Ngar Ker Orars?

Mla er a President Henry B. Eyring

Kot el Counslor er a First Presidency


Henry B. Eyring
A orars el uaia lolenget chedaol ngeso a diak el bertii a Dios ng bai mertid. A Dios a diak el blart, eng di kid a lebebil er a taem e kede blart.

Chelsel a klou el ringel le bla er ngii ra Liberty Jail, ea Profet Joseph Smith a uleldiu lmangel loker ra Dios el kmo ngomart er Ngii er ker?”1 Betok er kid sel de kurusii el ngara ringel, e kede omelchesiu el kmo a Dios acheroid er kid. Eng di a orars el uaia lolenget a chedaol ngeso a diak lomart ra Dios; ng bai blechoel lomart er kid. A Dios a diak el berrotel, eng di kid a lebebil ra taem e kede berrotel, er a orars ra kmong ngera el mengeroid er kid ra Dios e rullii Ngii meng uaia lecheroid el diak el sebeched el mor ngii. Sel soal a rengud, e diak el sel “Ngii a soam bol mekedmokl,”2a rullii orars lomart ra Dios. A Dios a blechoel lomes er kid e mengedecheduch lobengked, eng di kid a locha diak el soad el orrenges malechub e doltirakl er sel Ngii a soal ma temel.

Sel rengud el uaia dechacheroid kid ma Dios a mo diak sel sekum e kede mo uaia ngalek er Medal. Tia diak el beot el teletael er tial beluulechad el ngii a uldesuir a rebebil ra rechad a sebechel klou a lengedechii ra ikel moktek er kid. Eng di ngosukid el mesa klemerang: A Dios a kmeed er kid e kmal medengelkid e diak lomart er Ngii ra rengelekel.

A ede rekil redil el ngelekel a ngelekek a ochotii a klisichel a klikiid ma ngariou el reng el uaia lokedid ra Dios. Ng ulebengkel a telungalek er ngii el mora open house ra Templo ra Brigham City ra Utah. Chelsel a ta ra delmerab ra templo, eng ulemes el meliuekl e okerei, “Mommy, ngar ker a Jesus?” A delal a silodii el kmo ng diak lesa Jesus ra templo, ng di mo omelchesiu er Ngii ra rengul. A Eliza a mlo chelellakl e melbedebek er tial tekingel a delal e uaia blo el mesubed a rengul e dula el kmo, “A, Jesus a mla merael el mo olngeseu ra kmong techang,” ng dilung.

Ng dimlak orars lomart ra klemedengei ra Eliza malechub el tengetengii osengel kirel a klemerang. A Dios a kmeed er ngii, e ngii omelchesiu el kmeed er Ngii. Ng mle medengei el kmo a templo a blil a Rubak e dirrek el mle medengei el kmo ngika el mla mekiis ra kodall loba klebkall el Jesus Kristo a oba bedengel e sebechel di ngara chimo el basio ra ta el taem.3 Omko Ngii a dimlak el ngara Blil, eng mlo medengei el kmo Ngii a locha kuk ngara ta ra basio. Ngultuil ra klemedengei er ngii ra Osobel, eng mle medengei el kmo Ngii a ngara kmong ker el meruul a ungil el kirir a rengelekel a Chedam. Ng mle bleketakl el kmo ng mlarngii a urungulel el mo mesa Jesus el diak lultuil ra ongasireng el teletael er Ngii ng bai ultuil er sel kmo ng mle betik a rengul er Ngii.

A Reng a ulechotii el mora rengul ma uldesuel ma rengul a ongelaod el kid el rokui ousbech e soad. A Jesus Kristo a ngar, e medengelkid, e mengkar kid, e omekerreu er kid. Ma chelsel aikel taem ra ringel, klesabisi, malechub a rraureng, eng diak a belkul bo desa er a medad a Jesus Kristo el uchul el bo dodengei el kmo Ngii a medengelii a teletael el de ngara chelsel ea Urerel a omekngeltengat er kid.

