Hemia Wok mo Glori blong Mi

I Kam long Elda M. Rasel Balad

Blong Kworom blong Olgeta Twelef Aposol


M. Rasel Balad
God i givim fri, paoa ia blong Hem long olgeta we oli akseptem mo stap ona long prishud blong Hem, we i lidim man long ol blesing blong promes we i blong man i nomo save ded mo i kasem laef we i no save finis.

Presiden Peka. Mifala i stap luk fored blong kasem namba 98 vesen blong naesfala poem ia. Hem i bin givim wan gudfala instraksen long yumi.

Sam wik i pas, long wan naet we i kolkol mo i tudak, waef blong mi, Babra mo mi i bin lukluk wetem sapraes i go long skae. Ol milian sta, oli saen gud mo oli naes. Nao mi openem buk blong Perel we I Gat Bigfala Praes mo ridim bakegen, wetem ae i bigwan, wanem we Lod, God i bin talem long Moses se Hem i bin krietem ol wol we i no gat namba blong hem; mo tu, Hem i bin krietem olgeta from stamba tingting blong Hemwan; mo Hem i bin krietem olgeta tru long Pikinini, we i Wan Stret Wan Ia Nomo blong Hem (luk long Moses 1:33).

Long taem blong yumi, bigfala Habol spaeglas i konfemem ol bigfala samting we Moses i bin luk. Folem ol man blong saens blong Habol, Longfala Sta Galaksi, we wol mo san i wan smol pat blong hem nomo, oli tekem se hem i wan aot long ol 200 bilian nara galaksi. Long mi, hem i had blong andastanem, i no posibol blong pikjarem, from se ol kriesen blong God oli bigbigwan tumas.

Ol brata mo sista. Paoa we tru long hem, oli bin krietem ol heven mo wol, hem i prishud. Olgeta long yumi we i memba blong Jos ia, i save se stamba blong prishud paoa ia, hem i God we i Gat Olgeta Paoa, mo Pikinini blong Hem, Jisas Kraes. Prishud i paoa we tru long hem, oli bin krietem ol heven mo wol ia, be tu, hem i paoa we Sevya i yusum long seves blong Hem long wol ia blong mekem ol merikel, blong blesem mo hilim ol sikman, blong mekem ol ded oli laef bakegen, mo, olsem Wan Stret Pikinini Ia Nomo blong Papa blong yumi, i stanap strong long ol strong soa blong Getsemane—olsem ia nao, Hem i bin mekem wanem ol loa blong jastis mo sore oli askem, mo i givim wan Atonmen we i bigwan tumas mo i winim ded blong bodi tru long Laef Bakegen long Ded.

Oli ol ki blong prishud atoriti ia, mo paoa we i kamaot long hem, we Lod i givim long Pita, Jemes, mo Jon mo ol nara Aposol blong Hem blong blesem ol narawan mo blong joenem long heven wanem we oli joenem long wol.

Paoa blong prishud i tabu mo i stamba presen we i kam long God. Hem i defren long prishud atoriti, we i raet blong mekem samting long nem blong God. Raet o odinens ia, wan i kasem tru long fasin blong putum han antap long hed blong man. Paoa blong prishud i kam nomo taem olgeta we oli yusum, oli klin inaf mo oli mekem samting folem tingting blong God. Olsem we Presiden Spensa W. Kimbol i talem: “Lod i givim long yumi evriwan, ol man we i kasem prishud, wan atoriti, be yumi save yusum ol paoa blong heven nomo folem hamas yumi laef long stret mo gud fasin” (luk long “Boys Need Heroes Close By,” Ensign, May 1976, 45).

Long taem blong ol gudfala dei blong Restoresen mo taem oli stanemap bakegen Jos blong Jisas Kraes long wol tedei, Jon Baptaes, Pita, Jemes, mo Jon, Moses, Elaeas, mo Ilaeja oli bin kam long wol mo putumbak, tru long Profet Josef Smit, evri ki mo atoriti blong prishud blong mekem wok blong God long ol las dei ia.

