Ol Naesfala Moning

I Kam long Elda Brus D. Pota

Blong Olgeta Seventi


Brus D. Pota
Yumi no mas fraet long wanem bae i kam, o kam slak long hop mo glad hat blong yumi, from God i stap wetem yumi.

Long wan Tosdei naet long Jerusalem, Jisas mo olgeta Disaepol oli bin mit long rum antap blong selebretem Pasova. Tabu dei ia blong olgeta man Jiu. Ol man we oli joen wetem hem oli no save se, kaekae ia, bae wan dei oli singaotem Las Sapa. Sapos oli bin save hemia mo mining blong hem, bae oli krae.

Masta blong olgeta, ating, i andastanem gud se tes blong garen blong Getsemane mo Golgota bae i hapen i no longtaem. Ol aoa blong tudak long histri blong wol bae i hapen eni taem; Be Jisas i talem long olgeta: “Long wol ia bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ia finis.” (Jon 16:33)

Yumi stap laef tudei long wan taem blong trabol mo tu tingting, wan taem we Lod i talemaot long Inok blong oli makem olsem “ol taem blong nogud fasin mo fasin blong stap givimbak” (luk long Moses 7:60). Bigfala harem nogud mo hadtaem bae i stap long fored, yet yumi tu i gat samting blong stap glad mo glad oltaem long hem. Yumi stap laef long las dispensesen, taem God i putumbak Jos mo Kingdom blong Hem long wol ia blong mekem rere ol man from taem we bae pikinini blong Hem i kambak.

Presiden Boed K. Peka i bin tokbaot wan taem abaot apupikinini blong hem mo ol fasin nogud long taem we oli stap laef long hem naoia. Hem i talem: “Bae oli luk plante samting bae i hapen long taem blong laef blong olgeta naoia. Sam long olgeta samting ia bae oli traem winim strong tingting mo mekem fet i groap. Be sapos oli lukaotem wetem prea long hat blong olgeta blong kasem help mo daereksen, bae oli save kasem paoa ia blong winim ol samting we i kam long Setan.

Afta hem i talem moa: “Ol valiu blong gud fasin mo tingting we sosaeti i mas dipen long hem i stap go daon bigwan long bigfala spid. Be, mi no fraet long fiuja.” (“Do Not Fear,” Ensign o Liahona, Mei 2004, 77, 78).

Ol brata mo sista. Yumi no mas fraet long wanem bae i kam, o kam slak long hop mo glad hat blong yumi, from God i stap wetem yumi. Long olgeta fas toktok blong kaonsel we Jisas i talem long ol niu Disaepol blong hem long Galili i gat tu toktok nomo, “No fraet” (Luk 5:10). Hem i gohed blong talem kaonsel ia long taem blong seves blong Hem. Long olgeta Sent blong Hem long dei blong yumi, Sevya i talem long olgeta blong oli stap glad, mo oli no fraet, from we Hem, Lod, i stap wetem olgeta, mo bae Hem i stanap wetem olgeta (luk long D&C 68:6).

Lod bae i stanap long saed blong Jos blong Hem mo ol pipol blong Hem mo kipim olgeta oli sef kasem taem we bae Hem i kambak. Bae i gat pis long Saeon mo long ol stek blong hem, from Hem i bin talemaot se wok blong karem ol pipol oli kam wanples long graon blong Saeon, mo long ol stek blong hem, bae i blong oli save difendem olgeta, mo blong oli stap long wan sef ples long taem blong strong win, mo long taem blong bigfala nogud kros, hemia long taem we bae Hem i kapsaetem ful paoa blong Hem long ful wol (luk long D&C 115:6).

Jos i stanap olsem strong ples blong stap sef blong ol memba blong hem. Iven sapos ol samting long wol i stap kam nogud long semtaem, ol fetful Lata-dei Sent bae oli faenem sefti insaed long stek blong Saeon. Lod i talem tabu tok ia se, ston we oli katemaot long hil we wan han i no katemaot bae i fulumap wol (luk long Daniel 2:31–45; D&C 65:2). Mo i no gat wan man bae i save stopem. I no from paoa blong man mo ol samting we oli save mekem, from God nao i mekemaot wok ia, mo Jisas Kraes i jif konaston blong hem.

Profet Nifae i bin luk long wan visen se long ol las dei ia, bae paoa blong Smol Sipsip blong God bae i kam daon “long olgeta Sent mo long ol kavenan pipol blong Lod” mo bae oli “oli blokem olgeta wetem stret fasin mo paoa blong God long bigfala glori” (1 Nifae 14:14).

