Taiala o le Faatinoga mo Au Peresitene o Siteki ma Au Epikopo
Sau, Mulimuli Mai ia te A’u: Ola Ai, Aoaoina, ma le Aoao Atu o le Talalelei a Iesu Keriso
Ia Ianuari 2019, o le a amata faaaoga ai e tagata o le Ekalesia i le salafa o le lalolagi ia punaoa fou e tolu ua mamanuina e lagolagoina ai le aoaoina ma le aoao atu o le talalelei i le aiga ma i le lotu:
-
Sau, Mulimuli Mai ia te Au—Mo Tagata Taitoatasi ma Aiga
-
Sau, Mulimuli Mai ia te A’u—Mo le Aoga Sa
-
Sau, Mulimuli Mai ia te A’u—Mo le Peraimeri
O nei punaoa o le a suitulaga i tusi lesona o loo i ai nei o le Mataupu Faavae o le Talalelei ma tusi lesona a le Peraimeri (ae o vasega pepe o le a faaauau pea ona faaaogaina le Faauta i o Outou Tamaiti: Tusi Lesona a le Vasega Pepe [2008]). O le a maua [nei tusi lesona] i le polokalama o le Potutusi a le Talalelei ma i le comefollowme.lds.org. O le a mafai foi ona meliina atu ia kopi ua lolomiina i uarota ma paranesi ia outou siteki.
Ua valaauliaina au peresitene o siteki e faia se fonotaga mo le faatinoga e faailoa atu ai nei punaoa fou i taitai o le siteki ma uarota. A uma le fonotaga lenei, e tatau i epikopo ona faia se fonotaga o le faatinoga a le uarota mo tagata uma o le uarota. E fautuaina atu e lenei taiala o le faatinoga ia punaoa ma fesili o talanoaga mo nei fonotaga taitasi.
Fonotaga o le Faatinoga a le Siteki
I le avea ai ma au peresitene o le siteki, faamolemole ia faia se fonotaga o le faatinoga faatasi ai ma taitai nei: tagata uma o le aufono a le siteki, au epikopo uma, au peresitene o Aoga Sa a le uarota, au peresitene o Peraimeri a le uarota, faiaoga o Aoga Sa a le uarota (tuu i le faitalia), ma faiaoga o Peraimeri a le uarota (tuu i le faitalia).
Faamolemole ia faia mea nei i le fonotaga lenei:
-
Tuu atu ia tofu tagata auai ma ni kopi o le “Pepa e Tufa Atu mo Tagata Taitoatasi, Aiga, ma Faiaoga.”
-
Tuu atu ia tofu le au epikopo ma se kopi o lenei taiala o le faatinoga.
-
Iloilo ma talanoa faatasi i le otootoga mo fonotaga o le faatinoga a le uarota o loo i ai i lenei taiala o le faatinoga. I le avea ai ma se vaega o la outou talanoaga, iloilo ia punaoa fou ma maimoa i vitio o loo faasino i ai i le otootoga (o loo maua i le comefollowme.lds.org ma le polokalama o le Potutusi o le Talalelei). E tatau ona avea lenei talanoaga ma se faataitaiga mo fonotaga o le faatinoga a le uarota.
-
Valaaulia taitai o le uarota ma le siteki e faasoa mai o latou manatu ma uunaiga e uiga i le auala e mafai ona faamanuiaina ai e punaoa fou ia tagata taitoatasi ma aiga i le siteki.
Fonotaga o le Faatinoga a le Uarota
I le avea ai ma se au epikopo, faamolemole ia faia se fonotaga e tasi pe sili atu o le faatinoga mo le uarota e faailoa atu ai ia punaoa fou o le Sau, Mulimuli Mai ia te A’u i le autalavou ma tagata matutua uma o le uarota. E mafai ona faia nei fonotaga i le taimi o le itula lona lua ma le lona tolu o sauniga tuufaatasi o le Aso Sa mo i latou o e mafai ona auai atu i na taimi. Afai e manaomia, e mafai ona faia se fonotaga e ese mai ai mo faiaoga o le Aoga Sa ma le Peraimeri. E mafai ona faia ni fonotaga se tele i le aluga o le tele o vaiaso.
