Fas Bigfala Komanmen

I Kam long Jefri R. Holan

Blong Kworom blong Olgeta Twelef Aposol


Jefri R. Holan
Yumi gat wan laef blong givim olsem disaepol, blong givim blong soemaot lav blong yumi long Lod.

I no gat wan grup blong man long histri we mi gat sore long olgeta bitim olgeta leven Aposol we oli bin stap stret afta long ded blong Sevya blong wol. Mi ting se samtaem, yumi jes stap fogetem se oli no bin gat eksperiens mo oli bin gat nid blong dipen fulwan long Jisas. Hem i talem long olgeta: “Mi stap longtaem finis wetem yufala, be yufala i no save mi yet …?” 1

Be, yes, long olgeta aposol, Jisas i bin stap wetem olgeta longtaem inaf. Tri yia i no wan longfala taem blong singaotem wan ful Kworom blong Olgeta Twelef Aposol aot long wan grup blong ol niu konvet, stretem ol olfala fasin, tijim olgeta ol gud samting blong gospel blong Jisas Kraes, mo afta, livim olgeta blong oli gohed wetem wok kasem taem we oli kilimded olgeta tu. Hemia i wan defren fiuja blong wan grup blong ol elda we oli jes odenem.

Speseli pat ia we bae oli stap olgetawan. Plante taem, Jisas i bin traem blong talem long olgeta se bae Hem i no stap wetem olgeta long bodi oltaem, be oli no bin save, o oli no wantem andastanem wan kaen tingting olsem. Mak i bin raetem:

“Hem i stap tijim ol man blong hem mo talem: ‘Mi mi Pikinini blong Man, bambae wan man i putum mi long han blong ol enemi blong mi, mo bambae oli kilim mi mi ded. Be long nambatri dei, bae God i mekem mi mi laef bakegen.

“Be ol man blong hem oli no savegud mining blong tok ya, mo oli sem blong askem long hem.”2

Afta, wan sot taem ia we oli gat blong lanem samting, mo smol taem blong rere, samting we oli ting long hem i bin hapen, samting we oli no biliv long hem, i kam tru. Lod mo Masta blong olgeta, Kaonsela mo King blong olgeta, oli bin nilim Hem long kros. Seves blong Hem long wol ia i finis, mo smol Jos ia we i stap traehad we Hem i bin stanemap, i luk se bae oli jikim mo bae i go lus. Ol Aposol blong Hem oli bin witnesem se Hem i bin laef bakegen long ded, be hemia i bin wan bigfala samting long olgeta. Yes, ating oli mas askem olgetawan: “Bae yumi mekem wanem naoia?” Blong kasem wan ansa, oli lukluk long Pita, senia Aposol.

Long ples ia, mi askem yufala blong akseptem we mi no ridim stret toktok blong skripja taem mi tokbaot wanem i bin hapen. Pita i talem long ol fren blong hem: “Ol brata, yumi bin gat 3 gudgudfala yia. I no gat wan long yumi i save tingting se sam manis i pas, yumi bin luk ol merikel mo yumi bin glad tumas. Yumi bin toktok wetem, prea wetem, mo wok wetem Stret Pikinini blong God. Yumi bin wokbaot wetem Hem mo krae wetem Hem, mo long naet we evri samting i finis, i no gat wan i krae nogud bitim mi. Be hemia i finis nao. Hem i finisim wok blong Hem mo Hem i girap long gref blong Hem. Hem i winim ded blong Hem mo blong yumi. So yufala i askem: “Bae yumi mekem wanem naoia?” Mi no save wanem moa blong talem, be blong yufala i gobak long laef blong yufala bifo, mo stap glad. Bae mi go sakem net. Sikis long olgeta ten Aposol we oli stap, oli bin agri, mo talem: “Bae mifala i go wetem yu.” Jon, we i bin wan long olgeta, i raetem “Nao olgeta oli godaon. Oli klaem long wan bot.”3

Be, sore tumas, oli no kasem fis. Fas naet we oli spendem long lek, oli no kasem wan samting, i no gat wan fis. Taem delaet i brok, oli lukluk i go long so, mo oli luk wan man we i stap singaot long olgeta: “Ol pikinini yufala i no kasem sam fis?” Nao ol Aposol ia we oli kam fisaman bakegen oli givim ansa we i no gat wan fisaman i wantem talem: “No, i nogat.” Mo olsem se hemia i no naf, oli singaotem olgeta “ol pikinini.”4

“Yufala i sakem net long raet saed blong bot. Bambae yufala i save pulum sam”5 strenja ia i talem, mo wetem ol simpol toktok ia, oli stat blong luksave Hem. Tri yia bifo, ol man ia oli bin stap sakem net long solwota ia. Long taem ia, oli bin wokhad ful naet, mo oli no kasem wan samting,6 skripja i talem. Be wan man Galili i stap long so, i singaot long olgeta blong oli sakem net blong olgeta, mo oli “pulum plante fis”7 we i inaf blong net blong olgeta i brok, mo oli fulumap tu bot we i fulap gud we kolosap ol bot ia oli draon.

