Nasayop ba ang Akong Bishop?

Ang among ward bag-o lang nga natunga, busa sa dihang ang bishop mihangyo sa pakigkita kanako, sigurado ko nga ako makadawat og calling sa bag-ong ward. Nagserbisyo ako uban sa mga young women ug nagmahal kanila. Sila dali kaayong modawat sa ebanghelyo ug makalipay kaayo ang pagtudlo kanila. Sigurado gyud nga ang Ginoo motugot kanako sa pagpadayon og tudlo kanila.

Sa akong katingala, ang bishop miingon nga ang Ginoo gusto nga ako motudlo hinoon sa Primary. Siguradong nasayop siya! Siya mipasalig kanako, hinoon, nga siya nag-puasa ug nag-ampo ug mibati og kadasig mahitungod sa akong calling. Ganahon kaayo ko og mga bata, apan unsa may akong nahibaloan sa pagtudlo kanila?

Sulod sa 15 ka tuig sa kaminyoon ang kaguol lang gyud sa akong bana ug nako mao nga ang Ginoo wala mopanalangin kanamo og mga anak. Ang among mga paningkamot sa pagsagup wala gihapoy resulta tungod sa among mga hagit sa panglawas.

Misalig sa bishop, akong gidawat ang call sa pagtudlo sa Primary, apan sa akong kasingkasing ako nanlimbasug. Nasuko ko sa Ginoo nga wala ko niya hatagi og anak, ug ako wala ganahi niining bag-ong calling.

“Ngano, Ginoo, nga Imo kining gipabuhat kanako?” Natingala ako. “Sa Imong kaalam, nahikawan ako og akong kaugalingong mga anak. Nganong ako gisugo sa pagtudlo sa mga anak sa ubang mga tawo?”

Nag-ampo ug nanlimbasug ug nakigbisog ako uban sa Ginoo, naghangyo pinaagi sa akong mga luha sa pagsabut. Sa kaulahian mihukom ko nga tungod kay midawat ako sa calling, mas maayong hunongon nako ang pagbati og kalooy sa akong kaugalingon ug mohimo sa labing maayo nga akong mahimo.

Diha miabut ang mga panalangin. Dali akong nakat-on sa paghigugma sa mga bata, ug sila nakat-on sa paghigugma kanako. Nakaplagan nako nga ang ilang gugma paigo gayud sa pagtabang kanako sa pagpuno sa kahaw-ang sa akong kinabuhi. Sa wala madugay dili ko makakanaog sa pasilyo sa simbahan nga walay duha ka mga bata nga magkupot sa akong mga kamot ug ang uban mohunong aron sa paggakos kon moagi ko. Sa laing bahin, ang akong bana gitawag isip usa ka Scout leader. Sa wala madugay ang among balay napuno sa mga bata ug mga batan-on.

Ang akong bana namatay sa edad nga 47 niadtong Nobyembre 1986. Sa makausa pa ang Ginoo nasayud unsa ang akong mas gikinahanglan. Sulod sa pipila ka mga semana sa pagkamatay sa akong bana, gitawag ako sa pagserbisyo og teaching mission sa Primary sa Fresno, California, Laotian branch. Ang kaisug niining talagsaong katawhan ug sa ilang mga bata mihatag kanako og kalig-on sa pagpadayon nga wala ang akong bana.

Dako ang akong kalipay nga makita ang mga batan-on nga akong gitudloan nga mitubo ngadto sa pagkahamtong, mialagad og mga misyon, naminyo sa templo, ug nagsugod og mga pamilya sa ilang kaugalingon. Kadaghanan niining “sinagup” nga mga bata padayong mohunong aron sa pagsulti og hello ug mas nagpanindot sa akong adlaw, ug malipay ako kon ako silang makita sa Fresno California Temple, asa ako nagserbisyo karon.

Ang akong pagserbisyo sa Primary sa tinuoray nahimong panalangin sa akong tibuok kinabuhi. Mapasalamaton kaayo ko nga ang atong mga calling gidiktar sa Ginoo ug dili pinaagi kanato.