Sulaclah nuh ke Ma Pahtpaht

Sel Elder Russell M. Nelson

Ke U luhn Mwet Sap Singucul Luo ah


Russell M. Nelson
Lahlmwetmwet in orekmakihn sukohsohk lom in orwaclah sulaclah lom sifacna uh yohk srihpac nuh ke kapkapwack in nguhn lom, inge ac nuh tok ma pahtpaht.

Tamuhlwel ac tahmtahel sacohk wiyuck, kais sie lwen pa sie lwen ma kuht enenuh in orwaclah sulaclah uh. Prestuhn Thomas S. Monson el luti kuht lah “sulaclah uh orwaclah fuhfahsryucsr tok uh.”1 Lahlmwetmwet in orekmakihn sukohsohk lom in orwaclah sulaclah lom sifacna uh pa yohk srihpac nuh ke kapkapwack luhn nguhn lom, ingena ac nuh tok ma pahtpaht. Kom tiacna fuhsrlaclac in lutlut, tiacna mahtuhlac in eklac. Kena lom in lutlut ac eklac tuhkuh ke sie ma utuckoht wolacna kena nuh ke orwaclah wo ma pahtpaht.2 Kais sie lwen use pacl wowo nuh ke sulaclah nuh tok ma pahtpaht.

Kuht mwet nuh tok ma pahtpaht—tuhlihk nguhn nuhtin pahpah ninac inkuhsrao. Pwacpuhl uh suhmsuhlah lah “God El orwaclah mwet uh ke luhmahl sifacna, … El orwaclah mukul ac muhtwacn.”3 Pacl fototo tari ah nga lohng soko kohres luhn tuhlihk uh onkihn soko on wolacna “Nga Tuhlihk Nuhtin God.”4 Nga motko, “Efuh nga soenna lohng on soko ah in kwacna onkihnyuck sin ninac ac pahpah yohk luhlahlfongi uh?” Yac kuht tiac nohfohntuhlihk nuhtin God? Ke ma pwacye uh, wacngihn sesr kuh in tuiin sie tuhlihk nuhtin God!

Oacna tuhlihk nuhtin God, kuht enenuh in luhngse El ke insiacsr ac nguhnasr nohfohn, finne in yohk likina pahpah ninac kiacsr facluh uh.5 Kuht enenuh in luhngse mwet tuhlan lasr oacna tamuhlwel ac tahmtahel. Wacngihn masap sahyac ma yohk liki ma inge.6 Ac kuht enenuh in ahkfuhlwactye pacl nuh kwewa yohk srihpaciyen moul in mwet uh, ke kais sie luhn puhlan pacl puhkantwen la uh.

Ma suhmuhslah uh luti lah mahno ac nguhn pa nguhnin mwet uh.7 Ke kowos oreklac ke ip luo uh, kais sie suwos kuh in kuloh nuh sin God ke mwe sang yohk molo Lal nuh ke monuwos ac nguhnuwos.

Monun Mwet uh

Yac in professional luhk oacna sie taktuh in ono use nuh sihk sie ahkfuhlwact na loal nuh ke monun mwet uh. Oreklac sin God oacna sie mwe sang nuh suwos, arulacna usrnguck! Nuhnkuh ke ahtron muhta lom ma liye, insroac ma lohng, ac kufun paho ma puhla ma wolacna nuh kwewa raunikomlac uh. Brain lowos an lwelah kowos in lutlut, nuhnkuh, ac ahkuhtweyac. Heart lowos an tiac ullac in pam ke lwen ac fong, apkuhran na kom in tiac akihlen.8

Monuwos sifacna karuhnganwacng. Ngal uh tuhkuh oacna sie mwe ahksensenkihn lah sie ma tiac wo ac enenuh lohacng. Fahsrwelihk luhn mas uh sikyak pacl nuh ke pacl, ac ke ac sikyak uh, antibodies uh oreklac ma ahkyohkye lainyac nuh ke fahsrwelihk tok uh.

Monuwos sifacna ahkwoye. Kihnet ac futun uh wolac. Sri kaptwelihk uh kuh in sifil fokokoi. Nga fahk muhkwena sie srihkasrak srihsrihk ke ohiyac usrnguck pucspucs utuckuh sin God ke monuwos.

