“Prindërit e mi nuk janë aktivë në Kishë. Si të qëndroj i fortë pa mbështetjen e tyre?”

Ftoni prindërit tuaj në lutje familjare. I ftoni ata në veprimtari të Kishës. Organizoni mbrëmje familjare. Lutuni shumë për ta dhe përpiquni të jeni një shembull i mirë. Kjo mënyrë do të forcojë familjen tuaj dhe dëshminë tuaj, ju do të ndiheni më mirë dhe Zoti do t’ju ndihmojë të qëndroni i fortë në Kishë. Bëjeni atë me besim dhe përkushtim dhe Ai do t’u përgjigjet lutjeve tuaja.

Babai im nuk është anëtar, ndërsa nëna me motrat e mia nuk janë aktive. Më lëndon që ata i shpërfillin besimet e mia. Por besimi im është rritur duke marrë pjesë në seminar, në kishë, në aktivitetet e përjavshme dhe kur lutem dhe lexoj shkrimet e shenjta. Këshilla më e mirë që mund të të jap është të mos dorëzohesh.

Unë njoh një vajzë të mrekullueshme që është skajshmërisht e fortë në Kishë edhe pse prindërit e saj janë më pak aktivë. Ajo është një frymëzim për vajzat e tjera ndërsa ajo e ka fituar tashmë medaljen e saj të të Rejave. Ajo thotë se mbështetja e të rejave të tjera, vajtja rregullisht në kishë dhe komunikimi i vërtetë me Atin e saj në Qiell, janë të gjitha mënyra të shkëlqyera për ta ndihmuar atë të qëndrojë aktive.

Unë mbështetem në lutjen dhe në studimin e shkrimeve të shenjta për të forcuar dëshminë time dhe unë gjeta një strehë të sigurt duke marrë pjesë në Skautizëm dhe në programin e Të Rinjve si dhe duke plotësuar thirrjet e mia. Ndjekja e këshillës së profetëve dhe zgjedhja e miqve të mirë ndihmon gjithashtu. Kujtoni që gjithnjë të jeni një shembull i shkëlqyer për familjen tuaj duke u shfaqur atyre dashuri të sinqertë, kujdes dhe respekt. Nëse ju e bëni pjesën tuaj, Zoti do të bëjë të Tijën.

Nëna ime është pak aktive dhe të afërmit e mi të tjerë nuk janë anëtarë. Ajo që bëj unë është të besoj tek udhëheqësit dhe miqtë e mi; ata më ndihmojnë gjithnjë. Ata kanë qenë shumë të rëndësishëm në jetën time qysh kur kontribuan në rrugën time të jetës dhe në qëllimin tim të vajtjes në një mision. Ata më japin shumë kurajë nëpërmjet shembullit të tyre. Ju keni nevojë të vlerësoni miqësinë e atyre njerëzve që ndihmojnë të formoheni si anëtar dhe kaloni më shumë kohë me ta, sepse me siguri ju gjithnjë do të keni diçka më shumë për të mësuar.

Vazhdoni të flisni me prindërit tuaj dhe përpiquni të keni mbështetjen e tyre. Shprehuni atyre dashurinë dhe vlerësimin tuaj dhe u tregoni sa e rëndësishme është për ju të shkoni në kishë. I kërkoni udhëheqësit tuaj t’ju ndihë për transportim dhe shikoni nëse peshkopi juaj do të provojë të bisedojë me prindërit tuaj. Lutuni dhe kërkoini Atit Qiellor mbështetjen e Tij dhe lutuni që prindërit tuaj të fillojnë të shohin se qëndrimi aktiv është i rëndësishëm për ju. Ju gjithashtu mund të bëheni më i fortë duke lexuar Librin e Mormonit çdo ditë dhe duke mbajtur urdhërimet.

Unë e shoh këtë situatë shpesh në misionin tim dhe fëmijët që ndeshen me këtë janë guximtarë. Si ia dalin? Duke krijuar një sistem mbështetjeje brenda Kishës nëpërmjet miqve dhe udhëheqësve dhe duke krijuar një sistem mbështetje te Zoti nëpërmjet lutjes, leximit të përditshëm të shkrimeve të shenjta dhe pjesëmarrjes në Kishë. Ju mund t’ia dilni mbanë duke bërë këto gjëra!