Ma Srihk ac Fihsrwacsr

Sel Elder Arnulfo Valenzuela

Ke U luhn Mwet Itngucul


Arnulfo Valenzuela
Lwelah kuht in tuhtahf nuh sin mwet sahyac ke luhlahlfongi ac ke luhngse.

Tamuhlwel ac tahmtahel sacohk wiyuck, kuhtuh wik somlah ah nga oasr ke acn in ahkpah luhn misineri ke acn Mexico City in fahkwack pweng se nuh sin misineri ah. Nga muhtwacn kiyuhk ah oai sa ke ao ekahsr ke srihpac. Ke kuht muhtwacta ke imac kahto ac inkacnek nwacnwacs ac karihngihnyuck luhn Acn in Ahkpah luhn Misineri ah, fihsrwacsr kuht in akihlen engan ma liyeyuck ke muhtuhn elder ac tahmtahel siofok kuhtuh, kais sie suc lohacng in eis pahlah ke kahs sasuc ac etwaclah in kulohkihn wo srihpaclos ke misineri.

Ke nga is pacl se in liye wo ngwetngwet wowo sac, nga motko ke kahs lal Alma ke el sap Helaman wen se nahtuhl in sihmihs sramsram mahtuh luhn mwet lal ke ipin ma sihmlac ma luhlahlfongiyuck yohrohl ac in karihngihn ma inge nuh kwewa in muhtahl tuh in sie lwen som nuh yurin muhtuhnfacl, sruf, kain in kahs, ac mwet nuh kwewa.

Na Alma el fahk nuh sin wen se nahtuhl muh:

El ac sahp muh ma lahlfohn se in karihngihn ma inge in muhtahl, tuhsruhk ke ma srihk ac fihsrwacsr, ma yohk uh oreklac, ac mukwikwi srihk ke pacl puhs ahkmwekihnye mwet lahlmwetmwet.

Ac Leum God El orekma ke ohiyac in oruh srihpac wowo ac ma pahtpaht lal in orek, ac mukwikwi arlac srihk, Leum El ahkmwekihnye mwet lahlmwetmwet ac oruh molwelah luhn nguhna pucspucs in orek (liye Alma 37:6–7).

Suwohsiyac ac fuhsriyacn misineri lasr uh srihkasrak wo ke ohiyac luhn Leum—pa muh elos suc insepuhsisacl kuh in “suli mwet in tuhkuh nuh yurin Kraist ke kahsrwelos in eis wosasuc fohlohkyak sac ke luhlahlfongi ke Jisus Kraist ac Iwaclah Lal, auliyak, pacptais, eis mwe sang luhn Nguhn Muhtahl, ac kwacfeacng nuh ke sahflah” (Preach My Gospel: A Guide to Missionary Service [2004], 1).

Ke mempucr ke Alu uh, kuht kuh, ke ma srihk ac fihsrwacsr kuht kuh in oruh uh, in oruh mwet puhs in akihlen tahfonglac luhn orekma lalos ac kahsruh in usaclos nuh ke etwacack luhn God lalos, sahflahiyac ke molwelah luhn nguhnalos (liyeAlma 37:8).

Ke sie pacl ah nga wi prestuhn luhn stek se ac pisap se in muhtwacta yurin mempucr suhkwac alu se. Kuht lotwel, ke ohiyac arlac fihsrwacsr, ke mwe insewowo ke Lwen Sahpuht. Kuht ahkkahlwemye nuh sel luhngse pwacye lasr. El topuk, “Ma se na nga enenuh ah pa mwet se in tuhkuh nuh yuruk ac use sie abrazo,” kuh asruoki se. Nga tuyak ke pacl sacna ac sruokohl. Lwen se tohkoh ah pa Sacnri. Tamuhlwel se pacna inge tuhkuh nuh ke toeni nuh ke kuhfa luhn Leum yurin sucu nohfohn lal.

Ke sie muhtwacta luhn forfor luti, Martha, sie mempucr luhn ward lasr, el fahk nuh sin muhtwacn kiyuhk ac mwet se weluhl ah in tiac sifil fohlohkoh. El sulaclah in tiac sifil tuhkuh nuh ke alu. Sie sin mwet forfor luti ah siyuck sel Martha fin elos kuh in tuhkweni on soko on in alu ah ke pacl sahflah se inge, ac el insese. Ke elos on, ma wo se orek. Kuhtuh srihk na kuhtuh srihk, Nguhn muhtwacwacack in nwacklah infuckihl ah. Kais sie selos puhla. Insiyacl Martha muhtwacwacack in fihsrwacsrlah. Ke muhtahl sesseslah ke sronin muhta, el fahk nuh sin mwet forfor luti lal nuhnak pwacye luhn insiyacl. Ke pacl sacn, el akihlen muh el etuh muh pwacye wosasuc uh. Ingena el kuloh nuh sin mwet forfor luti lal ac fahk kena se tuh elos in fohlohkoh. E ke lwen sac fahlac, el painguhlos ke engan ke elos muhtwacta.

