Luti ke Kuh ac Wal luhn God

Mwet in Kahsruh Se Met ke Prestuhnsi Luhlahp luhn Sacnri Skul


David M. McConkie
Leum El ahkolah tari inkacnek nuh sin Mwet Luhlahlfongi ke Lwen-sahflah nuh kwewa ma nwacsnwacs in luti oacna luti luhn Mwet Lahngo.

Kuht tarilacna liki kuht kuh in ahkahlwemye ke mwet luti ke Alu uh yen nuh kwewa. Kuht luhngse kowos ac yohk luhlahlfongi lasr in kowos. Kowos pa sie sin mwe usrnguck wowo ke wosasuc fohlohkyak se.

Ma na pwacye lah oasr ma lukmac in eklac mwet luti pihsrlac se ke wowasuc uh, in luti ke kuh ac wal luhn God. Nga orekmakihn kahs se lukmac mweyen ip yohk se suc ma sie mwet luti oasr kac kuh in kahlwem muhkwena selos ma oasr fahkwack luhlahlfongi ke sie ma sikyak ke lututwacng, wolacna, lwen na kahlwem se, muhtwacwacackiyacn spring ke 1820.

In topuk pruhe puhsisacl se luhn tuhlihk mukul yac 14 se, inkuhsrao ikacklah. God suc Pahpah Ma Pahtpaht, ac Wen Natuhl, Jisus Kraist, sikyang ac sramsram nuh sin Mwet Pahluh Joseph Smith. Fohlohkihnyuckyak luhn ma nuh kwewa tuhpanyuck ke pacl loeloes muhtwacwacack, ac ip yohk ke fwackyuck tuh akwucki ma pahtpaht ke we lasr uh. Pweng lal Joseph, ac pweng lasr nuh facluh, kuh in ahkfototoyeyucklac ke kahs luo: “God El sramsram.” El sramsram ke pacl mahtuh ah, El sramsram nuh sel Joseph, ac El fah sramsram nuh sum. Pa inge ma oruh kom in siena liki mwet luti nuh kwewa fin facluh. Pa oruh kom ac tiac muhnahslah uh.

Pahngonyuck kom ke nguhn luhn palye ac fwackyuck ac kom suleyucklac nuh ke kunohkohn ke kuh ituckot sin pristut. Meac kalmeyacn ma se inge?

Ma se met, kalmac pa kom oruh orekma luhn Leum. Kom oruh orekma Lal uh, ac ahkkweyeyucklac kom ac utuckot ma kunom in Aholuhl ac oruh orekma Lal. Ke kom ekihn mwet orekma Lal, kom lwelah nuh Sel in kahsrwe kom. Enenuh kom in siyuck sum sifacna, “Mac Mwet Lahngo elac fahk fin El luti kuhlahs luhk uh mihsenge, ac Elac fahk fuhkah?” Na kom enenuh in oruh oacna.

Kunohkohn se inge ac kuh in oruh kuhtuh in puhlakihn suhfal kuh finne luhman sahngweng. Inkacnek se inge tiac na upac. Leum El ahkolah tari inkacnek nuh sin Mwet Luhlahlfongi ke Lwen-sahflah nuh kwewa ma nwacsnwacs in luti oacna luti luhn Mwet Lahngo.

Ahkluo, pahngonyuck kom in luti wosasuc luhn Jisus Kraist. Kuht tiac enenuh in luti ke nuhnak lom sifacna kuh ohiyac, finne in srihlucng ke ma suhmuhslah. Wosasuc pa “kuh luhn God nuh ke molwelah,”1 ac kuht ac fah moullac ke wosasuc muhkwena.

Ahktolu, sapkihnyuck kom in luti ip yohk ke wosasuc oacna ke sukokyak ke puk in alu luhn Alu uh, in luti kahs luhn mwet pahluh ac mwet sap mihsenge, ac in luti ma lutiyuck kom sin Nguhn Muhtahl.

Na kuht ac muhtwacwacack oyac?

Kuhnohkohn yohk emet se lasr pa in moulkihn sie moul ma oruh Nguhn Muhahl in oa mwe kolyuck ac mwet wi kuht pacl nuh kwewa. Ke Hyrum Smith el suk in weacng orekma ke lwen-sahflah se inge, Leum El fahk nuh sel lah orekma lal ah pa in liyacacng masap Lal ke kuhiacl nohfohn, nuhnak ac kuh.”2 Pa inge muhtwacwacackiyac uh. Mwe kahsruh, tuhkuh sin Leum nuh sel Hyrum, oacpacna mwe kahsruh el sang nuh sin Mwet Luhlahlfongi ke matwac nuh kwewa.