Ao lumanai po o le taimi foi o fonotaga o le faatinoga mo le uarota, tuu atu ia tofu aiga ma se kopi o le “Pepa e Tufa Atu mo Tagata Taitoatasi, Aiga, ma Faiaoga.”
E mafai ona fesoasoani mataupu faavae nei i la outou talanoaga.
Mataupu Faavae e Taialaina Ai
Faaogatotonuina le Aiga |
Lagolagoina le Ekalesia |
O le aiga o le nofoaga sili ona lelei e ola ai, aoao ai, ma aoao atu ai le talalelei (tagai 3 Nifae 17:3; MFF 68:25). |
E lagolagoina i tatou e vasega i le lotu i le ola ai, aoaoina, ma le aoao atu o le talalelei (tagai Moronae 6:4–5). |
E tatau ona avea lo tatou aoaoina ma le aoao atu o le talalelei ma se vaega o o tatou olaga i aso taitasi (tagai Teuteronome 6:6–7; Galuega 17:11). |
E uunaia e faiaoga tagata aoao ina ia lagona le mana o le afioga a le Atua mo i latou lava (tagai Alema 32:27–30). |
O le suesueina o tusitusiga paia o le a aumai ai le mana i o tatou olaga (tagai 2 Nifae 32:3; Alema 17:2–3; Helamana 3:29–30). |
E fesoasoani faiaoga i tagata aoao ia iloa upumoni o le talalelei ma valaaulia i latou e faasoa atu o latou malamalamaaga (tagai MFF 88:122). |
Tagata Taitoatasi ma Aiga
Tuu atu ia tofu aiga ma se kopi o le Sau, Mulimuli Mai ia te A’u—Mo Tagata Taitoatasi ma Aiga, ma valaaulia tagata o le ekalesia e faaaoga ni nai minute e iloilo ai, e aofia ai ma itulau tomua. Faaali le vitio “Introduction for Individuals and Families” (comefollowme.lds.org), ma talanoa i fesili e pei o [fesili] nei:
-
E faapefea ona tatou faia o tatou aiga o se nofoaga autu o le ola ai , aoaoina, ma le aoao atu o le talalelei?
-
O a faamanuiaga e oo mai i tagata taitoatasi, aiga, ma le Ekalesia pe a avea le aiga ma se nofoaga autu o le ola ai, aoaoina, ma le aoao atu o le talalelei?
-
O le a se mea o e vaai i nei punaoa o le a fesoasoani ia te oe ma lou aiga?
Aoga Sa (mo le Autalavou ma Tagata Matutua)
Tuu atu ia tofu faiaoga uma o le Aoga Sa ma se kopi o le Sau, Mulimuli Mai ia te A’u—Mo le Aoga Sa, ma valaaulia i latou e iloiloina. Faaali le vitio “Introduction for Sunday School” (comefollowme.lds.org), ma talanoa i fesili e pei [o fesili] nei:
-
O le a se mea o e iloaina e uiga i le matafaioi a tagata aoao i lenei mataupu aoaoina fou?
-
Aisea e taua ai le uunaia e faiaoga ma atiae le aoaoina o le talalelei i le aiga?
-
E faapefea ona tatou faamautinoaina ua taulai atu a tatou vasega i le malamalama ai i le mataupu faavae?
Peraimeri
Tuu atu ia tofu faiaoga uma o le Peraimeri ma se kopi o le Sau, Mulimuli Mai ia te A’u—Mo le Peraimeri, ma valaaulia i latou e iloiloina. Faaali le vitio “Introduction for Primary” (comefollowme.lds.org), ma talanoa i fesili e pei [o fesili] nei:
-
E mafai faapefea ona fausia e faiaoga se fesootaiga malosi i le va o mea sa aoaoina e tamaiti i le aiga ma mea sa latou aoaoina i le Peraimeri?
-
O a faamanuiaga o le uunaia o tamaiti ina ia faasoa atili mai?
-
O le a le eseesega o e matauina i le va o lenei mataupu aoaoina fou ma vasega o i ai nei a le Peraimeri?
© 2018 Puletaofia e le Intellectual Reserve, Inc. Ua taofia aia tatau uma. Lolomiina i le Iunaite Setete o Amerika. Faamaonia le faaperetania: 05/18. PD60006394