Chedaol Basio er Kau

Mlara Ann M. Dibb

Ongeru el Counselor er a Cherrengelel Omerreder er a Young Women


Ann M. Dibb
A [chedaol basio er kau] a diak el iior er a kmo ngulterekokl el basio malechub eng taem, ng kma osisiu el di chedaol e klou a klisichel.

A kerbai er kid er a Mutual er chelecha el 2013 a mengai er a bades el ngara okai me a euid el bliongel er a Doctrine and Covenants. Tia el tekoi a debetik er ngii er a ikakid el kldei el bliongel: el bleketakl el klou a belkul.Ng smodii el kmo ng mekra dengai a ulekerreu, klisiich, me a budech er chelecha el meringel el taem. A chedaol tekoi er ngii a “mo dechor er a chedaol basio, e diak de mesim.”1

Sel kulbedebek er tial kerbai, e ak melbedebek el kmo, “Ngera ‘chedaol basio’ el Chedam er a Babeluades a mesaod er ngii?” A President Ezra Taft Benson a milellach, “A chedaol basio a uldimukl a templo er kid, ikelesia, rekeblid, me a stakes er a Zion, el ngii … ‘a omekerreu, e mesebechakl.’”2 Ongingil tiang, ea kuumera el kmo ng sebeched el muut el metik a bebil er a basio. Eng di, a basioa sebechel “kuk ngodech el teletael, blekeradel, malechub e ngara uldasu.”3 Tia belkul a kmo a basio a uldimukl a taem—taem el Chedaol Reng a mengedecheduch er kid, taem el domelchesuar a beltikelreng er a Chedam er a Babeluades, malechub eng taem el dengai a nger er a nglunguched. E dirrek, a kuumera el kmo ngii di el taem el meisiich a rengum el dechor el kirel a llemalt, oumesingd aikel teletael el ngii a diak a chad el sebechel mekerang, e kau a dirrek el dechor er a chedaol basio.

Chelsel a kedeb eng di ng klebokel el klengar er a Joseph Smith, eng mera el “[dilechor] er a chedaol basio” e dimlak el mesim. Sera le ngeasek, eng mlo rrau a rengul kirel a ultok er a klechelid er a beluu e mle soal mo medengei el kmo ngera er a ikal ikelesia a mle klemerang. Sel oreomel el mle kmeed er a blil a mlo chedaol basio er ngii er a bo loutubaruach er a delul a kerrekar e lodersii a kot el nglunguchel. A nglunguchel a mlo nger, me a chelecha el sils e a Ruriul-klebesei el Santo a omes er tial Basio el Chedaol.

Ngeasek el redil er a beluulechad a dechor er a chedaol basio, er a camp er a re Young Women. A oungerachel er a re Young Women a ulechais er a teletael el dilubech el mora tara ngeasek el dil. Ngika el dil a dimlak el sal mesisiich er a ikelesia, e mle telkib loumededenger el kirel a kora chedaol teletael. Uriul er a kot el sils, e nguluchais el mora oungerachel er ngii, “Ng kmal ungil a renguk, eng di ng sebechel diak dosaod el kirel a kora Chedaol tekoi? Ngak a ngar tia el camp, el mesarch er tial basio, e teloi er a resechelik, e milil!” Eng di, a mocha ulebongel, e ng mlarngii a olchotel a klaumerang e ngika el osisiu el dil a longelang e ouchisang, “Ng diak el soak el mo remei. Ak mekerang e di omelchesiu er tial kumelchesiu er ngii er chelechang, tial Chedaol Reng, lobengkek er a bek el taem?” Ng mla metik er a chedaol basio.

A tara chedaol basio er a klengar er a Joseph Smith a dilubech er a delmerab er ngii. Tia locha meringel a bo doumera er ngii, le ng uaia rebetok er kemiu, e nguluchais er tial teletael el mora rebebil er ngii. Ng mlo chedaol basio er sera loluluuch loba mesisiich el klaumerang me a ngariou el reng el sal lousbech. Ng millekoi el kmo uriul er a lorael el mo mechiuaiu er sel kesus, eng mocha meluluuch lolengit er a olab a Klisiich el Dios el kirel a klausubes er a rokui el kngtil me a telmellel.”4 Edei el rak ruriul er a lenguu sel kot el ues a Joseph er a Chedaol Basio a dimlak el beot er ngii. A teruich me a euid a rekil el Joseph a mlora ringel er a otuub, omelenguul, me a omecheracheb. Eng di tiaikid el kesus er a chelsel a delmerab er ngii, ea anghel Moroni a dilum el uaia ble le nger er a ongtil. A Joseph a ngilai a llomes, me a ongelaod. Tial delmerab er ngii, a mlo chedaol basio er ngii er sel kesus.

