2011
Ang Aaronic Priesthood—Mas Labaw Pa Kaysa Inyong Gihunahuna
Enero 2011


Ang Aaronic Priesthood—Mas Labaw Pa Kaysa Inyong Gihunahuna

Usa ka Mensahe kabahin sa Katungdanan ngadto sa Dios

Imahe
David L. Beck

Upat ka tuig ang milabay mitambong ko og memorial service sa akong igsoong lalaki nga si Gary. Usa sa mga tigpamulong mihatag og dakong pasidungog sa akong igsoong lalaki. Kanunay akong naghunahuna kabahin niini sukad niadto. Siya miingon, “Si Gary usa ka lalaki nga adunay priesthood. … Siya nakasabut sa priesthood, nagpasidungog sa priesthood, ug hingpit nga midawat sa priesthood ug sa mga baruganan niini.”

Sa dihang ang akong igsoong lalaki namatay, siya usa ka high priest sa Melchizedek Priesthood, ug siya nakatagamtam og 50 ka tuig sa pagserbisyo diha sa priesthood. Si Gary usa ka mahigugmaong bana ug amahan kinsa nakaserbisyo og madungganon nga full-time nga misyon, naminyo sa templo, naglambo sa iyang mga calling sa priesthood, ug kugihang nagserbisyo isip usa ka home teacher.

Kamo usa ka tighupot sa Aaronic Priesthood. Ang inyong pagserbisyo diha sa priesthood nagsugod pa lang. Kamo tingali wala pay 50 ka adlaw nga kasinatian diha sa priesthood. Apan kamo mahimong angay sa samang pasidungog nga nadawat ni Gary. Sa pagkatinuod, kamo kinahanglang angay nianang pasidungog. Ang Ginoo mitawag kaninyo sa usa ka talagsaon nga buhat, ug nagpaabut Siya nga kamo mahimong usa ka lalaki nga adunay priesthood.

Ang Kahalangdon sa Aaronic Priesthood

Hunahunaa lang ang kahalangdon sa Aaronic Priesthood nga inyong gihuptan:

  • Ang Ginoo mipadala sa nabanhaw nga si Juan Bautista sa pagpahiuli sa Aaronic Priesthood. Sa dihang gitugyan ni Juan kining priesthood ngadto nila ni Joseph Smith ug Oliver Cowdery, siya mitawag kanila nga iyang “kauban nga mga sulugoon” (D&P 13:1). Si Presidente Gordon B. Hinckley (1910–2008) mihatag og gibug-aton nga si Juan “wala mobutang sa iyang kaugalingon nga mas taas nila ni Joseph ug Oliver. Siya mibutang kanila sa iyang sama nga kahimtang sa dihang siya mitawag kanila isip ‘akong kauban nga mga sulugoon.’” Si Presidente Hinckley mipadayon sa pagsulti nga ang usa ka 12 anyos nga deacon mahimong kauban nga sulugoon ni Juan.1

  • Ang Aaronic Priesthood naghupot sa mga yawe sa pagpangalagad sa mga anghel (tan-awa sa D&P 13:1). Samtang kamo mopuyo sa matarung nga paagi ug moserbisyo sa makugihon nga paagi, kamo makadawat sa pagpangalagad sa mga anghel nga mogiya ug molig-on kaninyo. Pinaagi sa inyong pagpahigayon sa sakrament, kamo makatabang sa uban sa pagdawat usab niining panalangin.2

  • Ang Aaronic Priesthood “naghupot sa mga yawe sa … ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala” (D&P 13:1). Ang paghinulsol ug bunyag mao ang ganghaan diin ang mga tawo mosulod sa pagsugod ngadto sa dalan padulong sa kinabuhing dayon (tan-awa sa 2 Nephi 31:17–18). Naglihok ubos sa direksyon sa mga lider sa priesthood, kamo makatabang sa mga tawo sa pag-abli niining ganghaan.

  • Ang Aaronic Priesthood naglakip sa katungod sa pagpahigayon sa sakrament. Kon kamo mangandam, mopanalangin, o mopasa sa sakrament, kamo nagrepresentar ni Jesukristo (tan-awa sa 3 Nephi 18:1–12). Makatabang kamo sa inyong mga sakop sa pamilya ug mga higala sa paghinumdom Kaniya, pagbag-o sa ilang mga pakigsaad, ug makasarang sa pagpakig-uban sa Espiritu Santo.