Sramsram nuh sin mwet luti mihsenge, Prestuhnsi Se Met fahklah: Ma yohk srihpac se emet ke kuhlwacnsap lom ac fah ma nuh ke ahkolah in nguhn lom sifacna, weacng pruhe, lutlut ke ma suhmuhslah, ac ahkos masap. Kuht ngihsre kom in kihsackihnkomyang nuh ke mwe luti luhn wosasuc ke srihpac yohk liki na met ah.”3

Arlac yohk srihpac lah Prestuhnsi Se Met tiacna fahk lah ip yohk srihpac ke kuhlwacnsap lom in ahkolah lesin lom an in wo kuh in orek luti usrnguck. Pwacye lah, kom enenuh in oaru in ahkolah kais sie lesin ac kampare in lotwelah lah kom ac luti fuhkah kom in kuh in kahsruh tuhlihk kom luti an in orekmakihn sulaclah lalos ac lwelah wosasuc in ekuhllah ma elos puhla insiaclos, tuhsruhk ma se met ac yohk srihpac ke kuhlwacnsap lom pa ahkolah lom sifacna, in nguhn. Ke kom ukwe mwe kahsruh se Prestuhnsi Se Met olwelah ohinge: “Nguhn Muhtahl fah kahsrwe kom in etuh ma kom ac oruh. Fahkwack luhlahlfongi lom sifacna fah kapwack, kom ac fah lihksrweni na eklac, ac kom fah fokoko in lain ma upac ke moul uh.”4

Mwe insewowo yohk fuhkah se mwet luti se kuh in kena uh?

Ma se tohkoh an, Leum el sapkihn lah met liki kuht suk in fahkwack kahs Lal, kuht enenuh in suk met.5 Kuht enenuh in eklac mukul ac muhtwacn suc yohk kahlwem la, tuhkuh ke oaru in suk ma suhmuhslah, ac usrui ma inge insiom. Na ke kom siuck ke kahsruh luhn Leum, El ac fah ahkinsewowoye kom ke Nguhn Lal ac kahs Lal. Kuh luhn God nuh ke sikunyact luhn mwet.

Paul el fahk nuh sesr lah wosasuc el tuhkuh nuh sin mwet uh ke inkacnek luo, ke kahs ac ke kuh.6 Kahs luhn wosasuc sihmlac lun ma suhmuhslah uh, ac kuht kuh in sokwack kahs uh kuht fin oaru in suk. Kuh luhn wosasuc tuhkuh nuh in moul lalos suc moulkihn oruh Nguhn Muhtahl el weluhlos ac suc ukwe pihrihkyuck elos eis. Kuhtuh lohacng muhkwena in eis kahs, ac elos eklac mwet pihsrlac in luti ma in etweyuck. Kuhtuh tiac sang insiyac in ahkolah ac finsrak muh Leum ke wolacna Lal elac fah ke kuhtuh ohiyac kahsrweloslac liki pacl in kuhlahs lalos. Kom tiac kuh in motko Nguhn in kahsrwe kom esam ma suhmuhslah ac ip yohk kom tiac lutlutkihn kuhn nuhnkuh. In orwaclah sie mwet luti wowo luhn wosasuc, enenuh in oasr yurum kwewana kahs ac kuh luhn wosasuc in moul lom an.

Alma el kahlwem ke ip yohk inge ke el enganwack ke wen nahtuhl Mosiah ac ohiyac elos luti ke kuh ac wal luhn God. Kuht riti:

“Tuhlihk mukul nahtuhl Mosiah elos mwet yohk kahlwem la mweyen elos oaru in suk ma suhmuhslah elos in muh etuh kahs luhn God.

Tuhsruhk tiac pa na inge, elos pruhe ac lalo upac ac inge elos eis nguhn luhn palye ac nguhn luhn fwackyuck.”7

Ma se tohkoh, kom enenuh in etuh in lohng. Elder Jeffrey R. Holland el luti ip yohk se inge nuh sin misineri uh. Nga fah tahfuh kahs lal Elder Holland ac tuhsruhk eis kuh in ahollah acn luhn misineri ac mwet sirape nuh ke acn luhn mwet luti ac tuhlihk lutlut ke akfuhlwact yohk: “Ahkluo nuh ke ma kunacn [mwet luti] se in lohng sin Nguhn, pa ma kunacltahl in lohng [tuhlihk lutlut]. … Kuht fin lohng ke epacl nuh sin nguhn, …[tuhlihk lutlut nahtuhsr] fah fahk nuh sesr lesin eltahl enenuh in lohng uh!”

