2011
Gikan sa Pagtuo ngadto sa Pagkasayud
Enero 2011


Ebanghelyo sa Akong Kinabuhi

Gikan sa Pagtuo ngadto sa Pagkasayud

Ang pagtuo nga ang Basahon ni Mormon tinuod mao lamang ang sinugdanan.

Una nakong nahimamat ang mga misyonaryo nga mga Santos sa Ulahing mga Adlaw sa estasyonan sa tren sa dihang 19 pa ko. Makaingon ko nga adunay butang nga espesyal bahin niining batan-ong mga babaye, ug mibati ko og kadasig sa pagpakig-istorya kanila. Mao nga giduol nako ug gipangutana kon unsay ilang gibuhat sa Taiwan. Misulti sila kanako nga sila mga misyonaryo ug misugod sa paghisgut mahitungod sa ebanghelyo. Sa daghang mga gihisgutan sulod sa pipila ka mga panagkita, akong nakat-unan ang mahitungod kang Jesukristo, sa Iyang gipahiuli nga ebanghelyo, ug sa Basahon ni Mormon. Ang katapusan niini nga mga hilisgutan—ang Basahon ni Mormon—mao ang nakahimo kanako sa pagpasakop sa Simbahan.

Nakahinumdom pa gihapon ko sa akong kasinatian sa pag-ampo mahitungod sa basahon. Human sa pagbasa niini usa ka gabii, akong gitak-op ang basahon, miluhod, ug nangutana sa akong Langitnong Amahan kon tinuod ba kini. Gibati nako ang kainit nga miliyok kanako, usa ka butang nga wala gayud nako batia didto sa mga templo sa Buddhist nga akong gitambongan sa tibuok nakong kinabuhi. Kini nga pagbati lahi. Nasayud ko nga adunay usa ka tawo nga naminaw. Nianang higayuna gikan sa akong pagtuo nga ang Simbahan tinuod misangput sa pagkasayud nga kini tinuod, ug ako nakahukom nga magpabunyag.

Ang Basahon ni Mormon padayong nakapanalangin sa akong kinabuhi sukad niadto. Nakapanalangin kini kanako sa dihang miserbisyo ako isip usa ka misyonaryo.

Nakapanalangin usab kini kanako sa akong mga calling. Samtang nagserbisyo isip usa ka magtutudlo sa institute, akong nakat-unan nga ang Basahon ni Mormon gisulat alang sa atong panahon.1 Apan sa pagpangandam sa akong mga leksyon, akong nakita kana nga pamahayag nga dili lamang tinuod sa kinatibuk-ang paagi, apan kini tinuod alang sa piho nga mga tawo diha sa piho nga mga sitwasyon sa piho nga mga panahon. Pananglitan, usahay samtang nangandam ko sa pagtudlo, ang panagway sa usa sa akong mga estudyante mosantup sa akong hunahuna, ug mahibaloan dayon nako ang piho nga butang nga gikinahanglan nakong itudlo alang sa kaayohan niana nga tawo. Ang ingon niana nga mga pag-aghat kanunay nga nahitabo ug napamatud-an sa higayon nga ang usa ka estudyante mosulti kanako human sa klase aron sa pagpahibalo kanako nga ang leksyon tukma gayud kaayo sa unsay iyang gikinahanglan.

Sa katapusan, ug tingali sa labing makahuluganong paagi, ang Basahon ni Mormon nakagiya sa akong personal nga kinabuhi. Nahinumdom ko nga midangup sa mga kasulatan sa dihang hapit na nako tapusa ang usa ka relasyon sa pakig-date. Gibati nako ang hilabihan nga kaguol. Apan ang usa ka bersikulo nga akong nabasa, 2 Nephi 10:20, diretsong namulong sa akong kasingkasing ug mihatag kanako og usa ka pagbati sa kalinaw: “Karon, akong hinigugma nga mga kaigsoonan, nagtan-aw nga ang atong maloloy-on nga Dios naghatag kanato sa daghan kaayo nga kahibalo mahitungod niini nga mga butang, ato siya nga hinumduman, ug biyaan ang atong mga sala, ug dili iduko ang atong mga ulo, kay kita dili mga sinalikway; bisan pa niana, kita giabug gikan sa yuta nga atong kabilin; apan gidala kita ngadto sa labaw nga maayo pa nga yuta, kay ang Ginoo naghimo sa dagat nga atong dalan, ug kita ania sa usa ka pulo sa dagat.”

Ang paghinumdom sa Ginoo, sama sa gisugyot niana nga bersikulo, nakahatag kanako og kaisug ug paglaum. Makasalig ako diha sa “dako kaayo nga kahibalo” sa ebanghelyo nga gihatag sa Dios kanako, ug makasiguro ko nga ako wala “gisalikway.” Adunay maanindot nga mga butang sa unahan.

Dako kaayo kadto nga panalangin nga motuo sa mga pulong sa mga misyonaryo sa dihang ako nagsusi pa sa Simbahan. Mas mahinungdanon kaayo nga masayud sa kamatuoran sa ebanghelyo, ilabi na sa katinuod sa Basahon ni Mormon, alang sa akong kaugalingon. Nasayud ko nga buhi ang Dios ug nga Siya nagtudlo kanato sa direkta ug sa personal nga paagi pinaagi sa mga kasulatan.

Mubo nga sulat

  1. Tan-awa sa Ezra Taft Benson, “The Book of Mormon Is the Word of God,” Tambuli, Mayo 1988, 2.

Litrato © IRI