Ruwainene n̄an Kweilo̧k in

Jen Būreejtōn Thomas  S. Monson


Thomas S. Monson
Kōm̧m̧an bwe jen ron̄jake ennaan ko … , bwe jen maron̄ en̄jake Jetōb eo an Irooj im bōk jeļāļo̧kjeņ eo Ekōņaan bwe jen bōke.

Jon̄an eo imaron̄ loe, aolep jea eobrak—ijjelo̧kin wōt jejjo ijuweo ilik. Ewōr ruum̧ n̄an kōkkōm̧anm̧anļo̧k. Ej juon men eo em̧m̧an n̄an jabdewōt eo emaron̄ jidik rumij, kōnke traffic, n̄an loe juon aer jea n̄e rej itok.

Rainin ej juon raan eļap—raan in kweilo̧k. Jaar ron̄ juon al in kuwaer eaiboojoj im kōjan̄jan̄ em̧m̧an. Aolep iien ij ron̄jake ak ron̄jake kōjan̄jan̄ ak ron̄jake piano, ij kōļmenļo̧kjeņ kōn jinō, eo eaar ba, “Ij iakwe aolep mālim eo kar lewaj n̄an eok, aolep degree ko kwaar būki, im aolep jerbal eo kwaar kōm̧m̧ane. Ajļo̧k eo wōt aō ej bwe kwaar jab pād wōt ilo piano eo.” Kom̧ool, M̧am̧a. Ikōņaan bwe in kar.

Ekōjkan an menin em̧m̧an, ro jeiū im jatū, n̄an karuwaineneiktok kom̧ n̄an 182 Kein Karuo in Kweilo̧k eo Eļap an Kabun̄ eo an Jisōs Kraist im Armej ro Rekwojarjar ilo Raan-ko Āliktata.

Jen ke jaar iioon doon jiljiljino allōn̄ ko rem̧ootļo̧k, jilu tampeļ ko rekāāl em̧ōj aer kōjeram̧m̧an, juon tampeļ eaar bar aje. Ilo Māe, iaar jeram̧m̧an n̄an aje Tampeļ eo eaiboojoj ilo Kansas City Missiouri im kar pād ilo culture celebration eo eaar ekkejeltok ippān. Inaaj kwaļo̧k kōn celerbration eo ilo meļeļe eo eļapļo̧k ilo kōnono ko aō ilju jibbon̄.

Ilo Juun eo, Būreejtōn Dieter F. Uchtdorf eaar bar aje tampeļ eo etto baj kōttare ilo Manaus, Brazil, im ilo jinoin Jeptōm̧ba eo, Būreejtōn Henry  B. Eyring eaar bar aje tampeļ eo ekāāl im dedeļo̧k kōkāāle ilo Buenos Aires, Argentina, juon tampeļ eo iaar jeram̧m̧an n̄an aje enan̄in 27 iiō ko rem̧ootļo̧k. Ruo wiik ko rem̧ootļo̧k, Būreejtōn Boyd  K. Packer eaar bar aje Tampeļ eo eaiboojoj ilo Brigham City ilo kapijuknen ijo eaar ļotak im rūttoļo̧k ie.

Āinwōt aō kar kwaļo̧k m̧oktaļo̧k, ejjeļo̧k em̧ im̧ōn Kabun̄ in eaorōkļo̧k jen juon tampeļ, im eļap ad m̧ōņōņō bwe ewōr 139 tampeļ ko rej jerbal aolepān laļ in, ippān bar 27 kar kōjjeļā kaki ak repād ilo aer kōkāāl. Eļap ad kam̧oolol kōn m̧ōkein reļļap im kwojarjar im kōjeram̧m̧an ko rej bōktok n̄an mour ko ad.

Jibbon̄ in ij m̧ōņōņō in kōjjeļāik bwe bar ruo tampeļ ko, ko rej itok ilo allōn̄ ko im iiō ko renaaj maron̄ ekkal ilo jikin kein rej ellaajrak: Tucson, Arizona, im Arequipa, Peru. Meļeļe ko kōn tampeļ kein renaaj pojak ilju im jekļaj n̄e mālim ko im kōmālim ko naaj būki.

Ro jeiū im jatū, ij kiiō oktakļo̧k n̄an bar juon men—āinwōt, jerbal in mijenede.