Sera kumes er a video er a Mormon Message el mora Rengeasek. Ak milsa tara delmerab el mlo chedaol basio. Tial video olecholt el kirel a Ingrid Delgado, el ngeasek el dil er a El Salvador, louchais el kirel a templo. Ng kmo, Ngungil el ngarngii a basio el sebeched el mo er ngii el cheroid er a tekoi er a beluuelchad e ngmai a chedaol ruoll e dirrek el ngosuterir tirkel dimlak el sebechir el ngmai er tial klengar.” Tia er a longedecheduch, e tial video olecholt er a Ingrid el menguiu chedaol llechukl, el iiliuekl er a Mormonads, mekedeb llechukl el tekoi, babier er a Personal Progress, siasing er a telungalek er ngii me a templo, e uldimukl, er a ikel soal omotzia el charm.5 Meng locha diak lotebengar, eng di ngii a mla kudmeklii a chedaol basio el cheroid er a teletael er tial beluuelchad. Ak melatk el k mo ng locha tela el taem el Ingrid a mla menguiu a bades er a chedaol llechukl, melchesuar Chedaol Reng, e ngmai a nger er a nglunguchel er a chelsel tial chedaol basio.

A dirrek el mle tara chedaol basio er a klengar er a Joseph Smith a sera le ngara Liberty Jail. Elder Jeffrey R. Holland a millekoi, “Ng dimlak a ngodech el meringel el berraod er a klengar er a Joseph Smith er tiaikid el mekngit, diak loltirakl a llach, me a diak el melemalt el kellebus.” A Elder Holland a millemolem el melekoi el kmo a Liberty Jail a lulemes er ngii el a uaia el “templo er a blil a kelebus” le ikel chedaol teletael el Joseph Smith a ngilai er ngii.6

A rebebil er kemiu a rengeasek el dil locha seluk er a chelsel a Liberty Jail, el basio el mchelebangel otuub, basio el momelchesiu el diak omekerreu, basio el ngarngii a romtelub, omecheracheb, omekringel, malechub ete melemall er kemiu. Me kemiu el ngeasek el redil, msall e kdung a tekingel a Elder Holland: “Ng sebechiu el mo ngara chelsel chedaol, blil ocholt, me a osisechakl lobengkel a Rubak er a chelsel aikel kot el meringel el taem er a klengar …, sel moutekangel aikel kot el meringel el mekngit el blekeradel, sel bom chau aikel chachisois el olibesongel el kau a mla obangel.”7Ng belkul a kmo, ng di uaia Profet Joseph Smith, engsebechiuel kudmeklii a chedaol basio e dechor er a chelsel, luldimukl aikel meringel el taem kemiu a mo ngara chelsel.

A ngeasek el klou el redil, el Kirsten, a ulechais er ngak er a meringel el teletael erngii. A high skuul a uaia blel Liberty Jail er ngii. Ngeltengat, ele blil omengitakl a silbecheklii. Ng dilu el kmo: “Sera ksiseb er a chelsel tial delmerab, eng uaia bla ksiseb er a chelsel a selbechakl el basio. Ng diak a omtelub me a otuub el tekoi el krenges, diak a sius. Ak bai, remenges a tekoi er a beltikelreng me a omelisiich. Aki mle bekokeuii. Ng mle ungil basio. Tial delmerab er a chelitakl a mle mui Chedaol Reng er ngii sel ki mosuub a chelitakl. Tial delmerab a mle uaisei el blekerdelel olisechakl chelitakl a uchul. Ng mle ungil Kristiano el chad. Chelecha e sel kumes er ngii, ea high skuul a uaia lullisiich er ngak. Ng mle meringel, eng di ak milsuub el mo mesisiich. Ak di mereng a saul el kirel tial selbechakl, el chedaol basio er ngak, el delmerab er a chelitakl.”8

Chelecha el kesus e kom mla omdasu el kirel a chedaol basio er kemiu? Ak mla olengit er a rebetok el ngeasek el dil me louchais el kirel a chedaol basio er tir. Meng diak el iior er a kmo aika meral basio malechub eng di taem, ng kmal di chedaol e kmal ngarngii a klisichel. Aikakid a kltiu el tekingir:

