“Nga Fah Tiac Fahsr Liki Kom, Ac Nga Ac Fah Wi Kom Pacl E Nuh Kwewa”

Sel Prestuhn Thomas S. Monson


Thomas S. Monson
Pahpah tuhmasr Inkuhsrao … El etuh lah kuht lotwelah ac ahkfokokoyeyuck ke kuht ohsun ac kuhtanglah pacl upac ma kuht enenuh in som ahluhkwelah.

Ke mwe sihm luhk, nga ac sihm ofong, “Pa inge sie toeni ma moklweyuck emet ke kuhtwena toeni luhlahp nga wi kac. Ma nuh kwewa kac arulacna wo ac ke ohiyacn nguhn.”

Tamuhlwel ac tahmtahel, mahlwem itkohsr somlah ah ke kuht ohsun ke toeni luhlahp lasr uh, muhtwacn sacohk kiyuck, Frances, el muhta ke lohm ono, tukun sie puhtatlac yohk ke kuhtuh lwen met ah. Ke Mei, tukun wik se ke el srihke yohk in wolac ke kweok lal, el som nuh ke acn ma pahtpaht. Nga ahsrwellah yohk. El ac nga pahyuckyak ke Salt Lake City Tempuhl ke Ohktohpa 7, 1948. Na lutu oasr ahkfuhlwactye luhn macruht lasr ke lusen yac 65. El pa luhngse luhn moul luhk uh, muhtwacn luhlahlfongi kiyuck, ac kawuck fototo se emet luhk. In fahk lah nga ahsrwellah pa suhfal in ahkkahlwemye puhla loal luhk.

Toeni se inge mahkiyac lusen yac 50 ke nga pahngonyuck nuh ke U luhn Mwet Sap Singucul Luo sel Prestuhn David O. McKay. Nuh ke pacl uh nga tiac puhla suhfal karihngihnyuck nohfohn sin muhtwacn sacohk kiyuck. Yohk pa kihsackuhnlah el oruh nga in muh kuh in ahkfalye pahng luhk. Wacngihn pacl nga lohng tohrkahskahs sel ke nga enenweyuck in som ke lwen ekahsr ac kuhtuh pacl wik ekahsr luhkwel ac tuhlihk nahtuhsr. El pa lihpufacn se, na pwacye.

Nga ke ahkfuhlwactye kuloh luhk, oacna sin sucu luhk, ke ahkkahlwemyeyuck luhn luhngse ma tuhkuh nuh sesr tukun Frances el misac. Card ac lwacta foko suhpweyuckme ma tuhkuh ke acn nohfohn fin facluh ac ahkkahlwemye ahkfuhlwactyeyuck nuh sel ac luhng lalos nuh sin sucu lasr. Kuht eis ros orekweni puhspuhs. Kuht kuloh ke mwe sang puhkantwen ma ituckyang ke inel nuh ke General Missionary Fund luhn Alu uh. In tahfwekuhtlac suc muhta inge, nga ahkkahlwemye kuloh loal ke kuhlwacng ac fahkwack luhn luhngse lowos.

Ma ahkkweyeyuck emet nuh sihk ke pacl in fahsrelihk an pa luhlahlfongi luhk nuh ke wosasuc luhn Jisus Kraist ac mwet etuh luhk lah Frances sacohk luhk el srwackna moul. Nga etuh lah fahsrelihk lasr uh ma nuh ke kihtin pacl. Kuht siliyuck ke lohm sin God sin sie suc oasr kuh in kapriyac ma ke facluh ac inkuhsrao. Nga etuh lah kuht ac sulpac ohsun sie lwen ac wacngihn pacl kuht ac sulpac fahsrelihk. Pa inge mwe etuh suc ahkkweyeyuclac.

Tamuhlwel ac tahmtahel, nga muh wona in nuhnkuh lah wacngihn mwet moul ac tiac kweok kuh ahsor, oacyacpac wacngihn pacl ke sramsram mahtuh ma tiac akacsruhi pacl upac luhlahp ac mwe ahsor.

