Fahsruh, Wi kuht

Sel President Dieter F. Uchtdorf

Mwet in Kahsruh Ahkluo ke Prestuhnsi Se Met


Dieter F. Uchtdorf
Finne fuhkah ohiyacn moul lowos an, ma mahtuh ke moul lowos an sifacna, kuh kuhiyacn fahkwack luhlahlfongi lowos an, oasr na acn suwos ke Alu se inge.

Sie pacl ah oasr sie mukul suc mwemwekihn muh el oasr lun infuckihl luhlahp se suc oasr alu nohfohn luhn facluh tuhkweni. El akihlen muh ke kais sie alu uh oasr ma yohk kac ma luhman kenayuck ac sacohk.

El ohsun nuh sin sie siacnyacn suc ahol Alu luhn Jisus Kraist luhn Mwet Luhlahlfongi ke Lwen-sahflah ac el siyuck, “Meac se kowos sapkihn sin mempucr lowos an?”

Kuht tiacna sapkihn kuhtwena ma,” elos topuk. “Tuh Leum El siyuck kuht in ahkmuhtahlye ma nuh kwewa.”

Siacnyacn sac kalweni in ahkuhtweyac ke kunohkohn pahngonyuck luhn Alu uh, forfor luti ac luti in sucu, misin ke pacl nuh kwewa, ekuh in toeni luhn sucu kais sie wik, orekma ke tempuhl, kuhlwacnsap ke mwet enenuh, ac kunohkohn pahngonyuck in luti.

“Kuh kowos moli mwet lowos an ke orekma nuh kwewa elos oruh uh?” mukul sac siyuck.

“We, moh,” siacnyacn sac ahkuhtweyac. “Elos sang pacl lalos ke tiac moul.”

“Oacyacpac,” siacnyacn sac kalweni, “mahlwem onkohsr nuh kwewa mempucr ke Alu lasr eis sie kapihn wik in wi kuh liye ao 10 ke toeni luhlahp uh.”

“Ao singucul ke mwet orek sramsram?” mukul sac siyuck ke suhlahlahlfongi.

“Kuh fuhkah toeni ke kais sie wik luhn alu lowos an?” Lusac kac?”

“Ao tolu, kais sie Sacnri!”

“Kuh sel kuhtuh,” mukul sac fahk. “Kuh mempucr ke alu lowos an pwacye na oruh ma kom fahk uh?”

“Ma ingacn ac kuhtuh pac. Kuht soenna sruhmuhn ke sramsram mahtuh ke sucu, tuhkweni luhn mwet fuhsr, sramsram ke alu, lutlut ke ma suhmuhslah, ahkpah luhn mwet kol, ma pwacr luhn mwet fuhsr, kuhlahs luhn mwet fuhsr ke lututwacng, karihngihnyacn lohm Alu, ac ahok oasr masap luhn Leum ke karihngihn mahno, lalo mahlwem nuh kwewa in kahsruh mwet suhkahsruhp, ac sie tahfuh singucul.”

Mukul sac fahk, “Ingena nga fohsack. Kuh efuh kuhtwena mwet kena in wi kain alu sacn?”

Siacnyacn sac isrwacsr ac fahk, “Kuht pahngon muh kom ac tiac siyuck.”

Kuh Efuh Kuhtwena Mwet Ke Welah Kain Alu Sacn?

Ke pacl ma puhkantwen alu inmahsrlon facluh puhlakihn suhpucsweni luhn mwet, Alu luhn Jisus Kraist luhn Mwet Luhlahlfongi ke Lwen-sahflah—finne srihklac liki alu sahyac—pa sie ke alu fin facluh ma pihsrpihsr emet ke kapkapwack uh. Ke Septempuh 2013 Alu uh sun yohk likina mempucr miliacn 15 fin facluh nohfohn.

Oasr srihpac puhkantwen ke ma inge, tuh nga kuh in sang kuhtuh na?