Hem i tru long ol ki ia, atoriti ia mo paoa ia we Jos blong Jisas Kraes i oganaes tedei, wetem Kraes i stap long hed, mo wan profet we i laef i sapotem, we i Tomas S. Monson, mo i gat help tru long ol Aposol we oli singaotem mo odenem.

Insaed long plan blong Papa blong yumi long Heven we i givim prishud paoa long man, ol man oli gat stret responsabiliti ia blong wok wetem prishud, be oli no prishud ia. Ol man mo woman oli gat defren be ikwol wok. Semmak olsem wan woman i no save krietem pikinini sapos i no gat wan man, nao semmak, wan man i no save yusum fulwan paoa blong prishud blong stanemap wan famle we i no save finis, sapos hem i no gat wan woman. Long nara toktok, long lukluk we i no save finis, tugeta, paoa ia blong krietem laef, mo prishud paoa, wan hasban mo wan waef tufala nao i serem. Olsem wan hasban mo wan waef, wan man mo wan woman i mas traehad blong folem Papa blong yumi long Heven. Ol Kristin klin fasin blong lav, tingting i stap daon, mo wet longtaem, oli mas kam faswan taem oli stap lukaotem ol blesing blong prishud long laef blong olgeta mo blong famle blong olgeta.

Hem i impoten tumas blong yumi andastanem se Papa long Heven i givim wan wei blong evriwan long ol boe mo gel blong Hem blong save kasem ol blesing blong paoa ia, mo kam strong moa tru long paoa ia blong prishud. Long medel blong plan blong God long ol spirit pikinini blong Hem, long toktok blong Hem, Hem i talem se hemia i wok mo glori blong mi—blong mekem man i nomo save ded mo i kasem laef we i no save finis (luk long Moses 1:39).

Long revelesen we Lod i givim long Profet Josef Smit, long seksen 81, ves 5 blong Doktrin mo Ol Kavenan, Lod i eksplenem se paoa blong prishud, i blong yusum blong givhan long olgeta we oli no strong, leftemap ol han we oli hang i kamdaon, mo mekem ol ni we oli no strong oli kam strong moa (luk longves 5).

Mo taem yumi mekem olgeta samting ia, bambae yumi mekem wan bigfala gud samting long ol narafala man, mo bambae yumi leftemap glori blong Hem we i Lod blong yumi (D&C 81:4).

Taem yumi stap tingting long pikja ia blong givhan long olgeta we oli no strong, leftemap han we i hang i kamdaon, mo mekem ol ni we oli no strong oli kam strong moa, mi stap tingting long wan swit seven yia pikinini we i stap soem long bubuman blong hem, wan smol tomato plant we hem i planem sid blong hem, olsem pat blong klas 2 projek blong hem.

Hem i eksplenem se aot long wan smol sid, bae wan bigfala plant i kamaot. Mo sapos plant ia, yumi lukaot gud long hem, bae i givim fulap tomato we i gat plante moa sid insaed long olgeta.

Smol gel ia i talem: “Mo sapos oli planem evri sid ia, mo moa tomato oli gro, mo yu planem evriwan long ol sid ia bakegen, long sam taem afta, bae yu gat plante milian tomato.”

Evriwan ia,” hem i talem wetem sapraes, “aot long wan smol sid.”

Be afta, hem i talem, “Kolosap mi kilim plant blong mi. Mi livim i stap long wan rum we i tudak, mo fogetem blong wotarem. Taem mi tingbaot plant ia, i benben olbaot evriwan mo i olsem se i ded. Mi krae from se mi tingbaot evriwan long ol milian tomato ia we bae oli neva gro.”

Hem i bin glad tumas blong talem long bubuman blong hem long merikel we i bin hapen.

Hem i eksplenem: “Mama i talem se ating plant ia i no ded. Ating i nidim smol wota mo sam laet blong mekem i laef bakegen.