Ang ingon nga mga oportunidad nagkinahanglan sa buhat sa mga lalaki nga adunay priesthood—mga lalaki kinsa lig-on sa espirituhanong paagi ug kinsa motuman sa ilang mga katungdanan sa priesthood.

Ang Bag-ong Libro sa Katungdanan ngadto sa Dios

Ubos sa direskyon sa atong buhi nga mga propeta, usa ka kapanguhaan ang giandam sa pagtabang kaninyo mga mahimong lalaki nga adunay priesthood. Bisan ang kapanguhaan bag-o, kini adunay pamilyar nga ngalan: Katungdanan ngadto sa Dios.

Naghinam-hinam ko kabahin niining bag-ong basahon sa Katungdanan ngadto sa Dios. Kini makatabang kaninyo sa pagsunod sa sugo sa Ginoo sa “pagkat-on sa [inyong] katungdanan” ug “mobuhat sa buhatan diin [kamo] natudlo, sa tanan nga kakugi” (D&P 107:99).

Sa paggamit sa libro isip deacon, teacher, ug priest, kamo makaapil sa mga kalihokan sa duha ka mga kategoriya: espirituhanong kalig-on ug mga katungdanan sa priesthood.

Usa ka Sumbanan nga Mamahimo

Ang matag kalihokan sa Katungdanan ngadto sa Dios nagsunod og sumbanan nga makatabang kaninyo nga mahimong tighupot sa priesthood nga ang Ginoo gusto nga kamo mamahimo: Una, pagkat-on kamo og usa ka baruganan sa ebanghelyo o usa ka katungdanan sa priesthood. Dayon paglihok kamo kon unsa ang inyong nakat-unan. Sa katapusan, ipakigbahin ninyo ang inyong mga hunahuna ug mga pagbati kabahin sa inyong nakat-unan ug nasinati. Ang pipila niining mga kalihokan mga personal. Ang uban mahimong gamiton alang sa inyong tibuok nga korum aron magamit sa mga leksyon sa Dominggo o sa mga kalihokan niana nga semana.

Sa pahina 39 ang ehemplo gikan sa libro nagpakita kon sa unsang paagi kining sumbanan magamit. Ang mga komentaryo gikan sa mga batan-ong lalaki kinsa nakasinati na og talagsaong mga kasinatian sa bag-ong libro.

Usa ka Lalaki nga adunay Priesthood

Kon maghunahuna ko sa hugpong sa mga pulong “lalaki nga adunay priesthood,” maghunahuna dayon ko sa akong igsoong lalaking nga si Gary. Apan maghunahuna usab ko sa uban. Maghunahuna ko ni Presidente Thomas S. Monson, kinsa, isip usa ka deacon, mibati nga siya nagbarug sa balaan nga dapit dihang siya mitabang og usa ka lalaki nga baldado sa pag-ambit sa sakrament.3 Maghunahuna ko ni Juan Bautista, ang halangdong tighupot sa Aaronic Priesthood kinsa miandam sa agianan sa mortal nga pagpangalagad sa Manluluwas pinaagi sa pagtudlo, pagpamatuod, ug pagpahigayon sa sagradong ordinansa sa bunyag. Ug maghunahuna ko kaninyo. Samtang kamo magtubo sa espirituhanong kalig-on ug motabang sa uban sa pagduol ngadto kang Kristo pinaagi sa inyong pagserbisyo diha sa priesthood, kamo tinuoray gayud nga lalaki nga adunay priesthood.

Mubo nga mga sulat

  1. Tan-awa sa Gordon B. Hinckley, “The Aaronic Priesthood—a Gift from God,” Ensign, Mayo 1988, 45.

  2. Tan-awa sa Dallin H. Oaks, “The Aaronic Priesthood and the Sacrament,” Liahona, Ene. 1999, 44–45.

  3. Tan-awa sa Thomas S. Monson, “Buhata ang Inyong Katungdanan—Kana ang Pinakamaayo,” Liahona, Nob. 2005, 56.

Paghulagway sa litrato pinaagi ni Craig Dimond © IRI

Paghulagway sa litrato pinaagi ni Steve Bunderson © 2000; gilitratohan ni John Luke © IRI