Wacngihn God Sahyac

Sel Elder Dallin H. Oaks

Ke U luhn Mwet Sap Singucul Luo


Dallin H. Oaks
Kuh kuht kuhlwacnsapuh ma oaruiyuck uh kuh ma srolwaclah met liki God se kuht alu nuh se uh?

Masap singucul ac pa ip se met ke Alu luhn mwet Kristin ac Mwet Jew uh. Ituckyang sin God nuh sin tuhlihk nuhtin Israel sel mwet pahluh Moses, masap luo emet ke masap inge sang kolyuck nuh ke alu lasr uh ac ma kuht arui uh. Ke ma se met ah, Leum El sapkihn, “nik kom eis siena god sahyuck” (Exodus 20:3). Yac foko tohkoh, ke tuh siyuckyuck sel Jisus ah, “Piyac masap ma se ma yohk emet ke masap uh?” El topuk, “Kom fah luhngse Leum God lom ke insiyom kwewa, ke nguhnum kwewa, ac ke nuhnkom kwewa (Mattu 22:36–37).

Masap ahkluo ke Masap Singucul ahkuhtweyac wo inkacnek in tiac eis god sahyac ac liye lah meac enenuh in aruiyuck yohk ke moul lasr uh in oa tuhlihk nuhtin God. “Nik kom oruh nuh sum kuhtwena ma srolwaclah, kuh kuhtwena luhman ma oan in kuhsrao lucng, kuh ma oan in facluh ten” (Exodus 20:4). Na masap se laheslah, “Nik kom sifacn epahsr nuh selos, kuh orekma nuh selos (Exodus 20:5). Sruhngwacyuck na pwacye ma srolwaclah, ma se inge orwaclah ma yohk srihpac se emet nuh ke pacl nuh kwewa. Jehovah El ahkuhtweyac, “Tuh Nga Leum God lom, sie God lwemta, … oruh kuhlwacng nuh sin … selos suc luhngse Nga ac liyacacng masap luhk” (Exodus 20:5–6). Kalmeyacn lwemta uh kahlwemi. Kalmeyac na Hibru pa puhla emtucng ac loal (Exodus 20:5, footnote b). Kuht ahktoasrye God ke kuht “epahsr nuh ke” kuh “kuhlwacnsapuh” god sahyac—ke oasr mwe aruiyuck sahyac lasr uh.1

I.

Meac kuhtuh ma oaruiyuck sahyac ma “epahsr nuh kac” kuh “kuhlwacnsapiyuck” met liki God sin mwet uh—finne mwet wi alu uh—ke pacl lasr uh? Nuhnkuh ma kuh in sikyak inge, ma inge nuh kwewa sikyak fin facluh:

  1. Oruh luhn facsin ac sucu uh
  2. Orekma wo in tiac ahktoasrye mwet siena luhlahlfongi la
  3. Kena se in ahkwoyelah etuh luhn sie mwet
  4. Kuhfa luhn mwet
  5. Sukok mwe pwacr
  6. Kuh, woiyac, ac eye

Fin wacngihn sin mwe srihkasrak inge fal nuh ke sesr, kuht kuh in nuhnkuh kuhtuh sahyac ma fal nuh sesr an. Ip yohk uh yohk srihpac kuhtuh likina mwe srihkasrak luhn kais sie. Ip yohk se tiac pa lah oacna oasr kuhtuh ma kuht oarui sahyac. Kihsen siyuck se siyuckyuck ke masap ahkluo uh pa “Meac kuht oarui yohk uh?” Kuh kuht kuhlwacnsapuh ma aruiyuck uh kuh ma srolwaclah met liki God se kuht alu nuh se uh? Yac kuht muhlkuhnlah Mwet Lahngo suc luti lah kuht fin luhngse El, kuht fah liyacacng masap Lal? (liye John 14:15). Fin oacyac, mwe aruiyuck lasr uh fohsack ke wacngihn engnweyac ke ip luhn nguhn ac suhkwac kaiyuck uh orekma ke pacl lasr uh.

II.