Ak ungil medengeil el kmo tial teletael el mlora Elizabeth a dirrek el sebechel mei er kid, ruriul ra klengeasek er kid. Se er a uchelel a urerek, eak mle meringel loureor el sensei ra Stanford University. Ak ulemdasu el kmo ak mla kudmeklii a ungil klengar ngak ma rengelekek. Aki kiliei ra kmal ungil basio el kmeed ra rechad ra blil a bechik. A denguu ra teletael ra beluulechad, eng mla mo ungil besuk. Eng di ng mlorngii a techellek el tuobed ra beluu ra California el mora Ricks College ra Rexburg, Idaho. A mle moktek ra klengar ngak el oureor a locha mle orars el omii er ngak ma oubeltikelreng el Chedam el ngii a mle ungil ungil medengelii a siorai er ngak. Eng di ak mle ngeltengat el mlo medengei el mo ngii dil klungiaol ra urerek ma telungalek er ngak el mei er tiaikid el taem a mle sengk ra Dios. Meng, uaia ngalek, eak mlo meluluuch loker el kmo ngera kirek el meruul. Ng mlo sebechek el rongesi a chelellakl el ngor ra uldesuek el kmo, “Ng skulek.” Ng dimlak orars el omart er ngak ma Dios. Me ngultuil ra klaumerang ma ngariou el reng, ea kultireklii sel Ngii a soal, e mlo omelchesiu er Ngii el omekerreu e kmeed.

Aikel rak er ngak ra Rick’s College, el kullasem el osiik ra soal a Dios e otireklii, a urekedii orars meng dimlak lomart er ngak malechub e lecheridii a Dios ra klengar ngak. Sel kusiik el meruul a Urerel, eak mlo omelchesiu el kmeed er Ngii e mlo medengei el kmo Ngii a mle medengelii a teletael kngarngii e kmal omekerreu el kirel a deureng el mei er ngak. Eng di ng di uaia Stanford, ea odbechel a tekoi ra beluulechad a mocha medmedum. A chimong a kmal mle ungil ureor, el dilubech ra taem el bocha kurekui ra ongeim ra rak el kurreder ra Ricks College. A kulemdasu er ngii e milluluuch el kirel e dirrek el milsaod er ngii lobengkel a First Presidency. Te kora mle ungil longer el kirel e kora oungengelakel eng di dimlak a kmal bleketakl el uldasu. A President Spencer W. Kimball a ulerrenges er ngak el mesaod er ngii e dula el kmo: “Oi, Hal, ng kora ungil techall lekor kau! Ea lsekum a ki mo ousbech er kau, ea ki medengei el kmo ke ngar ker.” Tir a medengelii ak ngarngii, eng di sel klemeriar ngak el kirel a ureor a locha sebechel mekdebechii orars el uchul eng mo meringel er ngak losiik ra Dios e kmal meringel er ngak el mo orrenges e oltirakl Ongtil.

A bechik, el mlo medengelii tiang, a mlo omelchesiu ra mesisiich el kmo ng diak ki bom cheroid er a Ricks College. Ak dilu el kmo, “Tia ungiang el bla bo kudengelii.” Ng di ng di ulsiseb ra, uldesuel, e kmo ng kirek el nguu ocholt el mei er ngak. Me ak liluut el meluluuch. Tiaikid e ngak a ngiluu a bleketakl el nger, el uaia le ngor ra uldesuek el kmo, “Ak mechikau me kelmuut el kiei ra Ricks College el telkib el taem.” Aikel kuk di mle soak a locha milngucheb ra osengek el kirel a klemerang el uchul eng mle meringel el kulai ocholt.

Okedei el klebesei ruriul eak mlo ngeltengat el mle kotouar tial ta ra ureor e kiliei ra Ricks College, ea Teton Dam a ulebuu. A Dios a mle medengei el kmo a dam a mo obuu ea rechad a mo ousbech a ngeso. Ngii a milchikak ma kulsiik rolel ma uchul eak kiei ra Ricks College. Ngii a medengei a uchul el kmo a omesiungel a locha dirk usbechall ra Rexburg. A kulsiik a ngeso ra Chedam ra Babeluades lokiu a nglunguuch me bo kudengei el kmo Ngii ngera soal a bo kurrul el mo er tirkel miltemall a kloklir. Ak chiloit a betok el temek lolngeseu ra ikel miltemall el obliil. Sel blakekreng er ngak losiik ra Soal a mlo uchul ea ulekrael er Ngii ra klengar ngak a mlo klemerang.

Tia ochotii a ta ra uchul e kede rullii orars el uchul eng mo diak dodengelii a soal ma rengul a Dios. Sel beltikelreng er Ngii el mei er kid: eng diak dolsiseb ra uldesueder sel ngii a taem el soad e diak do ba temel a Rubak. Ak ulemdasu el kmo a mla mo merek a temek er a Rexburg meng kirek el kuk melodech er ak bor ngii. Bebil ra taem e sel lak el soad el mengiil a uchul eng mo kedeb osenged er sel Ngii a soal el kired.

