Te mau arata‘iraa no te taime faaanaanataeraa e te faanahoraa a te mau tamarii i te pureraa oro‘a

A faaohipa i teie buka iti a faainene ai outou i te haapii i te hoê haapiiraa e 15 minuti i te hepetoma i te taime faaanaanataeraa. E nehenehe ta outou e faananea i ta outou mau haapiiraa o te hepetoma e te tahi atu mau materia a te Ekalesia mai te Friend aore râ te Liahona. E tauturu teie mau arata‘iraa i muri nei ia outou ia faaineine e ia horo‘a i te haapiiraa.

A here i te feia ta outou e haapii ra. A faaite i to outou here i te mau tamarii na roto i te tamauraa i to ratou mau i‘oa e na roto i te imiraa i te mau mea ta ratou e au, ta ratou mau taleni, e to ratou mau hinaaro.

A haapii i te haapiiraa tumu na roto i te Varua. A faaineine ai outou i te mau haapiiraa, a pure ia arata‘ihia outou e a tutava ia haapuai i to outou iteraa papû no ni‘a i te mau parau tumu ta outou e haapii atu. E tauturu te reira ia outou ia haapii na roto i te Varua.

A titau i te haapii-tamau-noa-raa Ua faaineinehia teie buka iti no te tauturu ia outou ia ite eiaha noa te mea e haapii atu, te rave‘a atoa râ no te haapii e no te titau i te haapii tamau-noa-raa. E haapii outou i te haapiiraa tumu ma te maitai ia rave outou i teie na mea e toru i muri nei i roto i te mau haapiiraa tata‘itahi:

1. Faaite i te haapiiraa tumu. A faaite ma te maramarama i te haapiiraa tumu ta te mau tamarii e haapii mai. A feruri i te mau rave‘a no te haapii i te reira na roto i te parau e te faahi‘oraa. (No te tahi atu â mau hi‘oraa, a hi‘o i te mau haapiiraa no te maha o te hepetoma i te ava‘e fepuare e te toru o te hepetoma i te ava‘e tiurai.)

2. Tauturu ia taa maitai. A haapapû e, e roaa i te mau tamarii te iteraa hohonu no ni‘a i te haapiiraa tumu na roto i te mau rave‘a rau no te haapiiraa o te riro i te faitoito ia ratou ia haapii mai, mai te himeneraa i te mau himene, te ha‘utiraa taata ora, e i te tai‘oraa i te mau papa‘iraa mo‘a.

3. Tauturu ia faaohipa A horo‘a i te mau tamarii i te mau rave‘a no te faaohipa i te haapiiraa tumu i roto i to ratou oraraa. A feruri e nahea ta ratou e nehenehe ai e faaite i to ratou mau mana‘o aore râ e tuu i te hoê fâ e tu‘ati i te haapiiraa tumu.

Tei roto i teie buka iti te taatoaraa o te haapiiraa no te hoê pae o te mau hepetoma i roto i te matahiti. Te vai ra te tahi noa mau mana‘o, eiaha râ te taatoaraa o te haapiiraa, no te tahi atu mau hepetoma. A faananea i taua mau mana‘o ra ma te tuu atoa mai i to outou iho mau mana‘o. E nehenehe e noaa mai te mau mana‘o ia outou na roto i te tai‘oraa i te tahi atu mau haapiiraa i roto i teie buka iti. Mai te mea e, e pae Sabati, a faaohipa i tera taime no te hi‘opo‘a-faahou i te mau haapiiraa i ma‘iri. E nehenehe i te Varua e arata‘i ia outou a faanaho ai e a faaineine ai outou i te mau haapiiraa.

A rave amui e te arata‘i himene no te faaineine i ta outou mau haapiiraa. E tauturu te himeneraa i te mau himene ei haapapûraa i te mau haapiiraa tumu o ta outou e haapii ra. I te tahi mau taime e nehenehe ta outou e titau i te mau orometua e ta ratou mau piha ia tauturu ia outou i roto i te tahi mau tuhaa no te haapiiraa evanelia.

E titau te tahi o te mau haapiiraa i te mau taata ia haere mai i roto i te Paraimere. E ti‘a ia outou ia farii i te parau faati‘a no ô mai i to outou episekopo aore râ peresideni amaa hou a titau ai i teie mau taata ia haere mai.

Apitihia e te mau haapiiraa, e rave rahi mau mana‘o tauturu haapiiraa o te riro i te tauturu ia outou ia haamaitai a‘e â i to outou aravihi no te haapii. Te vai atoa ra te mau hoho‘a i roto i te mau haapiiraa o te riro i te tauturu ia outou ia ite i te huru o te hoê ohipa. Noa’tu e mea faufaa te faananearaa i te mau aravihi no te haapii, na te faaineineraa ia outou iho i te pae varua e te iteraa papû e titau i te Varua no te haapapû i teie mau haapiiraa tumu i roto i te aau o te mau tamarii.

E ti‘a i te pehe i roto i te Paraimere ia faatupu i te hoê huru tura, ia haapii i te evanelia, e ia tauturu i te mau tamarii ia ite i te faaûruraa a te Varua Maitai e te oaoa e noaa mai na roto i te himeneraa. E faataahia e 20 minuti o te taime faaanaanataeraa no te himene e no te haapii i te himene. E haapapû te reira e, e nava‘i to outou taime no te haapii i te himene apî e no te tauturu i te mau tamarii ia oaoa i te himeneraa.

Te vai ra i roto i teie buka te hoê himene apî o te ti‘a i te mau tamarii ia haapii i teie matahiti (hi‘o i te api 28). Te vai atoa ra te hoê tuhaa « Nahea ia faaohipa i te pehe i roto i te Paraimere » (a hi‘o i te mau api 26–27) e te tahi atu â mau mana‘o no te haapiiraa i te mau himene i te mau tamarii (hi‘o i te mau api 3, 11, 17).

Piha haapa‘oraa tamarii rii: A hi‘o na i ta outou mau tamarii rii; Te mau hihi mahana: Paraimere 1; Ma‘iti i te Maitai 4–7: Paraimere 2; Aau itoito 8–11: Paraimere 6

Te mau hihi mahana: Paraimere 1; Ma‘iti i te Maitai 4–7: Paraimere 2; Aau itoito 8–11: Paraimere 5