Wehem Bigfala Tapolen?

I Kam long Presiden Henri B. Aering

Fas Kaonsela long Fas Presidensi


Henri B. Aering
Bigfala tapolen we i blokem yumi long help we i kam antap i no kavremap God; be i kavremap yumi moa; God i neva haed, be samtaem, yumi nao.

Long taem blong bigfala harem nogud blong hem long Libeti Kalabus, Profet Josef Smit i bin prea i askem God se Hem i stap wea. Mo wehem nao bigfala tapolen we i kavremap ples we God i stap haed long hem? 1 Plante long yumi, long ol taem blong harem nogud blong yumiwan, yumi filim se God i stap longwe long yumi. Bigfala tapolen we i blokem yumi long help we i kam antap i no kavremap God; be i kavremap yumi moa; God i neva haed, be samtaem, yumi nao, antap long yumi i gat wan tapolen blong ol narafala tingting we i pulum yumi longwe long God, mo i mekem se yumi luk se Hem i stap longwe mo yumi no save kasem Hem. Wanem yumi wantem, be i no filing blong “olsem we yu yu wantem,” 2 i mekem se yumi filim wan tapolen i blokem God. God i stap nomo i luk yumi, o toktok long yumi, be ating yumi nao, yumi no wantem lisin o folem tingting blong Hem mo taem blong Hem.

Ol filing ia se yumi seperet long God bae i godaon taem yumi kam moa olsem wan pikinini long fes blong Hem. Hemia i no isi long wan wol we tingting blong narafala man i save jenisim tingting blong yumi. Be bae i helpem yumi blong luksave trutok ia: God i stap kolosap long yumi mo i luksave yumi, mo i neva haed long ol fetful pikinini blong Hem.

Apugel blong mi we i gat tri yia, i soemaot paoa blong klin tingting mo tingting i stap daon we i mekem yumi toktok wetem God. Hem mo famle blong hem i go long open haos blong Brigham Siti Tempol long Yuta. Long wan long ol rum blong naes bilding ia, hem i lukraon mo askem: “Mama, wehem Jisas?” Mama blong hem i traem eksplenem se bae hem i no luk Jisas insaed long tempol, be bae hem i save filim paoa blong Jisas long hat blong hem. Ilaesa i tingting gud long ansa blong mama blong hem mo afta hem i glad mo talem “O! Jisas i go helpem wan man.”

I no gat tapolen i kavremap save blong Ilaesa, o i blokem ae blong hem blong luk tru samting we i stap. Hem i bin save se tempol i haos blong Lod, be hem i andastanem tu se Jisas Kraes we i laef bakegen long ded mo i gat glori, i gat wan bodi mo i save stap long wan ples nomo long wan taem.3 Sapos Jisas i no stap long haos blong Hem, hem i luksave se Hem i mas stap long wan narafala ples. Mo aot long wanem we hem i save long saed blong Sevya, hem i save se bae Jisas i stap samples, i stap mekem gud long ol pikinini blong Papa blong Hem. Hem i klia se hem i bin hop blong luk Jisas, i no blong konfemem wan merikel se, i tru, Hem i stap laef, be nomo, from se hem i lavem Jisas.

Spirit i save talemaot long maen mo hat blong hem we i olsem hemia blong pikinini, givhan ia we yumi evriwan i nidim mo wantem. Jisas Kraes i stap laef, i save yumi, i lukaot long yumi, mo i kea long yumi. Long ol taem blong harem nogud, stap yumiwan, o tingting i fas, yumi no nid blong luk Jisas Kraes blong save se Hem i save gud long ol situesen blong yumi mo se misin blong Hem i blong blesem man.

Mi save, long laef blong miwan, se eksperiens blong Ilaesa, i save eksperiens blong yumi, longtaem afta we yumi nomo stap wan pikinini. Long ol fas yia blong wok blong mi, mi bin wokhad blong kasem wan wok blong profesa long Stanfod Yunivesiti. Mi ting se mi gat wan gud laef blong miwan mo famle blong mi. Mifala i stap kolosap long papa mo mama blong waef blong mi long wan gudfala ples. Tru long standet blong wol, mi gat sakses. Be Jos i givim janis long mi blong mi aot long Kalifonia mo go long Riks Kolej long Reksbeg, Aedaho. Stamba tingting blong mi long saed blong wok, ating i stap olsem wan tapolen we i seperetem mi long wan Papa we i lavem mi, we i save mi bitim mi wanem nao i stap long fiuja blong mi. Be mi gat blesing blong save se nomata wanem sakses mi bin gat long wok mo famle laef blong mi kasem taem ia, i bin wan presen we i kam long God. Mo, olsem wan pikinini, mi nildaon blong askem wanem blong mekem. Mi save harem wan kwaet voes long maen blong mi we i talem “hem i skul blong mi.” I no gat tapolen i blokem mi long God. Wetem fet mo tingting i stap daon, mi mekem tingting blong mi i folem tingting blong Hem, mo mi bin filim se Hem i kea mo stap kolosap.

