Mo Le Filemu i le Aiga

O Le Korama a Aposetolo e Toasefululua


Richard G. Scott
O se tasi o faamanuiaga silisili e mafai ona tatou ofoina atu i le lalolagi, o le mana lea o se aiga e faatotonugalemu ia Keriso lea e aoaoina ai le talalelei, tausia ai feagaiga, ma ola lauusiusi ai le alofa.

O le anoanoai o leo mai le lalolagi o loo tatou ola ai, ua latou ta’u mai ia i tatou e tatau ona tatou ola saoasaoa. E tele isi mea e tatau ona fai ma isi foi mau mea ia ausia. Ae peitai, o loo i le taele o o tatou loto taitoatasi se manaomia ona i ai o se nofoaga o le sulufaiga lea e i ai le toafilemu ma le toafimalie, se nofoaga e mafai ona toe faatulaga, toe faavasega, ma toe maua ai le faasiliga malosi e saunia ai mo faafitauli i le lumanai.

O le nofoaga lelei lava mo lena toafilemu o totonu lava o puipui o o tatou lava fale, lea na tatou faia ai mea uma tatou te mafaia e faatotonugalemu ai le Alii o Iesu Keriso.

O nisi o aiga o loo i ai se tamā o se tagata agavaa ua umia le perisitua faatasi ai ma se tina faamaoni ma tuuto la te taitai faatasi i le amiotonu. O le tele o aiga e eseese ituaiga faatulagaga. E tusa lava po o a ou tulaga ae e mafai ona e faatotonugalemuina lou aiga ma lou olaga i le Alii o Iesu Keriso, aua o Ia o le puna o le filemu moni i lenei olaga.

Ia mautinoa o faaiuga uma e te faia, e tusa pe faaletino pe faaleagaga, e faavae i le mea e finagalo le Faaola e te faia. A avea o Ia ma totonugalemu o lou aiga, e i ai le filemu ma le toafimalie. E i ai se agaga o le faamautinoaga lea e siomia ai le aiga, ma e lagonaina e tagata uma e nonofo ai iina.

O le faataunuuga o lenei fautuaga e le faapea na o matua e pa’ū i ai, e ui o la laua matafaioi o le taitai. E mafai ona nafa le fanau ma le faaleleia atili o taumafaiga i totonu o le aiga ia taulai atu ia Keriso. E taua i matua ona aoao le fanau ia iloa auala e aafia ai tagata taitoatasi e nonofo i le aiga i a latou amioga. O fanau o e faia, ia latou lagona e faamasinoina i latou i a latou amioga, pe amiotonu pe leai, e tutupu ae ma avea ma tagatanuu tauaogaina i le malo o le Atua.

Ou te mautinoa e mafai ona e iloa mataupu faavae taua o loo faatotonugalemu ai le Faaola i lou aiga. O le fautuaga faaperofeta e fai tatalo faaletagata lava ia ma faaleaiga i aso uma, suesueina e le tagata lava ia ma faaleaiga o tusitusiga paia, ma afiafi faaleaiga faalevaiaso o laau faalalava taua ia e tauaveina le mamafa o le fausia o se fale e faatotonugalemu ia Keriso. A aunoa ma nei faiga masani o le a faigata ona maua le filemu lea e matuai naunau i ai ma manaomia e avea ma sulufaiga mai le lalolagi.

Ia usiusitai i aoaoga faaperofeta ua finagalo Keriso e te mulimuli ai. Aua le faataatiaesea le fiafia i le lumanai e ala i le uia o auala ‘alo nai lo le faaaogaina o mataupu faavae atoatoa o le talalelei. Manatua: o mea laiti e oo atu ai i mea tetele. O nai faatamala e foliga mai e laiti po o le le ano i ai, e mafai ona oo atu ai i faafitauli ogaoga. Ae e sili atu le taua, o mausa faigofie, faifai pea, ma lelei e oo atu ai i se olaga e tumu i faamanuiaga.

Outou le fanau i le Peraimeri, outou alii ma tamaitai talavou i polokalama a le autalavou, ma outou faifeautalai faamaoni o loo auauna i le taimi nei ua faia ni mea se tele i ni auala sili atu ona faamanuiaina nai lo mea sa mafai ona ou faia a’o ou matua pei o outou. I le muai olaga sa outou faamaonia ai lo outou totoa, usiusitai, ma mama. O iina, sa outou galulue malosi ai e atiina ae taleni ma tomai e saunia ai outou e feagai ma le lalolagi ma le lototetele, taua o le tagata lava ia, mamalu, ma le faamanuiaina.

E le’i mamao atu na outou o mai ai i le lalolagi nei ma na gafatia uma matagofie ma avanoa e le uma. Ae o loo i ai se tulaga lamatia moni i le siosiomaga ua siomia ai outou. O o outou gafatia ma tomai e mafai ona faatapulaaina pe faatamaiaina pe afai tou te gauai atu i mea leaga ua faaosofia e le tiapolo lea ua siomia ai outou. Ae peitai, o Satani e le taitai tutusa ma le Faaola. Ua uma ona iloa le iuga o Satani. Ua ia iloa ua toilalo o ia, ae o loo manao e faaleaga ni tagata se toatele na te mafaia. O le a taumafai o ia e faaleaga lou tagata lelei ma gafatia e ala i le faaaoga sese o ou vaivaiga. Tumau i le itu a le Alii, ma o le a e manumalo ai i taimi uma.