Ke inkacnek luhn moul forlah nuh ke ma upac, oasr mwe srihfe in siyuck kihsen siyuck “Efuh nga?” Kuhtuh pacl uh luhman oacna in wacngihn kahlwem ke sahflahiyacn tunnel uh, kuh wacngihn faht takwack in ahksahfye lohsr luhn fong uh. Kuht puhla sesseslah ke suhpwacr luhn mwemwe tiac fahlac ac ahsor yohk ke finsrak wacngihnlac. Kuht welah in fahk siyuck se ke pwacpuhl uh, “Yac wacngihn ono in Gilead?”1 Kuht puhla tuhlac, ahsor, ac muhkahimtacl. Kuht kwacna liye ma upac lasr ke ohiyac suhfal uh. Kuht semuhtweng nuh ke top ke elyah lasr uh, ac muhlkuhnlah lah ohiyac in mongfihsrwacsr luhn inkuhsrao enenweyuck pacl puhkantwen.

Ma upac ma tuhkuh nuh sesr ahkkahlwemye nuh sesr srihfeyuck pwacye in liye kuht fin kuh in kampare. Oasr kihsen siyuck fihsrwacsr ma kais sie sesr enenuh in topuk: Nga ac puhtatlac, kuh nga ac ahksahfyelah? Oasr kuhtuh suc puhtatlac ke elos sifacna konwacack lah elos tiac kuh in eslah ma upac lalos. In ahksahfye mwet enenuh muhtweng nuh ke sahflah luhn moul.

Ke kuht motko ke ma sikyak ma kuh in sikyak nuh sesr nohfohn, kuht kuh in fahk weluhl Job pacl mahtuh ah, “Mwet uh sifacna oraclah mwe lokoalok.”2 Job el “arulacna inse pwacye” mukul se suc “alu nuh sin God, … [ac] tiac oruh kuhtwena ma koluk.” 3 Suwohsuwohs ke mukwikwi lal, oraclah wo ke ma lal, Job el sun sikeng se ma kuh in kuhnaoslah kuhtwena mwet. Ma lal nuh kwewa tuhlac, ahkkolukyeyuck sin kawuck lal, kweok ke ma upac lal, ahsor na pwacye ke sucu lal tuhlac, el srihfeyuck in “selngawi God ac misac.”4El som liki mwe sruhf inge ac fahkwack ke acn loal luhn nguhnal:

“Ahok pwacyena, oasr mwet se inkuhsrao suc ac fah tuyak wiyuc lac, ac kahsrweyuc.” 5

“Nga etuh lah oasr sie inkuhsrao.”6

Job el karihngihn luhlahlfongi lal. Na kuht ac oruh oacna sie ke kuht ohsun nuh ke ma upac sifacna lasr?

Kuhtwena pacl kuht puhla yohk ke ma toasr luhn moul uh, lwelah kuht in esam lah mwet sahyac uh som ke inkacnek soko pacna ingacn, muhtwacnglah, ac na kuhtanglah.

Sramsram mahtuh ke Alu se inge, ke fihl in pacl ke fohnlah luhn pacl uh, sesseslah ke mukwikwi luhn mwet suc kweok ac oaru nuh ke ma wo ac ohiyacn engan. Srihpac an? Elos oruh in sang wosasuc luhn Jisus Kraist nuh ke infulwacn moul lalos. Ma inge pa ma fah kahsrwe kuht ke kuhtwena ma upac tuhkuh nuh sesr. Kuht fah srwackna puhlakihn ma elyah upac uh, tuhsruhk kuht fah kuh in sun ma ingacn, in puhlaik in lain, ac in kuhtanguhloslac.

Ke mwe oan luhn kweok an, ke ilul sroksrok ke sronin muhta, kuht sruhkwack nuh lucng ke mokleyuck wolacna ac olwelah sacohk: “Nga fah tiac fahsr liki kom ac nga ac fah wi kom pacl ac nuh kwewa.”7 Ahkkweyeyuck inge yohk molo.

Ke nga forfor ke acn puhspuhs fin facluh in ahkfalye kunohkohn luhk uh, nga etwaclah ma puhspuhs—wi pac lah mwe ahsor ac kweok oasr acn nuh kwewa. Nga tiac kuh in muhtwacwacack in ahkuhtweyac mwe ahsor ac kweok nga liye ke nga muhtwacta yurin mwet suc oasr ahsor, wi mas, fahsrelihk ke pahyuck la, srihke in kahsruh tuhlihk nahtuh suc puhtatlac, kuh kweok ke ma sikyak tukun elos oruh ma koluk. Tahk se inge tiac tui, mweyen oasr elyah puhkantwen ma kuh in tuhkuh nuh sesr. In sramsram ke sie muhkwena arulacna upac, na ke nga nuhnkuh ke ma upac, nuhnak luhk forlah nuh sel Tamuhlwel Brems, sie mwet luti ke Sacnri Skul ke nga fuhsr. El pa mempucr oaru ke Alu uh, mukul se ke inse pwacye. El ac muhtwacn kiyacl, Sadie, nahtuh tuhlihk oalkosr, puhs selos wi matwac oacna sie ke sucu lasr.