Long taem long Riks Kolej, long taem we mi bin traem blong lukaotem tingting blong God mo mekem folem, i bin mekem se tapolen i no kavremap mi, o i no blokem mi long han blong God long laef blong mi. Taem mi stap lukaotem blong mekem wok blong Hem, mi filim se mi stap kolosap long Hem mo filim se Hem i bin save ol wok blong mi mo i kea bigwan long hapines blong mi. Be, semmak long Stanfod, ol tingting blong wol oli stat blong kamaot long mi. Wan, i wan gudfala wok, we oli givim long mi jes taem mi stap finisim nambafaef yia blong mi olsem presiden long Riks Kolej. Mi tingting long hem mo prea from, mo tokbaot wetem Fas Presidensi. Oli smael mo mekem fani smol, be oli no talem wan samting long mi. Presiden Spensa W. Kimbol, i lisin gud long mi we mi stap tokbaot wok we wan bigfala kampani i wantem givim long mi mo i talem: “Okei Hal. I luk se hem i wan gudfala janis! Mo sapos mifala i nidim yu, bae mifala i save weaples blong faenem yu.” Bae oli save weaples blong faenem mi, be ating ol tingting blong mi blong gat sakses long wok bae i save putum wan tapolen we bae i mekem i had long mi blong faenem God, mo i had moa blong mi lisin mo folem ol invitesen blong Hem.

Waef blong mi i filim se mi gat wan strong tingting be hem i filim se bae mifala i no aot long Riks Kolej. Mi talem “Hemia i inaf long mi.” Be hem i talem wetem waes, se bae mi mas gat revelesen blong miwan. Mo mi prea bakegen. Naoia, mi kasem wan daereksen, olsem wan voes insaed long maen blong mi we i talem: “Bae mi letem yu stap long Rikjs Kolej smol moa.” Ol tingting blong mi i bin putum wan klaod long fored blong ril laef, mo i mekem i had blong mi kasem revelesen.

Teti dei afta we mi gat blesing ia blong kasem insperesen blong no akseptem wok ia mo stap long Riks Kolej, Teton haedrowota i bosta. God i bin save se haedrowota ia bae i bosta mo plante handred pipol bae i nidim help. Hem i bin letem mi blong askem advaes, mo kasem raet blong Hem blong stap long Riks Kolej. Hem nomo i save evri risen from wanem seves blong mi bae i impoten long kolej mo long Reksbeg. So mi stap ia blong askem long Papa long Heven long prea se bae Hem i pusum mi blong mekem ol samting ia we bae i helpem ol pipol we haos mo bisnis mo ol laef blong olgeta i kasem damej. Mi spendem plante aoa wetem ol narafala pipol blong karemaot sofmad mo wota long ol haos. Tingting blong mi, blong wantem save mo wantem mekem tingting blong Hem i givim mi wan janis blong lukluk long sol blong mi.

Nogud taem i soem wan narafala wei we yumi save krietem wan fanis we bae i blokem yumi blong save tingting blong God, o blong filim lav we Hem i gat long yumi: yumi no gohed blong stap strong blong folem taem blong yumi, taem we Lod i gat taem blong Hem. Mi tingting se mi bin spendem inaf taem long seves blong mi long Reksbeg, mo mi stap hariap blong muv i go. Samtaem, from se yumi wantem tumas mekem samting folem taem blong yumi, nao hemia i mekem se yumi blokem yumi long tingting we Hem i gat long yumi.

Long Libeti Kalabus, Profet Josef i bin askem Lod blong panisim olgeta we oli stap mekem nogud long ol memba blong Jos long Misuri. Prea blong hem i blong Lod i mas givimbak long olgeta ia. Be Lod i ansa se long sam yia nomo afta, 4 bae Hem i lukluk long ol enemi blong Jos. Long namba 24 mo 25 ves blong seksen 121 blong Ol Doktrin mo Kavenan,

Hem i talem se Hem i luk mo save evri wok blong olgeta, mo holemtaet wan kwik jajmen i stap blong givim long stret taem, blong olgeta evriwan;

From se i gat wan taem blong jajmen blong evri man, folem ol wok we bae wanwan man i mekem.5

Yumi tekemaot tapolen taem yumi filim mo prea, “olsem we yu yu wantem” mo “folem taem blong yu.” Taem blong Hem, i no longtaem, bae i kam long yumi, from se yumi save se Hem i wantem nomo wanem we i moa gud.

