Mei Melak Mesim!

Mlara Elaine S. Dalton

Merredel er a Cherrengelel a Young Women


Elaine S. Dalton
Mdechor el mesisiich. Lak ko mesim. “Mdechor el kirel a klemerang me a llemalt.” Mdechor el sioning. Bo molangch el mora beluulechad. Mdechor er a chedaol basio.

Chelecha el kesus eak kdechor er a chedaol basio, el dechor medal tiei er mederir a reprofet, romes, olecholt me a ngarbab el ngelekel a Dios. Ng mera lungil taem el omngar tial beluulechad el ngeasek el dil. Kemiu a ngellitel el ngelekel a Demad er a Babeluades. A kureng me ko mtbengar sel teleteliu el kmo ko meral betik er a rengul a Demad er a Babeluades. Ngii a betik a rengul er kemiu, me ngak me ak uaisei.

A tebelek er obis, a ngarngii a delsechelel a ngeasek el dil el ngkel a Kristina. Sel klou el delsachel el Katrina el diua klungel a chad a dechor er a Copenhagen, er a Denmark, ng dechor ra cheldukl el ruul lomes er a daob el bedul a Zion. A uldesuel el chilitii a blil e mlo teloi er a Ikelesia a dimlak el beot, meng sebechem el mesa ultekengel a eolt el melokou el lomtok er ngii. Ng dechor el mesisiich, ng meruul er a kmal meringel eng di medengei el kmo ng melemalt. A rtelecheroll er ngii a lilia tia el delsachel er tial cheldukl el uldersii el mora Kristina, er a uldesuel er sel sils el kmal klou a rellii el mo cherchar er a rebetok el telcheroll.

Sel kuk denguu er ngak e tial delsechel a Kristina a omtechei er kemiu el rokui. El diua Kristina, e kom dechor er a bkul a betok el uldasu el molilt er a bek el sils, a bebil er ngii a meringel, el ngii a mo dosechii a diak el dil ngarmedemiu ng dirrek el merael mei el telecheroll. Kemiu a dirrek el chelbangel a chetau er a ultok, cherarou, ongetikaik er a re mtelbasech, me a delngerenger. Meng uaisei eng di kom dechor el diak mesim e kiei el ngara ebangkelio el teloi er a ikal mesisiich el eolt er a beluad. El diua Kristina, e kau a mukrael lokiu Chedaol Reng. Ke melilt a ungil uldasu. Ke blak a rengum, e ngarbab.

Ng diak bedesuii a ngii di el klou a belkul tekingel a Chedam er a Babeluades el ua tia el lomeklatk er a derta er kemiu el mo “dechor … er a chedaol basio e diak mesim.”1 Ngii a melekoi el kmo: Bo mesisiich el dechor. Bol blak a rengmiu.2 “Bom dechor el kirel a klemerang me a llemalt.”3 Bom dechor el sioning.4Bom olangch er a beluulechad. Bom dechor er a chedaol basio. Me a klemechek el mei er kemiu a kmal beot: Lak mesim.

A kot, la ko mesim er a melilt a mera el tekoi. Chelecha uriul-klebesei, eng diak a mekekerei el tekoi el molib. A omelilt el moruul er chelechang a meklou a belkul. Omelilt, me a sebeched el melilt, a ta er a ungil sengk er a Dios el mora rengelekel. Ng tebdechel a uldasu er a deureng kau me ngak a ngililt e mesebechakl er a klengar ruchei. Bom kiei el ngara teletael mel sebechem el rongesii a Chedaol Reng, e Ngii a mo ngosukau el melilt a ungil luldasu. Ng klemerang, Ngii a mo “subedau a “rokui el tekoi el kau a mo meruul.”5

Sese el sandei ruchei e ak mlora mle skulek er a high skuul el ketengek el mong er a meketeketa el taem. Ak mlei er stake conference el mla er ngii er a skuul. Me a kurael er a chelsel tia el basio, eng mle er a uldesuek. Ak ulemelchesiu a osisiu el omelchesiu er se er ak ngeasek el dil el—merur, diak ansing er ngak, e di klsakl, e meral, meral mle soak el mo uai tir. Ak mlo er a auditorium. E liluut el mo melbedebek aikal teletael. Ak mle lmatk aikel rokui el tekoi er tial auditorium. Ng di ta el tekoi a mla mengodech—ngak.

