Ang Manluluwas ang Gamhanan nga Magtutudlo

Sa dihang ang Ginoo mianhi sa yuta, Siya miagi usab sa tabil sa pagkalimot, sama kanato, apan Siya, sama kanato, milambo sa grasya ug dugang pa nga grasya (tan-awa sa D&P 93:11–17). Siya gitudloan sa Iyang Langitnong Amahan (tan-awa sa Juan 8:28; 12:49) ug sa mortal nga mga magtutudlo. Sama sa gihatagan og gibug-aton ni Elder James E. Talmage (1862–1933) sa Korum sa Napulog Duha ka mga Apostoles: “Ang atong kahibalo sa kinabuhi sa Judeo niadtong panahona naghatag og kapasikaran sa paghukom nga ang Bata natudloan og maayo sa mga balaod ug mga kasulatan, kay mao kana ang lagda. Siya nakaangkon og kahibalo pinaagi sa pagtuon, ug nakabaton og kaalam pinaagi sa pag-ampo, paghunahuna, ug pagpaningkamot.”¹

Gikan sa Iyang pagkabata hangtud nga Siya misugod sa Iyang pagpangalad sa publiko, ang istorya lang nga atong nahibaloan bahin Kaniya mao ang Iyang tahas sa pagtudlo didto sa templo sa edad nga 12, nagpakita og talagsaong paggamit sa kaalam ug kahibalo: “Tapus sa tulo ka adlaw nakaplagan siya [ni Jose ug Maria] sulod sa templo, nga naglingkod taliwala sa mga doktor [o mga magtutudlo], naminaw kanila ug nagpanukso kanilag mga pangutana” (Lucas 2:46). Ang Hubad ni Joseph Smith nagklaro niini nga bersikulo ug nagpasabut nga ang mga magtutudlo naminaw ni Jesus ug nangutana Kaniya.

Ang Iyang pagtubo sa kahibalo sa wala pa Siya magsugod sa Iyang pagpangalagad nagpakita sa tambag nga Iyang gihatag ngadto kang Hyrum Smith niadtong 1829: “Ayaw pagtinguha sa pagpahayag sa akong pulong, apan unaha ang pagbaton sa akong pulong, ug unya ang imong dila makasulti; unya, kon ikaw magtinguha, ikaw makabaton sa akong Espiritu ug sa akong pulong, oo, ang gahum sa Dios ngadto sa pagkabig sa mga tawo” (D&P 11:21).

Kita usab makasiksik sa mga kasulatan alang sa instruksyon ug pagdasig samtang kita magsugod sa atong mga pagpangalad, bisan kon kana nga pagpangalagad usa ka bag-ong calling, bag-ong responsibilidad (sama sa pagkaginikanan), o yanong leksyon sa family home evening.

Sa sinugdanan sa Iyang pagpangalagad, si Jesus gitintal sa yawa. Duha sa tulo ka tintasyon nagsugod uban sa usa ka pahayag sa pagduha-duha: “Kon ikaw Anak sa Dios” (Mateo 4:3, 6). Sa pagbuntog ni Satanas, ang Manluluwas mikutlo og tulo ka mga kasulatan sa Daang Tugon, nag-ingon, “Nahisulat na …” (mga bersikulo 4, 7, 10).

Ang Manluluwas mitudlo usab sa Iyang mga sumusunod pinaagi sa mga ehemplo diha sa kasulatan aron sa pagbuntog sa dautan. Sa pagtudlo sa mga tawo sa pagbuntog sa dautan o sa pag-atubang og makalilisang nga mga sangputanan, ang Gamhanan nga Magtutudlo mikutlo og usa ka panghitabo sa Daang Tugon: “Sa adlaw sa hukom maarang-arang pa unya alang sa yuta sa Sodoma ug sa Gomorra, kay sa maong lungsod [kadtong dili modawat sa Iyang ebanghelyo]” (Mateo 10:15).

