Bar Roolļo̧k N̄ane


M. Russell Ballard
Jemaron̄ aolep jejjetļo̧k ad bōk koņaad ilo jerbal in mijenede jen ad joļo̧k mijak kōn tōmak em̧ool.

Jiljinon̄oul emān iiō ko rem̧ootļo̧k Jeptōm̧ba in, iaar rool n̄an m̧weo jān mijen eo aō ilo England. Jilu raan ālkin, iaar pād ilo juon eb jinoin jikuuļ ilo University an Utah ippān juon m̧ōtta. Eaar jiron̄ eō kōn juon sophomore elikatu etan Barbara Bowen eo eaar ļōmņak ij aikuj ioon e. Eaar bōktok e im kwaļo̧k kadkadim, im kōm̧ ar jino eb.

Jerata, menin ekar ta eo kōm̧ kijon̄ ba juon “tag dance,” meļeļein bwe kwoj aikuj in eb ippān leddik eo m̧ae juon armej ej jibwe aeram̧ im kobōjrak ak ewōnm̧aanļo̧k wōt. Barbara eaar kekemo̧o̧j im bun̄bun̄, kōn menin iaar aikuj in wōt kar eb ippān ium̧win juon minit m̧okta jen an juon bar likao jibwe aera.

Eaar jab em̧m̧an ippa. Jen aō kar katak aorōk in bar roolļo̧k n̄ane ilo mijen eo aō, iaar bōk taļboon nōm̧ba eo an im iaar kūrļo̧k e raan eo tok juon n̄an kajjitōk an bwebwenato ippa, ak eaar boub kōn jikuuļ im kalim̧m̧ūr ko jet an. Kam̧oolol mijen eo aō eaar katakin n̄a kijenmej ilo jelm̧ae ebbweer, im iaar maron̄ bōke im bwebwenato. Im bwebwenato eo im eaar tōlļo̧k n̄an ro jet. Ilo jet wāween ilo iien bwebwenato ko iaar maron̄ in kwaļo̧k n̄an e bwe iaar baj juon mijenede ej kab rool wōt im emour—eļaptata āinwōt e ej aikuj jeļā kake. Kiiō, 64 iiō tokālik, ewōr jiljimjuon ajri ro, elōn̄ jibūm̧ im jibūm̧ jibūm̧ ajri ro rej jutak āinwōt kam̧ool in m̧ool in em̧m̧an jekdo̧o̧n ewi em̧m̧an in ennaan eo am̧, emaron̄ ejjeļo̧k am̧ iien n̄an leļo̧k n̄e ejjeļo̧k bar iien roolļo̧k n̄ane ejejjet, kijenmej.

En̄in etke iaar maron̄ en̄jake im̧we n̄an bar roolļo̧k n̄ane rainin n̄an ruo iaan ennaan ko aō jen kweilo̧k ko reļļap m̧oktaļo̧k.

Ilo Oktoba 2011 kweilo̧k eo, iaar rōjan̄ bwe jen keememej ta eo Irooj eaar jiron̄ kōn kabun̄ eo An aikuj ņaetan ilo raan ko āliktata: Kabun̄ eo an Jisōs Kraist im Armej ro Rekwojarjar ilo Raan-ko Āliktata.1

Ippān naan kein, Irooj ej kalikkar bwe ej jab taitōļ wōt ak āt eo Kabun̄ eo An enaaj kar ņaetan. Kar letok kōmlet eo An ealikkar, jej jab aikuj ān̄inn̄in e Kabun̄ eo jen jabdewōt bar āt, āinwōt “Mormon Church” ak “LDS Church.”

Naan in Mormon emaron̄ jejjetļo̧k kōjerbal ilo jet kōnono rej iookļo̧k membōr ro an Kabun̄ eo, āinwōt Mormon paineer ro, ak n̄an institution ko āinwōt Mormon Tabernacle Choir. Membōr in Kabun̄ in eļap jeļā kake er āinwōt Mormon ro, im ilo iktōltōl ko ippān ro rej jab jān tōmak in ad, jemaron̄ jejjet kōnono kōn kōj make āinwōt Mormon ro, eļan̄n̄e jej kobaik meļeļe in ippān likio in etan Kabun̄ in.

N̄e membōr ro rej katak kilen kōjerbal jim̧we in etan Kabun̄ in ilo kobaiki ippān naan eo Mormon, enaaj kwaļo̧k bwe jej Rikūrijin, membōr ro an Kabun̄ eo an Rilo̧mo̧o̧r eo.

Ro jeiū im jatū, jen bar roolļo̧k n̄ane im ejaake juon imminene ilo aolep iien kalikkar bwe jej jen Kabun̄ eo an Jisōs Kraist im Armej ro Rekwojarjar ilo Raan-ko Āliktata.