Tukun Frances ac nga pahyuckyak ac som liki ward an, kuht liyacl Tamuhlwel ac Tahmtahel Brems ac mempucr ke sucu lalos ke macruht ac mas an, oacyacpac ke sulpac tuhkweni luhn ward.

Ke yac 1968, muhtwacn kiyacl, Sadie, el misac. Tuhlihk luo nahtuhl oacyacpac misac ke yac somlah tohkoh.

Sie lwen ke apkuhran in yac 13 somlah ah, tuhlihk muhtwacn nuhtin nahtuhl pahngonyuc. El ahkuhtweyac lah pahpah mahtuh tuhmwacl el sun yac 105 lal. El fahk, “El muhta ke lohm srihsrihk ma karihngihn mwet mahtuh tuhsruhktuh el ohsun yurin sucu lal nohfohn kais sie Sacnri, na el sang sie lesin ke wosasuc.” El kalweni, “Sacnri tari ah Pahpah el fahkwack nuh sesr, ‘Mwet wiyuck, nga ac misac ke wik se inge. Nuhnak muhnahs pahnglol Tommy Monson. El ac oruh ma el enenuh in oruh.’”

Nga som muhtwacta yohrohl Tamuhlwel Brems ke ekuh se tok ah. Nga tiac sonol ke pacl loes. Nga tiac kuh in sramsram nuh sel, mweyen el sohlohngkahs. Nga tiac kuh in sihmihs sie pweng nuh sel elan riti, mweyen el tiac kuh in liye. Nga lohng sin sucu lal lah elos muhtwacta yohrohl ke orekmakihn paho in sihm ke pahol inen mwet muhtwacta an. Kuhtwena pweng enenuh in sikyak ohinge. Nga ukwe ohiyac sacn ke eis pahol ac suhmuhslah T-O-M-M-Y M-O-N-S-O-N, ine el etweyuc kac. Tamuhlwel Brems el rahrahlac, ac sruok pouk, ac fihliyac ke insifacl. Nga etuh kena lal pa in eis mwe insewowo luhn pristut. Mwet utuck stosah suc kahsrweyuc in som nuh ke lohm sacn wi ke kuht sang pahosr nuh ke insifacl Tamuhlwel Brems ac sang sie mwe insewowo el kena ah. Tokoh, sronin muhta uh muhtwacwacack in tuhkuh ke ahtron muhtah ma tiac kuh in liye. El sruok pahosr ke sruikihn. Finne el tiac lohng mwe insewowo kuht sang nuh sel, Nguhn uh fokoko na pwacye, ac nga luhlahlfongi lah el mokleyuck in etuh ma kuht sang ke mwe insewowo el enenuh. Mwet sacohk se inge tiac kuh in liye. El tiac kuh in lohng. El muhta ke infuckihl srihk ke lwen ac fong lun lohm se ingacn. Tuhsruhktuh isracsr ke muhtahl ac kahs el fahk ah puhsrallah insiyuck. “Kuloh,” el fahk. “Pahpah tuhmuhk Inkuhsrao El karihngihnyuc wo.”

Ke wik sacn, oacna Tamuhlwel Brems el palye, el misac. Wacngihn pacl el nuhnkuh yohk ke ma wacngihn lal; Ke ohiyac sahyac, el kuloh yohk pacl nuh kwewa ke mwe insewowo puhspuhs lal.

