Mga Ideya sa Family Home Evening
Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo:
“Pag-apil sa Buhat sa Family History,” p. 8: Kamo mahimong mohatag sa matag sakop sa pamilya og usa ka kahon aron dekorasyonan ug gamiton sa paghipos sa mga litrato, mga journal, ug ubang mga rekord.
“Unsay Bag-o diha sa Personal nga Kauswagan?” p. 34, ug “Ang Aaronic Priesthood―Mas Labaw Pa Kaysa Inyong Gihunahuna,” p. 37: Ang bag-o nga Personal nga Kauswagan ug Katungdanan ngadto sa Dios nga mga programa nag-awhag sa mga batan-on sa pagpakita ug sa pagpakigbahin sa ilang nakat-unan. Kon kamo adunay mga teenager sa inyong pamilya, makahangyo kamo nila sa pagplano og leksyon sa family home evening nga gibase sa kalihokan sa Katungdanan ngadto sa Dios o sa Personal nga Kauswagan nga bag-o pa nila nga nakompleto.
“Unsaon man Nako sa Pagtukod og usa ka Espirituhanon nga Sukaranan?” p. 62: Sa usa ka waterproof nga sudlanan, pagbutang og pipila ka gagmayng mga bato nga magtapad. Sa laing waterproof nga sudlanan, pagkatag og balas. Pangita og duha ka gagmayng mga butang nga nagrepresentar og mga balay. Ibutang ang usa ka “balay” diha sa mga bato ug ang usa diha sa balas. Dayon ang sudlanan pun-a og tubig. Ang “balay” diha sa balas maunlod, samtang ang “balay” diha sa mga bato magpabiling magbarug. Hisguti kon sa unsa nga paagi ang espirituhanong pundasyon nagtugot kanato sa paglahutay sa mga unos sa kinabuhi (tan-awa sa Helaman 5:12).
Mga Nakat-unang Leksyon Gikan sa Itoy
Sa diha nga bata pa ang among mga anak, ako silang gidala sa tindahan sa mga binuhi nga mananap [pet store] aron sa paglukat sa kupon alang sa libre nga goldfish. Paglabay sa duha ka oras nanggawas kami uban sa itoy, nga pinalit sa kaugalingong kwarta sa mga bata. Nianang gabhiona among gibutang ang itoy sa lawak-labhanan aron pakatulgon. Pagkabuntag ang mga butang sa lawak nagkatag. Unta ang mga bata mao gayud ang manglimpyo, apan sila mibati nga sobra ra kaayo. “Dili namo ni mahimo!” sila nagbakho.
Nianang gabhiona kami nag-family home evening nga ang hilisgutan mao mga sangputanan. “Sa diha nga mipalit kamo sa iro,” miingon ang ilang amahan, “wala kamo maghunahuna sa mga sangputanan. Karon ang iro kabahin na sa atong pamilya, ug kinahanglan gayud nga kamo maoy responsable kaniya.” Kami naghisgot kon sa unsa nga paagi ang mga sangputanan kanunay magsunod sa bisan unsang pagpili nga atong gihimo, ug kami miawhag kanila sa kanunay nga paghimo og matarung nga mga pagpili.
Ang iro bag-o pa lang nga namatay human sa 14 ka tuig isip kabahin sa among pamilya, apan ang mga leksyon sa kinabuhi nga natabang niini sa pagtudlo kanamo kanunay nga magpabilin.
Jill Grant, Victoria, Australia