Kon kita mosunod niini, ang pulong sa Dios adunay tiunay nga gahum sa pagpanalipod: “Kinsa kadto nga mopatalinghug sa pulong sa Dios, ug hugot nga mogunit niini, dili gayud sila malaglag; ni ang mga pagtintal ug ang nagdilaab nga mga pana sa kaaway makabuntog kanila” (1 Nephi 15:24).

Usa sa akong paboritong kasulatan sa pagbuntog ni Satanas karon mao kining bersikulo: “Ang akong mga mata anaa kaninyo. Ako anaa sa inyong taliwala” (D&P 38:7). Kini mahangturong makapawala sa bakak nga “walay masayud.”

Ang Manluluwas miila sa karaang mga propeta ug mikutlo sa ilang gipangsulti. Niini nga dispensasyon, Siya misugo ni Sidney Rigdon sa “pagtawag sa balaan nga mga propeta aron sa pagpamatuod sa mga pulong [ni Joseph Smith]” (D&P 35:23).

Sa paghatag og pamatuod ug balaan nga pagtahud sa mga propeta sa Daang Tugon, ang Manluluwas mikutlo kang Noe (tan-awa sa Mateo 24:37–38); Abraham (tan-awa sa Lucas 16:22–31; Juan 8:56–58); Abraham, Isaac, ug Jacob (tan-wa sa Mateo 8:11); Moises (tan-awa sa Juan 5:46); David (tan-wa sa Lucas 6:3); Elias (tan-awa sa Lucas 4:25–26); ug Isaias (tan-awa sa Lucas 4:16–21; Juan 1:23). Siya usab mipasidungog ug misuporta sa Iyang kadungan, si Juan Bautista (tan-awa sa Mateo 11:7–11).

Sa Wali sa Bukid, ang Manluluwas mihimo og importanteng koneksyon sa mga propeta sa Daang Tugon ug sa ilang mga pagtulun-an kabahin Niya. Kini gihulagway pinaagi sa dug-ol og kahulugan tali sa mga hugpong sa mga pulong sa Kabulahanan [Beatitudes] (tan-awa sa Mateo 5:3–11) ug sa Isaias 61:1–3.²

Kita usab makapasidungog sa nangagi ug bag-ong mga propeta pinaagi sa paghunahuna sa ilang mga pagtulun-an kon unsa man kini: ang pulong ug kabubut-on sa Ginoo (tan-awa sa D&P 68:4). Samtang kita mangandam sa pagtudlo gikan sa mga kasulatan, kita kinahanglang mainampoon nga magsiksik sa mga baruganan nga atong mapahisama ngadto sa atong gitudloan.

Ang usa ka labing talagsaon nga mensahe diha sa kinabuhi sa Agalon mao ang wali sa “tinapay sa kinabuhi” (tan-awa sa Juan 6). Kini nagpakita sa Iyang kabatid ug paggamit usab sa mga kasulatan ingon man ang kahulugan niini ngari kanato.

Sa miaging adlaw sa wala pa Niya gihatag kini nga mensahe, ang Ginoo mihimo sa milagro sa pagpakaon sa 5,000, nakabaton og mas daghang sumusunod (tan-awa sa Juan 6:5–14). Kon kini ug uban pa nga mga milagro dili paigo sa pagtabang sa uban sa pagtuo Kaniya, Siya bukas nga mideklarar sa wali sa tinapay sa kinabuhi kon si Kinsa siya. Kini nga wali nagsilbing pagbansay sa Iyang mga Apostol, ilabi na ni Pedro, kansang pagpamatuod nalig-on (tan-awa sa mga bersikulo 63–71).

Ang Gamhahan nga Magtutudlo mipasabut sa usa ka panghitabo sa Daang Tugon aron sa pagpaila sa wali sa tinapay sa kinabuhi:

“Si Moises dili mao ang naghatag kaninyo niadtong tinapay gikan sa langit; apan ang akong Amahan mao ang nagahatag kaninyo sa tinuod nga tinapay nga gikan sa langit.

“Kay ang tinapay sa Dios mao kadtong nanaug gikan sa langit, ug nagahatag og kinabuhi ngadto sa kalibutan” (Juan 6:32–33; tan-awa usab sa Exodo 16).