Chelsel a Liberty Jail ea Profet Joseph a ulengit ra Rubak me lomlals er tirkel luldechelakl ra rechedal a Ikelesia ra Missouri. A nglunguchel a mle soal el melaitechei. Eng di a Rubak a ulenger el kmo ng mo duubech er a chelsel a kesai el rak,”4Ngii a mo omals er tirkel cherreuel a Ikelesia. Sel lluich ma eua ma lluich ma eim el bades ra bliongel 121, Eng kmo:

“Ngii a mla mes e medengei aikel omerellir, e mo omals er tir el rokui, er sel ungil temel;

“Ngarngii a taem el mla mekedmokl el kirir a rebek el chad el mo mukerkeriil, el ultuil ra omerellel a chad.”5

Kede oridii orars sel domelchesiu e doluluuch, “Sel Soam bol mekedmokl” er “Sel ngii a Temem.” Tiaikid a kired el mo medengelii, ele kid el medengei el kmo Ngii a di soal sel mo klungioled.

A bechil a ngelekek el sechal a mle betok el rak lomdasu el kmo a Dios a mla loiia orars ra delongelel. Ng mle ngeasek el chedil el tedei a rengelekel e soal muut el mo oungalek. Uriul ra eru el mengai ra kldiull ea nglunguchel lolengit a uaia blo lak. Meng chelsel a betok el rak el diak lomechell, eng mlo omelchesiu el kesib a rengul. A kot el kekerei el ngelekel ra lomuchel el mocha ra skuul, ea bechachau el blai ra rengalek a uaia le rirellii el mlo moalech a uldesuel el kirel a klechedil—luldimukl er tirkel ngii a mle medengelterir el chad el dimlak ra telbiil e mlo dioll. Ng ulemelchesiu er ngii el blak a rengul e klikiid el uaia Maria, el dilu el kmo, “Ngika delal a Rubak.”6Meng uaisei el millekoi aikal tekoi ra rengul, eng di dimlak a ngera lomelchesiu er ngii.

A bechil omdesua ra kmo ngera el rullii meng kora mo ugil a rengul, eng mle siotai er ngii lobengkel ra omerael ra ureor el mora California. Tia ra le ngara miting, e ngii el bechil a mirrerorael, er tial kleboke,l el chelechol. Meng soal lobuu a rengul, eng mocha klou a ngerel el meluluuch. Meng ketengel, el meluluuch el diak lolengit ra ngalek ngullengit chedaol moktek er ngii. “Chedam ra Babeluades,” ng lilangel, “Ak mo meskau a rokui el temek; a kulengit mochotii er ngak el kmo ak mekerang.” Ng ulechotii el kmo ng mo blak a rengul loba telungalek er ngii el mora ikel kirir el mor ngii. Tial nglunguuch a milsa kmal ngodech el budech. Ng dimlak el semechii a uldesuel, eng di ng mle kot el taem ra chelsle a betok el rak, el blo lechelellakl a rengul

Tial nglunguuch a ngilmersii orars e milkengii a mado ra babeluades. Chelsel eru el sandei eng mocha medengei el kmo ng dioll. Ngkal tolechoi a dimle ta rekil ea okedong ra mision a mocha ra ngelekek el sechal me ngii. Me ngultuil er sel yaksok el mo meruul a ngii dil ngerang e mora ngii dil ker eng mlo mechere dektel e ngilteterir a rengelekel e mirrael. Tia ra le ngara mision eng liluut el mechell—ra sils el kuk kirir el melukl.

Otireklel sel soal a babelaudes, el uai ngkal ngeasek el chedil, a klou a belkul kirel a choridii orars el bebil ra taem e kid a loiiang. Eng di ng diak el belkul a kmo a nger ra nglunguched a mereched el mei.

Ng locha mle melemalt a rengul a Abraham ruchei ra Sarah bol dioll ra Isak e uchei ra bol siseb ra beluu ra telbiil. A babeluades a mlarngii a kuk bebil ra moktek el mle kirel kot eng kudmokl. Aikal moktek a dimlak di luldimukl er ngii a ulekerulel a klaumrang ra Abraham ma Sarah ng dirrek el mle kirel osischeklel a klemerang el mo er tir el terung ra chelsel tial kemanget, e diak lodengelii lomerael el mora beluu el mla mekedmokl el kirir. A iieudel a Rubak a locha kmal kemanget; le bebil eng tial klengar. Eng di ng blechoel ulterekokl el omekngeltengat er kid. Ng diak el kirel ngarngii a taem ra klesabisi ma klengit el reng.

