“Ko ʻEtau Taumuʻá ke Fakaului,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻoú 2019 (2019)
“Ko ʻEtau Taumuʻá ke Fakaului,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2019
Ko ʻEtau Taumuʻá ke Fakaului
Ko e taumuʻa ʻo e ako mo e akoʻi kotoa pē ʻo e ongoongoleleí ko hono fakaloloto ʻetau uluí pea tokoniʻi ke tau hoko ʻo hangē ko Sīsū Kalaisí. ʻI he ʻuhinga ko ʻení, ko e taimi ʻoku tau ako ai e ongoongoleleí, ʻoku ʻikai ngata pē ʻi heʻetau fekumi ki ha ngaahi fakamatala foʻoú; ka ʻoku tau fie hoko ko ha kau “fakatupu foʻou” (vakai, 2 Kolinitō 5:17). ʻOku ʻuhinga ʻeni ke tau fakafalala kia Kalaisi ke Ne liliu hotau lotó, ngaahi fakakaukaú, angafaí, mo hotau natula moʻoní.
Ka ʻoku ʻikai hoko fakaʻangataha pē ʻa e faʻahinga ako ki he ongoongoleleí ʻokú ne fakamālohia ʻetau tuí pea fakatau ki he liliu fakaofo ʻo e fakauluí. ʻOku ope atu ia mei he loki akó ki he loto mo e ʻapi ʻo e fakafoʻituituí. ʻOku fie maʻu ki ai ʻa e ngāue maʻu pē he ʻaho kotoa peé kae lava ke mahino mo moʻui ʻaki e ongoongoleleí. ʻOku fie maʻu ki he fakaului moʻoní ʻa e ivi tākiekina ʻo e Laumālie Māʻoniʻoní.
ʻOku tataki kitautolu ʻe he Laumālie Māʻoniʻoní ki he moʻoní pea fakamoʻoniʻi mai ʻa e moʻoni ko iá (vakai, Sione 16:13). ʻOkú Ne fakamaama hotau ʻatamaí, fakaake ʻetau mahinó, mo tākiekina e ongo hotau lotó ʻaki e fakahā mei he ʻOtuá, ko e tupuʻanga ʻo e moʻoni kotoa pē. ʻOku fakamaʻa ʻe he Laumālie Māʻoniʻoní hotau ngaahi lotó. ʻOkú Ne ueʻi kitautolu ke tau holi ke moʻui ʻaki ʻa e moʻoní, pea ʻokú Ne fanafana mai ʻa e ngaahi founga ke tau fai ai ʻení. Ko hono moʻoní, “ko e Laumālie Māʻoniʻoní … te Ne akoʻi ʻa [kitautolu] ʻi he meʻa kotoa pē” (Sione 14:26).
ʻI he ngaahi ʻuhinga ko ʻení, ʻi heʻetau feinga ke moʻui ʻaki, ako mo akoʻi ʻa e ongoongoleleí, ʻoku totonu ke tau tomuʻa fekumi ki he takaua ʻa e Laumālié. ʻOku totonu ke puleʻi ʻe he ngaahi taumuʻa ko ʻení ʻa ʻetau ngaahi filí mo tākiekina ʻetau ngaahi fakakaukaú mo e ngāué. ʻOku totonu ke tau fekumi ki he meʻa ʻokú ne fakaafeʻi ʻa e ivi tākiekina ʻo e Laumālié pea tafoki mei he meʻa ʻokú ne tuli ʻa e ivi tākiekina ko iá—he ʻoku tau ʻiloʻi kapau ʻoku tau taau ke maʻu e Laumālie Māʻoniʻoní, te tau lava foki ʻo taau ke nofo ʻi he ʻao ʻo e Tamai Hēvaní mo hono ʻAlo, ko Sīsū Kalaisí.