Nuh sin Mwet Luhlahlfongi ke Lwen-sahflah uh, masap luhn God wi na plwacn luhn God nuh sin tuhlihk Nahtuhl—plwacn wowo ke molwelah. Plwacn se inge, kuhtuh pacl uh pahngpahng plwacn wowo luhn engan (liye Alma 42:8), ahkuhtweyac pwacyeiyacsr ac sahflahiyacsr in oa tuhlihk nuhtin God—acn kuht tuhkuh we me, meac kuht tuhkuh oruh uh, ac kuht ac som nuh oyac. Ac ahkuhtweyac srihpac luhn oreklac sac ac atacn moul sukawihl, weacng masap luhn God, enenuh luhn Mwet Lahngo, ac kunohkohn yohk srihpac ke sucu facluh ac ma pahtpaht uh. Fin kuht Mwet Luhlahlfongi ke Lwen-sahflah, suc ma utuckuh tari etuh se inge nuh se, nimet oruh ma kuht arui uh in laisyac plwacn se inge, mwe sensen nuh sesr in kuhlwacnsapuh kuhtwena god sahyac.

Etuh ke plwacn luhn God nuh sin tuhlihk Nahtuhl sang liye wowo se nuh sin Mwet Luhlahlfongi ke Lwen-sahflah ke pahyuck ac sucu. Kuht etweyuck wo ke alu yohk ke sucu se. Ahkuhtweyac luhn alu lasr uh muhtwacwacack sin pahpah ninac inkuhsrao uh, ac kena yohk se emet lasr uh pa in sun fohnlah luhn enganwack ma pahtpaht, suc kuht etuh muh kuh in sikyak muhkwena ke atuhkweni luhn sucu se. Kuht etuh lah pahyuck luhn mukul ac muhtwacn uh enenweyuck nuh ke ahkfallac ke plwacn luhn God. Pahyuck se inge muhkwena fah sang lwelah luhn akwuck nuh ke isuslac luhn mwet ac in ahkolah mwet ke sucu nuh moul ma pahtpaht. Kuht nuhnkuh pahyuck ac karihngihn ac tuhfweyacn tuhlihk uh pa ip ke plwacn luhn God ac orekma muhtahl se lalos suc ituckyang pacl wowo in oruh ohinge. Kuht luhlahlfongi muh ma sacohk yohk emet fin facluh ac nuh inkuhsrao pa tuhlihk nahtuhsr uh ac orwaclos wo lasr uh.

III.

Ke srihpen ma kuht etuh ke kunohkohn ma pahtpaht wo luhn sucu uh, kuht ahsor ke srihpen srihkweni yohk ke pihsen isus ac pahyuck ke un mwet puhs nuh lwacyacn Rohtoh suc facsin etweyuck pa Mwet Kristin ac Mwet Ju. Ma konwacack uh fah ke ma ten inge:

  1. Acn United States inge pa suhpuhs emet pihsen mwet isuslac ke etweyuck la uh,2 ac pihsen mwet isuslac ke muhtuhn facl puhs European Union ac kuhtuh muhtuhn facl yohk sahyac uh, srihk liki pihsac enenweyuck se in sruok na pihsen mwet we ah.3 Oruh se inge sensen nuh ke sruokyacn facsin ac finne nuh ke muhtuhn facl uh.
  2. Fin acn Macrike, pihsac luhlahp se ke mwet fuhsr mahtuhyak matwac yac18 nuh ke 29 suc ma pahyuck srihkweni liki percent 59 ke yac1960 nuh ke percent 20 ke 2010. 4 Ingena matwac se in pahyuck uh pa luhpah yohk se emet ke ma etweyac uh: 26 nuh sin muhtwacn uh ac apkuhran in 29 nuh sin mukul uh. 5
  3. Ke muhtuhn facl ac facsin pucspucs (1) facsin luhn sucu ma ninac ac pahpah ac tuhlihk pahyuckyak uh muhtwacwacack in oruh ma kuh ac tiac enenuh se likina ke ma masap (2) sukok orekma sahyacn pahyuck ac orek tuhlihk uh pa sulaclah yohkyohkwelihk se sin muhtwacn fuhsr pucspucs, ac (3) kunohkohn ac nuhnkweyacn ma enenweyuck sin pahpah uh wacngihnlac.