Sel sils eng mlo rengii a techellek el mo dechor er a stage el ua ike el kulruul er a tia el skuul el betok el taem el mengeteklir. Ak dirrek el milsterir a kimdilak el skuul er tial seked—a rebebil el blek date er tir! Eng di, chelechal taem, e ak mle techellekel—ngar sei el auditorium er a skuul— el “dechor el sioning”6 e olecholt er a klaumerang er ngak er a Osobel el Jesus Kristo.

Ngeasek el dil, ng mo blak a rengmiu el kirel a deleuill er kemiu ma rebebil e le bol merek a okeua er rak, eng diak bo merur er ngii. Ng diak a ngii di el ongesuseu er a omta el basech, a da ng kengei, mo merael chisiu el ngii a meklou a belkul meke mo moruul a diak el kirem. A omengetikaik er kau er a rengeasek el sechal a mo ngosuterir el mo klikiid el olab a klisichel a priesthood er tir, me a telbiil er a templo me a mesiou el misionari. E techa medengei? Okeua el rak er medad, e a locha ta er tir a merkau, er sei el high skuul auditorium, e oureng a sulem el ngilsuterir me te kiliei el klikiid e mo oltaut a ngerchelir er a priesthood e mo ra mision. E techa medengei? Ke locha mo nguu a tengami er a bechil a ta er tirka el sechal, el mereng a sulem er a ongetikaik er kau er a bechil me a ngar medal el telungalek er tir me a ika a bleketakl el omelilt er kau el muruul er a high skuul. A omolilt a klou a belkul. A omelilt er kau a diak el dil bol kirem, ng dirrek el mo kirir a rebebil. Aika a meklou a ultutelel er a klengar er a diak a ulebengelel. Lak ko mesim!

Ongerung, lak ko mesim el soam el mo blak a rengum e kdung e klikiid er a delboes. Bo mekreos er a kldung. A sel omklikiid a ta er a kot el klou el uchul a klisiich. Sera omei ra beluulechad e ke ngiluu a mekreos el sengk el bedengem er a tech. A bedengem a dongu er a uldesuem e chedaol sengk el mo ousbech er a llemeltem el melilt. Tia sengk el dimlak lenguu a Diablong maleuaisei ea ikel rokui lodecheleklel a ngara bedengem. Ng soal kau a bol chetim, mekngit a usechellem, e melemall er a bedengem. Diak lomekerreu, deleboes, delengerenger, delengod, me a omsibs el bedenged, ousbech a mekngit el kar, me a uleksau er a bekbedengel a mekngit a rokui el urerel el melai er tial mekreos el sengk— el bedengem— e meruul er ngii meng mo meringel er kau lousbech er a llemeltem el melilt. A Paulus oker, “Kau ng diak modengei el kmo ke templo er a Dios, me a Reng er a Dios a kiei er a chelsem?”7

A bedengem a templo. E ngerang? Ele ng sebechel el blil a diak el dil reng el mo cherchar ng dirrek el blil a reng el mo cherchar er a rebebil el dirk mei er tial beluu el tebedechel a diak a ulebengelel el telungalek er kau. A Elder Dallin H. Oaks a ulsisechakl, “A klisiich el lomekdubech a klengar a kot [el] ngarbab el klisiich.”8 A ngerchelem a ngarbab el ngerachel. A Dios a mla meskau a chedaol el klaumerang! Kau a mengedmokl el mo chedil er a telcheroll el merael mei. Molemolem el klikiid, e bom klekar er sel ngii a “kot el meringelchad lokedeldaol er a rokui el tekoi”—el kldung me a klidiid el kau.9 Me kau el ngellitel, el ngelekel a Chedam er a Babeluaded el redil, e sel Ngii a tekingel lekor kau a kmo “morael … er a rael er a kldung er medak.”10