Pahpah tuhmasr Inkuhsrao, suc use nuh sesr ma puhspuhs in engankihn, El oacyacpac etuh lah kuht lotwelah ac ahkfokokoyeyuck ke kuht ohsun ac kuhtanglah pacl upac ma kuht enenuh in som ahluhkwelah. Kuht etuh lah oasr pacl ke kuht fah puhlakihn pacl upac, ke kuht ac ahsor, ac ke kuht srihfeyuck nu ke sahflah lasr. Tuhsruhktuh, ma upac inge oruh kuht in eklac nuh ke ma wo, in ahksasucye moul lasr ke ohiyac Pahpah tuhmasr Inkuhsrao El luti kuht, ac in eklac nuh ke mwet sahyac ma kuht oacna ingena—wo liki kuht met ah, yohk kahlwem liki met ah, yohk luhngse pwacye liki met ah, ke luhlahlfongi fokoko liki met ah.

Enenuh in pa inge srihpacsr lasr uh—in muhtweng ac kampare, ahok, tuh oacyacpac in ahkwoye ke ohiyacn nguhn ke kuht som ahluhkwelah kahlwem ac ahsor. Fin wacngihn ma upac in kuhtanglah ac elyah in ahkwoye, kuht ac tiac eklac, ke wacngihn kuh srihklac kapkapwack nuh ke finsrak lasr luhn moul ma pahtpaht yurin God. Mwet sihm sac ahkkahlwemye ma inge ke kahs inge:

Sahk wo uh tiac kapwack ke ohiyac fihsrwacsr,
Upaciyen eng uh, oruh sahk uh in fokokoi.
In sun acn lucng, sahk soko ac kapwack loes,
Yohkiyacn pahkah uh, ac ahkfokokoi liki met ah.
Ke faht ac ohyohu, ke af ac snow,
Ke sahk ac mwet, sahk wo uh kapwack.8

Mwet Luti sefanna El etuh ma loal ke srihfeyuck lasr, ngal lasr, ac kweok lasr. El sifacna kuh in sang mihslac ma pahtpaht ke pacl upac. El muhkwena puhsrallah nguhna kweok lasr ke kahs in kahsruh Lal:

“Fahsruh nuh yuruk, kowos suc orekma ac tohtohlah, tuh nga fah usot monglac nuh suwos.

“Eis srenenuh luhk nuh fowos ac lutlut sihk, tuh nga fakpahp ac inse puhsisacl; ac kowos fah konwacack monglac.

“Tuh srenenuh luhk fihsracsr, ac mwe utuck luhk muhlahlah.”9

Finne pacl wo emet kuh koluk emet uh, El wi kuht. El olwelah tari lah ma inge tiac kuh in eklac.

Tamuhlwel ac tahmtahel luhk, lwelah in oasr wuhlweacng lasr nuh sin Pahpah tuhmasr Inkuhsrao ma tiac eklac ke pacl kuh ma upac ke moul lasr uh. Kuht tiac enenuh in puhlakihn ma upac nuh sesr in Esamuhl, ac kuht tiac enenuh in pahtokyuck in inse puhsisacl met liki kuht sang luhlahlfongi lasr nuh Sel.

Lwelah kuht in oaru in ahkfototoye kuht nuh sin Pahpah tuhmasr Inkuhsrao. In oruh ohinge, kuht enenuh in pruhe nuh Sel ac Ukwacl lwen nuh kwewa. Kuht Enenwacl na pwacye oa nuh kwewa, finne oa ke faht kuh af. Lwelah olwelah Lal in karihngihn kuht: “Nga fah tiac fahsr liki kom, ac nga ac fah wi kom pacl e nuh kwewa.”10

Ke kuh nuh kwewa ke nguhnihk, nga fahkwack lah God El moul ac luhngse kuht, lah Wen Kuloh Sefanna Nahtuhl moul ac misac kacsr, ac wosasuc luhn Jisus Kraist pa kahlwem ma ahkkahlwemye ahluhkwelah lohsr ke moul lasr. Lwelah in oruh ohinge, nga pruhe ke inen muhtahl Jisus Kraist, amen.

Mostrar referencias

  1.  

    1. Jeremiah 8:22.

  2.  

    2. Job 5:7.

  3.  

    3. Job 1:1.

  4.  

    4. Job 2:9.

  5.  

    5. Job 16:19.

  6.  

    6. Job 19:25.

  7.  

    7. Joshua 1:5.

  8.  

    8. Douglas Malloch, “Good Timber,” ke Sterling W. Sill, Making the Most of Yourself (1971), 23.

  9.  

    9. Matthew 11:28–30.

  10.  

    10. Joshua 1:5.