Mo hem i talem tru. Mi putum wota long plant mo putum i go long windo blong kasem laet. Mo ?save wanem? hem i askem. “!I kambak long laef, mo naoia bae i givim milian tomato!

Smol tomato plant blong hem, we i gat fulap paoa yet blong kasem, i no strong mo i benben from man i mestem mo no lukaot, mo afta, i kam strong moa bakegen mo i laef tru long smol givhan blong wota mo laet tru long han blong wan gel we i gat lav mo kea.

Ol brata mo sista—olsem ol stret spirit pikinini blong Papa blong yumi long Heven—yumi gat paoa we i tabu mo i no gat limit. Sapos yumi no lukaot gud, yumi save kam olsem tomato ia we i benben. Yumi save go longwe long tru doktrin mo tru gospel blong Kraes mo no kasem kaekae long saed blong spirit mo kam benben, taem yumi aotem yumiwan long tabu laet mo ol wota blong laef blong lav we i no save finis blong Sevya mo prishud paoa.

Olgeta we oli kasem prishud mo oli no gohed oltaem blong traehad blong ona long hem tru long fasin blong givim seves long famle mo ol narawan, bae oli olsem olgeta we oli no kasem ol blesing we i kam wetem paoa blong prishud, mo bae oli go benben long saed blong spirit, from se oli blokem olgetawan long ol stamba kaekae blong spirit, laet mo paoa blong God long laef blong olgeta—semmak olsem tomato plant ia wetem fulap paoa we i save kasem, be oli no lukaotem hem mo i go benben.

Semfala prishud paoa ia we i bin krietem ol wol, ol galaksi, mo yunives, i save mo i mas pat blong laef blong yumi blong givhan, mekem strong, mo blesem ol famle, ol fren, mo ol neiba blong yumi—long nara toktok, blong mekem ol samting we Sevya bae i mekem sapos Hem i stap givim seves long medel blong yumi tedei.

Mo fas stamba tingting blong prishud paoa ia, i blong blesem, mekem yumi kam tabu, mo mekem yumi kam klin blong mekem se yumi save laef tugeta wetem ol famle blong yumi wetem ol papa mo mama blong yumi long heven, we prishud siling i joenem yumi, mo blong yumi tekpat long bigfala wok blong God mo Jisas Kraes blong oltaem, mo stap mekem laet mo glori blong Tufala i go moa.

From samting ia, sam manis i pas, mi gat janis blong tekpat blong mekem wan vidio blong 2013 wol lidasip trening we oli singaotem Mekem Famle mo Jos I Kam Strong Moa tru long Prishud.

Niu mo gudfala DVD ia, oli transletem long 66 lanwis. Hem i tijim olsem wanem paoa blong prishud i save blesem, givim paoa, mo givim niu paoa long laef blong yumi, laef blong ol famle, mo laef blong evri memba blong Jos.

Hem i soem yumi evriwan—ol man, ol woman, ol pikinini; olgeta we oli mared, wido, o singgel; nomata wanem situesen blong yumi—olsem wanem yumi save tekempat long ol blesing blong prishud. I gat defren 8 o 12 minit vidio we i eksplenem ol ki, atoriti, mo paoa blong prishud mo olsem wanem i mekem wanwan man mo woman, ol famle, mo Jos i kam strong moa.

Wan spesel pat oli tekem long wan smol paeonia hom blong bigfala bubuwoman blong mama blong mi, Meri Filding Smit. Hem i wido blong Haeram, bigfala brata blong Profet Josef. Olsem wan singgel mama, tru long strong fet blong hem long prishud, hem i askem mo dipen long paoa ia blong lukaotem mo blesem ol pikinini blong hem wetem lav mo laet blong gospel. Tedei, laen blong hem we i gat taosen fetful lida mo memba blong Jos oli talem tangkyu long hem from fet, strong paoa long tingting mo eksampol blong hem.