Ennaan eo kein karuo ij en̄jake bwe ij aikuj bar roolļo̧k n̄ane kar letok ilo kweilo̧k eo eļap ļo̧k ke iaar rōjan̄ membōr ro n̄an jar bwe ren tōl ļo̧k n̄an diktata juon armej n̄an ro remaron̄ leļo̧k juon kūr n̄an katak kōn ko̧jpeļ eo eaar jepļaaktok m̧okta jen Kūrijmōj. Elōn̄ membōr ro raar kwaļo̧k ippa jet en̄jake ko aer make āinwōt juon wāween aer kajjitikin Irooj kōn iien ko rem̧m̧an an mijenede.

Juon mijenede ej kab rool, n̄an waanjon̄ok, eaar jar bwen tōl n̄an “juon” eo emaron̄ tōpare. Etan juon kar rijikuuļ in kaļej m̧ōttan eaar itok n̄an ļōmņak eo an. Eaar kōnono ippān kōjerbal facebook, im eaar katak bwe eaar jar kōn jibadbad im meļeļe in mour eo an. Eaar bar roolļo̧k n̄ane iien eo wōt ke ej pukōt m̧ool eo, im ilo Tijem̧ba eo eaar peptaij.

Elōn̄ kain karuwainene rot in kar ribo̧o̧ti tok n̄an n̄a, ak jejjo raar maron̄ bar roolļo̧k n̄ani āinwōt būratōr in eaar kōm̧m̧ane.

Ij juon ritōmak eļap ilo pedped in katak an bar roolļo̧k n̄ane. Āinwōt an ba ilo bok in tōl an mijenede Preach My Gospel, “leļo̧k juon kalim̧m̧ur ilo an ejjeļo̧k bar roolļo̧k n̄ane ej āinwōt jinoin juon iaļ ejjeļo̧k jem̧ļo̧kin ak wiaki juon tikōt n̄an juon iien kōjan̄jan̄ im jab etal n̄an m̧ōn pija eo. Jab kadedeikļo̧k m̧akūtkūt eo, kalim̧m̧ur eo ejjeļo̧k koban.”2

Preach My Gospel ej katakin aolep wāween jab wōt karuwainene ak barāinwōt wāween n̄an bar roolļo̧k n̄ane kalim̧m̧ur ko ad. Jibadbad eo an jerbal in mijenede ej kōmeļeļeik āinwōt karuwaineneik “ro jet n̄an itok n̄an Kraist jen jipan̄ er bōk ko̧jpeļ eo emōj an jepļaaktok jen tōmak ilo Jisōs Kraist im Pinmuur eo An, ukweļo̧k, peptaij, bōk menin letok eo an Jetōb Kwojarjar, im niknik n̄an jem̧ļo̧kin.”3

Karuwainene ej m̧ōttan wōt jerbal in. Ak jeļā bwe eļap ijo n̄an jerbal in mijenede n̄an membōr ro jen leļo̧k karuwainene ko n̄an armej ro n̄an ron̄jake mijenede ro. Ej barāinwōt kitbuuj bar roolļo̧k n̄ane ippān mijenede ro ilo ejaak tōmak, kadeleel n̄an ukweļo̧k, m̧aanjebpopo n̄an kōm̧m̧an bujen ko im niknik n̄an jem̧ļo̧kin.

Pedped in katak an bar roolļo̧k n̄ane ej kōmeļeļeik ilo bok in Jerbal:

“Im kiiō Piter im Jon rej wanlōn̄ļo̧k n̄an ilowaan tempel. …

“Im juon armej e kūrro jān lo̧jien jinen, im raar bōktok im likūt e raan otemjej ņa iturin kōjam in tempel, etan kōjām eo Wūlio, ej kajjitōk m̧weien tūriam̧o jān ro rej deļo̧n̄ ilowaan tempel;

“Ke ej lo Piter im Jon re nan̄in deļo̧n̄ ilowaan tempel, ej kajjitōk m̧weien tūriam̧o.

“Im Piter ej kalimjeke kab Jon, im e ba, “Kwōn lale kōmro.”

“Im ej eo̧ron̄ erro, im ļōmņak enaaj bōk men eo jabdewōt jān er.

“A Piter ej ba, “Ejjeļo̧k silver ak gold ippa, a men eo ewor ippa, ij lewōj n̄an eok: Ilo etan Jisōs ri Nazeret, kwon jutak im etal.”

Ej juon karuwainene ekajoor jān juon rikarejar an Irooj, ej ke? Ak Piter eaar jab bōjrak wōt ilo karuwainene in. Bwebwenato in ilo eoon in ej jiron̄ kōj bwe “ej jibwe anmooņōn, im kajutak e: im e m̧ōkaj an pen neen im kwōlelein neen.