Alu luhn Mwet Lahngo

Ma se met, Alu se inge fohlohkihnyuckyak ke lwen lasr sel Jisus Kraist Sifacna. Inge kom fah konwacack wal in orekma ke Innel—pacptais ke elah luhn ma koluk, sang mwe sang luhn Nguhn Muhtahl, ac in sili fin facluh ac inkuhsrao.1

Elos suc wi Alu se inge luhngse Mwet Lahngo Jisus Kraist ac elos kena fahsr Tohkohl. Elos engankihn etwacack lah God El sifilpac sramsram nuh sin mwet uh. Ke elos eis akwuck muhtahl luhn pristut ac orwaclah olwelah yurin God, elos kuh in puhla kuh Lal ke moul lalos an.2 Ke elos utyak nuh in tempuhl muhtahl, elos akihlen muh elos oasr ye muhtahl. Ke elos riti ma suhmuhslah muhtahl3 ac moulkihn mwe luti luhn mwet pahluh Lal, elos fototoi nuh sin Mwet Lahngo suc elos luhngse yohk.

Sie Luhlahlfongi Fokoko

Sie pac srihpac pa ke srihpen Alu sac sang pacl wowo in oruh ma wo.

Luhlahlfongi ke God kaksakihnyuck, tuhsruhktuh inkaiyacn mwet uh ke oruh yohk likina lohacng nuh ke sramsram mokleyuck kuh mwemwekihn tohkohsrahi lalos lucng.4 Elos ke sang luhlahlfongi lalos nuh in orekmakihnyuck. Elos ke luhmuhnwack poun wes lalos uh ac pwacye na wi ke orekma na luhlahp se inge.

Ac pa ingacn ma sikyak ke elos wi kuht—oasr pacl wowo pucspucs lalos in ahkpahyelah talan lalos, kuhlwacng lalos, ac pacl lalos nuh ke orekma wowo. Ke srihpen wacngihn mwet orekma ke alu lasr moliyuck inmahsrlon u luhn alu lasr fin facluh nohfohn, mempucr lasr sifacnna oruh orekma luhn kuhlwacnsap. Elos pahngonyuck ke pihrihkyuck luhn Nguhn. Kuhtuh pacl uh kuht sifacna sang kahsruh; kuhtuh pacl uh kuht “pahngonyuck” in sang kahsruh. Kuht liye ma kunacsr tiac oacna ke ma toasr uh tuh oacna pacl wowo in ahkfalye ma olwelah kuht engan in orwaclah in kuhlwacnsapuh God ac tuhlihk Nahtuhl.

Mwe Insewowo Sacohklacna

Srihpac se ahktolu efuh mwet uh wi Alu sac pa ke srihpen fahsrkihn inkacnek luhn mwet tuhma lutlut kol nuh ke mwe insewowo sacohk.

Kuht liye pacptais in oacna muhtwacwacackiyacn fuhfahsryucsr lasr ke ohiyacn mwet tuhma lutlut. Fahsr ke lwen nuh kwewa lasr yurin Jisus Kraist kol nuh ke mihslac ac srihpac ke moul se inge ac engan yohklacna ac molwelah ma pahtpaht ke facl se fahsruh uh.

Elos suc ukwe inkacnek se inge ke luhlahlfongi kahingkihn ma puhkantwen ke ma sensen, mwe ahsor, ac mwe sruhngwacyuck ke moul uh.

Elos suc suhkahsruhp ke nguhn ac suc pwacye ke insiyac konwacack ma kahsruhp yohk ke etwacack inge.

Elos suc kweok kuh ahsor konwacack ahkkweye inge.

Elos suc toasrkihn ma koluk konwacack nuhnak muhnahs, sukohsohk, ac monglac.

Nuh Selos Suc Fahsr Liki

Suk ke ma pwacye uh kol mwet million nuh ke Alu luhn Jisus Kraist luhn Mwet Luhlahlfongi ke Lwen-sahflah. Tuhsruhktuh, oasr kuhtuh mwet suc fahsr liki Alu se ma elos luhngse met ah.

Sie kuh in siyuck, “Fin wosasuc uh arulacna wo na pwacye, kuh efuh kuhtwena mwet kena fahsr liki?”

Kuhtuh pacl uh kuht nuhnkuh ma sikyak ke srihpen elos puhlakihn ma koluk sin mwet uh kuh alsracngwesr kuh orek ma koluk. Tuh pwacyena, tiacna fihsrwacsr ohingacn. Ma na pwacye, tiacna srihpac sefanna ma fal nuh ke kain in ma sikyak puhkantwen uh.

Kuhtuh ke mempucr sacohk lasr upackihn ke yac puhs ke kihsen siyuck se fin elos enenuh in srwacloslac sifacna liki Alu uh.