Wan long ol waef blong wan boe blong mi i bin spendem plante yia we i stap filim se God i putum wan tapolen i kavremap hem. Hem i wan yang mama we i gat 3 pikinini mo i wantem moa. Afta we hem i lusum 2 pikinini, prea blong hem i kam bigwan, i kam moa wan wari. Moa yia i pas, i no gat pikinini, mo i filim temtesen blong kam kros. Taem yangfala blong hem i go skul, haos ia we i emti i olsem se i stap jikim hem olsem wan mama—i semmak taem ol fren blong hem oli gat ol bebi we oli no plan from. Hem i filim se hem i komitim hem mo i konsekretem hem olsem Meri, we i talem, “mi mi woman blong wok blong yu, Masta.”6 Be nomata hem i talem ol toktok ia long hat blong hem, hem i no save harem wan ansa.

Wetem hop se bae i leftemap tingting blong hem, hasban blong hem i invaetem hem blong go wetem hem long wan bisnis trip i go long Kalifonia. Taem hasban blong hem i go long miting, hem i stap wokbaot folem wan naes, emti sanbij. Hat blong hem i rere blong bosta, hem i prea long wan laod voes. Blong fas taem, hem i no askem blong gat wan narafala pikinini be wan tabu wok. “Papa long Heven” hem i prea, “bae mi givim yu evri taem blong mi; plis soem long mi olsem wanem blong fulmap taem ia.” Hem i talem se hem i rere blong tekem famle blong hem long weaples oli mas go long hem. Prea ia, i givim wan filing blong pis we hem i sek long hem. Hemia i no stretem tingting blong hem blong wantem samting we i sua, be long fas taem afta plante yia, i mekem hat blong hem i go daon.

Prea ia, i tekemaot tapolen ia mo i openem ol windo blong heven. Long 2 wik taem, hem i lanem se hem i gat bel. Niufala bebi i gat wan yia nomo taem wan misin koling i kasem boe mo aeneli blong mi. From se hem i bin promes blong go mo mekem eni samting long eni ples, hem i putum fraet blong hem long saed, mo tekem ol pikinini blong hem i go ovasi. Long misin, hem i bin gat wan narafala pikinini—long wan misinari transfea dei.

Blong stap putum tingting i folem fulwan tingting blong heven, semmak olsem yang mama ia i bin mekem, i stamba blong tekemaot ol tapolen long saed blong spirit, we samtaem, yumiwan i stap putum antap long hed blong yumi. Be, hemia i no minim se ol kwik ansa blong prea blong yumi bae i kam kwiktaem.

I luk se hat blong Ebraham i stap stret longtaem bifo we Sera i bonem Aesak, mo bifo oli bin kasem promes graon. Heven i gat ol narafala stamba tingting blong mekem i hapen faswan. Olgeta stamba tingting ia, i no blong bildimap fet blong Ebraham mo Sera nomo, be tu, i blong tijim tufala long ol trutok we oli no save finis, we tufala i bin serem wetem ol narafalawan, long longfala rod blong olgeta i go long graon we God i mekem rere blong olgeta. Samtaem, taem Lod i pusumbak samting, yumi luk se i longtaem; sam i blong ful laef. Be, oli stap blong blesem man. I no nid blong i gat ol taem blong stap yumiwan, o harem nogud, o fasin blong no save wet.

Nomata se taem blong Hem i no oltaem folem taem blong yumi, yumi mas save stret se Lod i stap kipim ol promes blong Hem. Long eniwan long yufala we i filim naoia se i had blong kasem Hem, mi testifae se dei bae i kam, we bae yumi evriwan bae i luk Hem, long stret fes blong Hem. Semmak olsem we i no gat wan samting naoia we i blokem Hem blong luk yumi, bae i no gat wan samting we bae i blokem yumi blong luk Hem. Bae yumi evriwan i stanap long fored blong Hem, yumi fesem Hem. Semmak olsem apugel blong mi, yumi wantem luk Jisas Kraes naoia, be taem bae yumi mitim Hem long dei blong jajmen, taem ia bae i moa swit sapos yumi mekem, faswan, ol samting we bae i mekem se yumi savegud Hem olsem we Hem i savegud yumi. Taem yumi wok blong Hem, yumi kam olsem Hem, mo yumi filim se yumi stap kolosap moa long Hem taem bae yumi kam kolosap long dei ia we bae i no gat wan samting we bae i blokem ae blong yumi.

