Pagpakigbahin sa Tinapay sa Kinabuhi

Init kadto nga adlaw sa Foz do Iguaçu, Paraná, Brazil. Mibiyahe ako og daghang mga oras ug gikapoy. Isip usa ka lider sa Church Educational System, ako adunay mga butang nga gusto nakong ipaabut ngadto sa bishop, kinsa makigkita nako sa simbahan. Apan, siya wala pa sa akong pag-abut.

Samtang nagpaabut ko, usa ka babaye ang misulod sa simbahan. Siya miduol kanako ug mapainubsanong nangayo kanako og gamayng kantidad sa kwarta aron ipalit og tinapay. Siya mipasabut nga siya ug ang iyang bana gigutom, ug bisan og maulaw nga mangayo, wala na siyay laing mahimo. “Bisan lang gayud og usa ka gamay nga tinapay,” siya midugang.

Natandog ko, ug mikuha og gamay nga kwarta gikan sa akong bulsa. Siya naghunahuna nga kini dako ra. Miingon ko kaniya, “Palit og tinapay, gatas, ug gamayng karne.”

Siya mapasalamaton ug miingon kanako nga ang iyang bana gisaaran na og trabaho sa sunod Martes. Gusto niya akong ilisan dayon kon ang iyang bana makadawat na sa iyang sweldo.

Miingon ko kaniya nga dili na niya kini kinahanglang buhaton. Siya miinsister.

Miingon ko kaniya, “Imbis nga imo kong ilisan, mahimo kang mobalik dinhi sa chapel sa Dominggo sa buntag. Kon ikaw moabut na dinhi, sultihi si bisan kinsa nga gusto kang makig-istorya sa mga misyonaryo. OK?” Siya miuyon.

Ang babaye mibiya. Nahuman nako ang kinahanglang ihisgot ngadto sa bishop ug mipadayon sa pagbiyahe ngadto sa Paraná, nagbuhat sa akong trabaho.

Daghang bulan ang milabay, ug laing oportunidad ang midala kanako ngadto sa samang meetinghouse sa Foz do Iguaçu alang sa usa ka komperensya. Ang choir ug ang ilang pasundayag nindot. Sa dihang natapos ang komperensya, usa sa mga sakop sa choir miduol kanako. Siya milamano, mitimbaya kanako uban sa maanindot nga pahiyum, ug misulti nga may emosyon, “Salamat, brother. Wala lang ko nimo hatagi og tinapay sa paghupay sa akong kagutom ug sa akong bana; gihatagan usab ko nimo sa tinapay sa kinabuhi. Salamat.”

Mibati ako og dakong kalipay sa dihang akong nailhan ang babaye kinsa nangayo kanako og gamayng kwarta mga pipila ka bulan ang milabay. Nakaamgo ako nga ang ebanghelyo ni Jesukristo—kinsa mideklarar sa Iyang Kaugalingon mismo nga mao ang Tinapay sa Kinabuhi—makapausab sa kinabuhi niadtong kinsa modawat niini.