Ke Alu se inge suc ahkfuhlwactye yohk ke sukohsohk in sifacna sulaclah ma tuh fohlohkihnyuckyak sin mukul fuhsr se suc siyuck kihsensiyuck ac suc suk ke top, kuht ahkfuhlwactye elos suc pwacyena in suk ke ma pwacye. Ac kuh in ahkmuhnahsyelah insiyacsr ke fuhfahsryucsr lalos usacloslac liki Alu uh suc kuht luhngse ac liki ma pwacye uh ma kuht konwacack, tuh kuht ahkfuhlwactye sukohsohk lalos in kaksakihn God Fuhlwactlacna fal nuh ke ma elos nuhnkuh muh pwacye, oacna ke kuht pahngohn sukohsohk wo se ingacn in ma lasr pac.5

Kihsen Siyuck Soenna Toplac

Kuhtuh upackihn kihsen siyuck sonna toplac ke ma suc oreklac tari kuh fwacklac ke pacl somlah. Kuht pwacyena akihlen lah ke apkuhran in sun yac 200 ke ma mahtuh luhn Alu uh—wi na tahk tiacna tui ke ma sikyak mokleyuck, ahkfuhlwactyeyuck, ac ahkmuhtahlyeyuck—oasr kuhtuh ma fwacklac ac oreklac ma kuh in oruh mwet uh in kihsen siyuck.

Kuhtuh pacl uh sramtweack kihsen siyuck ke srihpac fihsrwacsr se ma wacngihn mwe ahkuhtweyac nohfohn yohrohsr ac kuht tuh enenuh kihtin pac muhtweng. Ke ma pwacye nohfohn etweyucklac uh, ma ma tiacna ahkkahlwemyeyuck nuh sesr met ah fah ahksuwohsyeyuck nuh ke luhngse lasr.

Kuhtuh pacl uh oasr ma siena ke nuhnak ke meac kalmeac pwacye luhn “ma na pwacye” uh. Kihsen siyuck ma oraclah suhmuhngnguh ke kuhtuh mwet uh kuh in, tukun lutlut lihksreni, ahkkweye luhlahlfongi ke mwet sahyac uh.

Tahfonglac luhn Mwet Sesuwohs

Ac, in fahk arulacna suwohs, oasr pacl ke mempucr kuh mwet kol ke Alu uh pwacyena tahfonglac. Ac tuh sahp oasr ma fwacklac kuh oreklac ma tiacna fal nuh ke luhlahlfongi lasr, ip yohk srihpac lasr, kuh mwe luti lasr.

Nga nuhnkuh muh Alu uh ac oacna suwohswohs finne muhkwena ahkfahsryeyuck sin mwet suwohswohs. God El suwohswohs, ac mwe luti Lal nwacsnwacs na pwacye. Tuh El orekma kacsr—tuhlihk sesuwohs Nahtuhl—ac mwet sesuwohs orwaclah tahfonglac uh.

Ke sra soko oasr ke sifacn Puk luhn Mormon kuht riti lah fin oasr ma koluk kac pa ma koluk luhn mwet oruh kuht enenuh in tiac ahkkolukye ma luhn God, tuh kuht in kuh in sukokyak nwacsnwacs ke siac in nuhnuhnkuh luhn Kraist.6

Pa inge ohiyacn ma sikyak ah ac ohiyacn ma ac fah sikyak nwe ke lwen suwohswohs sac ke Kraist fah Sifacna kol facluh.

Koluk ohiyac lah kuhtuh tikuclkucl ke srihpen tahfonglac luhn mwet. Tuh finne ohinge, ma pwacye ma pahtpaht ke wosasuc fohlohkihnyuckyak sukokyak ke Alu luhn Jisus Kraist luhn Mwet Luhlahlfongi ke Lwen-sahflah tiacna ahkfohkfohkyeyucklac, ahksrihkyeyucklac, kuh kuhnausyucklac.

Ke in sie Mwet Sap luhn Leum Jisus Kraist ac sie suc sifacna liye toeni ac orekma ke Alu se inge, nga lohoh ke puhsisacl lah wacngihn sulwaclah ke ma yohk srihpac oruh Alu se inge kuh mempucr kac uh tuh tiacna suleyucklac sahyacn suk na pwacye ke mokleyuck, kolyuck, ac luhngseyuck luhn Pahpah Ma Pahtpaht tuhmwacsr. Pa inge Alu luhn Jisus Kraist. God El fah tiac lwelah Alu Lal in forlah liki inkacnek srisrilac kuh tiac ahkfahsryelah in ahkfalye orekma muhtahl kac uh.

