Glad Ia blong Stap Sevem Ol Dedman

I Kam long Elda Rijad G. Skot

Blong Kworom blong Olgeta Twelef Aposol


Rijad G. Skot
Lod i talem se bae hem i planem insaed long hat blong ol pikinini, ol promes we Lod i bin mekem long ol papa, mo ol hat blong ol pikinini bae i tanem i go long ol papa blong olgeta.

Lod i bin soemaot long Profet Josef Smit ol bigfala doktrin long saed blong tabu odinens blong baptaes. Laet ia i bin kam taem ol nara Kristin Jos oli bin tijim se ded nomo, mo blong taem we i no save finis, bae i talemaot fiuja blong sol. Oli bin tijim se olgeta we oli baptaes oli kasem praes blong glad we i no gat en, be ol narawan, oli fesem harem nogud we i no save finis, we i no gat hop blong Lod i sevem olgeta.

Be revelesen ia blong Lod, se tru long stret prishud atoriti, oli save mekem baptaes long bihaf blong ol dedman, i holemtaet jastis blong toktok blong Hem we i talem: “Sapos man i no bon long wota mo long Tabu Spirit, bambae hem i no save kam we God i King blong hem.”1 Baptaes long bihaf blong ol dedman, i givim rod long impoten odinens ia long evri dedman we i klin inaf we i no bin gat Janis ia blong kasem taem i stap long wol.

Bigfala doktrin ia i wan nara witnes blong Atonmen blong Jisas Kraes we i stret evriwan. Hem i bin mekem fasin blong pemaot man i stap long evri sol we i sakem sin. Atonmen blong Hem i winim ded, mo Hem i letem olgeta dedman we oli klin inaf blong oli kasem evri odinens blong fasin blong sevem man tru long narafala man.

Long wan leta, we hem i raetem 150 yia i pas, Josef Smit i bin talem: “Olgeta Sent oli gat spesel janis blong kasem baptaes long bihaf blong ol famle blong olgeta we oli ded mo oli kasem Gospel long spirit wol tru long olgeta we oli bin komisenem olgeta blong prij long olgeta.2 Olgeta Sent ia we oli no tingting blong mekem wok ia long bihaf blong ol famle blong olgeta we oli ded, oli stap putum nekis laef blong olgetawan long kwestin.”3

Profet Ilaeja i bin komitim ol ki blong wok blong ol dedman long Josef Smit long Ketlan Tempol4 blong mekem promes blong Lod i kamtru se bae hem i planem insaed long hat blong ol pikinini, ol promes we Lod i bin mekem long ol papa, mo ol hat blong ol pikinini bae i tanem i go long ol papa blong olgeta.5

Tru long moa revelesen we i go long Josef Smit mo ol nara profet, save i bin kam mo wok blong mekem tempol wok mo famle histri i kam sapotem save ia. Evri profet, stat long Josef Smit, i tokbaot bigwan bigfala nid blong mekem evri odinens blong yumiwan, mo tu, blong olgeta bubu blong yumi we oli ded finis.

Tempol mo famle histri wok, i wan wok nomo we oli serem long tu pat. Tufala i joen tugeta semmak olsem ol odinens blong baptaes mo presen we i Tabu Spirit i joen. Sam memba, ating bae oli no save mekem tufala wok ia from se oli sik o from oli stap longwe long ol tempol.

Presiden Howod W. Hanta i tijim:

“Yumi mas mekem prishud tempol odinens wok we i nid blong yumi wanwan i save kasem kingdom blong God; afta, yumi mas mekem evri wok we i nid blong mekem blong olgeta we oli no bin gat janis blong akseptem gospel long laef. Blong mekem wok blong ol narawan, i kamtru long tu step: faswan, tru long wok blong lukaotem famle histri blong faenemaot ol bubu blong yumi; mo sekenwan, taem yumi mekem ol tempol odinens blong givim olgeta semfala janis we olgeta we oli laef oli gat.

“Be yet, i gat fulap memba blong Jos we oli no save kasem tempol. Oli mekem evri samting we oli save mekem. Oli gohed blong lukaotem famle histri blong olgeta mo givim wok blong mekem ol tempol odinens i go long ol narawan. Long narasaed, i gat sam memba we oli mekem wok blong tempol be oli no tingting blong mekem wok blong lukaotem famle histri blong stret famle laen blong olgeta. Nomata oli mekem wan tabu seves blong helpem ol narawan, oli lusum wan blesing taem oli no stap lukaotem stret ded famle blong olgeta, olsem we ol lata-dei profet oli talem. …

“Mi bin lanem se olgeta we oli stap mekem wok blong lukaotem famle histri blong olgeta, mo afta, oli mekem wok blong tempol odinens blong olgeta nem ia we oli faenem, oli save se wanem ia glad blong kasem tufala haf blong ol blesing ia.”6

Papa we i stap long Heven i wantem wanwan long yumi blong kasem tugeta pat blong ol blesing blong wok blong ol dedman. Hem i bin lidim ol narawan blong soemaot long yumi hao blong kwalifae. Hem i stap long yu mo mi, blong klemem ol blesing ia.