Naoia, i stap hapen bakegen. “Ol pikinini” ia, olsem we oli bin singaotem olgeta, kwiktaem oli bin sakem net blong olgeta, mo oli bin save kasem fulap, fulap fis.8 Jon i talem samting klia, “Masta blong yumi ia!.”9 Nao Pita i harem, i jiam aot long bot, i swim i go.

Taem Hem i mit bakegen wetem Jisas we i laef bakegen long ded, Pita i toktok wetem Sevya, mo mi ting se toktok ia i bin jenisim seves blong Pita olsem aposol, mo i jenisim Pita hemwan; mo i muvum Pita blong givim wan bigfala laef blong seves mo lidasip. Taem Hem i bin lukluk long bot blong olgeta, long olfala net blong olgeta, mo hip blong 153 fis, Jisas i talem long Senia Aposol, “Saemon, yu yu lavem mi moa i winim we ol narafala ya oli lavem mi?” Pita i talem: “Yes, Masta, yu save se mi lavem yu.”10

Lod i toktok bakegen be i gohed blong luk long ae blong disaepol blong Hem mo talem bakegen, “Saemon, yu yu lavem mi?” I tru, hem i konfius smol from Lod i askem kwestin ia bakegen, be bigfala fisaman ia i ansa nambatu taem, “Yes, Masta. Yu save we mi mi lavem yu.”11

Bakegen, Sevya i givim wan sot ansa, be i gohed blong lukluk hem mo askem nambatri taem, “Saemon, yu yu lavem mi?” Naoia, Pita i no filim gud nating. Ating long hat blong hem, hem i tingbaot se sam dei i pas, we Masta i bin askem wan narafala kwestin tri taem, mo hem i bin ansa olsem—be i no long sem wei. O ating, hem i stap blong askem hemwan sapos hem i haremgud kwestin blong Masta Tija. O ating, hem i stap tingting long hat blong hem, i lukaotem wan ones konfemesen blong ansa blong hem we hem i givim finis, kwiktaem. Nomata wanem filing blong hem, Pita i talem long nambatri taem, “Masta, yu yu save we mi mi lavem yu.”12

Mo afta, Jisas i ansa (mo bakegen long ples ia mi no yusum toktok blong skripja), ating hem i talem wan samting olsem, “Afta Pita, be yu yu stap mekem wanem long ples ia? From wanem yu stap long ples ia long semfala solwota, wetem ol semfala net, mo yumi ripitim storian blong yumitu bakegen? Olsem wanem? Yu no bin luksave mo yu no luksave naoia se sapos mi wantem sam fis, bae mi kasem sam fis? Wanem mi nidim Pita, hem i ol disaepol—mo mi nidim olgeta blong oltaem. Mi nidim wan blong fidim ol sipsip blong mi mo sevem ol smol sipsip blong mi. Mi nidim wan blong prijim gospel blong mi mo difendem bilif blong mi. Mi nidim wan we i lavem mi, i lavem mi tru, mo i lavem wanem Papa blong yumi long Heven i komisenem mi blong mekem. Mesej blong yumi i no wan smol mesej o wan wok blong smol taem. I no wan mesej we i no impoten mo i no gat hop long hem, we bae oli sendem i go long hip asis blong histri. Hem i wok blong Hem we I Gat Olgeta Paoa, mo i blong jenisim wol. So blong seken mo ating las taem, Pita, mi stap askem yu blong yu livim evri samting ia, blong go tij mo testifae, wok mo stap fetful blong givim seves kasem dei ia we bae oli mekem long yu, wanem we oli bin mekem long mi.”

Afta, Hem i lukluk long evri Aposol, ating Hem i talem long olgeta: “Olsem wanem? Yufala tu i krangke olsem ol tija blong loa mo ol Farisi? Mo semmak tu long Herod mo Paelat? Yufala tu, semmak olsem olgeta, yufala i ting se wok ia bae i ded nomo sapos oli kilimded mi? Yufala tu, semmak long olgeta, i ting se kros ia mo ol nil mo gref bae i en blong evri samting mo wanwan i save gobak gud nomo long wanem yufala i bin stap mekem bifo? Ol pikinini, olsem wanem? Laef blong mi mo lav blong mi i no bin tajem hat blong yufala bigwan inaf?

