Kasem Taem Yumi Mit Bakegen

I Kam long Presiden Tomas S. Monson


Tomas S. Monson
Mi prea se Lod bae i blesem mo kipim yufala, ol brata mo sista blong mi. Bae promes pis blong Hem i stap wetem yufala, naoia mo olwe.

Ol brata mo sista blong mi. Hem i wan gudfala konfrens we yumi bin gat ia. Mi save se yufala i agri wetem mi, se ol mesej ia oli givim insperesen. I tajem hat blong yumi, mo testemoni blong yumi long saed blong tabu wok ia i kam strong moa taem yumi bin filim Spirit blong Lod. Bae yumi tingbaot wanem yumi bin harem long tufala dei ia blong longtaem. Mi askem strong long yufala blong stadi moa long ol mesej ia taem bae oli printim olgeta long magasin blong Ensign mo Liahona.

Mifala i talem tangkyu long wanwan long yufala we i bin givim toktok, mo tu, long yufala we i givim prea. Antap long hemia, miusik i leftemap tingting mo givim insperesen. Mifala i lavem naes Tabenakol Kwaea mo talem tangkyu long evri narawan we i bin givim miusik tu.

Mifala i joen blong talem tangkyu long olgeta presidensi mo bod blong jeneral Yang Woman we oli bin rilis yestedei. Seves blong olgeta i bin gud tumas mo strong tingting blong olgeta i fulwan.

Yumi bin sastenem, taem yumi leftemap han, ol brata mo ol sista we oli bin singaotem olgeta long ol niu posisen long taem blong konfrens ia. Yumi wantem evriwan blong save se yumi stap lukluk fored blong wok wetem olgeta long wok blong Masta.

Yumi wan Jos we i stap raon long wol, ol brata mo sista. Membasip blong yumi, i stap raon long wol ia. Mi askem strong long yufala blong stap ol gud sitisen blong ol nesen we yufala i stap long hem mo stap ol gud neiba long ol komuniti blong yufala, mo go aot long olgeta blong nara fet, mo tu, long jos blong yumi. Bae yumi gat gud fasin, mo stap kaen mo gat lav, long olgeta we oli serem ol semfala bilif mo standet blong yumi. Sevya i tekem long wol ia, wan mesej blong lav mo gud tingting long evri man mo woman. Bae yumi folem eksampol blong Hem oltaem.

Mi prea se bae yumi luksave ol nid blong olgeta raon long yumi. I gat sam, speseli ol yangfala, we oli stap fulwan insaed long drag, fasin nogud long saed blong seks, ponografi mo sam moa bakegen. I gat olgeta we oli stap olgetawan, wetem olgeta wido mo man wido, we oli wantem tumas blong man i tekem kea long olgeta. Bae yumi rere oltaem, blong stretem han blong help mo givim wan hat blong lav.

Yumi stap long wan taem blong histri blong wol we i gat plante had jalenj, be tu, ol bigfala janis mo risen blong stap glad. Yes, i gat ol taem ia taem yumi fesem harem nogud, hat i soa, mo ol nogud taem long laef blong yumi. Be, sapos yumi putum tras blong yumi long Lod, bae Hem i helpem yumi tru long ol hadtaem blong yumi, nomata wanem hadtaem. Man we i raetem Ol Sam i talem gud: “Bae yu krae blong wan ful naet, be glad i stap kam long moning.”1

Ol brata mo sista. Mi wantem yufala i save se mi talem tangkyu tumas from gospel blong Jisas Kraes, we i kambak long ol las dei ia tru long Profet Josef Smit. Hem i olsem ki blong hapines blong yumi. Bae yumi gat tingting i stap daon mo stap prea, mo gat fet se Papa blong yumi long Heven bae i lidim mo blesem yumi long laef blong yumi.

Mi talem witnes mo testemoni blong mi se God i stap laef, se Hem i stap harem ol prea blong hat we i stap daon. Pikinini blong Hem, Sevya mo Ridima blong yumi, i toktok long wanwan long yumi: “Yufala i luk. Mi stap stanap long doa, mi stap kilkilim doa, Sipos wan man i harem tok blong mi, i openem doa, bae mi kam insaed, mi kakae wetem hem.”2 Bae yumi bilivim ol toktok ia mo tekem ful janis blong promes ia.

Taem konfrens ia i stap finis, mi askem ol blesing blong heven blong stap wetem wanwan long yufala. Bae hom blong yufala i fulap wetem pis, gud taem, gud fasin mo lav. Bae oli fulap wetem Spirit blong Lod. Bae yu fidim mo fidim gud ol testemoni blong yumi long saed blong gospel, blong oli stap olsem wan proteksen agensem ol nogud fasin blong Setan.

Kasem taem yumi mit bakegen long sikis manis taem, mi prea se Lod bae i blesem mo kipim yufala, ol brata mo sista blong mi. Bae promes pis blong Hem i stap wetem yufala, naoia mo olwe. Tangkyu from ol prea blong yufala from mi mo evri Jeneral Atoriti. Mifala i glad tumas long yufala. Long nem blong Sevya mo Ridima blong yumi, we yumi stap givim seves long hem, amen.