Ang Managsuong Babaye Kinahanglang Magbahinay
Sama sa kadaghanan sa mga managsuong babaye nga 18 ka bulan ang gintang, sila si Marilia ug Nicole P. sa Cuzco, Peru, adunay daghang pagkapareha. Silang duha ganahan og ceviche, usa ka tradisyonal nga pagkaon nga Peruvian nga hinimo sa isda nga gi-marinate sa lime o lemon juice. Silang duha miingon nga ang damgo ni Lehi mao ang ilang paboritong istorya sa kasulatan. Ug kon ang “How Great Thou Art” mao lang ang himno diha sa hymnbook, silang duha magmalipayon sa pagkanta niini og balik-balik.
Pagpakigbahin og usa ka Pagpamatuod sa Pag-ampo
Ang usa pa ka butang nga ilang gipakigbahin mao ang lig-ong pagpamatuod nga ang Langitnong Amahan motubag sa mga pag-ampo.
“Nasayud ko nga ang Simbahan tinuod kay kon ako mag-ampo, Siya motubag,” miingon si Nicole, nga 10 anyos. “Kon ako mangayo Kaniya og tabang, Siya motabang kanako.”
Si Nicole naghisgot og usa ka higayon sa dihang ang iyang higala nasakit pag-ayo ug ang mga doktor mihukom sa pagpadala kaniya ngadto sa ulohan nga siyudad sa Peru, ang Lima, sakay sa eroplano tungod kay dili sila kahibalo unsaon sa pagtambal kaniya. “Dili ko gusto nga moadto siya tungod kay siya ang akong labing suod nga higala,” miingon si Nicole. “Mihangyo ko sa Langitnong Amahan sa pagpanalangin kaniya. Iyang gidungog ang akong pag-ampo, ug siya naayo.”
Si Marilia, kinsa 11 anyos, miingon ang rason nganong siya ganahan kaayo sa istorya sa damgo ni Lehi mao nga sa dihang nakaplagan ni Lehi ang iyang kaugalingon nga nag-inusara sa kangitngit, siya nag-ampo “ug ang Ginoo mitubag.”
“Nasayud ko nga ang Simbahan tinuod tungod kay akong gibati kini sa akong kasingkasing kon ako mag-ampo,” siya miingon. “Ang Dios naminaw kanako, ug kon ako mohangyo og usa ka butang, Siya motubag.”
Lain pa nga rason nganong silang duha ganahan kaayo sa istorya sa kasulatan tungod kay sila si Nephi ug Sam nagmasulundon.
Pagbahinay sa mga Pagkalahi aron sa Pagtabang sa Pamilya
Alang sa tanan nilang mga pagkapareha, kining managsuong babaye aduna usab mga pagkalahi. Sa eskwelahan si Marilia ganahan og science, samtang si Nicole mas gusto ang math. Si Marilia ganahang mosayaw, mokanta, ug magbisikleta. Si Nicole malingaw og volleyball ug ganahan og mga hayop.
Si Marilia gusto kaayong magluto. Siya ganahang motan-aw og mga programa unsaon sa pagluto diha sa telebisyon. Si Nicole mogahin og panahon sa pagserbisyo sa uban, ug siya daling makapasaylo.
Ang mga batang babaye mogamit sa ilang kaugalingong mga kinaiya ug mga talento sa pagtabang sa ilang pamilya.
Sila si Marilia ug Nicole nagpuyo sa taas sa Andes Mountains uban sa ilang mama ug papa, duha ka manghod nga babaye, ug usa ka manghod nga lalaki. Ang gugma alang sa ilang pamilya mao ang usa sa labing importanting butang nga gipakigbahin niining duha ka managsuon. Ug sama sa gipakigbahin nila ni Nephi ug Sam usa ka tinguha nga magmasulundon ug pagtabang sa ilang pamilya, sila si Marilia ug Nicole naglaum nga ang ilang mga kapareha ug ilang pagkalahi mopanalangin sa ilang pamilya.
Ang mga Paborito ni Marilia
-
Paboritong pagkaon: Ceviche
-
Paboritong kasulatan: damgo ni Lehi (tan-awa sa 1 Nephi 8)
-
Paboritong Himno: “How Great Thou Art” (Hymns, nu. 86)
-
Paboritong subject sa eskwelahan: Science
-
Paboritong mga kalingawan: Kanta, sayaw, ug magbisikleta
Ang mga Paborito ni Nicole
-
Paboritong pagkaon: Ceviche
-
Paboritong kasulatan: damgo ni Lehi (tan-aw sa 1 Nephi 8)
-
Paboritong himno: “How Great Thou Art” (Hymns, nu. 86)
-
Paboritong subject sa eskwelahan: Math
-
Paboritong kalingawan: Volleyball
Mga 11,000 ka pye (3.4 km) ibabaw sa level sa dagat, ang Cuzco mao ang usa sa labing taas nga siyudad sa kalibutan. Ang siyudad may mga 900 na ka tuig, nakapahimo niining usa sa labing karaan nga siyudad sa Amerika.
Mga paghulagway pinaagi ni Denise Kirby; mga litrato pinaagi ni Adam C. Olson