Ium̧win jet tōre ko Būreejtōnji eo Kein Kajuon im Doulul eo an Jon̄oulruo Rijilōk ro raar kōtļo̧k an likao ro jān jet laļ ko jerbal ilo iiō in 18 n̄e rej erreo, maron̄, kar kadiwōjļo̧k jān high school, im kar kwaļo̧k juon idelel eo em̧ool n̄an jerbal. Menin eaar juon kien an jejjo laļ ko im eaar kōtļo̧k an taujin likao ro jerbale mijen ko rem̧m̧an im barāinwōt kakūrm̧ool eddo ko remenin aikuj an tariņae im iien ko rem̧m̧an n̄an bōk jeļāļo̧kjeņ.

En̄jake eo ad kōn 18 iiō dettan mijenede rein eaar em̧m̧an. Mijen būreejtōn ro aer raar ripoot bwe raar pokake, tiljek, ekkeke, im jerbal āinwōt kāpeel āinwōt mijenede ro rerūtto rej kōm̧m̧ane ro rej jerbal ilo ejja mijen ko wōt. Aer tiljek, pokake, im ekkeke eaar kōm̧m̧an bwe en wōr am ikdelel n̄an ejja jokālet in wōt kōn jerbal in mijenede eo im̧aan n̄an aoleplikao ro, mekarta laļ eo rej itok jāne.

Ij m̧ōņōņō in kōjjeļāik bwe jejjet kitien kiiō aolep likao ro rereeo im maron̄, ro raar kadiwōjļo̧k jān high school ak einļo̧k wōt in, mekarta ijo rej jokwe ie, enaaj wōr aer kālet n̄an leļo̧k etāer n̄an jerbal in mijenede ilo 18 iiō, ijjelo̧kin 19 iiō. Ij ba bwe aolep likao ro renaaj—ak aikuj—jerbal ilo iiō ko im̧aan. Ijjelo̧kin, pedped wōt ioon jekjek ko an kajjojo barāinwōt ioon juon kile jen ritōl ro an priesthood, kālet in ej kiiō pojak.

Ilo am kar kejōkļo̧kjeņ ilo jar kōn iiō eo likao ro remaron̄ jino jerbal in mijenede eo aer, kōm̧ ar barāinwōt leļo̧k kile in n̄an iiō eo juon jiron̄ emaron̄ in jerbal. Rainin kōm̧ij m̧ōņōņō in kōjjeļļāik bwe jiron̄ ro remaron̄, ro rereeo, ewōr aer ikdelel n̄an jerbal maron̄ leļo̧k er n̄an jerbal in mijenede jino ilo 19 iiō, ijjelo̧kin 21 iiō.

Kōm̧ij barāinwōt kapene jerbal in mijenede ej juon eddo an priesthood—im kōm̧ij rōjan̄ aolep likao ro, ro rerreo im ro remaron̄ ilo ānbwin im kōļmenļo̧kjeņ n̄an uwaak n̄an kūr n̄an jerbal. Elōn̄ jiron̄ ro rej barāinwōt jerbal, ak rej jab pād ium̧win ejja kōmālim in n̄an jerbal āinwōt likao ro. Kōm̧ij jiron̄ļo̧k jiron̄ ro an Kabun̄ in, mekarta, rej kōm̧m̧ane juon jipan̄ eo eaorōk āinwōt mijenede ro, im kōm̧ij karuwaineneik jerbal in jipan̄ eo aer.

Ejjab bōjrak ad aikuji elōn̄ļo̧k mijenede ro reritto. Ilo an jekjek ko ami kōtļo̧k kom̧, ilo ami maron̄ pād ilo retirement, im ilo ami ājmour, ij rōjan̄ kom̧ bwe kom̧in kōm̧m̧an bwe kom̧in jerbale juon mijen elikio. Jim̧or ļeo im lio pālele naaj lan̄lōn̄ eļap ippān doon n̄e kom̧ij jerbal n̄an ajri ro nejin Jemād.

Kiiō, ro jeiū im jatū, kōm̧m̧an bwe jen lukkuun ron̄jake ennaan ko renaaj itok ilo raan ko ruo, bwe jen maron̄ en̄jake Jetōb eo an Irooj im bōk jeļāļo̧kjeņ eo Ekōņaan n̄an kōj. En̄in en maron̄ erom en̄jake eo ad ij jar ilo etan Jisōs Kraist, amen.