel a templo el mo ra buai er a re me oldingel, cheldelel ma ungil klebesei el kirel a Laie Hawaii Templo.

Mekesai el buil ra bochul merek a ureor ra templo, eng mlorngii a techellek el mo oldingel lobengkel a Executive Director ra Templo Department, Elder William R. Walkder, ma rebebil ra remengeteklel a Templo. Nguldimukl er tia, a rechedal ma remengeteklel a kombalii el .milngedmokl er tia el templo a direk el ulbengkemam. A mle mokdek er tia el odingel, a mo omes el kmo ng mle uangera a teletelel tial ureor ra roruul er ngii. A taem er tial odingl, ea ureor a mle 85 el basent a rekil.

Maki morael el meliuekl ra templo, eak kulmes e ulerenges ra Elder Walker me tirka el bebil er ngii el kensai er tial ureor e kadecheduch ngii me ngkal ngii a merreder ra kombalii ra urerel tial templo. Chelsel tia el odingel ea kulemtab ra chimol chad el lorrurt ra chimal ra kboub ra ki morael ra chelsel a delmerab el mo ra tang. Mekesai el taem ra loruul er tial lomeruul, eng blechoel el mengilkelk ra chetngelel chimal e sola e mocha mengedecheduch ra meredelel tia el ureor e dula er ngii el kmo, “Ak melchesuar ra okrokr ra ikal kbouub. Okrokr a diakl e meral teletelel a templo. Kom kiriu el lemuut el metengtii tia el kboub.” Men gkal chad ra ureor a mocha otebedii a babilngel e meluches e omtab a ika el lolekoi.

Me chelcha ki morael er ngii el chelsel a templo el di mekesai el chad a mes, e ngika el diosisiu el chad a mocha stob er kemam e mocha ngosukemam el kmal mo ungil lomes ra ikal beches e meral klebokel el karas el mado. Mitia el mado a nglai a klungel el ngara eru el sak (0.6{nb m) ma elolem el sak a klemengete (1.8 m) e mlarngii a mekekerei, el llechukl er ngii. Ng millutk el mor tial el kekerei el eru el sung (5 cm), el ngarngii a iro er ngii el skak el karas el ngii a ulebengkel tial klalo e dilul kmo, “Tilcha el skak a chebirukel.” Ak kulmes er tial skak, ea osengek el lomes er ngii a diak el chebirukel. Eng di, a bocha kungil omes loba dongu el, melai er a klungel, ak kmlo sebechek el mesa e medengelii el kmo ng meral uaisei el tial kekere el skak mle chimo ma cheiai sung (3  mm) el chebirukel. A dereder a milchedereder el mor ngka el ngii a oungerachel el kmo aika el mado a kirel mo mengubet leng diak el ngii a teletael ra templo.

Ak kilngei e mlo mechas a renguk er a dul kmo tia el rokir el mado a kirel mengubet lengii el kmal meringel a doues ika el mekekerei el llechukl er ngii. Ulterekokl, el dimlak el sal kmal sebechir a rechad el mesa ma lechub ete dongchii tial mado leng kmal ngar ra mo cheuekel ra chelsel a tmeplo.

A kurola el mo remei er tiaikid el sils, eak mlo melebedebek el kmo ngerak silubii er tial teletael— ma lechub, eak kuk, silubii. Ng dimlak el meketeket e ra chelsel a kesai el klebesei eng mlar ngii a klechedaol el mo mesarch er tia el mla mo merek el templo e sola ea melemalt el uldasu a kmal mlo bleketakl el merngak.

Misei ra ktuu er tia el mla mo merek el Laie Hawaii Templo, ak meral mlo mechas a renguk er a klebebekelel ma teletelel. Ke locha medengei el kmo ak kmal mle semeriar el mo omes aike el kboub ma mado el ngii a dimlak el ungil. Me ngkal chad ra ureor eng mlo sebechel el mtanget ikal kboub. Ma ikal mado ng meral mlutechei? Misei ra kurael el me omes ika el mle keritbetbechel el kboub eng meral mlo mechas a renguk ra ika el beches el dekedekel tial kboub. Ma kot el mle era uldusuek a kmo, “ng uaisei el chad er a ureor ra—a lruul aikang di ngilai a babier el me mereked er a ika el kboub, eng di lechub eng diak, tia di mla moktek el kirel mo bereked ra kboub.” Ak mlo melebedebek el kmo ngera uchul meng kmal kirel morngii a dekedekel ika el keritbetbechel el kbouub? Mak kulereched el mo er tial basio el ngar ngii tia el mado e kmal mlo mechas a renguk ra kisa a dellomel kmal kedelal el ngar tia el mo er a tensio. Ak dilengchokl el bedul tiakid el mado el lengarngii. E liluut el omdasu, “menguaisei el tiakid a teletael el chad er a ureo a mo kudmeklii a telemall tial chebirukel el skak el mado—ng milertii.” Ma kurola el mo kmeed er tial mado, eak kulbechii aika el llel a delomel el mo ra bitang e kilmir a cherik e ra kisa tial mado el blal btechir. Me tial meketeket el chebirukel el skak el mado a dilchor el kmal ungil ma ikal llechukl er ngii meng kmal tabesul.

Ngera ma uchul ma ika el mekekere el keritbetbechel ma chebirukel el kmal ngar ngii a techil a l kmal meringel ra rechad a mo remutech ma lechub e te dmangch? Nge ra ma chad er a ureor a kmal mle kirel mo kutmokl el mor bab el teletael?