Infulwacn ohiyac inge ma kuht elyahkihn uh, kuht puhla lah plwacn luhn God ma nuh sin tuhlihk Nahtuhl nuh kwewa ac lah God El luhngse tuhlihk nuh kwewa Nahtuhl, acn nuh kwewa.6 Sapta se emet ke Puk luhn Mormon fahkwack lah kuh, ac woiyac, ac kuhlwacng luhn God oasr acn nuh kwewa fin facluh (1 Nephi 1:14). Sapta se tohkoh an fahkwack lah El sang molwelah Lal nuh sin mwet nuh kwewa ke wacngihn molo ac lah mwet nuh kwewa oacna sie wo nuh se, ac wacngihn mwet sruhngwacyuck (2 Nephi 26:27–28). Ne ohinge, ma suhmuhslah uh luti lah ma kunacsr in pahkotwen ac luhngse pwacye (luhngse) nuh sin mwet nuh kwewa (liye 1 Thessalonians 3:12; 1 John 3:17; D&C 121:45).

IV.

Kuht ahkfuhlwactye pac alu sahyac luhn mwet nuh kwewa, finne nuh selos puhseni se ma fahk muh elos tiac luhlahlfongi ke God. Kuht etuh lah ke kuh in sulaclah utuckuh sin God uh, puhs mwet ac luhlahlfongi sie liki kuht na, tuhsruhk kuht finsrakihn lah mwet sahyac ac fah ahkfuhlwactye wo luhlahlfongi luhn alu lasr ac kahlwem kac lah luhlahlfongi lasr uh kwacfe kuht nuh ke kuhtuh sulaclah ac elah sahyac oruh lalos. Nuh ke mwe srihkasrak, kuht luhlahlfongi lah, in oa sie ip yohk srihpac ke plwacn in molwelah Lal, God El orwaclah akwuck ma pahtpaht fal se lah ohsun luhn mahno sikyak muhkwena inmahsrlon mukul an muhtwacn se ma pahyuckyak.

Kuh se in orwaclah moul facluh pa kuh fuhlwact emet God El sang nuh sin tuhlihk Nahtuhl uh. Orekmakihnyac uh sapkihnyuck ke masap se met luhn God nuh sel Adam ac Eve (liye Genesis 1:28), tuhsruhk masap yohk srihpac sahyac uh utuckuh in sruhnga oruh suhfal la uh (liye Exodus 20:14; 1 Thessalonians 4:3). Sap kuh kuht fihliyac ke masap luhn tiac kosro uh ahkuhtweyac ke etuh lasr ke srihpac luhn orek tuhlihk in ahkfalye plwacn luhn God. Sahyac tuhkweni luhn pahyuck inmahsrlon mukul ac muhtwacn se, orekmakihnyacn kuh in orek tuhlihk lasr uh kwewa pa sie ma koluk sahyac ac lain plwacn luhn God in sang moul ma pahtpaht nuh sin tuhlihk Nahtuhl.

Yohk srihpac se kuht sang nuh ke masap ke tiac kosro uh ahkuhtweyac otwelah lasr nuh ke pactuhn luhn pahyuck ma oreklac sel Adam ac Eve ac tuhtahflahna ke pacl uh oa pactuhn luhn God nuh ke orek tuhlihk inmahsrlon tuhlihk mukul ac tuhlihk muhtwacn Nahtuhl ac nuh ke tuhfahlah luhn tuhlihk Nahtuhl uh. Wo ohiyac, welah luhn mwet puhs nuh ke kuhtwena u in luhlahlfongi sahyac uh insese nuh sesr ke ohiyac ac yohk srihpen pahyuck, kuhtuh ke pwelucng ke mwe luti luhn alu ac kuhtuh sahyac ke pwelucng ke ma elos nuhnkuh wo nuh ke un mwet se.

Etuh lasr ke plwacn luhn God nuh sin tuhlihk Nahtuhl uh7 ahkuhtweyac lah efuh kuht sensenkihn lah puhseni pihsen tuhlihk isuslac pahpah ninac tiac pahyuck—ne ingena percent 41 ke tuhlihk isuslac fin acn United States8—ac lah pihsen siacnyacn ma tuhkweni muhta ma tiac pahyuck puhseni na upac ke yac luhmngaul somlah ah. Yac luhmngaul somlah ah, suhpuhs pihsac se ma tuhkweni muhta ma tiac pahyuck. Ingena mukul ac muhtwacn tuhkweni muhta ma tiac pahyuck ahluhkwelah percent 60.9 Ac ohiyac se yohkwelihk inseseiyac, yohkna nuh sin mwet fuhsr uh. Pacl fototo somlah ah liye se ke oruh se konwacack lah percent [luhmngaul] ke mwet fuhsr uh fahkkihn lah orek tuhlihk ke tiac pahyuck uh pa sie “atacn moul wo kuhtuh se.”10

V.