Ol brata mo sista we mi lavem tumas, mi no save gud wanem bae yumi eksperiensem long Jajmen dei, be bae mi sapraes bigwan sapos long wan poen long toktok ia God bae i askem yumi stret kwestin ia we Kraes i bin askem long Pita, “Yu yu lavem mi?” Mi ting se bae hem i wantem blong save stret long tingting blong yumi long wol ia, mo olsem wan pikinini, sapos yumi andastanem wan komanmen ia, we i fas mo bigfala komanmen long evriwan — “Yu mas lavem Hae God we i God blong yu long olgeta hat blong yu, long olgeta laef blong yu, long olgeta paoa blong yu, mo long olgeta tingting blong yu.” 13 Mo sapos long taem ia yumi save talem “Yes Lod, yu save we mi mi lavem yu,” nao ating bae Hem i mekem yumi tingbaot se bigbigfala fasin blong lav, oltaem, i blong stap tru.

“Sipos yufala i lavem mi, bambae yufala i save obei long ol tok blong mi”14 Jisas i bin talem. Yumi gat ol neiba blong blesem, ol pikinini blong protektem, ol puaman blong leftemap, mo trutok blong difendem. Yumi gat ol rong blong stretem, ol trutok blong serem mo gud samting blong mekem. Long sot toktok, yumi gat wan laef blong givim olsem disaepol, blong givim blong soemaot lav blong yumi long Lod. Yumi no save givap mo yumi no save gobak. Taem yumi kam blong mitim Pikinini we i laef blong God we i laef, i no gat wan samting bakegen we i mas stap olsem i bin stap bifo. Taem oli hangem Hem long kros, Atonmen, mo Laef bakegen long ded blong Jisas, i makem stat blong wan Kristin laef, i no en blong hem. Trutok ia, tru samting ia, i bin letem wan smol grup blong ol fisaman blong Galili we oli kambak olsem Aposol, we oli no gat wan joshaos, o naef blong faet,15 blong oli livim ol net ia nambatu taem mo jenisim histri blong wol we yumi stap laef long hem naoia.

Testemoni blong mi we i go long evriwan we i harem voes blong mi, i we evri ki ia blong aposol oli bin kambak long wol mo oli stap insaed long Jos blong Jisas Kraes blong Ol Lata-dei Sent. Olgeta we oli no joenem yumi yet long las wok ia blong Kraes, mifala i talem, “Plis kam.” Long olgeta we oli bin stap wetem yumi wantaem, be oli aot, we oli glad nomo blong jusum sam pat blong bigfala plan ia blong Restoresen mo no wantem save long haf kaekae blong lafet, mi talem “Bae yu fesem plante longfala naet wetem ol emti net.” Singaot ia i blong yufala i kambak, stap tru, lavem God, mo givhan. Singaot ia blong stap strong blong stap fetful, mi sendem tu i go long evri riten misinari we i bin stanap insaed long wan ples blong baptaes mo wetem han blong hem long skwea i bin talem : “Jisas Kraes i bin givim wok mo raet long mi”16 Wok ia i blong jenisim konvet ia blong oltaem, mo i sapos blong jenisim yu tu blong oltaem. Long ol yut blong Jos we i stap kam antap blong go long ol tempol mo misin mo mared, mifala i talem “Lavem God mo gohed blong stap klin long blad mo ol sin blong jeneresen ia. Yufala i gat wan bigbigfala wok blong mekem, we i kam long haelaet blong anaonsmen we Presiden Tomas S. Monson i bin mekem yestedei moning. Papa blong yumi long Heven i wantem luk se yumi gat lav mo stap tru long eni taem blong ol laef blong yumi.

Long evriwan we i harem voes blong mi, voes blong Kraes i kam, i ring i kam tru long ol taem, i askem wanwan long yumi taem i gat taem yet: “Yu yu lavem mi?” Long bihaf blong yumi evriwan, mi ansa wetem strong paoa blong sol blong mi, “Yes Masta, mifala i lavem yu.” Mo mifala i putum han blong mifala long wok,17 bae mifala i neva lukbak kasem taem wok ia i finis mo tru lav blong God, mo long ol neiba i rulum wol. Long nem blong Jisas Kraes, amen.

Show References

  1.  

    1.  Jon 14:9.

  2.  

    2.  Mak 9:31–32.

  3.  

    3.  Jon 21:3.

  4.  

    4. Luk long Jon 21:5.

  5.  

    5.  Jon 21:6.

  6.  

    6.  Luk 5:5.

  7.  

    7.  Luk 5:6.

  8.  

    8.  Jon 21:6.

  9.  

    9.  Jon 21:7.

  10.  

    10.  Jon 21:15.

  11.  

    11.  Jon 21:16.

  12.  

    12.  Jon 21:17.

  13.  

    13.  Luk 10:27; luk tu long Matiu 22:37–38.

  14.  

    14.  Jon 14:15.

  15.  

    15. Frederic W. Farrar, The Life of Christ (1994), 656; luk long japta 62 blong save moa long saed blong ol trabol blong niufala Jos ia we i jes stanap.

  16.  

    16. Luk longDoctrine and Covenants 20:73.

  17.  

    17.  Luk 9:62.