Tes blong Fet blong Yu

I Kam long Nil L. Andesen

Blong Kworom blong Olgeta Twelef Aposol


Nil L. Andesen
Semmak olsem strong faea we i jenisim aean i kam stil, sapos yumi gohed blong stap fetful long taem blong ol taem blong tes blong fet blong yumi, bae yumi kam gud moa long saed blong spirit, mo yumi i kam strong moa.

Ten yia i pas, taem waef blong mi, Kati, mo mi, i bin stap long Sao Polo, Brasil, Presiden Deved Mariot i bin prisaed long Brasil Sao Polo Intalagos Misin. Hem, mo waef blong hem, Nel, mo ol boe blong tufala, Wil, Wesli, mo Tres, oli bin stap kolosap long mifala. Oli bin livim hom, bisnis mo plante famle blong olgeta blong ansa long koling we i kam long profet blong go long wan misin.

Presiden Mariot i bin ringim mi long wan aftenun. Gudfala mo stret mo gud gel blong tufala we i gat 21 yia, Jojia, i wan senia vaeolin plea long Indiana Yunivesiti, mo wan trak i sperem hem taem hem i stap ron long baeskel blong kambak long haos afta long wan Jos miting. Long fas ripot, Jojia i oraet. Sam aoa afta, helt blong hem i kam nogud evriwan.

Ol famle mo fren oli stat blong livim kakae mo prea blong wan merikel i hapen long Jojia. Mama blong hem i bin flae long naet aot long Brasil. Hem i kasem eapot long Indiana long nekis dei, mo ol bigfala pikinini blong hem i mitim hem, mo wetem krae, oli eksplenem se oli bin stap wetem Jojia taem hem i bin ded.

Mi stap lukluk long Mariot famle long taem blong eksperiens ia mo long ol manis mo ol yia we oli kam afta. Oli bin krae, oli bin prea, oli bin tokbaot Jojia, oli bin filim soa bigwan mo oli no glad, be fet blong olgeta i no bin foldaon. Long sesen blong moning ia, yumi bin harem semmak fet ia long gudfala laef blong famle blong Bowen mo Wilbega. 1

Presen blong fet i wan endaomen blong spirit we i no gat praes. “Hemia laef we i no save finis” Jisas i bin prea “i min se man i save yu, we yu nomo yu tru God, mo i save mi, Jisas Kraes, we yu yu sanem mi mi kam.” 2

Fet blong yumi i lukluk nomo long God, Papa blong yumi mo long Pikinini blong Hem, Jisas Kraes, we i Sevya mo Ridima blong yumi. Hem i fas strong wetem save ia blong yumi, se ful gospel i bin kambak long wol; se Buk blong Momon i toktok blong God; mo ol profet mo ol aposol tedei, oli holem ol ki blong prishud. Yumi holem gud fet blong yumi, yumi wok blong mekem fet i kam strong moa, yumi prea blong fet i kam antap, mo yumi mekem evri samting long paoa blong yumi blong protektem mo difendem fet blong yumi.

Aposol Pita i bin faenem wan samting we hem i singaotem “traem bilif blong yufala.”3 Hem i gotru long hemia. Tingbaot ol toktok blong Jisas:

“Saemon. … Setan i [wantem] traem bilif blong yufala blong seraot yufala olsem we man i sevem sanbij …

“Be mi prea finis from yu, blong bilif blong yu i no foldaon.” 4

Afta, Pita i leftemap tingting blong ol narawan: “I nogud yufala i sapraes” hem i talem “long ol strong samting ya we oli kam blong traem bilif blong yufala.” 5

Ol strong samting ia, oli stap blong mekem yu kam strong moa, be oli gat paoa tu blong daonem o prapa spolem tras we yu gat long Pikinini blong God, mo blong mekem yu nomo strong blong kipim ol promes blong yu long Hem. Ol tes ia, plante taem oli haed i kam, i mekem i had blong luksave olgeta. Oli tekem rus blong olgeta long samting we yumi no strong long hem, ol ples we yumi no lukaot long ol, ol sopsop hat, o ol samting ia we yumi tekem se oli impoten. Wan tes we i tru be i no had long wan, i save kam wan strongwan long wan narawan.

Olsem wanem nao yu stap “strong mo no muvmuv”6 long taem blong wan tes blong fet? Yu draonem yuwan insaed long ol stret samting we i bin helpem yu blong bildimap strong fet blong yu: yu yusum fet long Kraes, yu prea, yu tingting hevi long ol skripja, yu sakem sin, yu obei long ol komanmen mo yu givhan long ol narafalawan.

Taem yu fesem wan tes blong fet—nomata wanem yu mekem, yu no go longwe long Jos! Taem yu go longwe long kingdom blong God long taem blong wan tes blong fet, i olsem yu aot long sef ples ia blong haed long wael win taem yu luk se hem i stap kam.

