Bag-ong mga Handbook Gipaila Atol sa Tibuok Kalibutan nga Pagbansay

“Adunay kasiguroan sa pagsunod sa mga handbook,” miingon si Presidente Monson, nagpasidaan batok sa pagtipas nga mahimong mahitabo sa mga programa sa Simbahan kon ang mga lider dili pamilyar sa mga polisiya ug mga pamaagi sa Simbahan. “Kini mahimong panalangin nganha kaninyo ug niadtong inyong giserbisyohan samtang kamo mobasa niini, mosabut niini, ug mosunod niini.”

Ang mga handbook naghatag og dakong kayano ug ka-flexible aron malikayan ang duha ka dakong mga kakuyaw, sumala ni Presidente Boyd K. Packer, Presidente sa Korum sa Napulog Duha ka mga Apostoles.

Ang una mao ang kakuyaw sa paghigpit sa impluwensya sa Espiritu Santo gikan sa mga programa sa Simbahan. “Kini usa ka espirituhanon nga buhat nga atong gibuhat,” siya miingon, “ug usa ka espirituhanon nga buhat kinahanglan magiyahan sa Espiritu.”

Ang ikaduha mao ang kakuyaw sa “pag-establisar sa Simbahan nga dili maestablisar ang ebanghelyo,” siya miingon. “Gikinahanglan nato ang Simbahan diha sa mga kinabuhi sa mga miyembro ug ang ebanghelyo maestablisar diha sa mga kasingkasing sa mga miyembro.”

Kadaghanan sa teksto sa Handbook 1: Mga Presidente sa Stake ug mga Bishop nagpabilin nga wala mausab gikan sa 2006 nga update ngadto sa Handbook sa mga Panudlo sa Simbahan, Basahon 1. Ang mga instruksyon nga anaa sa labing bag-o nga mga sulat sa Unang Kapangulohan giapil, mga kapitulo sa mga katungdanan sa presidente sa stake ug bishop gipamub-an ug giklaro, ug ang ubang materyal gi-organisar pag-usab alang sa mas sayon nga pakisayran.

Mga kausaban sa Handbook 2: Pagpangalagad sa Simbahan mas gipalapdan. Ang gibase sa baruganan nga paagi gipaningkamutan sa pagpakunhod sa pagkakomplikado sa mga programa sa Simbahan ug nagtugot sa pagpahaum niini sa lokal nga paagi kon gikinahanglan nga dili isakripisyo sa pagkapareha sa mga polisiya, mga pamaagi, ug mga programa.

Laing kausaban nga mamatikdan naglakip sa pagpagaan sa trabaho sa bishop pinaagi sa pagpasabut sa tahas sa ward council ug sa mga sakop niini, sa posible nga pagdugang sa frequency sa mga miting sa ward council, pagpatin-aw sa misyon sa Simbahan, pag-apil sa trabaho sa ward welfare committee ngadto sa mga panaghisgot diha sa priesthood executive (diin ang mga presidente sa Relief Society mahimong imbitaron kon gikinahanglan) ug sa mga ward council, pagwagtang sa karon nga ward activities committee ug pagdumala sa mga kalihokan pinaagi sa ward council, ug sa ubang mga kausaban.

Ang bag-ong handbook miklaro sa kalibug mahitungod sa unsay gihisgutan sa Unang Kapangulohan niadtong 1981 nga three-fold nga misyon sa Simbahan—pagsangyaw, paghingpit, ug pagtubos.

Sa Handbook 2, seksyon 2.2, nagsubli sa katuyoan sa Unang kapangulohan niadtong 1981 nga kining tulo ka mga buluhaton kabahin sa usa ka mahinungdanon nga buhat, namahayag: “Ang Simbahan ni Jesukristo gitukod sa Dios aron sa pagtabang sa Iyang buhat sa pagpahinabo sa kaluwasan ug kahimayaan sa Iyang mga anak” (tan-awa sa Moises 1:39).

Si Elder Dallin H. Oaks sa Korum sa Napulog Duha ka mga Apostoles mipasidaan batok sa paghatag og “naghingapin nga pagtagad sa kahulugan ug mga utlanan niining tulo ka buluhaton sa buhat sa Ginoo” o “wala molakip sa ubang importante nga mga elemento sama sa pag-atiman sa kabus.”

Miingon siya, “Ang kinatibuk-ang baruganan, nga gipahayag sa Seksyon 2.2, mao nga ‘ang mga programa ug mga kalihokan sa Simbahan [gitumong aron sa] pagsuporta ug paglig-on sa mga indibidwal ug mga pamilya.’”

Ang mga baruganan ug mga doktrina nga makita sa unang tulo ka mga kapitulo sa Handbook 2 “mao ang kapasikaran sa administrasyon sa Simbahan ug kinahanglang makaabag sa tanan ninyong buhaton [sa mga lider],” miingon si Elder Quentin L. Cook sa Korum sa Napulog Duha ka mga Apostoles. Hinoon, ang mga kapitulo sa handbook nga mosunod, ilabi sa bag-ong kapitulo nga gitawag og “Pagkapareho ug Pagpahaum,” makatabang sa pagpasabut kon adunay flexibility sa mga polisiya ug mga programa sa Simbahan.

Kini nga kapitulo nakatabang og “paghatag sa klaro nga paagi kon unsang mga butang ang kinahanglan magkapareha bisan asa sa Simbahan” ug usab “naglangkob og hilabihan ka importante nga mga baruganan sa pagpakita sa mga kondisyon nga mahimong magtugot niining … lokal nga pagpahaum,” miingon si Elder Cook.

Mga ehemplo kon asa ang mga pagpahaum mahimong tukma nga himoon maglakip sa pagbutang og mga staff ug mga programa sa mga auxiliary ug sa pormat ug frequency sa mga miting sa pagpangulo ug mga kalihokan. Ang mga kahimtang nga i-konsiderar maglakip sa mga kahimtang sa pamilya, transportasyon ug komunikasyon, diyutay nga mga miyembro, ug seguridad.

“Sa paghunahuna kon unsa nga pagpahaum ang tukma, ang mga lider kinahanglan magtinguha kanunay sa giya sa Espiritu ug magpakitambag sa ilang labing duol nga tigdumalang may pagtugot,” miingon si Elder Cook.

Sa pagpangulo sa panel discussion, si Elder M. Russell Ballard sa Korum sa Napulog Duha ka mga Apostoles misugyot nga ang pagtuon og usa ka kapitulo sa mga instruksyon matag higayon ug sa paghisgot nga mga baruganan diha sa mga miting sa council mahimong mosangput ngadto sa mas makahuluganon nga pagkat-on.

Kon ang mga lider adunay mga pangutana mahitungod sa mga polisiya ug mga programa nga dili matubag sa mga handbook, kinahanglan nga hisgutan nila kini uban sa ilang tigdumalang priesthood lider, mitambag si Elder Oaks. Kon adunay wala masulbad nga mga pangutana, miingon siya, “ang pinakalabaw nga mga priesthood lider lamang ang kinahanglan nga mosusi sa Buhatan sa Unang Kapangulohan.”