Niufala lidasip trening ia i stap naoia long intanet long LDS.org, blong evriwan i save luk mo gat eksperiens long hem. Yumi save luk laef tu long LDS. Org, o yu save daonlodem long kompiuta blong yu, smatfon, o dijitol pad.

Fas Presidensi i askem “ol stek presidensi, mo ol bisoprik blong putum wan o moa long wan stek o wod kaonsel miting blong luk ful DVD ia. Ol stek mo wod kaonsel oli sapos blong toktok raon long wei blong yusum ol tijing we oli stap presentem” (leta blong Fas Presidensi, 1 Feb. 2013).

Wanem i stap insaed, bae i givim insperesen mo i pusum ol memba long ol prishud kworom, ol Rilif Sosaeti, Sandei Skul, Yang Man mo Yang Woman (speseli olgeta we oli stap rere blong go long misin), mo long Praemeri miting, o long kombaen nambafaef Sandei miting. Ol memba blong kaonsel bae oli save leftemap tingting blong wanwan man, woman mo paren blong yusum presentesen ia wetem ol famle blong olgeta. Ol brata mo sista, lidasip trening ia i blong evri memba blong Jos. Ol papa mo mama, luklukbak, serem mo toktok raon long wanem yufala i bin lanem mo filim wetem ol pikinini blong yufala mo letem olgeta oli lukluk mo mekem semfala samting wetem yufala, blong mekem se ol famle oli save kam strong moa tru long prishud.

Jisas i bin talem:

“Man we i tosta, i gud hem i kam long mi blong i dring” (Jon 7:37).

“Be man we i dring wota ya we mi bambae mi givim long hem, bambae hem i no save tosta bakegen samtaem. Wota ya we mi bambae mi givim long hem i save kam olsem wan springwota we i save ron oltaem insaed long hem, blong givim laef ya long hem we i no save finis” (Jon 4:14).

“Mi nao, mi olsem laet blong ol man long wol. Man we i biaen long mi, … hem bambae i gat laet blong laef” (Jon 8:12).

Sapos eniwan long yufala i filim se fet o testemoni blong yufala i daon bitim wanem yu save se i sapos blong stap, nao tanem yu moa long Sevya. Letem laet blong Hem mo wota ia blong laef blong Hem i mekem long yu mo famle blong yu, wanem we smol wota mo laet i bin mekem blong mekem tomato plant we i benben i laef bakegen.

Nao mi bin stat blong tokbaot ol sapraes wok long ol kriesen blong God tru long paoa blong Prishud. Mi stanap ia, mi stap tingting, olsem we plante long yufala i mekem, blong stap askem miwan sapos paoa blong God blong givim instraksen mo blong blesem yumi, bae yumi andastanem fulwan o no. Hem i bigwan tumas, i hae, i gat paoa tumas.

Josef Smit i bin talem: “Prishud i wan prinsipol we i no gat en, mo i bin stap wetem God longlongtaem finis, mo bae i stap blong taem we i no save finis, we i no gat stat blong dei mo en blong yia blong hem” (Teachings of Presidents of the Church: Joseph Smith [2007], 104).

God i givim fri, paoa ia blong Hem long olgeta we oli akseptem mo stap ona long prishud blong Hem, we i lidim man long ol blesing blong promes we i blong man i nomo save ded mo i kasem laef we i no save finis.

Mi testifae se wok blong Jisas Kraes i hapen tru long prishud. Hem i paoa, we tru long hem, Papa blong yumi long Heven mo Pikinini blong Hem we Hem i Lavem i krietem wol ia mo i mekem bigfala plan blong hapines i stat, blong gud blong yumi. Bae yumi waes mo bae yumi lukaot blong mekem laef blong yumiwan, laef blong ol famle blong yumi mo Jos blong Jisas Kraes blong Ol Lata-dei Sent i kam strong moa tru long paoa blong prishud blong God; mi prea olsem wetem tingting we i stap daon, long nem blong Jisas Kraes, amen.