Puhs mwe elyah luhn kafucrmacn ac atuhkweni uh nuh ke ma suwohs ac eklac luhn akwuck in orwaclah ohiyac ma lain orwaclah se luhn God ohsun in mahno ac moul ma pahtpaht ac srihpac pahyuck ac tohf tuhlihk. Mwe elyah inge sang tari lwelah nuh ke pahyuck luhn mukul nuh sin mukul ac muhtwacn nuh sin muhtwacn ke kuhtuh acn kuh muhtuhn facl. Kuhtuh mwe elyah sahyac uh kuh in ahkfohsyeack mwet se kuh ekuhllah ip kwaclos in oacna ip luhn muhtwacn ac mukul ma enenweyuck in ahkfalye plwacn in engan wowo luhn God.

Etuh lasr ke plwacn luhn God ac mwet luti Lal uh use nuh sesr liye ma pahtpaht se ma ac tiac lwelah nuh sesr in etahi kain elah inge kuh in sokwack mwe ahkpwacyei ke masap ma sang lwelah kac. Ac, tiac oa kuhtuh u sahyac kuh in ahollah akwuck lalos ac finne ke mwe luti lalos, akwuck lasr uh oreklac ke ma pwacye God El fahk muh tiac kuh in ikihlyuck.

Ip yohk ke luhlahlfongi ahksingucul luo lasr uh fahk lah luhlahlfongi lasr in ahkfuhlwactye wal luhlahp uh “ahkos, ahkfuhlwact, ac ahkkweye masap.” Tuhsruhk masap luhn mwet uh tiac kuh in oruh sie ma in nwacsnwacs ke God El fahk muh fokfok. Otwelah nuh ke mwe oaruiyuck yohk emet lasr—in luhngse ac kuhlwacnsap uh God—enenweyuck kuht in luhlahlfongi masap Lal nuh ke akwuck fal ke ohiyacsr. Nuh ke mwe srihkasrak, kuht oasr na ye sap muhtahl in tiac kalyei in kosro nuh sahyac kuh liye ma koluk finne ke mukwikwi an tiac oruh koluk se ye masap luhn acn ac muhtuhn facl ma kuht muhta we uh. Oacna in muh, masap uh ahkkweyelah ma pahngpahng “pahyuck luhn mukul nuh sin mukul kuh muhtwacn nuh sin muhtwacn uh” tiac ekuhllah masap in pahyuck luhn God kuh masap Lal ac akwuck fal lasr uh elyahkihn. Kuht srackna oasr ye olweacng in luhngse God ac liyacacng masap Lal ac in tilokihn in tiac epahsr kuh kuhlwacnsap uh god ac mwe oaruiyuck sahyac—finne ma ngacn muhtwacwacack eyei ke pacl ac acn sesr uh.

Ke moklweyuck se inge sahp stuhuh etweyac sesr, ac sahp kuht sis nuh facsr ahkkoluk uh, kweokkihn sol mwet, kuh enenuh in kutong ahksrihkyactwen nuh ke oruh luhn alu lasr uh. Fin oacyac, nga muh kuht enenuh in esamwack mwe oaru se lasr emet ah—in kuhlwacnsapuh God—ac, oacna mwet luhlahp payonir lasr ah, kuhtanglah kais sie ma upac lasr ke kain kuh oaru elos ahkkahlwemye ah.