Eni wok we yumi mekem long tempol, hem i taem we yu yusum gud; be blong kasem ol odinens long bihaf blong wan long ol bubu blong yuwan, bae i mekem se taem ia we yu spendem long tempol i moa tabu, mo bae yu kasem blesing we moa bigwan. Fas Presidensi i bin talem: “Bigfala mo impoten wok blong yumi i blong lukaotem mo faenem ol bubu blong yumiwan.”7

Yufala ol yang pipol. Yufala i wantem wan stret rod ia blong kilimdaon paoa blong enemi long laef blong yufala? Draonem yuwan long wok blong lukaotem ol bubu blong yu, mekem ol nem blong olgeta oli rere from ol tabu odinens ia blong baptaes mo presen we i Tabu Spirit. Taem bae yu gro olfala, bae yu save tekpat blong mekem ol narafala odinens ia tu. Mi no save tingting moa long wan proteksen we i bigwan moa bitim paoa blong enemi long laef blong yu.

Long Rasia Mostov Na Donu Misin, oli invaetem ol yut blong mekem indeks blong 2 taosen nem, mo afta, mekem wan nem blong famle blong olgetawan i rere blong ol tempol odinens. Olgeta we oli bin kasem gol ia, oli bin invaetem olgeta blong go long wan longfala travel i go long niu Kiv Yukren Tempol. Wan yang man i serem eksperiens blong hem: “Mi bin stap spendem plante taem blong plei long kompiuta gem. Taem mi stat blong mekem indeks, mi nomo gat taem blong plei gem. Fastaem, mi tingting, ‘O no, !Hemia i no posibol!’ Taem projek ia i bin finis, mi lusum intres blong plei gem. …Wok blong famle histri i wan samting we yumi save mekem long wol ia, mo bae i stap long heven.”

Plante fetful Sent oli bin mekem wok blong lukaotem famle laen blong olgeta mo oli stap yusum joes blong holemtaet nem long program blong FamilySearch; hemia i holemtaet nem blong famle blong olgetawan blong afta oli go mekem wok. Tingting blong holemtaet nem i blong givim taem long wanwan blong mekem ol odinens blong ol bubu mo laen blong olgeta long tempol. Naoia i stap, i gat 12 milian nem mo plante milian odinens we oli holemtaet i stap. Hemia i ripresentem wan populesen we i bigwan moa bitim tufala populesen blong Nowe mo Denmak. Sam nem oli bin holemtaet olgeta plante yia finis i pas. Ol bubu ia we oli faenem nem blong olgeta, oli stap wari mo glad afta taem oli kliarem nem blong olgeta blong kasem odinens. Be, oli no hapi nating taem oli mas gohed blong stap wet blong oli mekem ol odinens blong olgeta.

Mifala i stap leftemap tingting blong yufala we i holemtaet fulap nem, blong serem olgeta long ol nara memba blong famle blong yufala, o wod mo stek blong yufala, blong oli helpem yu blong finisim wok ia. Yu save mekem hemia taem yu serem ol tempol kad long ol memba blong wok mo stek we oli wantem help, o taem yu yusum kompiuta sistem blong FamilySearch mo sendem nem i go stret long tempol. Las joes ia, i wan samting we Sindi Blevins blong Kaspa, Waeoming i bin stap mekem blong plante yia.

Sista Blevins i bin baptaes taem hem i yangfala, mo hemwan nomo i wan memba blong famle blong hem blong joenem Jos. Hem i komplitim wan bigfala wok blong famle histri. Be, i gat tumas nem blong hem mo stret famle blong hem i mekem. Nao, Sista Blevins i bin sendem ol nem i go long tempol, mo hem i ripotem, se plante taem, oli mekem ol odinens blong olgeta long sam wik taem nomo, plante taem, long wan long tufala tempol we i kolosap long hom blong hem. Hem i talem se hem i laekem blong ting se ol fren mo ol neiba blong hem long wod mo stek blong hem oli olgeta pipol ia we oli stap helpem hem blong komplitim wok blong ol bubu blong hem. Hem i glad long hemia.