Aposol Pol i bin talem “Yufala i no moa stap olsem we yufala i strenja, no yufala i man blong narafala ples. Naoia, yufala i gat raet insaed long ples blong God, olsem ol narafala man blong God nomo. Yufala i insaed long famle blong God finis.”7 Hem i insaed long sef ples ia blong Jos we yumi protektem fet blong yumi. Yumi mit wetem ol narawan we oli biliv, yumi prea mo faenem ansa long prea blong yumi, yumi wosip tru long miusik, serem testemoni long saed blong Sevya, yumi givhan long ol narawan, mo yumi filim Spirit blong Lod. Yumi tekem sakramen, yumi kasem ol blesing blong prishud, mo go long tempol. Lod i talem se insaed long ol odinens, i gat paoa we i olsem hemia blong God i kamaot.8 Taem yu fesem wan tes blong fet, stap long sefti mo sekiuriti blong famle blong God. Oltaem i gat wan ples blong yu long ples ia. I no gat tes we i bigwan tumas we yumi no save winim tugeta.9

Presiden Tomas S. Monson i talem: “Kampas blong klin tingting long sosaeti, i stap muv long wan spid we i spid tumas. Ol fasin, we bifo yumi luk se i no stret mo i no klin, naoia, plante oli luk se i oraet nomo.” 10

I gat plante singgel adalt insaed long Jos we oli bitim yia blong yangfala laef blong olgeta. Nomata oli faenem se laef blong olgeta naoia i defren long wanem we oli bin tingting long hem bifo, oli bin kipim loa blong jastiti.11 Ating i wan tes blong fet blong olgeta. Mi talemaot bigfala respek mo glad blong mi long ol disaepol ia blong Kraes.

“God i givim komanmen ia se tabu paoa blong mekem pikinini i mas tekem ples nomo bitwin man mo woman we tufala i bin mared folem loa olsem hasban mo waef.”12 Long Niu Testeman, Sevya i bin leftemap standet blong gud fasin blong olgeta we oli stap folem Hem taem Hem i bin talem, “Man we i luk wan woman, nao i wantem hem tumas, i olsem we hem i slip wetem woman ia finis.”13 Hem i tijim yumi blong no mas panisim ol narawan, be Hem i no bin fraet blong tok stret mo talem: “Gohom, mo yu no moa mekem sin.” 14

Famle blong mifala i gat wan fren. Ating yu save wan we i olsem tu, o ating yu olsem hem. Oltaem hem i fetful, i givim seves gud long Jos, oli laekem hem long wok, famle i laekem hem, mo nomata hem i luk fored long mared mo gat pikinini, woman ia i singgel. “Mi mekem desisen” woman ia i talem, “blong putum tras blong mi long Jisas Kraes. Mi gat fet …se i no gat wan blesing we bae mi no kasem sapos mi gohed blong stap fetful long ol kavenan blong mi, mo hemia i tekem tu loa blong jastiti.”15

Wan nara fren i bin wok gud long misin blong hem, mo afta i stadi strong long skul. Hem i hop blong gat wan famle. Tes blong fet blong man ia: hem i laekem wan man bakegen. I no longtaem, hem i raet i kam long mi: “Mi gat promes long petriakel blesing blong mi se bae mi gat famle blong mi wan dei. Sapos hem i long laef ia o long nekis wan, mi no save. Be mi no wantem mekem wan samting we bae i spolem ol blesing we God i bin promesem mi. Blong laef folem loa blong jastiti i wan jalenj, be yumi kam long wol ia blong fesem ol jalenj ia nao mo soem long God, lav mo respek blong yumi …taem yumi kipim ol komanmen blong hem. Mi gat blesing blong gat wan gud helt, gospel, wan gud famle, mo ol tru fren. Mi talem tangkyu from ol fulap blesing.”16

Wol i tok strong, yu ting se yu save askem tumas olsem? Lod i ansa,

“Tingting blong mi i no olsem tingting blong yufala, mo fasin blong mi i no olsem fasin blong yufala.

“Skae i antap we i antap, i antap olgeta long graon, mo long sem fasin, tingting blong mi i hae we i hae, i antap olgeta long tingting blong yufala mo fasin blong mi i antap olgeta long fasin blong yufala.”17

Tufala ia we i folem Kraes mo ol taosen man olsem tufala oli bin filim promes blong Sevya: “Mi putum pis blong mi i stap wetem yufala. Mi nomo mi givim pis ya long yufala. Mo pis ya we mi mi givim, i no olsem pis we ol man blong wol oli save givim. Yufala i no letem tingting blong yufala i trabol, yufala i no fraet.”18

Hemia i wan narafala tes. Oltaem i gat sam we oli wantem spolem Jos mo spolem fet. Tedei oli yusum Intanet.