Oasr Acn Nuh Suwos

Nuh selos suc srwacloselihk sifacna liki Alu uh, nga fahk, mwet kawuck sacohk luhk, srwackna oasr acn suwos inge.

Fahsruh ac sang talan lowos, mwe sang lowos, ac kuhiwos in ahkyohkye ma lasr. Kuht nuh kwewa fah ahkwoyeyuck kac.

Kuhtuh kuh in siyuck, “Tuh meac ke tahfuhluo luhk uh?”

Wona in oasr kihsen siyuck—fihtac srihsrihk ke kihsen siyuck pwacye uh inkaiyacn pacl ahkkahlwemyeyuck ac kapkapwack nuh ke sahk na yohk soko ke kahlwem. Oasr kuhtuh na mempucr ke Alu uh suc, ke sie pacl ah, tiac upackihn kihsen siyuck yohk kuh sacohk nuh selos sifacna. Sie srihpac luhn Alu uh pa in ahkkweye ac ahkyohkye fihtac ke luhlahlfongi—finne ke fohk suhfal luhn suhmuhngnguh ac nuhnak suhfal. Luhlahlfongi pa in finsrak ke ma ma tiacna liyeyuck tuh ma pwacye.7

Ohinge, tamuhlwel ac tahmtahel sacohk wiyuck—kawuck sacohk luhk—nuhnak muhnahs, ma se met tahfuh luo ke suhmuhngnguh lowos mwet liki kowos tahfuh luo ke luhlahlfongi lowos.8 Kuht tiacna ke kuhtwena ma lwelah suhmuhngnguh in kaprikuhti in oacna mwet kaclpous ac eiskuhtlac liki luhngse kuhlwacna, mihs, ac mwe sang ma tuhkuh ke luhlahlfongi ke Leum Jisus Kraist.

Kuhtuh kuh in siyuck, “Nga tuh tiacna fal oacna kowos mwet ke Alu uh.

Kom fin kuh in liye insiyacsr, kom fah sahp konwacack ma kom oacna fal liki ma kom nuhnkuh uh. Kom fah sahp lut in konwacack ma oasr ma kenayuck ac ma upac ac ma finsrak oacna ma lowos an. Moul met lowos kuh kapkapwack lowos an kuh in luhman siena liki ma kom nuhnkuh ke puhs Mwet Luhlahlfongi ke Lwen Sahflah, tuh ma ingacn kuh in oacna sie mwe insewowo. Tamuhlwel ac tahmtahel, mwet kawuck sacohk, kuht enenuh talan askuhlacna lowos sifacna an ac nuhnak lowos sifacna an. Ma siena liki ke mwet ac u luhn mwet fin facluh nohfohn pa sie mwe ahkkuh ke Alu se inge.

Kuhtuh kuh in siyuck, “Nga nuhnkuh tuh nga tiac kuh in moulkihn luhlahlfongi lowos an.

Srihpac yohk na in fahsruh! Alu uh oreklac in ahkkweye mwet sesuwohswohs, mwet suc tikuclkucl, ac mwet ullac na pwacye. El sesseslah ke mwet suc desire ke insiyaclos nohfohn in liyacacng masap uh, finne elos sonna wo na pwacye ke liyacacng uh.

Kuhtuh kuh in siyuck, “Nga etuh sie mempucr ke Alu lowos an suc mwet wosounkahs. Nga tiacna ke welah sie alu ma oasr kain mwet kac uh.

Kom fin ahkuhtweyac mwet wosonkahs in oacna mwet se suc tiac ahkfahsryelah in moul suwohswohs nuh ke ma el luhlahlfongi, na kuht nuh kwewa mwet wosonkahs. Wacngihn sesr pwacye na oacna Kraist oacna ke kuht etuh muh kuht enenuh. Tuh kuht kena na pwacye in kuhtanglah tahfonglac lasr ac ohiyac sac in orek ma koluk. Ke insiyacsr ac nguhnasr kuht suk in eklac wo liki met ah ke kahsruh ke Iwaclah luhn Jisus Kraist.