Ng uaisei el Temel a diak el temed, eng di sebeched el mo medengei el kmo a Rubak a oltirakl a Telbiielel. A lengarngii er kemiu omdasu el kmo ng meringel a de bor Ngii, ea kuuchais el kmo sel sils a mei el kid el rokui a mo chachebangel kid me Ngii. Ng di uaia chelechang el diak a ngera el melenget ra Osengel mei er kid, meng diak a ngera el melengat ra osenged er Ngii. Kid el rokui el mo dechor Medal, kid el chad. Ng uai ngkel redil ngelekel a ngelekek, ng soad lomes ra Jesus Kristo er chelechang, eng di sel klaumerang el kid a mo dmak Lobengkel er sel sils ra kerkeriil a lmuut el kmal ungil alsekum kede meruul aikel tekoi el uchul e Ngii a mo ungil medengelkid el uai kid el mor Ngii. Me sel dosiou er Ngii, e kede mo uai Ngii, e omelchesiu el kmeed er Ngii sel lemei sel sils el diak a ngera el mertii osenged.

Tial omerael bedul a Dios a sebechel melemolem. “Mei, kemiu el ngeltengat ra Demak, mnguu a rengediu el ngii a mla mekedmokl ra uchelel a beluulechad,”7a Osobel olisechakl. E Ngii a mo kmu er kid:

“Ak mle songerenger, eke milkelak: Meched a renguk, e ke milngelmak: Akmle ngodech el chad, eke ngilikak:

“Mle meau, eke mililak: Ak mle smecher, eke mle odngelak: Ak mlara kelebus, eke mlei.

“Ea melemalt el chad oker ngii, el kmo, Rubak, oingerang ea ki milsekau el songerenger, e milkelau? Meched a rengum, e milngelmau?

“Oingerang ea ki milsekau el ngodech el chad, e ngilikau? Malechub eke meau, eak mililau?

“Malechub eng oingerang eke mle smecher, ngara kelebus, e mle odngelau?

“Ea King a mo onger el mor tir el mo, A kmal kmu er kemiu, Aikel bla mruul el mo er ta er tirkal ngariou el chedak, a bla mruul el mei er ngak.”8

Sel doruul aikel Soal a doruul el mora rengelekel a Demal, ea Rubak omtab er ngii el blekokeuii el mor Ngii, e kid a mo kmeed er Ngii sel domelchesiu ra beltikelreng er Ngii ma kengei er Ngii. Ea cherengel a taem e kede merael mo uai Ngii e mo omdasu el kier sel Sils ra Kerkeriil el dmeu a rengud lolsingch el kirel.

A orars el melenget er kau ma Dios a locha dektem ra chad, e bai diak el blakereng el mo mesiou. A di mle ta el moktek ra Osobel a olngeseu ra rechad. Betok er kemiu, me ngak el dirrek, a mla melchesuar a dakt sel mtemellii a rengul a chad malechub a chad a tomellii a rengum. Eng di ak mla mesa Rubak el domdemek a reng ra chelsel a taem, luldimukl er ngak. Ma kulengit er kemiu me momtechei ra Rubak e bo mesa chad, el diak ko medakt, e modersii a beltikelreng ma klausubes. Ak yaksok er kemiu el kmo sel bom uaisei, e ke mo melchesuar a beltikelreng ra Osobel el mor ngkel chad ma dirrek el beltikelreng er Ngii el mei er kau, e mo omelchesiu el dimlak msal ngara cheroid el mei. Mora rebebil er kemiu e tial teletael a locha chelsel a telungalek er kemiu, malechub eng beluu, malechub eng chelsel a chacheroid el beluu.

Eng di a bo ra Rubak, e Ngii a medengei e meskau omeksullem. Omko ke blechoel meruul uaisei, e ke mo omelchesiu ra rengum ma klechad er kau el mengodech, lokiu a Tngakireng ra Jesus Kristo. Ng diak di bo momelchesiu el kmeed er Ngii, ke dirrek el mo omelchesiu el merael mo uai Ngii. Seikid, e sel bo Mesang, el kid rokui a mo mesang, eng kmal di uai sel mlora Moroni: ra lolmesumech ra rokui el chad el dul kmo ng mocha ra ulengull ra baradis ra Dios, el di merekmo a reng ma bedengel luut el mo dmak, e ngii a mekiis el bedul a eanged, el mo mesterir er medal a ngarbab el Jehovah, el ngii a Diak a ulebengelel Merriter ra re ngar ma re mla mad, Amen.”9

Alsekum kede mesiou loba klaumerang, ngariou reng, ma blakerreng el mo meruul ra soal a Dios, ea kuuchais el kmo a sils ra kerkeriil ra ngarbab el Jehovah a mo soad. Kede mo mesa Chedam ma Ngelekel el uai Tir sel lomes er kid er chelechang—loba bliochel el llomes ma bliochel el beltik el reng. El ngara ngklel a Jesus Kristo, amen.