Evriwan long yumi, ol famle blong yumi, i save holem paoa blong God olsem wan protekta sapos bae yumi stap tru long Jos blong Jisas Kraes blong Ol Lata-dei Sent mo letem Spirit i gaed blong yumi. Ol jalenj bae oli kam, mo bae yumi save andastanem evri samting we i stap hapen long yumi mo raon long yumi. Be sapos yumi gat tingting we i stap daon, bae Hem i givim yumi paoa mo daereksen blong evri dei jalenj we yumi fesem. Taem yumi wantem nomo blong mekem Hem i glad, bae yumi kasem blesing wetem wan bigfala pis insaed long yumi.

Long taem we Jos i bin kambak, ol memba blong Jos i fesem ol rabis jalenj. Presiden Brigham Yang i tokbaot taem ia: “Taem ol man blong faet oli kam raon, wetem toktok blong kilim man i ded, mi no save be mi filim glad mo gud long spirit blong mi, olsem we mi filim naoia. Sakses i save no klia mo kam dak, be mi neva luk wan taem long gospel be wanem we mi save i ol risal blong hem bae i help blong olgeta trutok” (Teachings of Presidents of the Church: Brigham Young [1997], 357).

Misinari kompanion blong mi, Pol i bin wan man we oltaem i fulap long glad. Olsem wan yang papa, hem i gat problem blong kontrolem hemwan. Nomata long problem ia we i kam, hem i gohed blong givim seves long ol nara man wetem fasin blong stap glad. Wan taem hem i kam long ofis blong mi wetem wiljea blong hem mo talem, “!Laef i stat wetem wan moto wiljea!” Bae mi tingbaot hem oltaem, sam yia bifo hem i ded, hem i bin holem toj blong Olimpik i go antap long wiljea blong hem taem we handred man i stap singaot long hem. Olsem faea ia we i stap laet long toj ia, fet blong Pol i neva ded samtaem long taem blong strong win blong laef.

Taem mi wan studen long Brigham Yang Yunivesiti, mi stap laef long wan haos wetem sam yang man. Hemia we i slip long rum wetem mi, Brus, hem i wan top waes man we mi mitim long laef blong mi. Mifala i neva harem hem i talem eni samting we i no stret abaot eni man o eni samting, mo hem i had blong no filim wan samting taem yu stap wetem hem. Ol gud fasin blong hem i kam tru long tras long Sevya mo gospel.

Wan kolkol dei, wan nara fren blong mi, Tom, i stap wokbaot krosem graon blong yunivesiti. Hemia i 7 klok long moning, mo graon blong yunivesiti i no gat man mo i tudak. Plante sno i stap foldaon, wetem kolkol win. “Hemia i wan rabis weta,” Tom i stap talem hemwan. Hem i wokbaot i go moa, mo long tudak ia mo sno ia, hem i harem wan man i stap singsing.

Yes, tru long sno ia waes fren blong mifala i kam, Brus. Wetem ol han blong hem i go antap long skae, hem i stap singsing blong Brodwei miusik Oklahoma: “!O wan naes moning! !O, wan naes dei! Mi gat wan naes filing, evri samting i hapen long wei blong mi” (Richard Rodgers and Oscar Hammerstein II, “Oh, What a Beautiful Morning” [1943]).

Long ol yia olsem, naes voes we i kamaot long tudak i wan saen blong wanem fet mo hop i minim long mi. Iven long wan wol we i tudak, yumi ol Lata-dei Sent bae i singsing wetem glad, mo save se ol paoa blong heven i stap wetem Jos mo pipol blong God. Yumi save stap glad long save we wan naes moning i stap long fored—moning blong milenium dei ia, taem we Pikinini blong God bae i kam long Is mo rul long wol bakegen.

Mi tingbaot tu, tu nara naes moning long histri blong wol ia. Long eli moning blong 1820, long wan naes moning, blong wan klia dei long Palmaera, Niu Yok, wan yang man nem blong hem Josef Smit i go long wan smol bus mo nil daon blong prea. Ansa blong prea ia, i we Papa mo Pikinini i kamaot long hem, mo hemia i stat long dispensesen blong taem, blong evri wok blong God i kam tru mo kambak blong Jos blong Jisas Kraes long wol.

Bakegen wan nara naes moning i girap kolosap 2,000 yia i pas aotsaed long ol wol blong siti blong Jerusalem. San i saen gud long Ista moning ia. Wan smol grup blong ol woman oli kam blong visitim ples we oli haedem bodi blong Lod blong oli anoentem bodi blong Hem. Tu Enjel i mitim olgeta mo talem: “?From wanem yufala i stap lukaot man we i laef long ples blong ol ded man? Hem i no stap long ples ia, Hem i laef bakegen” (Luk 24:5–6).

Mi talemaot witness blong mi long win blong Jisas Kraes ova long sin mo ded,. Long plan blong sore blong Papa we i no save finis mo lav blong Hem we i no save finis, mi testifae. Taem yumi girap long ol moning, bae yumi lukluk i go long heven wetem fet mo talem: “O, wan naesfala moning.” Mi prea olsem long nem blong Jisas Kraes, amen.