Fin ma inge oacna kena lowos, na sahyacn na moul lowos, kuh ma mahtuh sifacna ke moul lowos, kuh kuhiyacn fahkack luhlahlfongi lowos an, oasr na acn suwos ke Alu se inge.

Fahsruh, wi kuht!

Sahyacn na ma sesuwohswohs luhn atacsr ke moul kawihl nga luhlahlfongi pwacye lah kom fah konwacack inmahsrlon mempucr ke Alu se inge puhs sin nguhna wo emet ma oasr fin facluh se inge. Alu luhn Jisus Kraist kwacna orwacni mwet kuhlwacng yohk insiyac la, mwet pwacye ac mwet tiac alsruhngwacsr ke orekma.

Kom fin nuhnkuh in konwacack mwet suwohswohs inge, kom fah suhpwacrlac. Tuh kom fin suk ke mwet luti suhwohs na pwacye luhn Kraist, kahs luhn God ma ahkwoyelah nguhna kineta uh9 ac puhla ahkmuhtahlyeyuck luhn Nguhn Muhtahl, na inge kom fah konwaclosyak. Ke pacl inge luhn luhlahlfongi srihkweni—ke pacl inge muh puhs mwet puhla loeslac liki luhngse luhn inkuhsrao—inge kom fah konwacack mwet suc kena etuh ac fototoi nuh sin Mwet Lahngo lalos ke elos kuhlwacnsapuh God ac mwet ngiac, oacna kom. Fahsruh, wi kuht!

Yac Kowos Luhngse Pac Som?

Nga ahkacsmakihnyeyuck ke pacl se in moul luhn Mwet Lahngo ke puhs mwet fahsr luhkwel. 10 Jisus El siyuck sin mwet tuhma lutlut singucul luo Lal ah:

“Yac kowos luhngse pac som?

“Na Simon Peter el topuk, Leum, kuht ac som nuh yurin suc? kahs ma use moul ma pahtpaht oasr yurum.”11

Oasr pacl ma kuht enenuh in topuk oacna. Yac kowos luhngse pac som? Kuh kuht fah, oacna Peter, lihksreni sruok kahs ma use moul ma pahtpaht?

Kom fin suk ke ma pwacye, oasr srihpac, ac ke inkacnek se in ekuhlah luhlahlfongi nuh ke orekma; kom fin suk ke acn in luhngseyuck kom: Fahsruh, wi kuht!

Kom fin srolah liki luhlahlfongi se ma kom wi na met: Sifilpac fohlohkuh. Fahsruh, wi kuht!

Fin srihfeyuck kom in fuhlwelah: Muhta na kihtin pacl paht. Oasr acn suwos inge.

Nga kwacfe siyuck sin mwet nuh kwewa suc lohng kuh riti kahs inge: Fahsruh, wi kuht. Sruhkwack sahkseng lowos ac fahsr Tohkohl.12

Fahsruh, wi kuht! Tuh inge kom fah konwacack ma se ma sacohk likina molo.

Nga fahkwack lah inge kom fah konwacack kahs ma use moul ma pahtpaht, olwelah se ke molwelah insewowoyuck, ac inkacnek nuh ke mihslac ac engan.

Nga lihksreni pruhe tuh suk ke ma pwacye lowos sifacna an fah moklweack insiyowos kena sac in fahsruh ac wi kuht. Ke ine muhtahl luhn Jisus Kraist, amen.

Mostrar referencias

  1.  

    1. Liye Matthew 16:18–19; Helaman 10:7.

  2.  

    2. Liye Doctrine and Covenants 84:20.

  3.  

    3. Liye 2 Nephi 33:10.

  4.  

    4. Liye “Have I Done Any Good?” Hymns, no. 223.

  5.  

    5. Liye Ip Yohk ke Luhlahlfongi 1:11.

  6.  

    6. Sifen puk ke Puk luhn Mormon; liye Mormon 8:17.

  7.  

    7. Liye Hebrews 11:1; Alma 32:21.

  8.  

    8. Liye F. F. Bosworth, Christ the Healer (1924), 23.

  9.  

    9. Liye Jacob 2:8.

  10.  

    10. Liye John 6:66.

  11.  

    11. John 6:67–68.

  12.  

    12. Liye Matthew 16:24.