Luti se lal Prestuhn Thomas S. Monson orekmakihnyuck ke ohiyac sikyak se inge. Ke toeni luhlahp se inge ke yac 27 somlah ah, el fahkwack na suwohs: “Lwelah in oasr puhlaik lasr in laenwack sulaclah eye inse, puhlaik in loango ip yohk. Puhlaik, tiac insese, use isracsr srihsrihk ahkkweyelah luhn God. Puhlaik orwaclah ma nwacsnwacs moul ac kahto se ke ac nuhnkweyuck in tiac inseselac in misac oacna mukul uh, tuhsruhk ke motkweyac se in moul fal. Mwet sahngwengtoht nwacsnwacs se pa mwet se ma sahngweng in oruh ma el nuhnkuh muh pwacye ke srihpen mwet sahyac fah tiac insese kuh isrucn. Esam lah mwet nuh kwewa oasr sahngweng lalos, tuhsruhk elos suc sun mwe sahngweng lalos ke kuhiyaclos oasr pa puhlaik la.” 11

Nga pruhe tuh kuht in tiac lwelah ma upac nuh ke kihtin pacl luhn moul sukawihl oruh kuht in muhlkuhnlah masap yohk uh ac mwe oaru utuckuh nuh sesr sin Mwet Orwaclah ac Mwet Lahngo lasr. Kuht tiac enenuh in akiyac insiyac yohk nuh ke ma luhn facluh ac kena in eis ahkfuhlwact luhn mwet uh (liye D&C 121:35) lah kuht muhlkuhnlah acn ma pahtpaht lasr uh. Kuht suc etuh plwacn luhn God nuh sin tuhlihk Nahtuhl—kuht suc orwaclah olweacng in wi kac—oasr kunohkohn na kahlwem se. Kuht enenuh in tiac muhlkuhnlah kena yohk srihpac, suc ma in eis moul ma pahtpaht.12 ac mwe oaru se emet lasr uh— in wacngihn god sahyac ac in tiac kuhlwacnsapuh kuhtwena mwe oaru met liki God Pahpah ac Wen Nahtuhl, Mwet Lahngo lasr, Jisus Kraist.

Lwelah God lacn kahsrwe kuht kahlwem ke mwe oaru inge ac in kahlwemkihn sin mwet sahyac oacna ke kuht suk in ukwe ke inkacnek suhmaht ac luhngse se, nga pruhe ke inen Jisus Kraist, amen.

Ahkkahlwemye Reference an

  1.  

    1. Liye, mwe srihkasrak, Doctrine and Covenants 124:84.

  2.  

    2. Liye Joyce A. Martin ac kuhtuh sahyac, “Births: Final Data for 2011,” National Vital Statistics Reports, vol. 62, no. 1 (Jun  28, 2013), 4; Gloria Goodale, “Behind a Looming Baby Bust,” The Christian Science Monitor Weekly, Fepweri 4, 2013, 21, 23.

  3.  

    3. Liye Population Reference Bureau, “2012 World Population Data Sheet,” www.prb.org/Publications/Datasheets/2012/world-population-data-sheet/data-sheet.aspx.

  4.  

    4. Liye D’Vera Cohn ac kuhtuh sahyac, “Barely Half of U.S. Adults Are Married—a Record Low,” Pew Research Center, Social and Demographic Trends, Tisacmpuh 14, 2011, oasr ke www.pewsocialtrends.org/2011/12/14/barely-half-of-u-s-adults-are-married-a-record-low; “Rash Retreat from Marriage,” Christian Science Monitor, Jacnweri  2 ac 9, 2012, 34.

  5.  

    5. U.S. Census Bureau, “Estimated Median Age at First Marriage, by Sex: 1890 to the Present,” available at www.census.gov/population/socdemo/hh-fam/ms2.xls.

  6.  

    6. Liye Dallin H. Oaks, “All Men Everywhere,” Ensign kuh Liahona, Mei 2006, 77–80.

  7.  

    7. Liye Dallin H. Oaks, “The Great Plan of Happiness,” Ensign, Nohfuhmpuh 1993, 72–75.

  8.  

    8. Liye Martin, “Births: Final Data for 2011,” 4.

  9.  

    9. Liye The State of Our Unions: Marriage in America, 2012(2012), 76.

  10.  

    10. Liye The State of Our Unions, 101,102.

  11.  

    11. Thomas S. Monson, “Courage Counts,” Ensign, Nov. 1986, 41.

  12.  

    12. Liye Dallin H. Oaks, “Desire,” Ensign or Liahona, Mei 2011, 42–45.