Finne ohingacn, oacna in sucu nuh kwewa, fin tiac mwet nuh kwewa, kuhtuh ohiyac ke mahno uh oasr ma enenuh karihngihnyuck siena.9 Sie pactuhn nuh ke usyacn kain ma upac sacn utuckuh sin Leum. El fahk lah El sang nuh sin mwet uh mwe muhnahs tuh elos in puhsisacl; … ac elos fin ahkpuhsisaclyaclos sifacna … ac eis luhlahlfongi in El, na El fah orwaclah mwe muhnahs uh fokoko nuh selos.”10

Nguhn wolacna uh kwacna nein mahno suhfas uh.11 Mwe sang ke kain mahno inge kuh in ahkfokokoye sie sucu ke pahpah ninac ac sucu uh ac kena ekuhllah moul lalos uh in karihngihn tuhlihk se ma isuslac ke mwe enenuh yohk srihpac ingacn.

Ohiyac ke mahtohoh uh pa sie pac mwe sang sin God, ac oacyacpac misac. Misac ke mahno in ikoac lowos an yohk srihpac nuh ke plwacn in engan luhlahp se luhn God.12 Efuh? Ke srihpen misac fah lwelah nguhnuwos in fohlohk nuh lohm ah nuh Yohrohl.13 Ke sie ngwetngwet loal ma pahtpaht, misac uh salaclac muhkwena nuh sin mwet suc tiacna ahkolah in ohsun nuh sin God.

Ke monuwos el sie ip na yohk srihpac nuh ke plwacn ma pahtpaht luhn God, tiacna mwe lut lah Mwet Sap Paul el ahkuhtweyac oacna sie “tempuhl luhn God.”14 Kais sie pacl kom ngwetwacng nuh ke selnguhn ah, liye monuwos oacna tempuhl lowos. Ma pwacye se ingacn—sifil ahksasucyeyucklac ke tarilacna kais sie lwen—kuh in mokle sulaclah lowos an ke ohiyac kowos fah karihngihn monuwos ac ohiyac in orekmakihn uh. Ac sulaclah ingacn fah nuhnkwaclah fuhfahsryucsr lowos an. Ma inge kuh fuhkah? Ke srihpen monuwos pa tempuhl luhn nguhnuwos. Ac ohiyac ma kowos orekmakihn monuwos ac sikyak nuh ke nguhnuwos. Kuhtuh sin sulaclah ma fah nuhnkwaclah fuhfahsryucsr ma pahtpaht lowos uh pa:

  1. Kom fah sulaclah in karihngihn ac orekmakihn monum fuhkah?
  2. Elah ke nguhnguhn fuhkah kom fah sulaclah in ahkyohkye uh?

Nguhn luhn Mwet uh

Nguhnuwos pa sie atac ma pahtpaht. Leum El fahk nuh sin mwet pahluh Lal Abraham lah el suleyucklac met liki el isuslac.”15 Leum El fahk sie ma oacna kacl Jeremiah16 ac mwet puhs sahyac.17 El fahk pac keim.18

Pahpah tomomwos Inkuhsrao El etwekowos ke pacl loeloes. Kowos, oacna tuhlihk mukul kuh muhtwacn Nahtuhl, suleyucklac Sel in tuhkuh nuh facluh ke pacl fal se inge, in sie mwet kol ke orekma yohk Lal fin facluh.19 Kowos suleyucklac tiac nuh ke ohiyacn monuwos tuhsruhk nuh ke elah nguhnguhn lowos an, ma oacna puhlaik, kuh, suwohs luhn insiowos, sie kena ke ma pwacye, sie kena ke lahlmwetmwet, ac sie kena in kuhlwacnsapuh mwet sahyac uh.

Kowos ahkyohkye kuhtuh sin elah inge ke moul se met ah. Kuhtuh kowos kuh in ahkyohkye inge fin facluh20 ke kowos kalweni in suk uh.21

Sie elah ke nguhn yohk srihpac pa in sifacna kol—kuh in orwaclah sulaclah nuhnak sahyen kena uh. In sifacna kol muhsahelah sie nuhnak wo fokoko. Ac nuhnak wo lowos an nuhnkwaclah top ke mahno lowos uh ke ohiyac upac, srihfeyuck, ac srihke uh. Lalo uh kahsruh nguhnuwos in ahkyohkye kuhtanglah ke kena luhn monuwos. Lalo oacyacpac ahkyohkye lwelah lowos nuh ke kahsruh luhn inkuhsrao, ke srihpen el ahkfokokoye pruhe lowos uh. Efuh kuht enenuh in sifacna kol? God El fihliyac insiacsr kena fokoko nuh ke ahkkweyeyuck ac luhngse, yohk srihpac nuh sin mwet uh in kalweni in oasr inge.22 Ke kuht kol kena lasr uh ke luhpah ke masap luhn God uh, kuht kuh in engankihn moul loeloes, luhngse yohk, ac engan suwohswohs.23