Muv ia, blong go from God, i save stap gohed blong hapen. “Yufala i kam. Papa blong mi i mekem i gud tumas long yufala. Taem hem i no mekem wol ya yet, be hem i makemaot ol ples blong yufala finis long niufala wol we naoia bambae i kam we hem i king long hem,”7 Sevya i tijim. Mo afta, Hem i talem long yumi olsem wanem:

“From we taem mi hanggri, yufala i givim kaekae long mi, mo taem we mi mi tosta, yufala i givim wota long mi. Taem we mi mi strenja, yufala i tekem mi mi go long haos blong yufala.

“mo taem we mi mi neked, yufala i givim klos long mi. Taem we mi mi sik, yufala i lukaot gud long mi, mo taem we mi mi stap long kalabus, yufala i kam luk mi.

“Nao ol stret man ya bambae oli talem long mi se ‘Masta, mifala i luk yu wetaem we yu yu hanggri, nao mifala i givim kakae long yu, no yu yu tosta, nao mifala i givim wota long yu?

“‘Mifala i luk yu wetaem we yu yu strenja, nao mifala i tekem yu yu kam long haos blong mifala, no yu yu neked, nao mifala i givim klos long yu?

“‘Mifala i luk yu wetaem we yu yu sik, no yu stap long kalabus, nao mifala i kam luk yu?’

“Nao mi bambae mi talem long olgeta se ‘Tru mi talem long yufala, taem we yufala i mekem olsem long wan brata blong mi, we i daon moa long ol narafala brata blong mi, be hemia i olsem we yufala i mekem long mi nomo.’”8

Taem yumi stap mekem wanem Hem i wantem yumi mekem long ol pikinini blong Papa blong Hem, Lod i tekem se yumi mekem gud long Hem, mo yumi filim kolosap moa long Hem taem yumi filim lav blong Hem mo se Hem i agri long hem. Long stret taem, bae yumi kam olsem Hem mo bae yumi tingting long Jajmen Dei wetem wan glad hat.

Bigfala tapolen ia, we yu luk olsem se i stap haedem yu long God, ating i fraet long man, be i no blong wantem givim seves long narafalaman. Sevya i gat wan tingting nomo, we i blong helpem ol pipol. Plante long yufala, semmak olsem mi, i bin filim fraet blong go luk wan we yu bin mekem nogud long hem, o i bin mekem yu harem nogud tumas. Mo yet, mi bin luk Lod i meltem ol hat plante taem, wetem hemia blong mi tu. Mekem se mi jalenjem yu, yu mekem long bihaf blong Lod: go long wan nomata wanem fraet yu gat, blong givim lav mo fogivnes. Mi promesem yu se taem yu mekem olsem, bae yu filim lav we Sevya i gat long wan man ia, mo lav we Sevya i gat long yu, mo lav ia i no stap longwe tumas. Long yufala, ating jalenj ia i stap long famle, ating long komuniti, o ating i go krosem wan kantri.

Be sapos yu go, long bihaf blong Lod, blong blesem ol narafala man, bae Hem i luk mo i blesem yu. Sapos yu mekem hemia plante taem mo blong wan longfala taem, bae yu filim wan jenis stret long fasin blong yu, tru long Atonmen blong Jisas Kraes. Bae yu filim se yu stap kolosap moa long Hem, be tu, evri taem, bae yu filim moa mo moa bakegen, se yu stap kam olsem Hem. Afta, taem bae yu luk Hem, from se yumi evriwan bae i luk Hem, bae i hapen long yu olsem i bin hapen long Moronae, taem hem i talem: “Mo nao, mi talem long evriwan, gudbae. I no longtaem bae mi go spel long paradaes blong God, kasem taem we spirit blong mi mo bodi bae i kam tugeta bakegen, mo hae Jehova i tekem mi tru long skae, blong mitim yufala long fored blong gudfala kot blong hae Jehova, Jaj we i No Save Finis blong olgeta we i stap laef tugeta wetem olgeta we i ded. Amen.”9

Sapos yumi wok wetem fet, wetem tingting i stap daon, mo wetem tingting blong mekem tingting blong God, mi testifae se taem blong jajmen dei bae i wan gudwan. Bae yumi luk Papa we i gat lav, mo Pikinini blong Hem semmak olsem we Tufala i luk yumi naoia—we Tufala i luk yumi klia mo wetem wan stret lav. Long tabu nem blong Jisas Kraes, amen.