“Im ej kaure im jutak, im etetal, im ej deļo̧n̄ ippāerro ņa ilowaan tempel; ej etetal, im kāke, im wūjtake Anij.”4

Ilo bar ba, Piter eaar jab baj leļo̧k wōt mālim in priesthood eo an im karuwaineneik em̧m̧aan in n̄an jutak im etal. Eaar barāinwōt bar roolļo̧k n̄ane kōn karuwainene eo an jen an leļo̧k pein n̄an em̧m̧aan in, jibwe kōn anmooņōnin pein, kotak e, im etetal ippān n̄an tampeļ eo.

Ilo waanjon̄ok in jetōb an Piter, in kwaļo̧k bwe jemaron̄ aolep jejjetļo̧k ilo ad bōk koņaad ilo jerbal in mijenede jen ukōt mijak ko ippān m̧ool ilo tōmak, karuwaineneik juon armej diktata juon kōttan juon kuwōta—emān kōttan aolep iiō—n̄an maron̄ katakin jen mijenede ro. Rej pojak n̄an katakin jen Jetōb eo kōn m̧ool im im̧we eo jān Irooj. Ippān doon jemaron̄ bar roolļo̧k n̄an karuwainene ko ad bōk ro jet kōn pā, kotak er, im etetal ippāer im etetal ippāer ilo ialen ito itak in aer ilo jetōb.

N̄an jipan̄ kom̧ ilo jerbal in, ij karuwaineneik aolep membōr ro, men̄e kūr eo am̧ kiiō ak jon̄an m̧akūtkūt ilo Kabun̄ in, n̄an bōk juon kape in Preach My Gospel. Epād ilo jikin leto letak m̧weiūk ko im ejjeļo̧k wōnāer online. Ej juon bok in tōl n̄an jerbal in mijenede—eo ej meļeļe ej juon bok in tōl n̄an kōj aolep. Riiti, katak jene, innām kōjerbal ta eo kwoj katak n̄an jipan̄ eok meļeļe wāween bōktok jetōb ko n̄an Kraist jen karuwainene im bar roolļo̧k n̄ane. Āinwōt an Būreejtōn Thomas S. Monson ba, “Kiiō ej iien n̄an an membōr ro im mijenede ro itok ippān doon, n̄an jerbal ippān doon, n̄an jerbal ilo jikin kallib an Irooj n̄an bōktok jetōb ko n̄an E.”5

Jisōs Kraist eaar katakin rikaļoor ro An:

“Eļap jonikōn, a e iiet ri jerbal;

“Innām kom̧win jar n̄an Irooj in m̧adm̧ōd, bwe En jilkinļo̧k ro ri jerbal ilo jikin m̧adm̧ōd eo An.”6

Irooj eaar uwaake jar in ilo raan kein ad kōn oran eo eļap an mijenede ro ilo bwebwenato in laļ in. Ilo ibeb in ņo̧ in ekāāl an rijerbal ro retiljek, Irooj eaar letok n̄an kōj bar juon iien em̧m̧an n̄an jipan̄ E ilo jonikōn in eļap an jetōb ro.

Erkein rej wāween jerbal ko n̄an membōr ro n̄an jipan̄ im rie mijenede ro rekabwilōn̄lōn̄. N̄an waanjon̄ak, komaron̄ ba n̄an mijenede ro bwe kwoj katak jen Preach My Gospel im kajjitōk ippāer n̄an kwaļo̧k n̄an kwe ta eo rej katak ilo ekkatak ko aer. Ilo ami kwaļo̧k ippān doon, leke ej eddōkļo̧k ikōtaan membōr ro im mijenede ro naaj lukkuun ejaak, āinwōt Irooj eaar kean̄:

Bwe aolep em̧m̧aan im kōrā rej aikuj kōnono ilo etan Anij Irooj, eo ej Rilo̧mo̧o̧r an laļ.7

Im E barāinwōt ej jilkinļo̧k membōr ro n̄an kam̧ool im kakkōļ armej, im emōj ba bwe aolep armej ro raar kakkōļ er aikuj kakkōl riturin.8

Ro jeiū im jatū, komaron̄ ke kōlmenļo̧kjeņ kōn tōprak eo n̄e baam̧le im ro m̧ōttad rej kitbuuji men ko rej katak jān ekkatak eo aer make jen Preach My Gospel ilo leta ko aer im imāeļ ko n̄an mijenede ro? Komaron̄ ke pijaik kōjeram̧m̧an ko renaaj itok n̄an baam̧le ko n̄e rejeļā im meļeļe ļo̧k ta eo ļaddik im leddik ro nejier naaj katak im katakin ilo mijen ko aer? Im komaron̄ bōlen jino n̄an jon̄e damoļo̧k in lutōktok in tūriam̧o in pinmuur eo naaj ad, kajjojo im aolep, ekkar n̄an kalim̧m̧ur an Rilo̧mo̧o̧r eo n̄an aolep ro rej kwaļo̧k naan in kam̧ool ilo jerbal in karuwainene jetōb ko n̄an itok n̄an E—im bar roolļo̧k n̄an karuwainene ko?

