2011
Pagkahimong usa ka Matinud-anong Lalaki nga adunay Priesthood
Enero 2011


Pagkahimong usa ka Matinud-anong Lalaki nga adunay Priesthood

David L. Beck (tunga), presidente; Larry M. Gibson (wala), unang magtatambag; ug Adrián Ochoa (tuo), ikaduhang magtatambag.

Imahe
Young Men general presidency

Sa dili pa kamo mogradwar sa Primary, daghan kaninyo ang nakasag-ulo sa ikatrese nga artikulo sa hugot nga pagtuo ug unta makasag-ulo pa gihapon niini sa kinasingkasing. Niining tuiga isip kapangulohan kami naghagit kaninyo sa pagpadayon lapas pa sa simple nga pagsag-ulo ug tinuoray nga magkat-on kon unsay gipasabut ni Propeta Joseph Smith sa dihang siya miingon nga kami nagsunod sa tambag ni Pablo. Naghangyo kami kaninyo nga tun-an og maayo ang matag kinaiya nga gihisgutan diha sa ikatrese nga artikulo sa hugot nga pagtuo, ang tema sa Mutual niining tuiga. Kami nagdapit kaninyo sa pagbuhat sa unsay inyong nakat-unan. Ug kami nagdapit kaninyo nga ipakigbahin sa uban ang kalipay nga nahatag nganha sa inyong kinabuhi sa pagsunod niini nga mga sumbanan.

Kini nga sumbanan sa pamatasan sama ra sa usa nga inyong gigamit sa bag-o nga programa sa Katungdanan ngadto sa Dios: pagkat-on, pagbuhat, pagpakigbahin. Ang pagsunod niining tulo ka simple nga mga lakang motabang kaninyo nga mahimong usa ka matinud-anon nga lalaki nga adunay priesthood.

Ang ikatrese nga artikulo sa hugot nga pagtuo namahayag sa tinipik, “Kami nagtuo sa pagka matinuoron, pagkamatinud-anon, pagkaputli, pagkamanggiloloy-on, [ug] mahiyason” (empasis gidugang). Ang pagkakamo mas labaw pa kay sa giunsa ninyo sa pagbuhat—kini nagpasabut kon si kinsa kamo. Ang pagka matinuoron, pagkamatinud-anon, pagkaputli ug uban pa nakapahimo kaninyong lahi sa kasagaran nga batan-ong mga lalaki nga kaedad ninyo. Kon makita sa uban ang maayo nga mga kinaiya nga anaa kaninyo, gusto nila nga maangkon ang unsay anaa kaninyo. Samtang kamo magkat-on sa inyong mga katungdanan sa priesthood ug mobuhat niini, mausab kamo. Sa inyong paglakaw aron “pagbuhat sa matarung ngadto sa tanan nga mga tawo,” kamo mopanalangin ug mousab sa mga kinabuhi sa mga tawo.

Maayo nga mga Ehemplo

Si Ben usa ka maayo nga ehemplo mahitungod sa pagtabang sa uban ug usa ka panalangin sa ilang mga kinabuhi. Nangita siya sa mga tawo nga dili ingon ka sikat o wala mobati nga apil. Mas naghunahuna siya sa uban kay sa iyang kaugalingon. Sa dihang si Kelon mibalhin sa ward ni Ben, gihulagway ni Kelon ang iyang kinabuhi nga “walay pulos kondili lingaw-lingaw lang” nga mipaingon sa sayop nga direksyon. Gibati niya ang kahaw-ang. Apan tungod sa mga ehemplo sa iyang mga higala nga mga Santos sa Ulahing mga Adlaw ug ilabi na nianang iyang suod nga higala, si Ben, iyang nakita nga adunay mas maayo nga dalan. Si Ben midapit kang Kelon sa pag-apil sa mga kalihokan sa Simbahan. Niadto nga mga kalihokan namatikdan ni Kelon nga adunay butang nga lahi sa batan-ong mga lalaki didto. Gusto niya nga mahimong sama kanila. Dili siya sigurado kon unsa kadto, apan nasayud siya nga gusto niya kini. Gusto niya nga magmalipayon sama kanila.

Nag-ampo siya sa Dios ug nasayud nga gikinahanglan siya nga mopasakop sa Simbahan. Gibunyagan ni Ben ang iyang suod nga higala sa dihang nag-edad sila og 16. Si Kelon misulti mahitungod sa iyang bunyag, “Sa katapusan akong nakaplagan ang kalinaw, ug gibati nako ang mahigugmaong mga bukton sa Manluluwas sa akong pagkawas gikan sa bunyaganan. Nagpasalamat ko sa buotan nga mga higala kinsa nagsunod sa unsay ilang gituohan.”

Gahum sa Aaronic Priesthood

Ang Doktrina ug mga Pakigsaad 58:27–28 nag-ingon nga “ang mga tawo kinahanglan nga matinguhaon nga moapil diha sa usa ka maayo nga katuyoan,” mobuhat og “daghan nga mga butang diha sa ilang kaugalingon nga gawasnon nga kabubut-on” aron “magpahinabo sa daghan nga pagkamatarung; kay ang gahum anaa kanila.” Ang gahum anaa kaninyo. Gisalig nganha kaninyo ang gahum sa Aaronic Priesthood. Kami naghigugma kaninyo, ug kami nasayud nga makahimo kamo og mahinungdanon nga mga butang sa inyong pagkamatinud-anong lalaki nga adunay priesthood.