“O Fafagu ma Toefaaolaolaina,” Autu o le Talafaasolopito o le Ekalesia
“O Fafagu ma Toefaaolaolaina”
O Fafagu ma Toefaaolaolaina
Pe tusa o le 1829, sa alu ai Nancy Alexander e 13 tausaga le matua i se sauniga tele a le Metotisi. “Sa ufitia le silia ma le tasi le eka o le fanua i o latou faleie,” sa ia manatuaina, ma “sa faia a latou sauniga mo le tele o aso ma sa tele a latou tagata liliu mai sa maua ai.” I le taimi o sauniga, sa valaaulia ai o ia e se faifeau i le “nofoa o le au naunau,” lea o le a maua ai e ia ma isi se faamalosiauga mai le potopotoga atoa e liliu atu o latou olaga ia Keriso. “Sa ou lei mauaina lena suiga o le loto,” sa ia ta’utino atu ai. O i latou na alalaga,”Ia viia Aleluia, ua ou maua se tapuaiga,” sa ia toemanatua ai, “Ae sa leai lava se eseesega na ou lagonaina.”
O se maatusi o loo faaalia mai ai se fonotaga toefaaolaola po o se tolauapiga.
Na auai atu foi Iosefa Samita i ni fonotaga toefaaolaola a o talavou o ia, ma e faapei o Nancy, sa manao o ia e “lagonaina & le fia alaga e pei o tagata Uma” ae “sa le mafai ona ia lagonaina se mea.” O le tauiviga a le au sailiili e pei o Nancy ma Iosefa e “maua se tapuaiga” ma le aufailotu ia maua ni e liliu mai ma faamalolosia ai a latou ekalesia na matua’ia ai ia toefaaolaolaina faaleltou lea na lilofia ai matusisifo o le Iunaite Setete i le uluai fiasefulu tausaga o le 1800.1
O le Fesuiaiga Tele o Faigamalo o Amerika na aumaia ai se malo fou, o se tasi na tuuto atu i le puipuiga o le saolotoga o tapuaiga faalelotu. O le taimi foi lea, na mataitu ai e faifeau le pa’ulia o a latou potopotoga, ua i lalo ifo o le 20 pasene le auai i le tele o setete. O le tali atu i ai, na sailia ai e faifeau mai le tele o ekalesia le faama’itea o le faatuatua sili atu o a latou aulotu. O ekalesia sa lagolagoina e le malo ua le toe maua lo latou avanoa, ma ua tatala ai le avanoa mo le au folafola mai le anoanoai o ekalesia eseese e sailia ai ma le finafinau ia tagata liliu mai. O le salalau o le toefaaolaolaina---lea o le a faaigoa mulimuli ane e le au fai talafaasolopito o le Fafaguina Tele Lona Lua---na musuia ai le tele o le Au Porotesano Amerika e faataitai ia aulotu eseese, ofo atu mo faamoemoega faaagafesootai, ma faalauiloa o latou talitonuga faa-Kerisiano.2
O le agaga o le fafaguina na faamalosia ai alii ma tamaitai o ituaiga uma ma mai itu uma o le olaga. O vaega e pei o le Episikopalia, Faapotopotoga, ma le Periperiane sa latou faia ni tapuaiga e sili atu le faatulagaga. O a latou toefaaolaolaina e masani ona aofia ai lauga aloaia ma talaiga i Aso Sa, ma o latou faifeau e matuai tuu i le loloto a latou faaupuga e faasegia ai aulotu i se tuuto sili atu. E ese mai ai, o le Metotisi ma le Papatiso sa o latou tauanauina nuu i tua, sa faia a latou vasega ma sauniga tapuai. A o faalauteleina atu a latou malaga taamilo i le faatausiusiuga o tuaoi, e toatele le aumalaga na lauiloa i lo latou lototetele e avatu le talalelei i itulagi maotua. I le tele o nuu i tua, o le talaiga na faia ai fonotaga i tolauaiga e moea ia na tosina mai ai le motu o tagata mo le tele o aso i taimi taitasi.
O le liua patino, o le itu iloga lea o le talaiga a le au toefaaolaola, sa o se mea na tosina i ai le au saili o talitonuga faalelotu o e sa lei faamalieina i ekalesia sa faumalo i lena taimi. O tala o le liua mai sa faamamafaina ai se lotofuatiaifo tausalaina, o se iloa o le a tauamiotonuina le Atua i le lafoina o se agaga i lalo i seoli, ma se molimau maoae e faapea ua oo mai le alofatunoa o Keriso e laveai. A o molimau atu uo ma tuaoi i na aafiaga, sa matua faateleina le fiafia ma le malolosi i lotu ma sosaiete toeiloilo.
Autu e fesootai: Christian Churches in Joseph Smith’s Day, Religious Beliefs in Joseph Smith’s Day, Joseph Smith’s First Vision Accounts