A kedung a kot el klou a ultutelel el kiis el mora templo. Me, a ongedei, e la ko mesim el klikiid el mo meruul e oltirakl a chedaol telbiil.A telbiil el moruul er a techolb a mo sobecheklau er a rael er a kldung me a deureng sel mo mekbeches er ngii er a bek el sandei sel omolai a sakrament. Sel moltirakl a telbilem er a techolbechelid, e ke mo meues el ngodech, oubail ngodech, e ngodech omerellem er a beluulechad. Otireklel tia el telbiil a mo sebechem el mukrael lokiu Chedaol Reng. Mdechor er a chedaol basio, e lak bom keed er a ikel basio el chelitakl, media, malechub a rechad a mo uchul ea Chedaol Reng a mo cheroid er kau.11 Me sel moltirak a telbilem, e ke mo sebechem el mo kldmokl el mo soiseb er a chedaol templo er a Rubak.

A ulebongel, lak ko mesim el kirel a kengei er kau er a Tngakireng er a Osobel.A Tngakireng a mo er kau me ngak. Tia meskau a techall me a klisiich er a olsobel. Alsekum meng diak mklikiid el mo dechor er a chedaol basio, e lak mongol er tial berraod el muut el tara sils. Chelsel tial kelngar, e kid el rokui el di ruebet. Bo modengei el kmo a Osobel a kmal betik a rengul meng rirelii el mo sebechem el mo obult e mo ouchel a rengum sel mruul a chelbirukl. A Satan a diak el soal omomdasu el sebechem el mengodech.12 Ng soal meruul er kau lomdasu el kmo ng dikea techall. Tiang a blulak. Ng sebechem el lmuut el mei. Ng sebechem el mo ouchel. Ng sebechem el mo klikiid e chedaol el Tngakireng er a Osobel a uchul.

Chelecha e bo dongesimer el oba imo er a ungil cheldecheduch er a beltikereng el mla muchais. Ke locha oker, “Ngera cheldecheduch er a beltikelreng el kirel a dechor er chedaol basio?” Ng kmal ngarngii a relii el kirel a dechor er a chedaol basio. Tiang a chedechedechal a ngeasek el dil el ngklel a Rebekah.13

Me a tia el cheldecheduch, ea Abraham a msa ngerachel a mesiungel el mo osiik er a klikiid el dil el mo bechil a ngelekel er a Isaac. Ng kirel el sebechel el mo nguu a telbiil er a chebechiil—kedung, e klikiid. Me a Abraham a ulderchii a mesiungel el mo er a cheroid e kengaol lomerael el mo ra basio el ngkel a Haran. A uchul eng mlo risei a bleketakl—a chedaol chad a ousbech er a chedaol redil el mo kaingeseu. Ng kal mesiungel er a le merma er a Haran, eng mlo er a ido el lomngim ra chermel camel e milluluuch el kmo ngmo mukrael el mo er a mera el ngeasek el dil e ngii a mo mtebengar lokiu a ongtil el mo msa ralm me a dirrek el imelel aikel teruich el cheremel kiamo. Ngak, a mla ngmasech er a kiamo, ea ikakid a kudengei—a kiamo a kmal betokel ralm a lousbech!

Ngara Genesis e kede menguiu el kmo a Rebeka mlo metengel mora chelsel a ido e mela ralm, e “ulerreched,”14—malechub eng ulerred, el merkui er tia lurreor. Meng kal mesiou a ngila klilt me a ungil besichel a redil el mai el msa Rebekah e uleker a basio er a blil a demal el sebechel kiei er ngii. Ak medengei el kmo a ikal klilt a milngesuseu! A chedaol llechukl a kmo, “Meng ngka el redil a rirurt, e silbedeterir a rechad er a blil er a ika el tekoi.”15 A Rebekah a locha mle chad ra rurt!

Ngika el mesiou a silbedii a telungalek er a Rebeka er a moktek er ngii er tial kemangel lomerael, me a Rebeka kilengei el mo bechil a Isak. Ngkal mesiou a mle soal merael er a bol kukuk lobengkel a Rebeka, eng di a telungalek er ngii a ulengit mel kiei lobengterir el kesengil eng teruich el klebesei. Te uleker er a Rebeka a mle soal, ea nger er ngii a mle beot el kmo “Ak mong.”16 Tiang diak el nger el diua ikel nger er a rebetok ra retelael el kmal di dilung “Ak mong; E mo meruul”17 sera profet, el Thomas S. Monson, louchais el ngeasek el sechal me a redil a sebecherir er chelechang er a techall el mora mision sel dirk le kesai a rekrir?