Tiacna ma lut se, met, lah inkaiyen mwe sruhf in tuhlac liki plwacn in engan luhn God tuhkuh ke orekma suhfal ke ma yohk srihpac ingacn, kena utuckuh sin God. Karihngihn kena lasr uh el tiacna fihsrwacsr pacl nuh kwewa. Tiac sie sesr oruh ma ingacn suwohs.24 Ma suhfal uh sikyak. Ma tahfonglac uh sikyak. Ma koluk uh oreklac. Na meac kuht ac oruh? Kuht kuh in lotwelah kaclos. Ac kuht kuh in auliyak na pwacye.25

Kuht kuh in ekuhllah elah lasr uh. Finne kena lasr uh kuh in eklac. Fuhkah? Oasr inkacnek sefanna. Eklac pwacye—eklac na pwacye nwe tok—kuh in tuhkuh muhkwena ke onweyucklac, nwacsnwacslah, ac kuh tuhkuh ke Iwaclah luhn Jisus Kraist.26 El luhngse kowos—kais sie suwos!27 El lwelah kowos in eis kuh Lal ke kowos liyacacng masap Lal uh, ke rahrah, ke yohk srihpac, ac ke suwohsiyac. Ma inge fihsrwacsr ac pwacye ohingacn. Wosasuc luhn Jisus Kraist pa sie wosasuc ke eklac!28

Nguhn fokoko luhn mwet se suc kol mwe luhngse luhn ikoac el sie mwet kol ke nuhnak ac kena ac tiac mwet kohs nuh kac. Kain sukohsohk inge yohk srihpac nuh ke nguhn oacna oxygen nuh ke mahno! In sukohsohk liki kohs nuh ke kena lasr sifacna uh pa sukohsohk pwacye uh!29

Kuht sukohsohk in sulaclah sukohsohk ac moul ma pahtpaht kuh in sulaclah srohuh ac misac.”30 Ke kuht sulaclah inkacnek fuhlwact uh nuh ke sukohsohk ac moul ma pahtpaht, mahruht el oasr pac ke inkacnek soko ingacn.31 Mwet Luhlahlfongi ke Lwen-sahflah uh fahkwack muh “macruht inmahsrlon sie mukul ac sie muhtwacn ma ahkkweyeyucklac sin God ac tuh sucu uh pa yohk srihpac ke plwacn luhn El suc orwaclah nuh ke moul nwe tok luhn tuhlihk Nahtuhl uh.” Kuht etuh pac lah “sie mwet el kuh in mukul se kuh muhtwacn se ma el eis ke moul se el muhta we met liki el tuhkuh nuh facluh ah, ac moul se inge ac moul nwe tok ma pahtpaht.”32

Macruht inmahsrlon sie mukul ac sie muhtwacn uh ma enenweyuck nuh ke mwe luti luhn Leum ac arulacna yohk srihpac nuh ke plwacn ma pahtpaht luhn God. Macruht inmahsrlon sie mukul ac sie muhtwacn pa pactuhn luhn God nuh ke sie moul fohn fin facluh ac inkuhsrao. Pactuhn ke pahyuck luhn God tiac kuh in ahkkolukyeyuck, tahfnglac, kuh koluk. 33 Kom fin tiac ke engan na pwacye. Pactuhn luhn God nuh ke macruht uh karihngihn kuh muhtahl se ke orwaclah tuhlihk ac engan luhn kuhpahsr fototo pwacye luhn sie macruht.34 Kuht etuh lah Adam ac Eve elos tuh macruhtlac sin God met liki elos puhlakihn mwe engan ke tuhkweni luhn mukul ac muhtwacn pahyuck uh.35

Ke pacl lasr uh, government oasr sie kena la sifacna in karihngihn pahyuck uh ke srihpen sucu fokoko uh orwaclah inkacnek wo emet in sang ono, lutlut, kahsruh, ac orwaclah wo luhn fihl fahsruh uh.36 Tuhsruhk government uh mokle upaclaclac ke usyac sin mwet uh ac etwacack luhn facluh ke elos sihmihs, sifilpac sihmihs, ac pahtok ke kohs masap uh. Macnsis na ma masap uh kuh in orwaclah, mwe luti luhn Leum weacng pahyuck ac moul suwohs tiacna kuh in eklac.37 Esam: ma koluk, finne lwelahkihnyuck sin mwet uh, srwackna ma koluk ye muhtuhn God!