  1. Kot: “Ak mlara ospitar, el kluokou er a kekerei dirk mlechell el ochedak.”
  2. Ongerung: “Bek el taem e ak menguiu er a patriarchal blessing er ngak, ea kumelchesiu er a Demak er a Babeluades el medengelkak e betik a rengul er ngak.”
  3. Ongedei: “Sera bol teruich me a eru rekik, ea rengeasek el redil er a ward a milsichii a delmerab er ngak lolab a llechukl el chaidireng.9 Ak mlo omelchesiu er a beltikelreng, kengei, e ungil a renguk!”
  4. Ongeuang: “A tara kunguiu er a chedaol llechukl, ea bades a ‘siliseb er a uldesuek.’ Ak mla metik er a nger er a nglunguchek.”
  5. Ongeim: “Ak mlora omilil el rechad a millim a rrom e meruul a diak lungil lomeruul. A Chedaol Reng a dilu er ngak me kubult e kurael el mo remei. Me ak mirrael, e uaisei, el mlo er ngii a telmellel ruriul. Eng di, tial teletael a milskak a klisichel a renguk el medengei el kmo ng sebechek el oltirakl er a ebangkelio.”
  6. Ongelolem: “A tara temel a sacrament, eak ulemdasu el kirel a Tngakireng. Ak mlo medengei el kmo ng kirek el ousubes er a chad el mle kesib a renguk er ngii. Tial omelilt er ngak el mo ousubes a mle ungil omeruul el uchul ea Tngakireng a mo oureor er a klengar ngak.”
  7. Ongeuid: “Uriul er a ki bo merek el ngara New Beginnings ngak me a delak, eng tirrengur otengek e kmu er ngak el kmo ng betik a rengul er ngak. Tia ketengek el mesa el uaisei.”
  8. Ongeai: “Ngultuil er a tekingel a bisop er ngak, eak mlo medengei el kmo a yaksok er a chedaol llechukl a klemerang: ‘A kngtim el kmal mo bekerkard, a mo bechelelu el uaia yuki.’10 Ak mlo medengei el kmo ng sebechek lomuchel el ouchel a renguk er a kngtik.”
  9. Ulebongel: “A tara kesus, eng mlo sebechek el louchais aikel kumelchesiu el kirel a ebangkelio me a Babier er a Mormon lobengkel a kmal sechelik. Ea uriul, e ak mlora techolbechelid er ngii. Chelecha ea ki dmak el ngara Ikelesia.”

Msall a kuchais er kemiu a tara chedaol basio er ngak? A tara, taem, ea kulmelchesiu loberaod, medakt, e uaia kcheloit. Ak mocha chelellakl, e meluluuch: “Chedam er a Babeluades, ng diak kudengei el kmo ak mekerang. A kulengit, a kulengit, me mngesukak!” Di mle telkib, ea chad a mle duum er ngak, e loia chimal er ongelngelek, e milskak a ongelaod, me a mesisiich el tekoi. Tiaikid, e ak mlo melchesuar a budech. Ak mlo omelchesiu el ngarngii a medengelkak. A rokui el tekoi a mlengodech. A tekingel a President Spencer W. Kimball a mlei er a uldesuek: “A Dios a medengelkid, e ngii omes er kid. Eng ding blechoel lultuil er a tara chad e kede ngmai a ngeso er ngii.”11 A dengu er ngak, e tial taem, er tial basio a mlo chedaol.

Kemiu el ngeasek el redil, ng kmal betook a chedaol basio el kuureng el ulekum eng sebeched el kauchais. Sel bom rei er chelechal kesus, ea kulengit er kemiu me mulches aika er a journal er kemiu aikel basio el kemiu e mtab e dobedebek. Ng bleketakl er ngak el kmo a retelalel er kemiua dechor er a chedaol basio. Aika el basio a meskemiu a ulekerreu, klisiich, me a budech er a chelsel a meringel el taem. A klaumera er kemiu a meleketek ele kemiu el dechor el kirel a klemerang me a llemalt er a klebokelel teletael.

Kemiu, el chetengakl el ngeasek er a Ikelesia, a smiich a renguk er kemiu. Ng betik a renguk er kemiu. Ak melchesuar a beltikelreng er a Chedam er a Babeluades el kiriru ea kuuchais er kemiu er a klaumera er ngak el kmo a ebangkelio er a Jesus Kristo a klemerang. Ngii a mengiil er kemiu, el kldmokl el mo mesebechakl er kemiu “bom dechor … er a chedaol basio, e lak ko mesim.” Ng betik a renguk e oldubech er a President Thomas S. Monson, el merang e mesisiich el profet er kid. Aika el tekoi a kdung el ngarra ngklel a Jesus Kristo, amen.

Mosiik a Osisiu

  1.  

    1. Mesa Doctrine and Covenants 87:8; dirrek el mesa Mesa Doctrine and Covenants 45:32; 101:22.

  2.  

    2. Ezra Taft Benson, “Prepare Yourself for the Great Day of the Lord,” New Era, May 1982, 50; dirrek el mesa Mesa Doctrine and Covenants 115:6.

  3.  

    3. Merriam-Webster Online, “place,” merriam-webster.com/dictionary/place.

  4.  

    4. Joseph Smith—History 1:29.

  5.  

    5. Mesa “Practice, Celebration, Dedication: Temple Blessings er a El Salvador,” lds.org/youth/video.

  6.  

    6. Jeffrey R. Holland, “Lessons from Liberty Jail,” Ensign, Sept. 2009, 26, 28.

  7.  

    7. Jeffrey R. Holland, “Lessons from Liberty Jail,” 28.

  8.  

    8. Cheldecheduch lobengkel a milluches.

  9.  

    9. Bebil er a taem er a Beluu er a Merikel ete kmo “heart attack.”

  10.  

    10. Isaia 1:18.

  11.  

    11. Spencer W. Kimball, “The Abundant Life,” Ensign, July 1978, 4;Tambuli, June 1979, 3.