2017
Ko ha Vakai ki ha Fakataha Alēlea
November 2017


Ko ha Vakai ki ha Fakataha Alēlea

Ko ha pongipongi Sāpate ia, pea ʻoku tangutu ha kau Fineʻofa ʻe toko 45 ʻo e Uooti Pukamipilia ʻi Kuatalahala Mekisikoú, ke fai e fakataha alēleá. Hili e fua himí, naʻe fakaafeʻi ʻe he palesiteni Fineʻofá ko Yara Ramirez hanau niʻihi ke vahevahe ange ʻenau ngaahi aʻusia mei heʻenau lēsoni he uike kimuʻá.

Hili hono vahevahe ʻe he kau fineʻofá ʻi ha ngaahi miniti siʻi ʻenau aʻusiá, naʻe tohiʻi ʻe Sisitā Ramirez ha foʻi lea ʻe taha ʻi he palakipoé peá ne toki tangutu ki lalo ʻi he siakalé.

Ko e foʻi leá ko e “Uouongatahá.”

Fakatatau ki he fakahinohino ʻa Sisitā Ramirez, naʻa nau vakai leva ki he Mōsaiá 18:21 ʻo lau, “… pea ke taha honau lotó ʻi he uouongataha mo e feʻofoʻofani.”

Naʻá ne fehuʻi ange, “Ko e hā te tau lava ʻo fai ko e kau Fineʻofa ke fakaʻaongaʻi e potufolofola ko ʻení?”

Naʻe fakakaukau e kau fineʻofá ʻi ha ngaahi miniti siʻi. Naʻe vahevahe ange ʻe ha fineʻofa ʻe taha, “ʻOku ʻikai lava ke ʻalu e toʻu tupú ki he temipalé. ʻOku ʻikai tokolahi feʻunga e kau fineʻofa matuʻotuʻa angé ke nau ō mo kinautolu.”

Naʻe pehē ange ʻe ha taha mo e ʻohovalé, “Naʻe ʻikai te u ʻilo ia ʻe au.” Naʻá ne fehuʻi ange, “Te ke tokoni fēfē kapau he ʻikai te ke ʻilo ʻoku ʻi ai ha fie maʻu?”

Naʻe tali ange ʻe Sisitā Ramirez, “Ko e ʻuhinga ia ʻoku tau ʻi heni aí.” “Ne u ʻilo e ngaahi fie maʻu pehení mei he fakataha alēlea fakauōtí ʻe lava ke tau tokoni ai.”

Naʻe fokotuʻu ange ʻe ha taha, “Fēfē ka fokotuʻu haʻatau tohi māhina?” Ne toe tokanga ange e kulupú he taimí ni. “ʻOku ou tui kuo fakataimi-tēpileʻi ha taimi maʻá e toʻu tupú ʻi he temipalé ki he Tuʻapulelulu ʻe taha ʻi he māhina.”

Naʻe pehē hake ʻe ha faʻē kei talavou ʻi he kulupú, “ʻOku faingataʻa ke u ʻalu ki he temipalé.” Naʻá ne talaange, “Kuo fuoloa mai ʻeni mo e teʻeki ke u toe ʻalu ki ai, pea kuó u kiʻi ongoʻi femoʻuekina. Ka te u fiefia ke tokoni.”

Naʻe kamokamo mo loto ki ai e niʻihi kehé. Naʻe faingataʻa foki ke nau toutou ʻalu ʻo hangē ko ʻenau fie maʻú.

Naʻe fokotuʻu mai ʻe ha faʻē kei talavou ʻe taha ke nau fetongitongi hono tokangaʻi e fānaú pea nau taufetongi ai he ʻalu ki he temipalé.

Naʻe kamata leva ke feʻekeʻaki ʻe he kau fineʻofá e feituʻu ʻoku nau nofo aí pea mo e toʻu tupu ʻoku nofo ofi atu ki aí. Ne nau aleaʻi e founga te nau tokoni ai ki he toʻu tupú ke nau lava atu ki heʻenau ngaahi ʻekitivitií.

Naʻe pehē hake ha tokotaha, “ʻE fie maʻu foki ke tau feʻilongaki. “ʻOku totonu ke ʻi ai haʻatau ngaahi ʻekitivitī!”

Naʻe hokohoko atu e fokotuʻu mo e ʻeke fehuʻi ʻa e kau fineʻofá.

ʻI he fakaʻosinga ʻo e fakataha alēleá, naʻe kole ange ʻe Sisitā Ramirez ki heʻene sekelitalí ke ne fakamatalaʻi fakanounou e minití. Naʻá ne fehuʻi ange, “Ko e hā e ongo ne mou maʻu lolotonga e fakataha alēleá?”

Ne nau tali ange ʻoku nau toe ʻilo lahi ange ki he ngaahi fie maʻu ʻa e tokotaha kotoa, pea ʻoku fie maʻu ʻenau tokoní pea ko ha ngaahi kaungāmeʻa pē kinautolu.

Naʻá ne fehuʻi ange, “Fakatatau mo e ngaahi meʻa kuo tau ako he ʻaho ní, ko e hā e ngaahi ngāue pau ʻoku fie maʻu ke tau tokanga taha ki ai he māhiná ni ko e Kau Fineʻofá?”

Ne nau loto taha ʻi he kulupú ke nau lukuluku meʻakai ʻi he Sāpate ko iá ʻi he tuku ʻa e lotú, kamata vaʻinga volipolo he pō Tuʻapulelulú, fakataimi-tēpileʻi ha taimi ke nau ʻalu ki he temipalé mo palani e founga ke tokoni ai ʻi he ngaahi ʻekitivitī ʻa e toʻu tupú.

Naʻe fakaʻosi ʻaki ʻe Sisitā Ramirez, “Kuo tau aʻusia ʻa e uouongatahá ʻi he ʻahó ni,” peá ne fakaafeʻi e fineʻofa takitaha ke nau fakakaukau ki ha ngaahi founga te nau lava ai ʻo tokoni he lolotonga ʻa e uiké. “ʻE hokohoko ueʻi fakalaumālie kitautolu ʻe he Laumālie Māʻoniʻoní ʻi heʻetau ngāue fakatāutaha mo fakalukufua ko e kau Fineʻofá. ʻOku ou fakaafeʻi kimoutolu ke mou mateuteu ke vahevahe hoʻomou ngaahi aʻusiá ʻi he Sāpate hoko maí.”