Ua outou i ai i se lalolagi ua matuai saoasaoa lava i mea faatekinolosi. E faigata i le toatele o la matou tupulaga ona tulituli atu ia taumua tutusa ma avanoa. E faalagolago i le auala e faaaoga ai tekinolosi, o nei atinaega e mafai ona avea ma se faamanuiaga po o se maagao. O le tekinolosi, pe a malamalama i ai ma faaaogaina mo faamoemoega amiotonu, e le tatau ona avea ma se mea taufaamatau ae o se faaleleia atili ai o fesootaiga faaleagaga.

Mo se faataitaiga, o le toatele o i tatou ua i ai ni masini patino faaeletonika lea e ofi i totonu o a tatou taga. E seāseā mamulu ese ma i tatou; e tele ni taimi o le aso tatou te fetagofi atu i ai. O le mea e leaga ai, o nei masini e mafai ona avea ma puna o mea eleelea ma faama’imau taimi. Ae, a pulea lelei le faaaogaina, o nei tekinolosi e mafai ona avea ma se meafaigaluega o le puipuiga mai mea e sili ona leaga e fai e tagata.

O ai na manatu i tausaga e le’i mamao atu o le a ofi i totonu o lau taga ia tusitusiga faavae uma ma savali o konafesi aoao ua autausagā? O le na o le tuu o ia mea i lau taga o le a le puipuia ai oe, ae o le suesue, mafaufau loloto, ma le faalogologo i ai i taimi paganoa i aso uma, o le a faaleleia atili ai fesootaiga e ala i le Agaga.

Ia atamai i le ala e te taulima ai tekinolosi. Faailoga mau taua i lau masini ma ia toe alu soo i ai e faitau. Afai e faitau soo e outou na tagata talavou ni mau i luga o lau masini e pei o le tele o taimi e auina atu ai e nisi o outou ia savali i tesi, o le a le umi ae outou taulotoina ni mau se fia selau. O na fuaitau o le a faamaonia le avea ma punavai malosi o musumusuga ma taitaiga a le Agaga Paia i taimi o faafitauli.

O le faia o mea uma tatou te mafaia e valaaulia ai le faatosinaga agamalu, taialaina a le Agaga Paia i totonu o o tatou olaga, e taua tele i a tatou taumafaiga e faatotonugalemu o tatou aiga i le Faaola. O le faia ma le usiusitai o na uunaiga e atili faamalolosia ai i tatou.

O le a oo atu ia te oe le filemu sili atu pe a fai faatasi au taumafaiga e usiusitai ma auauna atu ia i latou o siomiaina oe. E toatele naua tagata taitoatasi o e ua i ai le manatu e faapea e faaletalenia, e faaaogaina ma le lotomaualalo ma le agalelei na taleni e faamanuiaina ai olaga o ē e siomiaina i latou. O le manatu faapito o le pogai lea o le amioleaga tele. O le vaifofo i lena amioleaga, o loo faaalia manino mai lava i le soifuaga o le Faaola. Ua Ia faaalia mai le ala e taulai atu ai la tatou auaunaga i isi.

Ua ou aoaoina se upumoni ua faafia ona ta’ua soo i lo’u olaga ua ou iloa ai o se tulafono atoatoa lava. Ua faamatalaina ai le ala e fesootai ai le usiusitai ma le auauna atu i le mana o le Atua. A tatou usitai i poloaiga a le Alii ma auauna atu i Ana fanau ma le le manatu faapito, o le taunuuga masani lava o le mana mai le Atua: o le mana e fai ai mea e tele atu nai lo o mea e mafai ona tatou faia na o i tatou lava. O o tatou manatu, a tatou taleni, o tatou tomai o le a faalauteleina ona ua tatou maua le malosi ma le mana mai le Alii. O Lona mana o se vaega taua e faavae ai se aiga e tumu i le filemu.

A o e faatotonugalemuina lou aiga i le Faaola, o le a mautinoa lava le avea ma se sulufaiga e le gata i lou lava aiga ae faapena foi i uo o e e nonofo i tulaga e sili atu ona faigata. O le a latou tosina atu i le toafimalie latou te lagonaina iina. Ia talia ituaiga uo faapena i totonu o lou maota. O le a latou tutupu ae ma alualu i luma i totonu o lena siosiomaga e taulai atu ia Keriso. Ia faauo atu i uo a lau fanau. Ia avea oe ma faataitaiga agavaa mo i latou.

O se tasi o faamanuiaga silisili e mafai ona tatou ofoina atu i le lalolagi, o le mana lea o se aiga e faatotonugalemu ia Keriso lea e aoaoina ai le talalelei, tausia ai feagaiga, ma ola lauusiusi ai le alofa.