Ke kuht ac ukwe kuhlwacng ac pahkotwen luhn Mwet Lahngo lasr uh, ke kuht enenuh in sekoi suwohs ac puhla luhn tuhlihk nuh kwewa nuhtin God uh, kuht tiac kuh in ekuhllah mwe luti Lal. Tiacna ma lasr in ekuhllah. Mwe luti Lal uh ma lasr in lutlutkihn, kahlwem kac, ac ahkkweye.

Inkacnek in moul luhn Mwet Lahngo el wo. Inkacnek Lal an weacng pac tiac kosro met liki pahyuck ac ahkfuhlwact yohk ke pahyuck uh.38 Inkacnek luhn Leum pa inkacnek sefanna nuh sesr in puhlakihn engan kalweniyuck uh. Inkacnek Lal use ahkkweye kalweniyuck nuh ke nguhnasr ac mihs kalweniyuck nuh in lohm sesr uh. Ac wo liki nuh kwewa, inkacnek Lal kol kuht nuh lohm ah nuh Yohrohl Pahpah tuhmasr Inkuhsrao, nuh ke moul ma pahtpaht ac wacngihn sahflahiyac.39 Pa inge ip yohk emet ke orekma ac wolacna luhn God.40

Tamuhlwel ac tahmtahel sacohk wiyuck, kais sie lwen pa sie lwen in sulaclah, ac sulaclah lasr uh nuhnkwaclah fuhfahsryucsr tok lasr uh. Sie lwen kais sie sesr fah tu ye muhtuhn Leum in nuhnuhnkweyuck.41 Kais sie sesr fah eis sie lohlngohk la sifacna yurin Jisus Kraist.42 Kuht fah tuniyuck ke sulaclah kuht orwaclah ke mahnosr, elah luhn nguhn lasr, ac ohiyac kuht ahkfuhlwactye pactuhn luhn God nuh ke pahyuck ac sucu. Nga pruhe na upac ke ine muhtahl luhn Jisus Kraist tuh kuht in kuh in orwaclah sulaclah wowo ke kais sie lwen in sulaclah uh, amen.

Mostrar referencias

  1.  

    1. Thomas S. Monson, “Decisions Determine Destiny” (Church Educational System fireside, Nohfohmpuh 6, 2005), 3; speeches.byu.edu.

  2.  

    2. Nuhnak ke orwaclah wo ma pahtpaht sruokyucki wo sel W. W. Phelps ke sihm lal ke on in alu “If You Could Hie to Kolob” (Hymns, no. 284). Fuhs 4 rit: “There is no end to virtue; / There is no end to might; / There is no end to wisdom; / There is no end to light. / There is no end to union; / There is no end to youth; / There is no end to priesthood; / There is no end to truth.” Verse 5 concludes: “There is no end to glory; / There is no end to love; / There is no end to being; / There is no death above.”

  3.  

    3. Genesis 1:27; liye pac Colossians 3:10; Alma 18:34; Ether 3:15; Moses 6:9.

  4.  

    4. “Nga Tuhlihk nuhtin God,” Hymns, no. 301.

  5.  

    5. Liye Matthew 10:37.

  6.  

    6. Liye Mark 12:30–31.

  7.  

    7. Liye Doctrine and Covenants 88:15.

  8.  

    8. God El use pac nuh sesr ohiyac sahyac ma sikyak nuh ke mahno uh. Elements ma oacna sodium, potassium, ac calcium, ac compounds ma oacna kof, glucose, ac proteins yohk srihpac nuh ke moullac uh. Mahno uh orekmakihn gases ma oacna oxygen ac carbon dioxide. Ma inge orwaclah hormones ma oacna insulin, adrenalin, ac thyroxin. Lacfuhl nuh ke kais sie ma inge ac ma puhs sahyac uh sukokyak ke mahno uh sifacna orekma ke kain in luhpah. Kuhpahsr inmahsrlon glands luhn mahno uh sifacna karihngihnyuck ac orekma. Nuh ke mwe srihkasrak, pituitary gland ke kapihn brain uh orwaclah sie hormones in okasack lihkihn ip ke adrenal glands in orwaclah adrenal cortical hormones. Luhpah mayak ke cortical hormones uh ac okanlah ma oreklac ke pituitary luhn hormones oreklac ac ayaol na. Fucsrfucsriyen monuwos ac oan na ke luhpa fal la ke 98.6˚F kuh 37˚C, finne kom oasr ke equator kuh oasr ke North Pole.