Waef blong mi we mi lavem hem, Janin, i bin laekem blong stap mekem wok blong lukaotem famle histri. Taem ol pikinini blong mitufala oli bin yangfala, bae hem i givim wok blong lukaotem bebi long sam fren blong hem, blong mekem se hem i gat sam taem blong lukaotem famle laen blong mifala. Afta we yangfala pikinini blong mitufala i aot long haos, hem i raetem long jenol blong hem: “Mi jes mekem wan desisen naoia mo mi wantem stanap mo singaot blong talem. Olfala bedrum blong Maek i kam famle histri wokrum blong mi. Hem i gat evri samting blong oganaesem ol rekod mo wok insaed long hem. Laef blong mi, naoia, bae i lukluk long wok blong lukaotem famle histri mo sendem nem long tempol. Mi mi glad tumas mo mi no save wet blong gohed naoia.”8

Wan nara ples long jenol i rid olsem: “Merikel i hapen long mi insaed long Famle Histri Ofis blong Mel Olsen we i soem long mi ol nem we oli printim, blong evri bubu blong mi we mi faenem, we hem i tekem long Bubu Fael long kompiuta rekod we oli sendem long Sosaeti blong Famle Histri. Oli kamaot long ol rekod blong ol fo jeneresen program we Jos i bin yusum plante yia i pas. Mi bin sek long tingting ia se i gat bigfala wok i stap long fored blong mi blong mi putum tugeta ol rekod blong ol bubu blong mi long evri famle oganaesesen, mo putum olgeta long kompiuta, hemia we i bin stap long fas program blong Bubu fael. Be evriwan i stap ia, i naes, we oli oganaesem gud, mo oli printim mo i sidaon long tebol blong mi. Mi bin glad tumas, mi sidaon nomo long ples ia, mo mi stat blong krae from mi hapi tumas. …From se mi bin wokhad blong 30 yia blong lukaotem olgeta, mo kompiuta program ia i mekem ol rekod i stap. Mo taem mi tingting long ol handred mo taosen man we oli stap naoia, we bae oli putum nem blong olgeta long kompiuta, ol lis blong ol nem blong sensas, mo ol praevet wok long disk … mi glad tumas. I tru, hemia wok blong Lod mo Hem i stap lidim wok ia.”9.

Mi bin testem inaf ol frut ia blong bigfala wok ia blong save se ol ki we Ilaeja i putumbak long Josef Smit i mekem se hat blong yumi i joen, mo wanwan long yumi i joen long ol bubu blong yumi we oli stap wet from help blong yumi. Tru long ol hadwok blong yumi long ol tabu tempol long wol ia, mo taem yumi yusum atoriti we Sevya i givim, ol bubu blong yumi oli kasem ol odinens we i sevem laef, we i letem olgeta blong oli save glad long hapines we i no save finis.

Long taem bifo, wetem strong tingting se wok ia i tabu, wanwan man mo woman i bin fesem jalenj we i olsem blong havestem evri kaekae blong garen long Nebraska. Tedei, plante oli joen long wok ia. Tugeta, yumi save mo bae yumi mekem wok ia we i nid blong mekem.

Mi testifae se Spirit blong Ilaeja i stap tajem hat blong plante pikinini blong Papa raon long wol, mo i stap mekem wok blong ol dedman i wok long wan spid we i hae tumas.

Be olsem wanem long yu? Yu bin prea long saed blong wok blong ol bubu blong yu? Livim ol samting we i no impoten long laef i stap long saed. Disaed blong mekem wan samting we bae i blong taem we i no save finis. Ating, yu kasem smol voes blong lukaotem ol bubu blong yu, be yu filim se yu no wan stret man blong mekem wok ia. Yu no luk se bae yu nomo kaen man olsem?. Evri samting ia i stat nomo wetem lav mo wan tru filing blong wantem helpem olgeta long nara saed blong vel we oli no save helpem olgetawan. Jekem raon long yu. Bae i gat wan, long eria blong yu, we i save helpem yu blong yu gotru.

Wok ia, i wan wok long saed blong spirit, wan bigfala wok blong joen tugeta blong wok long tugeta saed blong vel, we tugeta saed i kasem help long tufala. Eni ples we yu stap long hem long wol, wetem prea, fet, strong tingting, ful tingting, mo sam sakrifaes, yu save kam wan bigfala help. Stat naoia. Mi promesem yu se Lod bae i helpem yu blong faenem wan rod. Mo bae i mekem yu filim gud evriwan. Long nem blong Jisas Kraes, amen.

Show References

  1.  

    1.  Jon 3:5.

  2.  

    2.  History of the Church , 4:231.

  3.  

    3.  Teachings of Presidents of the Church: Joseph Smith (2007), 471–72.

  4.  

    4. Luk long Doctrine and Covenants 110:13–16 .

  5.  

    5. Luk long Doctrine and Covenants 2:2; oli ademap italik.

  6.  

    6. Howard W. Hunter, “A Temple-Motivated People,” Liahona, Mei 1995, 5–6; Ensign, Feb. 1995, 4–5.

  7.  

    7. Leta we i kam long Fas Presidensi 29 Feb. 2012; oli ademap italik.

  8.  

    8. Jeanene Watkins Scott, jenol blong sista ia, Epril 1988.

  9.  

    9. Jeanene Watkins Scott, jenol blong sista ia, 23 Sept. 1989.