Martha el muhtwacwacack wi alu yurin tuhlihk muhtwacn fuhsr se nahtuhl. Yac pucspucs elos kwacna wi, ke Martha el tiacna fuhlweack finsrak muh mukul tuhmwacl ac fah sahp sie lwen sulaclah in weluhlos. Sahflahiyac lwen sac tuhkuh ke Leum el pihrihkyac insiyacl, ac el muhtwacwacack in wi yohrohlos, oacna tuhlihk muhtwacn se sahyac nahtuhlos tohkoh. Martha el kuhlwacnsap oaru e ke pacl sacn ke Prestuhn luhn Rilif Sosaiti ke ward lasr, ac mukul tuhmwacl el tuh kuhlwacnsap wo ke kuhtuh kunohkohn ke stek ah. Ma inge nuh kwewa muhtwacwacack ke on luhn soko on in alu ah, ma srihk ac fihsrwacsr se ma pihrihkyac insiyacl Martha.

Naaman el sie mwet kol fuhlwact ke un mwet mweun luhn tohkohsrah luhn Syria, mwet ahkfuhlwactyeyuck se, sie mwet arulacna kuh ac puhlaik, tuhsruhk el weack pac mihsen lepa. (liye 2 Tohkohsrah 5:1). Tukun el tiacna eis mwe ono yurin tohkohsrah luhn acn Israel nuh ke mihsen lepa lal, Naaman el som nuh ke lohm sel Elisha, mwet pahluh. Elisha el suhpwaclah sie mwet kuhlwacnsap nuh yohrohl, fahk:

“Som yihlac ke infacl Jordan pacl itkohsr, na ikom ac fah kwelac liki mas an, ac kom fah nwacsnwacs.

“Tuhsruhk Naaman el foloyak, ac fohlohklac, ac fahk, Liye, Nga nuhnkuh, El ac ilme nuh yuruk, ac tu, ac pahngon inen Leum God lal, ac sruhkwack pahol nuh fin acn sac, ac ahkkweyelah mwet mihsen lepa sac. …

“Ac mwet kuhlwacnsap lal elos kaluhkyang nuh yohrohl, ac sramsram nuh sel, ac fahk, Pahpah tuhmuhk, Mwet pahluh sac fin fahk kom in oruh sie ma na upac, kuh kom ac orwaclah na? efuh ac tiac wo liki, ke el fahk nuh sum, Yihlac, ac nwacsnwacslah?

“Na el oatui, ac sifacna yihlac pacl itkohsr ke Infacl Jordan, oacna ke fahk luhn mwet luhn God: ac ikoacl fohnlah ac fwellac oacna monin tuhlihk fuhsr, ac el nwacsnwacslah” (2 Tohkohsrah 5:10–11, 13–14).

Mwet pahluh lasr, Prestuhn Thomas S. Monson, el tuh suli kuht nuh kwewa in fahsroht ac loangwelah tamuhlwel ac tahmtahel wiyacsr. El fahk: “Facluh enenuh kahsruh lowos. Oasr niyac in ahkkweye, paho in sruokyac, insifac in ahkkweye, insiyac in pihrihkyac, ac nguhna in molwelah. Mwe insewowo luhn pacl ma pahtpaht uh tuhpan kom” (“To the Rescue,” Ensign, May 2001, 48; kuh Liahona, Julahe 2001, 57).

Nga fahkwack luhlahlfongi muh puhs selos suc enenuh kahsruh lasr elos oasr tuhpan kuht. Elos ahkolah ke tamuhlwel ac tahmtahel oaru wiyaclos in tuhtahf nuh yohrohlos ac loangweloslah ke ohiyac srihk ac fihsrwacsr. Nga sifacna is ao pucspucs in muhtwacta yurin mempucr suhkwac wi luhn Alu uh suc insiyaclos ahkfihsrwacsrsrwacsryeyucklac tari sin Leum, suc ahkolah ingena in eis fahkwack luhlahlfongi lasr ac mwe fahkwack luhngse pwacye lasr. Ke kuht tuhtahf ac solwelos, elos ac tiac ahlohloh in fohlohk nuh ke Alu uh.

Lwelah kuht in tuhtahf nuh sin mwet sahyac ke luhlahlfongi ac ke luhngse. Lwelah kuht in esam olwelah Leum El orwaclah ke el fahk muh:

Kuht fin orekma ke lwen lasr kwewa in luti auliyak nuh sin mwet sahyac ac us mwet sefanna nuh Yohrohl, ac oasr engan wowo lasr yurin mwet sacn ke tohkohsrahi luhn Pahpah.

Ac fin engan lasr ac fah wowo yurin nguhna sefanna suc kuht us nuh yurin Mwet Lahngo ke tohkohsrahi luhn Pahpah, ac fuhkah woiyacn engan lasr kuht fin us nguhna pucspucs nuh Yohrohl! (liyeD&C 18:15–16).

Nga fahkwack luhlahlfongi ke luhngse luhn Leum nuh sin tuhlihk Nahtuhl kwewa. Nga etuh El moul ac muh El Mwet in Molwelah lasr. Ke inen Jisus Kraist, amen.