  9.  

    9. Kuhtuh ohiyac uh fihsrwacsr in liyeyuck; ma sahyac uh wihklac. Kuhtuh ma ke sucu; ma sahyac uh tiacna. Kuhtuh mwet uh fihsrwacsr in weack cancer, ma sahyac uh oasr allergy la, ac ma puhs sahyac. Kais sie sesr kuh in acsmak nuh ke acn muhnahs lal sifacna ac puhsisacl in lutlutkihn ma Leum El kena kuht in luti in muh mwe muhnahs uh kuh in eklac sie mwe kuh.

  10.  

    10. Liye Ether 12:27.

  11.  

    11. Kuhtuh ohiyac uh kuh in tiac ahksuwohsyeyucklac nohfohn nuh ke Sifil Moulyak, ke ma nuh kwewa fah fohlohkihnyuckyak nuh ke atac fal ac suwohs lalos” (liye Alma 40:23).

  12.  

    12. Liye Alma 42:8.

  13.  

    13. Mwet sihmihs Psalm el suhmsuhlah, “Fuhkah luhpan ahsor luhn Leum God ke sie sin mwet lal misac” (Psalm 116:15). Misac uh sacohk ke srihpen pa sie ahkfuhlwact ke fohlohk nuh lohm ah nuh yurin Leum.

  14.  

    14. 1 Corinthians 3:16; liye pac 6:19.

  15.  

    15. Liye Abraham 3:23.

  16.  

    16. Liye Jeremiah 1:5.

  17.  

    17. Liye Alma 13:2–3.

  18.  

    18. Liye Doctrine and Covenants 138:55–56.

  19.  

    19. Liye Alma 13:2–3; Doctrine and Covenants 138:38–57.

  20.  

    20. Elah ke luhlahlfongi, suwohs, etwacack, efahl, mongfihsrwacsr, kuhlwacng, wolacna, luhngse pwacye, puhsisacl, ac oaru (liye Doctrine and Covenants 4:6) oasr inmahsrlon mwe sang luhn nguhn ma kuht kuh in ahkyohkye ac kuh in ituckuh nuh sesr. Srui pa siepac elah ke nguhn ma kuh in ahkyohkyeyuck. Sruhi uh mokle ohiyacn mwet se ac kuh in orekma. Ac ke kom “isuslah ke “nguhn luhn God, kom fah srui in eis atac Lal ke ngwetngwetom (liye Alma 5:14).

  21.  

    21. Liye 1 Corinthians 12; 14:1–12; Moroni 10:8–19; Doctrine and Covenants 46:10–29.

  22.  

    22. Kuhtuh srihfeyuck in mongo yohklac. “Factoro uh eklac sie elyah yohk fin facluh, ke sahp 2.8 miliacn ke mwet misac ke kais sie yac ke ma sikyak ke toasrlaclac uh” (“10 Facts on Obesity,”World Health Organization, Mahs 2013, www.who.int/features/factfiles/obesity/en). Mwet sahyac uh srihfeyuck in mongo arlac srihk. Anorexia ac bulimia kuhnahsolah moul, pahyuck, ac sucu pucspucs. Ac kuhtuh srihfeyuck ke kena luhn ahko sruhngwacyuck sin Mwet Orwaclah se lasr ah. Ahkpwacyei nuh kac uh sukokyak lun Handbook 2: Administeringthe Church, ma fahk: Masap luhn Leum ke tiac kosro pa in tiac ohsun ke mahno sahyacn pahyuck suwohs ac ahkfuhlwact ke pahyuck uh. … Kosro sin mwet pahyuck, kosro sin mwet lolacp, homosexual kuh lesbian, ac ohiyac tiac muhtahl, tiac fal, kuh fohfohk nuh kwewa sahyac uh pa sesseslah ke ma koluk.” Srwackna ukwe ke handbook uh: Elah ke mukul mukul kuh muhtwacn muhtwacn tuhkweni uh ahkkolukye masap luhn God, lain srihpac ke asruoki luhn mwet uh, ac eslah mwet uh liki mwe insewowo ma kuh in sukokyak ke moul in sucu ac ke akwuck in molwelah ke wosasuc uh. … Ke lainyacn elah ke homosexual uh, Alu uh kahsruh ke etwacack ac ahkfuhlwact nuh sin kais sie suc luhngse mwet ma oacna elos mukul kuh muhtwacn” ([2010], 21.4.5; 21.4.6).