Chelechang ea suobel er tiang me a ulebengelel tial cheldecheduch: A Rebeka a mle kldmokl e klikiid el mo meruul e oltirakl a chedaol telbiil e mo bechil a Isak lokiu a telbiil. Ng dimlak longiil e longedmokl er ngii. Uchei er a riid er a telungalek er ngii, eng ngiluu a klengeltengat, ea tekoi a kmal kumelchesuar, eleng mle yaksok el mo “derrir a rebetok er a retelael el milion.”18 Ng di kot lungil tebedechel tial cheldecheduch sera Rebeka le kot el mesa Isaac me Isaac lesang. Ng diak lolekoi er tiang er a Bibilia, eng di kumdasu eng mle beltikelreng er a le kot el kaseues! Ele uchul a “kldung a osiik a kldung; [ea] llomes a bereked er a llomes.”19 A Isaac er a be ltobech el mo ra kareta, ea Rebeka “miltengel ra kiamo er [ngii].”20 E sola ng kmo ngii a ulbeltikereng el mo er ngii.”21Tiaikid sel kutuu a telik er ngii!

Me a Kristina me a Rebeka el dechor er a chedaol basio a diak el beot. A diak el mesim a diak el beot. A eolt a mesisiich el meloko, a ralm er a ido a mle obraod, me a mo cheroid er a lesau el delengcheklir me a mle klengar er tir a meral mle meringel. Eng di te miruul a ungil omelilt. Te mle mukrael er a Chedaol Reng. Te mle kedung, e milngedmokl er tir el mo meruul e oltirak a chedaol telbiil. A Osobel a ngalek el resechel a Rebeka. Ngka ng mle medengei el kmo tia mo uaisei? Ng diak! A omolilt a ngar ngii a ultutelel? Ochoi!

Rengeasek el redil, a telcheroll a ultuil er kemiu er a omelilt el moruul, klikiid el molab, me a kldung el klengar kemiu. Lak ko mesim. Ng klou omerael el ngara medemiu. Tia temiu! A kmal oumerang el kmo a tal kedung el ngeasek el dil, el ulekrael er a Chedaol Reng, a sebechel ngodechii a beluulechad!

A kuchais el kmo a Osobel a ngar! Ngii a mo obengkemiu. Ngii a mo sobecheklemiu. Ea chelsel a meringel el taem, ea “re anghel er Ngii [a mo] iiliuekl er kemiu, e mesebechakl er kemiu.”22 El ngara ngklel a Jesus Kristo, amen.

Mosiik a Osisiu

  1.  

    1. Mesa Doctrine and Covenants 87:8.

  2.  

    2. Mesa Mosiah 5:15.

  3.  

    3. Kerbai er a Young Women, er a Young Women Personal Progress (babier, 2009), 2.

  4.  

    4. Mesa Mosiah 18:9.

  5.  

    5. 2 Nephi 32:5.

  6.  

    6. Mesa Mosiah 18:9.

  7.  

    7. 1 Korinth 3:16.

  8.  

    8. Dallin H. Oaks, “The Great Plan of Happiness,”Ensign, Nov. 1993, 74.

  9.  

    9. Moroni 9:9.

  10.  

    10. Mesa Doctrine and Covenants 25:2.

  11.  

    11. Mesa1 Corinthians 6:9; 1 Tesalonika 5:22; 2 Timoteus 2:22; Mesa Doctrine and Covenants 9:13.

  12.  

    12. Mesa Kirel a Klisichir a Rengeasek (babier, 2011), 28–29.

  13.  

    13. Mesa Genesis 24.

  14.  

    14. Genesis 24:20.

  15.  

    15. Genesis 24:28.

  16.  

    16. Genesis 24:58.

  17.  

    17. Mesa 1 Nephi 3:7.

  18.  

    18. Genesis 24:60.

  19.  

    19. Mesa Doctrine and Covenants 88:40.

  20.  

    20. Genesis 24:64.

  21.  

    21. Genesis 24:67.

  22.  

    22. Mesa Doctrine and Covenants 84:88.