Faasino Mataupu

A e faitauina tala faatusi paia o Lona soifua ma Lana galuega, o le a e iloa ai le tele o le faaa’oa’o mai o le alofa e Iesu Keriso. Sa Ia faamalolo ma faamanuia tagata. Sa Ia le amanaiaina vaivaiga faaletagata ae silasila i le loto—ma avatu ai le faamoemoega, faamalologa, ma le faamagaloga e ala i Lana galuega, o aoaoga, ma le taulaga sili o le togiola. o le alofa.

O le Faaola lava lena, le Alo o le Atua, o loo soifua. Na te silafia o tatou loto ma e alofa ia i tatou. E i ai Lona finagalo alofa ma le faanaunauga e faamanuia i tatou. O le savali lena a lenei mekasini. O le a e mauaina i saunoaga a perofeta soifua ma aposetolo, o loo aoao mai ai pe o ai Keriso ma mea ua Ia ofoina mai mo i tatou. O le a e maua ai foi i molimau a tagata masani, o e ua faamanuiaina o latou olaga i lo latou taliaina o le valaaulia a Keriso ina ia o mai ia te Ia, aoao ia te Ia, ma mulimuli ia te Ia.

Matou te valaaulia oe ina ia e suesue ma le loto tatalo i nei savali, ia teu ai i lou loto, ma faasoa atu i isi.

—O faatonu

Malamalama i Faalagiga o Iesu Keriso. I tusitusiga paia atoa, e tele suafa ua iloa ai Iesu. O loo talanoaina nisi o na suafa i le lomiga lenei. Pe ua e lagonaina ea Lona alofa, o se taunuuga o le iloa o Ona suafa ma le malamalama i le uiga o suafa taitasi i lou lava olaga?

Molimauina o le Faaola. A maea ona faitau le “Avea ma se Molimau a Keriso” (i. 58), manatu i ni auala e te mafai ai—ma e—tu atu o Sana molimau. E faapefea ona faamalosia ai lou faatuatua?

Aoao Atu ma le Aoao Mai o le Talalelei. Ua saunia e le Ekalesia a Iesu Keriso o le Au Paia o Aso e Gata Ai le tele o punaoa mo le aoaoina atu o le talalelei i totonu o aiga ma totonu o le Ekalesia. Mo nisi faamatalaga, asiasi ane i le www.ldscatalog.com po o le faletusi autu i lo outou itulagi.