Ang Iyang Grasya Paigo

Sama sa kadaghanang mga tawo, nanlimbasug ako pag-ayo sa akong kinabuhi aron sa pag-ila sa bili sa akong kaugalingon. Nakigbisog ako og bug-at nga mga problema sulod sa daghang mga tuig, nga nakatampo sa akong negatibong mga pagbati. Bisan tuod og miubos ang akong timbang ug nagpuyo og usa ka himsog nga pamaagi sa kinabuhi karon, usahay makita gihapon nako ang akong kaugalingon nga nakigbisog niadtong negatibong mga panghunahuna ug mga pagbati.

Usa ka buntag mibati ako nga nagmagul-anon kaayo ug naghunahuna kon unsaon nako nga mahimong mas maayo ang sitwasyon. Misugod ako sa pag-ampo ug nangayo og tabang sa Langitnong Amahan sa pagbuntog niining mga pagbati nga may kakulangan [inadequacy]. Samtang nag-ampo ko, ang mosunod nga kasulatan akong nahunahunaan: “Kon kamo walay paglaum kamo kinahanglan gayud mawad-an sa paglaum; ug ang kawalay paglaum moabut tungod sa kadautan” (Moroni 10:22).

Kadautan mora og ingon ka seryoso nga pulong, seryoso kaayo nga sa sinugdanan wala nako panumbalinga ang panghunahuna tungod kay wala akoy nahunahunaan nga seryosong sayop nga akong nabuhat. Apan, ang panghunahuna nagpadayon, busa nag-ampo ko, sama sa gisugo usab ni Moroni, kay ang Langitnong Amahan mopakita sa akong mga kahuyang aron ako mahimong malig-on (tan-awa sa Ether 12:27).

Nakaplagan nako ang akong kaugalingon nga naghinumdom og tulo ka insidente niadtong miaging duha ka adlaw sa dihang wala ko mopakita og pailub sa akong mga anak. Akong giuna ang akong kaugalingong gusto ug mga panginahanglan kaysa ilaha ug wala mobati og sensitibo sa ilang mga pagbati. Bati ang akong gibati ug mihukom sa pagbuhat og mas maayo. Nangayo ako og pasaylo sa akong mga anak ug nag-ampo alang sa kapasayloan. Sa dihang nag-ampo ko, ang akong mga gibati nga kakulangan nawala ug mibati na ko sa kalinaw nga mawala na unta kanako.

Ingon og usa ka kahayag ang nakalamdag sa akong hunahuna, sa katapusan akong nasabtan ang yanong konsepto nga sa laing bahin wala nako masabti niining tibuok katuigan. Kon ako adunay wala masulbad nga sala sa akong kinabuhi, bisan kini gamay lang, akong gihatagan og gahum si Satanas sa pag-impluwensya kanako. Siya nakahibalo sa akong mga kahuyang, ug siya nakahibalo unsa nga mga pulong ang “makakutaw kanako” ug “makadala kanako sa kalaglagan” (tan-awa sa D&P 10:22). Sa pagkatinuod, wala ko maglagot sa akong kaugalingon, apan si Satanas naglagot kanako ug mogamit sa tanang paagi nga anaa aron mapalayo ako sa kahayag.

Apan, kon ako maghinulsol, nagsalig ako sa gahum ni Jesukristo. Tungod kay Siya hingpit nga nasayud unsaon sa pagtabang kanako sa akong mga kahuyang (tan-awa sa Alma 7:11–12), ang Iyang gahum makapabayaw kanako ug makapalig-on kanako sa daghang paagi nga dili mahimo sa akong kaugalingon.

Bisan si Apostol Pablo, nga walay kahadlok sa pagsangyaw sa ebanghelyo, nag-antus sa mga kahuyang ug nagmagul-anon kaayo sa mga epekto niini ngadto kaniya. Bisan pa niana, sa dihang siya nag-ampo aron ang kahuyang mawala, ang Ginoo mitubag, “Ang akong grasya igo alang kanimo: kay ang akong gahum ginahingpit diha sa kahuyang.” Si Pablo nagpadayon sa pagtu-aw, “Sa ingon niana labi pang igakalipay ko diay hinoon ang pagpasigarbo tungod sa akong mga kahuyang, aron ang gahum ni Kristo magapandong kanako” (2 Mga Taga-Corinto 12:9).

Sa ingon, akong buhaton ang akong labing maayo sa paghinulsol ug pagsunod sa mga sugo aron ang “gahum ni Kristo magapandong kanako” ug ako mapuno uban sa kalinaw ug gugma.