Tungod niini sila miingon, “Hatagi kami kanunay nianang tinapay” (Juan 6:34).

Ang Iyang tubag nagpadayag ngadto sa natugahan sa espirituhanong paagi sa Iyang pagkabalaan nga pagkatawo isip Anak sa Dios, ang gisaad nga Mesiyas ug Manluluwas: “Ako mao ang tinapay nga nagahatag og kinabuhi: siya nga moari kanako dili gutumon; ug siya nga mosalig kanako dili gayud uhawon” (Juan 6:35).

Ang Manluluwas dayon mipahayag sa balaang doktrina nga naghiusa sa Pag-ula ug sa mga simbolo sa tinapay ug tubig diha sa sakrament: “Gawas kon mokaon kamo sa unod sa Anak sa tawo, ug moinom sa iyang dugo, wala kamoy kinabuhi diha kaninyo” (Juan 6:53).

Kita nasayud nga kining wali milig-on ni Pedro, kay siya mipamatuod, “Kami nagatuo ug among nasinati, nga ikaw mao ang Balaan sa Dios” (Juan 6:69). Ang wali sa tinapay sa kinabuhi may kalabutan kanato, kay kita usab motuo ug mosiguro nga si Jesus mao ang Kristo kon kita mobasa, magtuon, ug mokutlo—dili i-paraphrase—sa balaang sinulat sa paglig-on sa atong kaugalingon ug sa uban.

Ang madaugong pagsulod sa Ginoo ngadto sa Jerusalem mao ang pinasambingay nga pagsiguro sa Iyang kahibalo ug paggamit sa mga kasulatan: “Bulahan siya nga moanhi sa ngalan sa Ginoo” (Salmo 118:26; tan-awa usab sa Marcos 11:9–10). Siya misakay og asno padulong sa Jerusalem, nagtuman sa panagna “Pagmaya sa hilabihan uyamut, Oh anak nga babaye sa Zion: … ang imong Hari nagaanhi kanimo: … nagkabayo sa asno” (Zecarias 9:9; tan-awa usab sa Mateo 21:4–5).

Gikan sa sinugdanan sa Iyang mortal nga pagpangalad hangtud sa Tanaman sa Getsemani, sa krus, ug sa walay sulod nga lubnganan, si Jesus ang Kristo nakaestablisar—pinaagi sa karaang kasulatan ug sa Iyang pagpangalagad, mga milagro, ug mga mensahe—nga Siya mao ang gisaad nga Mesiyas.

Sa Tanaman sa Getsemani, si Jesus nag-ampo, “Amahan, kon buot ka, kuhaa kining kopa gikan kanako; hinoon dili ang akong pagbuot, maoy matuman, kondili ang imo” (Lucas 22:42). Kini nga pamahayag sa Iyang pagkamanunuton ug sa Iyang pagtuman sa sakripisyo sa mahangturong pag-ula nagpamatuod nga Siya mao ang Anak sa Dios, ang labing talagsaon nga magtutudlo nga nabuhi ug mabuhi sa hangtud.

Ang mga kasulatan nagpamatuod ug nagtudlo kabahin ni Jesukristo. Kon kita mamalandong niini pag-ayo, kita makaila Kaniya ug sa Iyang tingog: “Kini nga mga pulong dili sa mga tawo ni sa tawo, apan gikan kanako; busa, kamo magpamatuod nga sila gikan kanako ug dili sa tawo” (D&P 18:34). Akong nakita nga kon ako mamalandong pag-ayo sa mga kasulatan diha una sa panimalay uban sa akong asawa ug pamilya, ako mas epektibo sa akong pagserbisyo sa Simbahan.

Ganahan ko kaayo sa mga kasulatan. Mopamatuod ko nga kini mga pulong sa Dios. Unta kita motudlo gikan niini, sama sa gibuhat sa Manluluwas, diha sa atong mga panimalay ug sa atong mga calling, nga “ang hiyas sa pulong sa Dios” adunay “gamhanan nga sangputanan” niadtong atong gipangtudloan (Alma 31:5).