Mise ra ktuu er a templo eak kmal mlo meringel el melebedebek, e miltik er a nger er sera kumes el bedul babkusa tial mla momerek el chelsel a templo el ngar ngii a llechukl er ngii: “Cheledaol el mo ra Rubak, Blil a Rubak.”

A templo er tial Ikelesia a ulekedong. Tial cheledaol el basio a usbechall el mer kid, ma tial cheledaol el kbekbel a usbechall, el ngii a cheledaol e ruoll a meruul ra chelsel. Eng ding diak el kirel ngar ngii a dekteled el kmo meng tiang meral blil techang. Eng di ng kirel usbechall a ikal teletael el blal ruul, meng diak el kired el kuk di simbai ra beltik el reng ma omengull el mo ra Rubak el Jesus Kristo, kede bai meruul ma lechub e kede, ocholt el mora rokui el tir a omtab e mengull er Ngii el blil.

Nga ra ocholt el mera Profet Joseph Smith el mo omkedechor ra templo ra Navuoo, el Rubak a dilung:

“Mei el rokui, kemiu ma kolt ma silver, ma ilecha el mekreos el bedmiu, ma rokui el meringel chad el klokliu; me tirke el ngar ngii a klemedengegi er tir ra klalo ra recheuodel, … em ngai el mei … ma ikel klebokel kerrekar;

“… E mokedecherur a blai el ngar ra ngklek, el mor ngkel Kot el Ngarbab.”1

Tiang a uleak a King Solomon er a Uodel Renged er sera lomekedchor a templo el di ulesbech a kmal di mle beot el klekedall.2 Chelchal taem e ke melemolem el meruul lousbech a meral teletael lokiu a mla medung el teletael, el lomekedechor a templo era Ikelesia.

Ak .dirrek el silubii el kmo ng direk el di osenged ma teleteled eng modiak el sebeched el mesang malechub e dolchesuar, a Rubak a medengei a chelitechetud meng sebechel melbodeb aike el kuk sebeched el mor sel tkul rebab el sebeched. Ng osisiu el klemerang el kirel omerelled ma teleteled eng sebeched el mo klikiid el kirel a klengeltengat ra templo. A Rubak a milellach:

“Ma leuaisei el rokui el chad el sebechir er rullii a blai el ngar ra ngklel a Rubak, e diak el cheltikaik er a kikiongel el omeruul el mera chelsel, el diak el temelii, mel sebechel a klebkall el mo obengkiu;

“Oi, ea rengedek a mo risei, e ngak a mei, e tirke el klikiid a rengrir a mei e mosebecherir el mesa a Rubak.

“Eng di lsekum eng mo diak el sebechel eng mo diak kbong, ea klebkellek a diak el mei; leng diak el sebechek el ngara diak el cheledaol el templo.”3

Ng di uai ngkal meruul a blai, sel blal bo domelchesiu a betok el omeruul ra chelsel a klengar er kid el ngii a diak el ungil teletael ra osisecheklel a Rubak, di mrekmo de riruul el mor sel tkul rebab el sebeched, ng kired el mereched el louedikl el mo meruul aike mle telmelled, sel bo domtab eng kmal meral diak el sebeched el mart a kngtid ra Rubak. Ng kired el mo melatk el kmo “sel doumededenger el omart a kngtid, … meng uaisei, el babeluades a mengichoit er tir; [ma] Chedaol Reng ra Rubak a mo mekngit a rengul.”4

Ak direk el silubii el kmo sel kot el ngaruchei el teletael ra templo el usbechall ng di ngar tial Ikelesa a teletael ma olangch el kmo mekerang e mo sebeched el di mo kid el kiei. Me ng sebeched el mesuub el bek el chad, a lulsisechakl a Apostol Paulus el mo ra Ikelesia el kmo:

“Ke medengei eng diak el kmo kau a templo ra Rubak, ea Chedaol Reng a mo kiei el lobeng kem?

“Alsekum ma ngii dil chad atomelii a templo ra. Rubak, e ngii el Rubak a mo melbeiakel; le templo ra Rubak a chedaol, el kau a ngii el templo.”5

Kid el rokui el ruull ra kmal lungil klekedall, e kid a ta era kot el mengasireng el kekka el ngar ra engedel a chederdelel a chad. Mechelechang, e sel domakes el mengelakl ra klengit ma mekngit el lomeruul e tia el templo er kid a kmal lousbech ra klou el omeruul el mo omekbeches. Uaisei el ngar ngii a kbekbed el keritbetbechel e ousebech ra btanget malechub eng beches el mado el mo omekbeches ra delbenged el mo sebeched el dechor ra chedaol el basio. Ak ngeltengat, le ika el teletael ra templo a diak el loker kid el mo klikiid e mo soiseb leng diak deklikiid eng di ke melasem el mor sel tkul er bab el mong eng di bai kired el mo oltirakl a llechul a Rubak e melasem el mo oltirakl ra remengeteklel a Jesus Kristo. Tia a nglunguchek el merkid el kmo me bo dolemolem e dolasem el mengikiid ra klengar kid me bol sebeched el mo ngmai a klengeltengat el mo ra templo el lokiu a klisiched el rokir. E dolemolem el meruul e dosebechakl er kid ra klengit me bo el sebechel a Chedaol Reng ra Dios lobengked. El ngara ngklel a Jesus Kristo, amen.