  23.  

    23. Liye 1 Corinthians 6:9–20; James 1:25–27; Doctrine and Covenants 130:20–21. Ac kuht enenuh in esam pacl nuh kwewa lah “mwet uh, tuh elos in kuh in eis engan” ( 2 Nephi 2:25).

  24.  

    24. Moul suhkawihl pa sie pacl in srihkeyuck, oacna ahkuhtweyucki ke ma suhmuhslah ah: God El fahk lah Elos fah ahkpwacyei nuh sesr in liye fin kuht kuh in oruh ma nuh kwewa ma Elos sapkihn nuh sesr in oruh (liye Abraham 3:25).

  25.  

    25. Liye Mosiah 4:10; Alma 39:9; Helaman 15:7. Handbook 2 weacng pweng se inge: “Elah ke homosexual kuh in nuhnak muhnahskihnyucklac ke auliyak pwacye” (21.4.6).

  26.  

    26. Ke Iwaclah luhn Jisus Kraist ac ke ahkostwen nuh ke ip yohk ke wosasuc uh, mwet nuh kwewa kuh in moullac (liye Doctrine and Covenants 138:4; Ip Yohk ke Luhlahlfongi 1:3).

  27.  

    27. Liye Ether 12:33–34; Moroni 8:17.

  28.  

    28. Liye Mosiah 5:2; Alma 5:12–14.

  29.  

    29. Liye Romans 8:13–17; Galatians 5:13–25; Doctrine and Covenants 88:86.

  30.  

    30. Liye 2 Nephi 2:27.

  31.  

    31. Liye Doctrine and Covenants 131:1–4.

  32.  

    32. “Sucu: Sie Mwe Fahkwack nuh fin Facluh,” Ensign kuh Liahona, Nohfohmpuh 2010, 129.

  33.  

    33. Liye Matthew 19:4–6; Mosiah 29:26–27; Helaman 5:2.

  34.  

    34. Kais sie mwet isuslac ke kais sie atac, chromosomes, ac DNA (deoxyribonucleic acid). DNA pa sie molecule ma nein sie code ke mwe kolyuck kuhpahsr orekmakihnyuck ke ahkyohkyeyacn ac fahsriyen living cells uh. Kais sie DNA luhn mwet oreklac ke DNA luhn sie pahpah ac sie ninac orekweni in orwaclah DNA luhn sie mahno sasuc—sie tuhkweni inmahsrlon pahpah, ninac, ac tuhlihk.

  35.  

    35. Liye Genesis 2:24–25; 3:20–21; 4:1–2, 25.

  36.  

    36. Dr. Patrick F. Fagan el suhmuhslah: “Pwelucng fal suc ma atacn kasrpen acn uh luhlahlfongi [pa] sucu ke pahpah ninacpahyuck uh—yohkna sie sucu ma oasr tuhlihk nahtuh ma wi alu wik nuh kwewa. … Pahyuck nuh kwewa orwaclah sie sucu sasuc, sie u srwenglah ke kasrpen acn ma orwaclah mani utyak, sisilac, sefiyucki, ac ahkkapye” (“The Family GDP: How Marriage and Fertility Drive the Economy,” The Family in America, vol. 24, no. 2 [Spring 2010], 136).

  37.  

    37. Liye Exodus 20:14; Leviticus 18:22; 20:13; Deuteronomy 5:18; Matthew 5:27–28; Mark 10:19; Luke 18:20; Mwet Rom 1:26–27; 13:9; Mosiah 13:22; 3 Nephi 12:27–28; Doctrine and Covenants 42:24; 59:6.

  38.  

    38. Liye Gordon B. Hinckley, “This Thing Was Not Done in a Corner,” Ensign, Nohfohmpuh 1996, 49.

  39.  

    39. Liye Doctrine and Covenants 14:7.

  40.  

    40. Liye Moses 1:39.

  41.  

    41. Liye 2 Nephi 9:41, 46; Mosiah 16:10.

  42.  

    42. Kuht fah nuhnuhnkweyuck fal nuh ke orekma lasr ac kena luhn insiacsr (liye Doctrine and Covenants 137:9; liye pac Hebrew 4:12; Alma 18:32; Doctrine and Covenants 6:16; 88:109).