Welkam long Konfrens

I Kam long Presiden Tomas  S. Monson


Tomas S. Monson
Bae yumi lisin gud long ol mesej …, blong yumi save filim Spirit blong Lod mo kasem save we Hem i wantem yumi blong kasem.

Hamas we mi save luk, evri jea i fulap, be smol nomo i emti biaen. I gat rum oltaem blong kam moa gud. Be yumi respektem tu olgeta we oli kam let from trafik blong oli save gat jea blong sidaon.

Dei ia i wan gudfala dei, i dei blong konfrens. Yumi bin harem wan gudfala kwaea i singim ol naes miusik. Evri taem mi harem kwaea, o harem ol narafala tul blong miusik, o harem piano, mi tingbaot mama blong mi we i bin talem: “Mi lavem ol dil we yu stap mekem, evri digri we yu bin kasem mo evri wok we yu bin mekem. Be mi rigret nomo from se yu no bin stap long piano.” Tangkyu mama, mi hop mi bin stap long piano.

Hem i gud tumas ol brata mo sista, blong welkamem yufala long 182 Medel Yia Jeneral Konfrens blong Jos blong Jisas Kraes blong Ol Lata dei Sent.

Lastaem we yumi bin mit, sikis manis finis i pas, i gat tri niu tempol we oli bin dediketem, mo wan tempol oli bin dediketem bakegen. Long Mei, i bin spesel janis blong mi blong dediketem naes Kansas Siti Misuri Tempol mo blong atendem kalja selebresen we i kam wetem dedikesen ia. Bae mi tokbaot selebresen ia moa long toktok blong mi long tumoro moning.

Long Jun, Presiden Dita F. Ukdof i bin dediketem tempol long Manaus long Brasil we pipol i bin wet from blong longtaem; mo long eli Septemba, Presiden Henri B. Aering i bin dediketem bakegen tempol long Buenos Aires, Ajentina we oli fiksim mo i kam niu bakegen, wan tempol we mi bin gat spesel janis blong dediketem fastaem kolosap 27 yia nao i pas. Jes tu wik i pas, Presiden Boed K. Peka i bin dediketem naes Brigham Siti Tempol long homtaon ples we hem i bin bon mo groap long hem.

Olsem we mi bin talem finis, i no gat wan Jos bilding we i moa impoten bitim wan tempol, mo yumi glad blong gat 139 tempol we oli stap open naoia raon long wol, wetem 27 moa we oli bin anaonsem, o stap gohed blong bildim yet. Yumi talem tangkyu from ol tabu tempol ia mo ol blesing we oli karem i kam long ol laef blong yumi.

Long moning ia, mi glad blong anaonsem tu moa tempol we long manis mo yia we i stap kam bae oli bildim long ol ples ia: Taksen, Arisona; mo Arekipa, Peru. Moa abaot ol tempol ia bae oli jes givimaot taem yumi kasem ol raet mo apruvol blong hem long fiuja.

Ol brata mo sista. Naoia mi go long wan nara mata—we hem i, misinari wok.

Blong sam taem nao, Fas Presidensi mo Kworom blong Olgeta Twelef Aposol i bin letem ol yang man blong sam kantri blong go long misin taem we oli kasem 18 yia, taem oli klin inaf, oli save mekem mo taem oli bin graduet long hae skul, mo taem oli bin soem wetem wan tru hat blong wantem go long misin. Hemia i bin wan kantri polisi mo i bin letem plante taosen yang man blong go mekem wan gud misin, mo tu, blong mas komplitim seves long ami we oli mas mekem, mo kasem ol janis blong skul.

Eksperiens blong yumi wetem 18 yia misinari i bin gud. Ol misin presiden blong olgeta i bin ripotem se oli bin stap obei, fetful, bigwan inaf, mo givim seves fulwan olsem ol misinari we oli moa olfala mo oli givim seves long sem misin. Fasin blong stap fetful, mo obei mo bigwan inaf i mekem mifala i wantem sem samting ia blong eli misinari wok blong evri yang man, nomata wanem kantri oli kam long hem.

Mi glad blong anaonsem se stat naoia i go, evri yang man we i klin inaf mo i save mekem, evri yang man we i bin graduet long wan sekendri skul o wan long sem level, nomata weples oli stap, bae oli gat janis ia blong go mekem misinari wok stat long 18 yia, be i nomo 19 yia. Mi no stap givim tingting ia se evri yang man bae i go—o oli mas—go long misin long eli yia olsem. Be, dipen long wanwan situesen, mo tu, folem las toktok blong ol prishud lida, joes ia i open naoia.

Taem mifala i stap prea mo tingting hevi long yia we ol yang man i save statem misinari wok blong olgeta, mifala i bin stap lukluk tu long yia we wan yang woman i save go long misin. Tedei mi glad blong anaonsem se ol yang woman we oli klin inaf mo oli wantem go long misin, oli save go mekem misinari wok stat long 19 yia, be i nomo long 21 yia.

Mifala i stap talemaot strong se misinari wok i wan prishud diuti—mo mifala i leftemap tingting blong evri yang man we oli klin inaf mo oli helti long bodi mo wetem gud tingting, blong ansa long koling ia blong go long misin. Plante yang woman tu oli stap long misin, be i no wan mas blong olgeta blong go long misin olsem ol yang man. Mifala i talem gud long ol yang sista blong Jos, se nomata hemia, oli mekem wan gudfala kontribusen olsem ol misinari, mo yumi welkamem seves blong olgeta.

Yumi stap nidim yet plante moa senia kapol. Sapos i oraet long yufala, sapos yu save ritae, mo sapos yu helti inaf, mi stap leftemap tingting blong yufala blong mekem yufala i fri blong save go long fultaem misinari seves. Tugeta hasban mo waef bae i gat bigfala glad taem tugeta i givim seves long ol pikinini blong Papa blong yumi.

Naoia ol brata mo sista blong mi, bae yumi lisin gud long ol mesej we bae oli givim long tufala dei ia, blong yumi save filim Spirit blong Lod mo kasem save we Hem i wantem yumi blong kasem. Blong hemia i save kam eksperiens blong yumi, mi prea olsem, long nem blong Jisas Kraes, amen.