O ni tausaga ua mavae, ina ua mavae se asiasiga taamilo i se misiona, sa faamatala mai ai lo’u toalua o Jeanene, e uiga i se alii faifeautalai sa la feiloai. Sa fesili i ai Jeanene e uiga i lona aiga. Sa te’i o ia i lana tali mai e leai sona aiga. Sa ia faamatala atili mai e faapea, i lona fanau mai, sa ave o ia e lona tina i le malo e tausi ai. Sa ia faaaluina lona olaga tamaitiiti e alu atu ai i lea aiga ma lea aiga e tausi ai. Sa faamanuiaina o ia i lona talavou i le mauaina o le talalelei. Sa fesoasoani se aiga agalelei o le uarota ia te ia, ia ona maua le avanoa e auauna atu ai i se misiona.

Mulimuli ane, sa fesili atu ai Jeanene i le faletua o le peresitene o le misiona e uiga i lenei alii faifeautalai lelei. Sa ia iloa ai o ni nai masina ma muamua atu, sa i ai lea alii faifeautalai i le fale o le misiona ona o se gasegase. O le taimi lena sa latou faatasi ai ma ia mo se afiafi faaleaiga. A o le’i toe foi atu o ia i le eria e galue ai, sa ia talosaga atu i le peresitene o le misiona, pe mafai ona toe faaalu ni aso se lua pe tolu pe a uma lana misiona i totonu o le fale o le misiona. Sa manao o ia e matau le auala e faagaoioi ai se aiga e faatotonugalemu ia Keriso. Sa manao ia mafai ona ia mamanuina ai lona aiga e pei o lena aiga.

Ia fai mea uma tou te mafaia ia maua ai na o se aiga faapena. Aapa atu ia i latou o loo ola i tulaga faigata. Ia avea ma se uo moni. O lenei ituaiga o faauoga tumau e pei lava o le maata lea e faatutumu ai omoomo o le olaga ma faalauleleia ma manaia atili ai la tatou faigamalaga. E le tatau ona avea ma se punaoa e faaaoga e maua ai se manuia faaletagata lava ia ae o se oa ia talisapaia ma faasoa atu. Ia talia i totonu o lou aiga isi o e e manaomia ona faamalosiauina e se aafiaga faapena.

Ou te tuuina atu ni manatu faaiu mo i latou o e alolofa i se tagata o le aiga na te le o faia filifiliga lelei. O lena mea e mafai ona luitauina ai lo tatou onosai ma le faapalepale. E manaomia ona tatou faalagolago i le Alii ma i Lana taimi e mafai ona maua ai se tali lelei i a tatou talosaga ma taumafaiga laveai. Tatou te faia mea uma e mafai e auauna atu ai, e faamanuia ai, ma ia faailoa atu ma le usiusitai le finagalo o le Atua i mea uma. Tatou te faaaoga le faatuatua ae manatua e i ai nisi o mea e ao ona tuu pea i le Alii. Ua Ia valaaulia i tatou e lafo atu a tatou avega i lalo o Ona aao. Faatasi ai ma le faatuatua e mafai ai ona tatou iloa, o lenei tagata peleina ua se ese e le o tuulafoaia ae o loo i ai i le tausiga a se Faaola agaalofa.

Ia iloa le lelei o loo i isi, ae le o a latou mea sese. E i ai taimi e manaomia ai e se mea sese se vaaiga talafeagai ina ia faamamaina ai, ae ia taulai atu pea i ona uiga lelei.

Pe a e manatu e faapea ua na o se pitofilo lava le faamoemoe, o le mea moni e le o se pitofilo ae o se sooga tele lava, e pei o se puipui o le ola e faamalosia ma siitia oe. O le a tuuina mai le faamafanafanaga ina ia e le toe mata’u ai. Taumafai e ola agavaa ma tuu atu lou faatuatuaga i le Alii.

E le tatau ona tatou popole pe a le mafai ona tatou faia i le taimi lava lena ia mea uma ua fautuaina i tatou e le Alii e fai. Sa Ia fetalai foi e uiga i se vaitaimi ma se vaitau mo mea uma. I le tali mai i a tatou tatalo faamaoni mo le taitaiga, o le a Ia taiala ai i tatou i mea e tatau ona faamamafaina i vaega taitasi o o tatou olaga. E mafai ona tatou aoao, tuputupu ae, ma avea e faapei o Ia e ala i le laa mausali e tasi i le taimi.

E tuuina atu la’u molimau o le ola i se olaga usiusitai, ua mausali le mauaa i le talalelei a Iesu Keriso, e tuuina mai ai le faamautinoaga aupito sili mo le filemu ma le sulufaiga i totonu o o tatou aiga. O le a tele pea luitau po o lototiga e i ai, ae e tusa lava pe o le totonugalemu o faigata, e mafai ona tatou olioli i le filemu i le loto ma le fiafia loloto. Ou te molimau atu o le Togiola a Iesu Keriso o le punavai lea o lena filemu tele i le suafa o Iesu Keriso, amene.