Elder Holland el tahfwelah: “Pwacyeiyacn ohiyac se pa [mwet luti] elos arlac motkoelah in luti ma fihsrwacr, kalweniuck koanon lesin likina in lohacng nuh sin [tuhlihk lutlut] lalos oacna kais sie.”8

Tukun kom ahkwekomlac sifacna ac lesin lom an ke kuhiyom kwewa, kom enenuh in lwelah in fuhlwelah. Ke pihrihkyuck mihs luhn Nguhn Muhtahl tuhkuh, enenuh in oasr kuh lom in fihliyac nuh sahyac tahkuhnlah ac ma sihmlac lom an ac som nuh acn ma mokleyuck ingacn ac us kom nuh we an. Ke kuht oruh ma inge, lesin kom oruh an tiac ma lom, tuhsruhk ac orwaclah lesin luhn Mwet Lahngo.

Ke kom kihsackihnkomlac in moulkihn wosasuc ke srihpac yohk liki na met ah ac suk ma suhmuhslah, usruikihn insiom, Nguhn Muhtahl se pacna, suc fahkwack kahs inge nuh sin mwet sap ac mwet pahluh met ah, fah fahkwack nuh sum ke ma pwacye lalos. Pwacyeiyac uh, Nguhn Muhtahl el fah sulpac fahkwack kac nuh sum. Ke ma inge sikyak uh, kahs kom riti inge tiac kahs lal Nephi kuh Paul kuh Alma muhkwena, tuhsruhk ac orwaclah kahs lom. Na, ke kom luti, Nguhn Muhtahl fah kuh in use ma nuh kwewa nuh ke esam lom an. Pwacyena, el fah acse nuh sesr ma kuht fah fahk ke ao se na kuht enenuh.”9 Ke ma inge sikyak kom fah konwacack sum sifacna in fahk ma kom tiac plwacni in fahk. Na, kom fin ac lohacng kom ac fah lotwelah ma se ke ma kom fahk ke kom luti an. President Marion G. Romney el fahk, “Nga kwacna etuh ke pacl se nga sramsram ke ma mokleyuck sin Nguhn Muhtahl mweyen nga kwacna lotwelah ma se ke ma nga fahk uh.”10 Esam, sie mwet luti el sie pac tuhlihk lutlut.

Ma sahflah, kom enenuh in muhkwena lohoh ke ma kom luti ac in tiac kalweni na ke kahs lun puk uh kuh nuhnak se luhn mwet sahyac uh. Ke kom kuhfenyuck ke kahs luhn Kraist ac srihke in moulkihn wosasuc ke srihpac yohk emet liki met ah, Nguhn Muhtahl fah ahkkahlwemye nuh sum lah ma kom luti an pwacye. Pa inge nguhn luhn fwackyuck, ac nguhn sepacna inge fah us pweng lom an nuh insiyacn mwet ma kena ac luhngse eis kac.

Lwelah kuht inge in ahksahfye acn kuht sramtweack we—lun Insack Muhtahl sac. Ke srihpen ma sikyak ke lututacng kahto ke spring sac ke pacl fototo somlah ah, ma kunom in luti ke kuh ac wal luhn God.  Ke ma inge nga fahkwack lohoh muhtahl ac siena luhk ke inen Jisus Kraist, amen.

Mostrar las referencias

  1.  

    1. Liye Mwet Rom 1:16.

  2.  

    2. Liye Doctrine and Covenants 11:20.

  3.  

    3. Prestuhnsi Se Met, ke Teaching the Gospel in the Savior’s Way: A Guide to Come, Follow Me: Learning Resources for Youth (2012), 2.

  4.  

    4. Pretuhnsi Se Met, ke Teaching the Gospel in the Savior’s Way, 2.

  5.  

    5. Liye Doctrine and Covenants 11:21.

  6.  

    6. Liye 1 Teslonika 1:5.

  7.  

    7. Liye Alma 17:2–3.

  8.  

    8. Jeffrey R. Holland, “The Divine Companionship” (sramsram ituckyang ke seminar nuh sin misin prestuhn sasuc, June 26, 2009), 7, 8, Church History Library, Salt Lake City; ahkuhtweyac wo ke ma oreklac.

  9.  

    9. Liye Doctrine and Covenants 100:6.

  10.  

    10. Marion G. Romney, ke Boyd K. Packer, Teach Ye Diligently (1975), 304.