Sam long ol infomesen long saed blong Jos, nomata se i save winim tingting, i jes no tru nating. Long 1985, mi tingbaot wan wokfren i wokbaot long bisnis ofis blong mi long Florida. Hem i gat wan Times magasin we taetol blong hem i “Ol Momon Rus Ia Oli Tru o No?” Hem i tokbaot wan leta we oli jes faenem, se oli talem se Martin Haris nao i raetem, we i no talem sem samting olsem Josef Smit long stori blong faenem ol plet blong Buk blong Momon.19

Wokfren blong mi i bin askem sapos niu infomesen ia bae i prapa spolem Momon Jos. Atikol ia i kwotem wan man we i talem se hem i stap aot long Jos from leta ia. Afta, oli ripotem se sam nara man oli aot long Jos.20 Mi sua se i bin wan tes blong fet blong olgeta.

Sam manis afta, sam ekspet oli faenemaot (mo giaman man i konfes) se leta ia i wan giaman leta. Mi tingbaot se mi bin hop se olgeta ia we oli bin aot long Jos from leta ia, bae oli faenem rod blong olgeta blong kambak.

Sam oli gat kwestin long fet blong olgeta taem oli faenem wan toktok we wan lida blong Jos i mekem ten yia i pas i luk olsem i no stret wetem doktrin blong yumi. I gat wan impoten prinsipol we i lidim doktrin blong Jos. Doktrin, i gat 15 memba evriwan blong Fas Presidensi mo Kworom blong Olgeta Twelef Aposol nao oli tijim. Hem i no haed long wan tudak spes blong wan toktok. Ol tru prinsipol, plante oli tijim oltaem. Doktrin blong yumi i no had blong faenem.

Ol lida blong Jos oli ones, be oli ol man we oli no stret evriwan. Tingbaot ol toktok blong Moronae: “No tok agensem mi from mi no stret gud, mo tu papa blong mi from hem i no stret gud; … be i moa gud se yufala i talem tangkyu long God we hem i bin soemaot long yufala, samting blong mifala we i no stret gud, blong mekem se yufala i save lanem blong stap moa waes bitim we mifala i bin stap.”21

Josef Smit i bin talem : “Mi neva talem long yufala se mi mi stret evriwan—be i no gat mistek long ol revelesen.”22 Merikel blong han blong God long histri mo fiuja blong Jos blong Jisas Kraes blong Ol Lata-dei Sent, bae man i andastanem nomo tru long ol ae blong spirit. President Esra Taf Benson i bin talem, “Evri man mo woman, bae wan taem, i mas fesem wol blong fet, mo long ples ia i mas tekem saed blong hem.”23Yu no sapraes taem bae i hapen long yu!

Folem mining blong hem, ol tes bae oli traem yumi. Bae i save gat wari, tingting i fas, naet we yu no silip, mo pilo we i fulap long wota blong ae. Be ol tes blong yumi, oli no nid blong kilimded yumi long saed blong spirit. Oli no nid blong tekemaot yumi long ol kavenan o long famle blong God.

“Tingbaot, … hem i long ston blong Ridima blong yumi, we i Kraes, Pikinini blong God, we yutufala i mas bildim fandesen blong yutufala; blong mekem se taem we devel bae i sendem aot ol strongfala win blong hem, yes, ol spia blong hem long wael win, yes, taem we ol ston blong aes blong hem mo strong win blong hem bae i foldaon long yutufala, bae i no gat paoa ova long yutufala blong pulum yutufala i go daon long bigfala hol blong sore mo sore tumas we i no gat en from ston; long hem we yutufala i bin bildimap yutufala, we i wan sua fandesen, wan fandesen long hem we sapos ol man i bildimap olgeta long hem oli no save foldaon.”24

Semmak olsem strong faea we i jenisim aean i kam stil, sapos yumi gohed blong stap fetful long taem blong ol taem blong tes blong fet blong yumi, bae yumi kam gud moa long saed blong spirit, mo yumi i kam strong moa.

Elda D. Tod Kristofeson i bin eksplenem wanem hem i bin lanem long tes blong hemwan: “Nomata mi bin safa long tetaem ia, mi luk i gobak, mo mi glad se i no bin gat wan kwik ansa long problem blong mi … mi kam blong save Sevya mo Papa long Heven blong mi long wan wei mo i go kasem wan mak we bae mi no save mekem long nara wei. … Mi bin lanem blong trastem Lod wetem ful hat blong mi. Mi bin lanem blong wokbaot wetem Hem, dei afta dei.”25

Pita i tokbaot ol eksperiens ia olsem se “i gud moa i winim gol.”26 Moronae i ademap se wan witnes i folem “tes blong fet blong yufala.”27

Mi statem toktok blong mi wetem stori blong Mariot famle. Las wik, Kati mo mi i joenem olgeta long gref blong Jojia. Ten yia i bin pas. Ol memba blong famle mo ol fren oli tokbaot lav mo ol memori we oli gat abaot Jojia. i bin gat sam waet balun blong selebretem laef blong hem. Long medel blong ol krae, Mama blong Jojia i bin tokbaot fet blong hem we i kam antap moa mo save we hem i bin kasem, mo papa blong Jojia, kwaet nomo, i bin tokbaot ol promes “witnes” we i bin kam long hem.