“Kom̧ij jeram̧m̧an,” Irooj eaar ba kōn Rikanaan Joseph Smith bwe n̄e jej kwaļo̧k ko̧jpeļ eo jej jeram̧m̧an, kōnke naan in kam̧ool eo jej kwaļo̧k ej reko̧o̧t ilo lan̄ n̄an an enjeļ ro lale, im rej lan̄lōn̄ iood, im ad jerawiwi rej jako.9

Bwe Irooj eaar barāinwōt kalim̧m̧ur bwe Enaaj jeorļo̧k ad jerawiwi, innām letok kien in—bwe jen pād wōt dim ilo kwaļo̧k naan in kam̧ool n̄an aolepān laļ in kōn men kein rej kōnono kake n̄an kōj.10

Eļan̄n̄e jej bar ro̧o̧lļo̧k n̄ane, Irooj eban lelaļļo̧k kōj. Iaar loe lan̄lōn̄ eo eļap ej itok ippān naan in kam̧ool eo ej karuwainene im tiljek bar roolļo̧k n̄ane ilubwilijin membōr ro an Kabun̄ in aolepān laļ in. Ke iaar jem̧aanļo̧k pād ilo Argentina, iaar rōjan̄ membōr ro n̄an karuwainene juon armej n̄an kabun̄ in m̧okta jen kweilo̧k in eļap. Juon ralitōk iiō etan Joshua eaar ron̄jake im kar karuwaineneik eo m̧ōttan im baam̧le eo an n̄an juon iien wate ward eo aer ilo Buenos Aires. In riit jān juon leta iaar bōke eo ej kōmeļeļeik karuwainene in an Joshua im bar roolļo̧k n̄ane eo an etiljek.

“Aolep jejjo minit ko [Joshua] enaaj ettōr ņamōjļo̧k n̄an gate eo n̄an lale eļan̄n̄e raar itok. Eaar ba bwe eaar jeļā renaaj [itok].

“Joten eo ro m̧ōttan Joshua raar jab itok, ak Joshua eaar jab ebbweer. Eaar tiljek im̧aan kōjem̧ eo aolep jejjo minit ko. Eaar iien n̄an jino kakkoņ men otemjej ke Joshua eaar jino kelōn̄ kelaļ kōjjeļļā, ‘Repād ijin! Repād ijin!’ Iaar reilo̧k n̄an lale juon baam̧le ej itaak tok m̧ōnjar eo. Joshua eaar ettōr namōjļo̧k n̄an iakiakwe er im bakwōj eo m̧ōttan. Raar aolep itok im lo im m̧ōņōņō eļap ilo iien wate m̧ōnjar eo. Raar bōk peba jidik ko im joļo̧k eļap iien n̄an jeļā kajjeen jet m̧ōttaer rekāāl. Eaar lukkuun em̧m̧an n̄an lo tōmak an ļaddik in edik im jeļā bwe ajri ro ilo Būraimere remaron̄ bar mijenede ro.”11

Ej aō naan in kam̧ool ilo ad kajjieon̄ kōm̧m̧ane ijo koņaad, pukōtļo̧k juon, karuwainene, im bar roolļo̧k n̄ane kōn leke im tōmak āinwōt Joshua, jenaaj lo bukwi taujin ajri ro nejin Anij ro renaaj kobatok ippād āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Anij en kōjeram̧m̧an kōj aolep ilo kijejeto ko ad n̄an kōm̧ōkajļo̧k jerbal eo An, ij jar ilo ettā ilo etan Jisōs Kraist, amen.

Kwaļo̧k Kein Jipan̄ ko

  1.  

    1. Doctrine and Covenants 115:4.

  2.  

    2. Preach My Gospel: A Guide to Missionary Service (2004), 200.

  3.  

    3. Preach My Gospel, 1.

  4.  

    4. Jerbal 3:1–8; aorōk eo kar kobaik.

  5.  

    5. Thomas S. Monson, “Karuwainene n̄an Kweilo̧k eo,” Ensign akLiaona,Okt. 2013, 4.

  6.  

    6. Matu 9:37–38.

  7.  

    7. Doctrine and Covenants 1:20.

  8.  

    8. Doctrine and Covenants 88:81.

  9.  

    9. Doctrine and Covenants 62:3.

  10.  

    10. Doctrine and Covenants 84:61.

  11.  

    11. Personal letter, Mar. 10, 2014.