Wetem fet, ol tes blong fet oli kam, oli tekem moa fet i kam. Gudfala toktok blong Lod long Profet Josef Smit i semfala promes ia we Hem i mekem long yu long taem blong tes blong fet blong yu: “Holemtaet…no fraet…from God bae i stap wetem yu blong oltaem mo oltaem.”28 Long hemia, mi talem tabu testemoni blong mi, long nem blong Jisas Kraes, amen.

Show References

  1.  

    1. Luk long Shayne M. Bowen, “Because I Live, Ye Shall Live Also,” mo Ann M. Dibb, “I Know It. I Live It. I Love It,” long Satedei moning sesen blong Oktoba 2012 jeneral konfrens.

  2.  

    2.  Jon 17:3.

  3.  

    3.  Fas Pita 1:7.

  4.  

    4.  Luk 22:31–32.

  5.  

    5.  Fas Pita 4:12; oli ademap italik.

  6.  

    6.  Alma 1:25.

  7.  

    7.  Efesas 2:19.

  8.  

    8.  Luk long Doctrine and Covenants 84:20.

  9.  

    9. Luk long Mosaea 18:8–10.

  10.  

    10. Thomas S. Monson, “Stand in Holy Places,” Liahonamo Ensign, Nov. 2011, 82.

  11.  

    11. Luk long Ezra Taft Benson, “The Law of Chastity,” New Era, Jen. 1988, 4–7; “The Law of Chastity” insaed long Brigham Young University 1987–88 Speeches (1988), 1–5, speeches.byu.edu; luk tu long Gospel Principles (2009), 224–32.

  12.  

    12. “Famle: Wan Ofisol Toktok I Go Long Wol,” 35538 852mo Ensign, Nov. 2010, 129.

  13.  

    13.  Matiu 5:28.

  14.  

    14.  Jon 8:11.

  15.  

    15. Praevet leta, 2012.

  16.  

    16. Praevet leta, 2012.

  17.  

    17.  Aesea 55:8–9.

  18.  

    18.  Jon 14:27.

  19.  

    19. Luk long Richard N. Ostling, “Challenging Mormonism’s Roots,” Time, 20 Mei 1985, 44.

  20.  

    20. Luk long Gordon B. Hinckley, “Lord, Increase Our Faith,” Ensign, Nov. 1987, 52.

  21.  

    21.  Momon 9:31.

  22.  

    22.  Teachings of Presidents of the Church: Joseph Smith (2007), 522.

  23.  

    23. Ezra Taft Benson, “The Book of Mormon Is the Word of God,” Tambuli, Mei 1988, 6; Ensign, Mei 1975, 65.

  24.  

    24.  Hileman 5:12.

  25.  

    25. D. Todd Christofferson, “Give Us This Day Our Daily Bread” (Church Educational System fireside, 9 Jen. 2011), lds.org/broadcasts.

  26.  

    26.  Fas Pita 1:7; luk tu long Fas Pita 4:13.

  27.  

    27.  Ita 12:6.

  28.  

    28.  Doctrine and Covenants 122:9; Presiden Joj K. Kanon i talem: “Nomata ol tes, harem nogud mo hadtaem i bigwan olsem wanem, [God] bae i neva livim yumi stap yumiwan. Hem i neva mekem olsem mo bae i neva mekem. Hem i no save mekem. Hemia i no fasin blong Hem. Hem i wan man we i no save jenis; i semmak yestedei, i semmak tedei, mo bae Hem i stap semmak truaot ol yia we i stap kam we i no save finis. Yumi faenem God ia. Yumi bin mekem Hem i kam fren blong yumi, taem obei long Gospel blong Hem; mo bae Hem i stanap long saed blong yumi. Bae yumi save go tru oven faea; yumi save pas tru ol dip wota; be bae i no save solemdaon yumi o kavremap yumi. Bae yumi kamaot long evri tes mo hadtaem ia long wan moa gud mo wan moa klin wei long olgeta, sapos yumi gat tras nomo long God blong yumi mo kipim ol komanmen blong Hem” (“Freedom of the Saints,” insaed long Brian H. Stuy, komp., Collected Discourses Delivered by President Wilford Woodruff, His Two Counselors, the Twelve Apostles, and Others, 5 vols. [1987–92], 2:185); luk tu long Jeffrey R. Holland, “Come unto Me,” Ensign, Epril 1998, 16–23.